YOANO 2
2
1Keteke liatatu kua kala uvala ko Kana ko vo Galilea, kuenje ina ya Yesu haiko a kala. 2Yesu wa lalekiwavo kuvala kuenda olondonge viaye. 3Kuenje, eci ovinyu via pua, ina ya Yesu wa popia laye hati, Ka va kuete ovinyu. 4Yesu wo kumbulula hati, Okãi, o kuete nye lame? Ekumbi liange ka lieyile handi. 5Inaye wa popia lakuenje hati, Cosi a popia lene ci lingi. 6Ocipepi kua kala asanga epandu ovawe, omu va kapa kapa ovava va Yudea va liyelisa lao ndociholo cavo. Asanga aco a kala okuti esanga lesanga lia soka ndolongoleta vivali, pamue vitatu. 7Yesu wa popia lavo hati, Yukisi asanga ovava. Kuenje va a yukisa to. 8Yu wa pañinya hati, Kaliye suiko tumue. Ka tu tuali ku muẽleakulia. Oco va a tuala. 9Oco, eci muẽleakulia a maha ovava a linga ovinyu, kuenje ka kũlĩhile oko a tunda, akuenje va sua ovava puãi va ci kũlĩha, oco muẽleakulia wa pañinya sandombua. 10Wa popia laye hati, Omanu vosi va tangola tete ovinyu viwa, kuenje noke, eci okuti va nyua ale, oco va tangola evi viaño. Ove puãi, wa soleka ovinyu viwa toke cilo. 11Ocilimbu eci, oco ocilimbu ca tete ca Yesu, ca lingiwila ko Kana ko vo Galilea. Ca lekisa ulamba waye, kuenje olondonge viaye vio kolela.
12Eci ovina evi via pita, eye wa lokila ko Kafarinau kumue la inaye la vamanjaye kuenda olondonge viaye, kuenje va kalako oloneke vimue.
13O Pascoa ya va Yudea ya kala ocipepi, kuenje Yesu wa lamanela ko Yerusalãi. 14Vonembele wa sangamo omanu va landisa olongombe lolomeme kuenda olopomba. Vakuakutolokaisa olombongo lavovo, haimo va kala. 15Oco, oku iña osikote yolonjita, wa va tundisa vosi yavo vonembele, kumue lolomeme lolongombe. Wa pesela olombongo via vakuakutolokaisa, kuenje wa leñula olomesa viavo. 16Oco wa popia lava va landisa olopomba hati, Ovina evi, tundi lavio. Onjo ya Tate ko ka yi lingisi ocitanda. 17Olondonge viaye via ivaluka okuti ca sonehiwa citi, Ombili ñuetele onjo yove yi ndia. 18Oco va Yudea vo wasa ondaka vati, Ocilimbu ce o tu lekisa omo o linga ovina evi? 19Yesu wa va kumbulula, hati, Papululi onembele yilo, kuenje ndi yi katula koloneke vitatu. 20Oco va Yudea va popia vati, Onembele yilo ya kala loku tungiwa akui akuãla kanyamo kanyamo epandu, oco hẽ, ove o yi katula koloneke vitatu? 21Puãi eye wa tukula onembele yetimba liaye. 22Oco, eci a pinduiwa ku vakuavilangu, olondonge viaye via ivaluka okuti wa ci popia, kuenje va kolela ovisonehua lolondaka via tukula Yesu.
23Oco, eci a kala vo Yerusalai kofesta yo Pascoa, omanu va lua va kolela onduko yaye eci va mola ovilimbu a linga. 24Yesu puãi ka tavele oku likapa kokuavo, 25omo wa kũlĩha omanu vosi, kuenje ka sukilile okuti umue imbila omunu uvangi. Momo eye muẽle wa kũlĩha eci ci kasi vutima womunu.
હાલમાં પસંદ કરેલ:
YOANO 2: EMB63
Highlight
શેર કરો
નકલ કરો
Want to have your highlights saved across all your devices? Sign up or sign in
Umbundu Bible © United Bible Societies, 1963.
