Lukas 7
7
Yesus nen ap tentara mende inewe omanggi anduwanengge u pano kagakike wene
(Matius 8:5-13)
1At Yesus akoni dogalegat yomenogo wene esigit diluk taʼbokogonat arat yogisalok nen, o Kapernaum unggi wagike. 2Unggi wagike mende, etoma ap tentara inewe nggok anduwanengge endainggen kunik mende omanggi oba u mondok weyak nen, watlasusak negen welagike. 3Esigit diluk werekma, ap tentara mende etnogo nen Yesus abok kolkikesik nen, anduwanengge etnogo u pano kagasi wisuwagaluk, ap Yahudi mende inarluwendek yomenogo yogisalok nen,
“Yesus ayonggo lani o,” yiluk laʼbiyasike. 4-5Esigit diluk laʼbiyasikemo, it yomenogo Yesus oba wagukasik nen, inane obatnerogonat yogoko dogolik, men yisuka,
“At ap yi akoni nit mende ninaʼbuwa kigik, at nenat nit sembayan yiligogoma yomenogo o pal dinanggik, kagakikesikmo eti, anduwanengge mende u pano kagasi lausak o,” yiluk esigit diluk yogokukama nen, 6Yesus ebe inom laguka. Uma ungguwogoluk korok korok asi laguka kak, ap tentara inewe nggok etnogo nen agoromi yomenogo Yesus yogosi lowagaluk laʼbiya wagike. Laʼbiya wagikemo, it yomenogo Yesus oba wagukasik nen,
“Ninewe. Nit ninewe nen, Yesus iyok wirlikogo wisunogo. An ap elegeatma an naguma unggi wisusak erlok dek o. 7Nen, an nen at oba lausak yiluk ambigidegat. Erlok degat o. At te, aneat yumo nen, an nanduwanengge mende yi pano asigin o. 8An nen, neugi nggokndek mende inapma dogolik inane kolkik, nen an nagoromi tentara mende eti an napma dogolik an nane kolkik, kagarigogi mende nogo nen, an nen, at omanggi
Lan o, yiluk yogoko kalok liligogoat o. Nen, omanggi
Kat eme o, yiluk yogoko kalok, wirigogoat o. Nen, nanduwanengge omanggi,
Yi kagatno, yiluk yogoko kalok, kagarigogoat o yiluk, esigit diluk yekemo yokisuwagaluk laʼbinani wagama wago,” yiluk yogokuka. 9Yogokukama at Yesus nen,
“Ap eti nayuk o,” yiluk pogot atluk nen, elokonggen dagakogo akoni dogalegat inom laguka yomenogo men yogisasike,
“Iya! Ap eti endainggen eberogonat an noba panggot deke eti kak, it akoni Israel mende omanggi inendainggen esigit diluk panggot disinem iyiligogo dek mende, nayuk o,” yiluk yogisasike. 10Esigit diluk yogisasikemo, it yonggo waguka mende yomenogo inaguma laguka kak, at tentara inewe nggok anduwanengge mende etnogo arat pano agikesikmo inilenggen kasuka.
Yesus nen elege omanggi o Nain mende warek werekma ilugut disike wene
11Esigit diluk kagatluk nen, at Yesus etnogo o unggul endaga Nain etoma lagonem, at agoromi ane waganggo laguka mende yomenogo inom, akoni amberek yomenogo inom, mondok dogalegat omborlik laguka. 12Lago lagukasik, leget ʼbak leget kolagambe mbalek oba asi laguka kak, elege omanggi arligat endago mende agoya soge werekma watlagikemo nen, akoni o unggul etoma mende dogalegat, agoya etnogo inom elege warek etnogo o mberlagogo wolok duki wagonem 13ilenggen lagiyasike. Lagiyasikesik nen, ninewe Endaganggok etnogo nen, agoya etnogo ilenggen kalok aʼbuwa kasikesik nen,
“Niru o. De ako ʼbuk o,” yiluk yogokikesik nen, 14elege warek o mberlagogo wolok waguka etnogo eragalilu lagikesik nen, inggi pakasike. Esigit diluk pakasikemo akoni o mberlagogo wolok waguka mende yomenogo puk aguka. Puk agukama Yesus nen warek etnogo yogoko dogolik,
“Elege yi ra! Melasin yiluk yokigi o,” yiluk yogokikemo nen, 15elege watlagike mende etnogo iluk atluk melagikesik korek dogolik, ane yisike. Ane yisikemo Yesus nen elege etnogo agoya wogokike. 16Esigit diluk kagakikemo, akoni dogalek yomenogo inayuk agukasik nen, Allah mondok pogorako dogolik,
“Ap nggok Allah wene yoknisasi dogogin mende omanggi ninakla winam aga yi!” yiluk yisuka. Nen, it amberek nen,
“Allah nen aʼburi ndil ninabigiluk waga kigi,” yiluk yisukaat. 17Esigit diluk yisukama, Yesus abok o Yudea yi ai ndi ai etoma nen wikakogo, eragalilungge etoma mondok wolok dukisuka.
Yohanes ima wusa ʼbiyasi lagike mende etnogo nen agoromi Yesus oba laʼbiya wagike wene
(Matius 11:2-19)
18Abok wolok dukisukama nen, at Yohanes ane waganggo laguka mende yomenogo nen wene kagat lagike mende etnogo Yohanes yogokukama, at nen agoromi inebe mbere waisasikemo wagukama, 19men yogisasike, “Ap omanggi wisigin yisi laguka etnogo karat a? Ninat mende omanggi anggorlem dogogun a, yiluk yogosi lani o,” yiluk ninewe Endaganggok oba laʼbiya wagike. 20Laʼbiya wagikemo it ap yomenogo Yesus oba wagukasik nen,
“Ninewe. At Yohanes ima wusa ʼbiyiligogo mende etnogo nen, Ap omanggi wisigin etnogo karat a? ninat mende omanggi anggorlem dogogun a, yiluk oba kinok wagani lani, yiluk laʼbinani wagama wago,” yisuka. 21Esigit diluk yogosi wagukasik werekma etinem, at Yesus nen akoni u ebe weak mende inom, kenet mondok wako laguka mende inom, pano kagarinakik, kugi inobabut weyak mende inakla unggisukasik werekma nggigilogo wula ʼbiyigik, inilenggen mbuk mende pano asuwagaluk ʼbenggelogo kagarinakik, kagako lagikesik, 22Yohanes agoromi waguka mende yomenogo men yogisasike, “Kit nen, an yigit diluk ndigit diluk kagakonem kinilenggen niyigik, wene yisinem kinasuk kolkik, kagakep mende, Yohanes dikogo yogosi lano o. Inilenggen mbuk mende ʼbenggelogo pano agik, iniyok ut warek mende kolak lagik, inoba u konanggo negen inayuk mende werekma kagarinakonem pano agik, inasuk dogu mende kuwokogo kolkik, akoni warek mende inilugurinakik, it amberek inamende dek mende pano wene yanggul isigik, kagakonem kinilenggen niyegep etnogo dikogo yogosi lano o. 23Ta nen an nake endainggen mbere atluk togot danggidek dogogin kalok, akla arlenggen kasi dogogin o, yiluk yogosi lano,” yiluk yogisasike.
24Yogisasikemo, it Yohanes nen yonggo laʼbiya wagike mende yomenogo arat lagukama nen, yabunggane at Yesus nen akoni dogalegat yomenogo Yohanes abok men yogisasike,
“Kit nen, o limo akoni dekma etoma nena mende kinilenggen kuwogoluk lago lagap nogo? Isingga omanggi kwiyakne nen pul kasinem lagik-wagik kagako werekma ʼbika luwogoluk lago lagasip a? 25At te, nena mende kinilenggen kuwogoluk lago lagasip. Ap omanggi iyom pano mondok mende yugu werekma ka luwogoluk lago lagasip a? Lakani! Ap nggokndek inaguma dogolik kalogat iniyom pano mende yikik, inamende yi mende ndi mende dogalegat pano welagik, kagarigogi o! 26Eti paga, etoma nena mende kuwogoluk lago lagasip. Ap Allah wene yogisiligogo mende omanggi werekma ʼbika luwogoluk lago lagasip a? Eberogonat, etiat o. An nen yokisak. It ap Allah wene yogisasi laguka mende amberek welaguka mende, it eti erlok degat. Mende, at Yohanes etiat endaga nggok arat o. 27Wene Allah nen men yisike,
Kat yabunggane lanok nen yiluk, ap omanggi kat kagolak yaʼbagasi dogowagaluk ayonggo ʼbiluk alebagik laʼbigima o, (Mal. 3:1)
yiluk yisikemo kolal mbalogo ʼbisuka eti ebe at Yohanes pasigat yisike o. 28Nen, an nen wene omanggi yokisak. Akoni taʼbokogonat inagoya lak nen endaginabik waguka mendeat, inendaga dek arlek mende, at Yohanes eti endaga werek o. Mende, Allah apma ʼbiyiligogoma etoma, at Yohanes etnogo endaga dek negen werek nggorlek, it akoni amberek inendaga dek mende eti, inendaga nggok negen werek o,” yiluk yogisasike.
29Esigit diluk yogisasikemo, it akoni dogalegat yomenogo inom pemerintah inake uang nandorlogo ʼbiligogi mende yomenogo inomat Yohanes nen paganeat ima wusa ʼbiyasikemo yomenogo nen, inasuk kolkukasik,
“Allah akla nen ambiligogo eti mot mondogat o,” yiluk yisuka. 30Esigit diluk yisuka mende, it ap Farisi mende inom, it ap Allah nen ninasuk wakike wene etnogo inilu mende yomenogo inom, Yohanes nen ima wusa ʼbiyawagaluk lagidek dogolik, Allah nen esigit diluk kagako dogowagaluk ambasike mende etnogo inaʼit nen, togot diyalok welaguka. 31At Yesus nen wene omanggi yogisasi dogolik,
“Akoni yogondak werek ya paga, nggi mende oba lisogo yokisak. Nggi negen werek. 32It ap eti, yi inom ndak-ndak. Elegerlak pasar onggo waganigogoma korek dogolik inagarlagi inom wene laʼbigik-waʼbigik yisi dogolik,
Nit endai wasuwogoluk erlo wulako mende, kit nen siribi lagidegat. Nen, de asuwogoluk de erlo wulako mende, de akidegat, yiluk yiligogi etnogo kagat kagarigogi o.
33At Yohanes ima wusa ʼbiyiligogo mende wagike eti, kimbiri inom, o anggur enggen ambusu inom, ninggidek wagikesikmo nogo nen, kit nen,
Kugi obabut weyak mende akla unggekesik werek o, yiluk, yisi lagap. 34Mende, an abat endak lasi wagagi, kimbiri inom, anggur enggen ambusu inom, yugunat nilik wagagisikmo nen, kit nen,
Lakani! Kimbiri inom, enggen ambusu inom, ambe aʼbusuk weyak nasi dogolik, ap pemerintah inake uang nandorlogo ʼbiligogi mende inom, ap weyak kagarigogi mende inom, kundiluk liligogo yi kani, yiluk yoknoko lagap. 35Mende, at Allah akla nggagalek dogolik kagarigogo mende etnogo, it amberek nen pano ambalok, esigit diluk mot-mot kagako dogogun kalok, eti morat yiluk didugunat o,” yiluk yogisasike.
Kwe weyak kagarigogo mende omanggi nen ambusu obasi pano mende Yesus iyok oba wakike wene
36Esigit diluk yogisasikesik werekma, ap Farisi mende omanggi endaga Simon, Yesus imbisak kimbiri at aguma nuwogoluk ayonggo ʼbisike. Ayonggo ʼbisikemo, aguma unggiluk imbisak kimbiri nuwogoluk, korek lagike. 37Korek lagikesik kimbiri nasi werekma, kwe o unggul etoma mende weyak kagarigogo mende abok inilu mende omanggi akoni nen,
“Yesus o etila dogolik kimbiri niligogo,” yiluk yisukama asuk kolkikesik nen, ambusu obasi pano mende onggo nggogat mbalogo iyak nggit mende akla yukarlogo wolok wagike. 38Wolok wagikesik uma unggisikesik nen, Yesus iyok unggutmo etoma korok-korok wagikesik nen, mendek dogolik, dek ako lagike. De akonem il ambusu Yesus iyok oba wusasikemo nen, isi paga yabunggane kokike. Kokikesik iyok oba keyagi ambe sarluk wakikesik nen, ambusu obasi pano mende wolok wagike etnogo Yesus iyok oba wakike. 39Esigit diluk kagakonem, ap Farisi mende Yesus imbisak kimbiri nuwogoluk ayonggo ʼbisike mende etnogo nen akla ambasi dogolik,
“Ap yi Allah wene yogisiligogo mende dogolepma,
Kwe yi weyak kagarigogo mende nen kagat nake yiluk enggagat didilep o,” yiluk esigit diluk ambasinem, at Yesus nen,
40“Simon. An wene omanggi yokosigin,” yiuk yisikemo at nen,
“Newe. Yoknisin o,” yiluk yogokikemo, 41at Yesus nen,
“Ap inebe mbere mende ap omanggi uang elalma ake wogisasi lagike mende nen wogisasikemo auang inoba mbalek welagike. Omanggi uang nggok mende 500 ribu rupiah negen. Nen, omanggi 50 ribu rupiah negen inoba mbalek welaguka. 42Esigit diluk welaguka mende, it nen onggo wogosusak dek agikemo nen, uang wagangguka mende kolal mbalek etnogo at ap nggok etnogo nen serlelogo togot diyalok nen,
Werlegat korlegep o, yiluk, yogisasike. Esigit diluk kagakikemo, ap inebe mbere eranogo ta kak nen inewe nggok etnogo endainggen kunik agike ambegep?” yiluk yisikemo, 43at Simon nen,
“At ap omanggi uang dogalegat oba mbalegengge mendeat. Werlegat korlegen o, yiluk yogokike etnogo paga endainggen kunik agike,” yiluk yogokikemo, at Yesus nen
“Yegen eti arat o,” yisike. 44Esigit diluk yogokikesik nen, at Yesus nen, elokonggen mirlokogo kwe etnogo wogokikesik nen,
“Simon. Kwe yi kegen a? Dek a. An kat kaguma unggi wagi mende, kat nen,
Kiyok kosin yiluk, i omanggi wokneken dek. Mende, kwe yi nen, il ambusu niyok oba wusakesik nen, isi paga kotnake o. 45Nen, kat nen keyagi kambe sarluk watnaken degat o. Mende, kwe yi nenat, an unggi wagi kurli nen, niyok oba keyagi ambe sarluk watnako mondok werek o. 46Nen, kat nen an nunggul oba ambusu omanggi wat danggen dek mende, at kwe yi nen ambusu obasi pano mende niyok oba watnake o. 47Esigit diluk kagake eti, an nen kat omanggi yokisik o. At weyak dogalegat kagako laga mende, arat nggorogo deget digimo yiluk, nggokogo endainggen kunik kagatnake eti paga enggagat werek o. It weyak ʼbugurlagat kagarigogi mende nggorogo deget disinem, inendainggen kunik ʼbugurlagat negen arigogo mende o,” yiluk esigit diluk yogisasikesik nen, 48kwe etnogo yogoko dogolik,
“Weyak kagako lagan mende etnogo arat nggorogo deget digi o,” yiluk yogokike. 49Esigit diluk yogokikemo, it akoni Yesus inom korek dogolik kimbiri nasuka mende yomenogo, omanggi nen, omanggi yogisasi dogolik, men yisuka,
“Akoni weyak kagarigogi mende nggorogo deget diyiligogo yi ta ambegep,” yiluk yisi nggorlek, 50at Yesus nen, kwe etnogo yogoko dogolik,
“Kat kendainggen noba panggot degen eti paga ndilkaki o. Eti paga, kakla panorogo lan o,” yiluk yogokike.
હાલમાં પસંદ કરેલ:
Lukas 7: DNA
Highlight
શેર કરો
નકલ કરો
Want to have your highlights saved across all your devices? Sign up or sign in
