Ra Vei Hira Yarisula 2
2
NA SOPENA 2.
1Me na rani teaso tahonai me Atua suri na heliheli, ra Varisula tehuhurahi.
2Vileahi na rorona mopala na lahi tahajia, momalua taroroi me taroroi, momajuri me na masau, mosohoni motavere na pea tetisiheae.
3Tereni memera pala hapu, tetahajajalae, itea itoho mera vunuvunu;
4Na Talume Tapu motavere me na lolora, teaso nonoho pala na Talume Tapu movaraira.
5Ra Ju ra tahalotu me ra ureure vunuvunu me na ulu tetitoho me Jerusalem;
6Ihisa teroho na rorona, motavere tehuhurahi, temaherehere tahajia, suria ra tajua vunuvunu hire moroho ra Varisula teaso na loena.
7Teuloulo, tesiaso me na marohira: “Na sava? ra tajua teaso rotea te tajua hi Kalili?
8Paleve hije vunuvunu torohora me na loeja?
9Na valuja to-Partians, Mites, me Ilamaites; me valuja totitoho me Mesopatemia, me Jutia me Kappatosia, me Pontus hi Esia hi Romu, Vrijia,
10Pamvillia, Ijipt, me ra ureure hi Lipia taroroi me Sairine, valuja tomaraha me Romu, to-tajua ra Ju e hije to-Ju suria totahapereheja, valuja Kritans me Arepians.
11Maa topalahi torohora teaso na loeja suri ra sanu tahajia Atua movera.”
12Hire vanuvunu temarohira tahajia, teine. “Na sava?” teaso valuira.
13Maa na valura tepirivivi: “Teoomi tahajia na uain.”
14Tau Piter, ra Varisula havulatea na vana motea taitalia moaso pati, moaso me ra vau. “Tajua me Jutia,” movaere, “me amiu vunuvunu ototoho me Jerusalem,
15Avaraiamiu na sanu naa, otoroho na loeu. Mosataharahu vai otoninima ra
16Tajua naanoi temuha: mo-molimarapate na klok hasa. Aue, na sanu naa na provet Joel moaso nie—
17Momalua pa me na tahuna rani, Atua moaso, Arahu na Talumeu me ra tajua vunuvunu; ra matuja me ra puija te-provet pa, Ra uluo hije tenavuriorio pa Me ra varie hije tenavuriorio pa;
18Maa me ra tajua-tahavarao, suria tepilau, ra tajua me ra hajae mono, Hire te-provet pa;
19Apise pa na sanu uloulo me na masau neesahe, Me ra matamata me na ulu neesivo, Na jae, na hapu, na mariho hina asu;
20Na maso mopohipohitupu, Me na hapatia mohahara pala jae, Mine na rani hina Moli momalua, na rani tahajia, na rani hina ine.
21Me na rani natuha hire vunuvunu tematapisi me na hisei Moli tejolo pa.
22Ra tajua Israel, otorohoe. Inie Iesu hi Nasaret, na varao hina pile Atua meja, otopinisi suri na varao-hauhaua-tohova, suri ra sanu uloulo, suri ra mata-mata, ra sanu Atua ipiseja suria, palaia otopinisi.
23Inie, aaso, me na rio Atua moninima me mopinisia mine mine, inie amiu, valui na tuiturituara lolopohitupu, otovosaleetea ta na hau palatusi, me otolosia.
24Atua, maa, monunie me na hajihajina hina mate me moalorahai momauri, na mate mosapinisi hajiria tuitui.
25Motaharahu suria Tevit moaso-
Mine ra matau terareni Atua tuitui,
Suria moturi me na matuau sura aisamamahanu.
26Suria na lolou mo ejieji me na memeu movarai na sena ejieji;
Io, na epeu mono itoho tamautu, usu;
27Suria oisajura na talemeu me na Vonae hina Mate,
Oisarahu tuheau pilam tajua tapu sura aijano.
28Mine oipiseau na rio hina mauri,
Oiveau aitavere hi na ejieji me na vonam.
29Ra tuahau, apinisi varai amiu taharahu suri na tamaja Tevit, suria mo-mate me tejapovia, suria na moru hina nai motaroroi me amiu me na rani naa.
30Moaso, pala provet, mopinisi Atua moaso taharahu mea movei na matuna motea mo-moli,
31Tevit, moninima na rani imalua moaso suri na tamaraha hi Iesu, hisa moaso mosatoho me na Vonae hina Mate, na epena mosajano.
32Iesu naa, Atua movea momauri, me na sanu naa topinisia.
33Suria varihi moaurahae me na matuana havei Atua me mine molavi na rahuvuso hina Tata, na Talume Tapu, moliherea, palahi otorenia me otorohoe.
34Suria mo-sa-Tevit mosahe me na tailahi. Io, inie moaso Na Moli moaso me na varese hiu Oisahe me na matuana haveu,
35Me na rani aitaria ra hamvalu tepala na vala me na vavana em.
36Motahonai ra tajua Israel tepinisi susuhia, Atua movea Varese me Kristo, Iesu naa isei otoveimeteia me na hau palatusi,”
37Ihise ra tanoho terohoe, na lolora tesarira, teaso me ra valura Varisula: Tivei na sava, Tuahaja?
38Otojomia, Piter moaso liliu, me otosi-paptais me na hisei Iesu Kristo sura lavituhe na pilamiu veivasoosoo; tau otolavi pa na rahuvuso na Talume Tapu.
39Suria na rahutau ta me amiu me ra matumiu, mono me ra tajua vunuvunu toho paravu, isei na Moli Atua hija moorera.
40Me na valura rio ra tari Piter movarai ra sanu mopinisi susuhi, movile ra tanoho telavi na jolo me na rani oso.
41Natuha ra tajua teejieji, telavi na loena, tepaptais, me taroroi tairau vahatolu tetoni ra varisula me na rani natuha.
42Tuitui teroho ra sanu Ra Varisula tevaraira, teraurau na rahuvuso, me na tope Pret me ra matapisi mono.
43Na talumera vunuvunu teine me Ra Varisula tevei ra sanu uloulo me ra matamata ra tari.
44Ra tajua vunuvunu terohoroho me Iesu, teraurau hire vunuvunu,
45Me tevolivoli ra pilara tano me ra pilara sanu, teraurau palahi mosaite pilana.
46Me na rani vunuvunu mono tehuhurahi me na pea hina lotu, me na peara sura Tope Pret, tehani, teejieji, na lolora motea, tuitui teaso tahonai me Atua.
47Ra tajua vunuvunu teninima tetahonae. Tuitui Na Moli motoni hire ra tahajolo.
હાલમાં પસંદ કરેલ:
Ra Vei Hira Yarisula 2: TLM9109
Highlight
શેર કરો
નકલ કરો
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
