YOANO 1
1
1Kefetikilo Ndaka wa kala ale, kuenje Ndaka wa kala kumue la Suku, Ndaka haeye Suku. 2Eye wa kala kumue la Suku kefetikilo. 3Ovina viosi via lulikiwa laye, nda haeyeko nda lacimue ca lulikiwa. 4Vokuaye mua kala omuenyo, kuenje omuenyo waco ocinyi comanu. 5Ocinyi ci tuila vowelema, kuenje owelema ka wa ci imile.
6Kua tukuluka omunu wa tumiwa la Suku, onduko yaye Yoano. 7Eye weyilila uvangi woku imbila Cinyi uvangi, okuti, eci va yeva uvangi waye, va kolela Cinyi. 8Yoano haeyeko Cinyi, puãi weyilila oku imbila Cinyi uvangi.
9Cinyi, haeye ocinyi cocili ci tuila omanu vosi, wa kala loku iya voluali. 10Wa kale voluali, hailuo lua lulikiwa laye, haimo oluali ka luo limbukile. 11Weya koliavo, kuenje omanu vaye ka vo tambuile. 12Puãi vosi vo tambula, kuenda va kolela onduko yaye, wa va iha omoko yoku linga omãla va Suku, 13ndokuti, vava ka va citiwile losonde pamue locipango cetimba, pamue locipango culume, puãi va citiwa la Suku.
14Oco Ndaka wa linga omunu, kuenje wa tunga pokati ketu, yu we yuka ocali locili. Tua mola ulamba waye. Ulamba waco ulamba wa Mõla wongunga wa Isia. 15Yoano wo wimbila uvangi, yu wa vilikiya hati, U, eye una nda tukula eci nda popia siti, U o ñuai wa mbelapo, momo eye wa livanga, ame nda siale konyima. 16Kuenje etu vosi tuopa keyuko liaye, ocali kocali. 17Momo ovihandeleko via eciwa la Mose, puãi ocali locili vieya la Yesu Kristu. 18Lomue wa la mola Suku. Omõla a Suku wongunga, u o kasi vonete ya Isia, eye wo situlula.
19Uvangi wa Yoano wowu: Va Yudea vo vo Yerusalãi va tuma ovitunda kuenda va Lewi oku u pula, vati, Ove elie? 20Kuenje eye wa kumbulula locili, ka kembele, wa popia muẽle locili, hati, Ame hameko Mesiya. 21Oco vo pula vali vati, Nda oco, mbi ove Eliya ale? Yu wa linga hati, Hameko. Vo pula vali vati, Ove uprofeto waco ale? Eye wa va kumbulula hati, Sio. 22Oco vo pula vati, Ove elie? Tu kumbulule okuti tu ka sapuila ava va tu tuma. Ove muẽle o lilombolola ndati? 23Eye wa kumbulula hati, Ame ndindaka yumue o vilikiya vekalasoko hati, Suñamisi onjila ya Ñala, ndeci ca popia uprofeto Isaya.
24Pokati kava va tumiwa pa kala va Fariseo vamue. 25Ovo vo pula vati, Oco hẽ, nda ku Kristuko, pamue Eliya, Pamue uprofeto waco, o papatisila nye? 26Yoano wa kumbulula hati, Ame mapatisa lovava. Puãi pokati kene pa tãi umue ka wo kũlĩhili. 27Kuenje ame, ndaño nda livanga okuti eye wa ñuama, haimo si sesamela oku kutulula olunjita luoluhaku luaye. 28Ovina evi via lingiwila vo Betánia, kesinya lia Yordão, oko Yoano a kala loku papatisila.
29Hẽla yaco Yoano wa mola Yesu wa kala loku iya kokuaye, kuenje wa popia hati, Kameme ka Suku, u upa akandu oluali, yo. 30U, Eye una nda tukula eci nda popia siti, Konyima yange kuiya umue wa mbelapo, momo eye wa livanga, ame ndo kuama. 31Kuenje ndaño ame muẽle, sio kũlĩhile. Puãi oco muẽle ndeyilila oku papatisa lovava okuti eye o situluiwa ku Isareli. 32Yoano wa imbavo uvangi hati, Nda mola Espiritu wa loka ndopomba, kuenje wo wila. 33Ame muẽle sio kũlĩhile, puãi, u wa numa oku papatisa lovava wa popia lame hati, U u moli okuti Espiritu u lokila kuenje u wila, eye o papataisa le Espiritu Sandu. 34Yu nda ci mola, kuenje nda imba uvangi okuti u, Omõla a Suku.
35Hẽla yaco Yoano wa talama lolondonge viaye vimue vivali. 36Wa vanja Yesu oko a ilila kuenje wa popia hati, Tali, Kameme ka Suku yo. 37Olondonge viaco vivali via yeva eci a popia, yu va kuama Yesu. 38Yesu, oku ñualapo, wa va mola ndomo vo kuãi, kuenje wa va pula hati, Vu sanda nye? Vo, kumbulula, vati, A Rambei,— ca lomboloka Olongisi,— o sikila pi? 39Eye wa popia lavo hati, Enjui, ndo tali. Oco veya, va mola oko a sikila, kuenje vosala laye eteke liaco, momo ca soka ale ndola yekui. 40Andereu, huva a Simono Petulu, eye umue polondonge vina vivali via yeva ondaka ya Yoano kuenje via kuama Yesu. 41Eye wa sanga tete manjaye Simono, yu wa popia laye hati, Tua sanga Mesiya, ca lomboloka, Kristu. 42Wo tuala ku Yesu. Yesu wo vanja, kuenje wa popia hati, Ove Simono, omõla a Yoano. O lukiwa Kefa, ca lomboloka, Petulu, pamue Ewe.
43Hẽla yaco Yesu wa enda ko Galilea. Wa sanga Filipu, kuenje wa popia laye hati, Ñuame. 44Filipu u Betesaita, imbo lia Andereu la Petulu. 45Filipu wa sanga Nataneli, kuenje wa popia laye hati, Tua sanga una Mose a tukula vovihandeleko, kuenda ovaprofeto vo tukulavo, okuti Yesu, omõla a Yosefe ukuimbo lia Nasara. 46Nataneli wo pula hati, Ko Nasara hẽ, ku tunda cimue ciwa? Filipu wo kumbulula hati, Enju, ndo tale. 47Yesu wa mola Nataneli o kasi loku iya kokuaye, kuenje wo vangula hati, O, u Isareli wocili. Vutima waye ka muli elimbi. 48Nataneli wo pula hati, Wa ñulĩha ndati? Yesu wo kumbulula hati, Osimbu Filipu ka ku kovongele, eci wa kala vemi liukuyu, nda ku mola. 49Nataneli wo kumbulula hati, A Rambei, vu Mõla a Suku, vu Soma ya Isareli. 50Yesu wo kumbulula hati, Omo nda popia love siti, Nda ku mola vemi liukuyu, oco wa kolelela? O mola ovina via velapo, evi vi sule. 51Kuenje Yesu wa popia laye hati, Mopia love, siti, Ocili, ocili, o mola ilu lia yuluka, kuenda ovangelo vamue va Suku va londa ku Mõlomanu, vakuavo va lokila kokuaye.
હાલમાં પસંદ કરેલ:
YOANO 1: EMB63
Highlight
શેર કરો
નકલ કરો
Want to have your highlights saved across all your devices? Sign up or sign in
Umbundu Bible © United Bible Societies, 1963.
