Mə́líkusu 8

Yə́susu a nɔ́ tukóló túnisə tɔ́ bɛndɔ lúkə́kə

(Mat 15.32-39)

1Buɔsɛ́ bɔ́mɔtɛ́ ilúkunə yɛ́ bɛndɔ yɛ́ ná manyɔ́ kɔtakana. Bátáyɛ́ bɛndɔ bá sa báá na bɔ́labɔ́nɛ́á, Yə́susu a ná báyɛ́á bɔkɔ́nɛna ɛ́lɛ́ákɛ́na, a sɛ́á: 2«Mɛɛ́lɔ yɛ́ ndɔ mɛaŋɔ́á wə́ə́ ɛlɔ́áyɛ́ báaba bɛndɔ bɔkɔasɛ́á, ɔ́ tunó tɔ́lálɔ́ tɔ́ɔtɔ, tɔ lɛa ilúkunə na bəə́bu. Bá lɛ bá tɔ́na na bɔ́labɔ́nɛ́á. 3Ábá mɛ ná niása bá ná úlúə́kə́ mɛtaná, ɛkasɛ bá sá kɔakɔna ɔ ɛnɔ́mɛ bɔkɔasɛ́á, bɔ́mɔtɛ́ bá ná húlə́kínə́ hata.» 4Báyɛ́á bɔkɔ́nɛna bá sɛ́á: «Hə́ní ɛkasɛ tɔ́ bɛbɛlɛ́tɛ bɔ́ŋɛ́ná háha ɔ bɔtɛ́á mbá tɔ́ báaba bɛndɔ lúkə́kə́ bəkimə, bá nɛ́áká, bá nibíə́kínə əə́?» 5Yə́susu a ná bəə́bu batá a sɛ́á: «Bɛbɛlɛ́tɛ bɛ́nɛ́á bɛ́ bənú lɛ́á əə́?» Bá sɛ́á: «Bɛ́lɛ́ndɔ́lɔ́mɔnɔ.» 6Nɔ́yɛ́, a ná bɛndɔ tuənə́kíníə́ ɔ misí. A ná bɛbɛlɛ́tɛ bɛ́lɛ́ndɔ́lɔ́mɔnɔ ɛtá, a ná Huɛlɛ́ mohóloniə índíə́, a ná bɛɛ́ta bísə́kə́níə́, a ná índíə́ ɔ bɔkɔ́nɛna ɔkɛaka ɔwá bá bɛndɔ afákɛ́ná. Bá ná bəə́bu afákɛ́ná. 7Bá ka báá tɔ́na na tɛ́tɛ́á yɛ tuɔfɔ́, Yə́susu a ná tuɔfɔ́ yɔ́mɛ́na, a ná báyɛ́á bɔkɔ́nɛna lɛ́na ɔwá bá bɛndɔ afákɛ́na. 8Bátáyɛ́ bɛndɔ bá ná nɛaka, bá ná nibíə́kínə. Bɔkɔ́nɛna bá ná bɛbɛ́sɛ́bɛsɛ kɔtáka ɔbɛ́á bɛ́ ná tíkə́nə́kə; bá ná úndúsíə́ mbíɔ́kɛ bɛkana bɛ́lɛ́ndɔ́lɔ́mɔnɔ. 9Bɛndɔ ɔbá bá ná báá ɔmɔ́tɔ́yɛ́, bá ka báá hoóyi na tukóló túnisə. Əlimə yɛ nɔ́yɛ́, Yə́susu a ná bəə́bu úlúə́sə́kíə́. 10Ɔ umisíúmə́, a ná fínə́ ɔ isóyí na báyɛ́á bɔkɔ́nɛna, a ná ákáná ɔ nɛkɛ́tɛ nɛ́ misí yɛ Talamanúta.

Bɛfalísia bá ndɔ Yə́susu hɛŋgɛtɛ́nɛ́á hɛ́ yələ́mənə bata

(Mat 16.1-4)

11Bɛfalísia bá ná ndáfámá, bá ná botólíə́ ɔ uwinyə́niə na Yə́susu, ɔkɛaka ɔwá bá wɛɛ́ya kɔsɔ́na, bá ná wɛɛ́ya batá ɔwá, a bəə́bu hɛŋgɛtɛ́nɛ́á hɛ́ yələ́mənə ínə́níə́ ɔhɛ́á hɛ́ ndɔ húlínə ɔ nɔɔ́mɛná. 12A ná fɔtálá mɔŋɛ́ŋa, a sɛ́á: «Ɛlɔ́áyɛ́ yatɛ́ bɛndɔ bá híihi hɛya bá ndɔ hɛŋgɛtɛ́nɛ́á hɛ́ yələ́mənə batɛna əə́? Ɔ taká, mɛ ndɔ bənú lɛna ɔwá, bɛndɔ bá híihi hɛya bá sɔ́ ŋɔ hɛŋgɛtɛ́nɛ́á hɛ́ yələ́mənə sinə ata hímotí.» 13Nɔ́yɛ́, a ná hɛ́kɛ́á na bəə́bu, a ná bálá ɔ isóyí, a ná ákáná ɔ yííní ɛsɛ́lɛ́.

Mətəkí má Bɛfalísia na má Əlóto

(Mat 16.5-12; Lúk 12.1)

14Bɔkɔ́nɛna bá ka fəliə ɔ bɛbɛlɛ́tɛ ɔwɛta, ɛmɔtɛ́ yɛ́ ná bəə́bu bá ɔ isóyí nuúmə́. 15Yə́susu a ná bəə́bu manɛ́na a sɛ́á: «Nɔ bɛ́tátáka! Nɔ́ bíkókósíə́ ɔ mətəkí má Bɛfalísia na má Əlóto.» 16Bɔkɔ́nɛna bá ná botólíə́ ɔ ɔlaa bəə́bu na bəə́bu bá sɛ́á: «A ndɔ hɔ́ɔ́ nɔ́yɛ́ bɔkɔasɛ́á tɔ lɛ báá na bɛbɛlɛ́tɛ.» 17Yə́susu a ná mányá nɔ́yɛ́, a sɛ́á: «Ɛlɔ́áyɛ́ yatɛ́ nɔ ndɔ hɔ́ɔ́ nɔ́yɛ́ bɔkɔasɛ́á tɔ lɛ báá na bɛbɛlɛ́tɛ əə́? Nɔ lɛ ndɔ ɔ́kɔ muɛsɛ, nɔ lɛ ndɔ manya; nɔ báka na mɛlɛ́má natákátɔ́ əə́? 18Nɔ báka na məə́sə, nɔ lɛ ndɔ sinənə əə́? Nɔ báka na məlúə́, nɔ lɛ ndɔ ɔ́kɔ́nɔ əə́? 19Bɛbɛlɛ́tɛ bɛ́lánɔ ɔbɛ́á mɛ ná bísə́kə́níə́ ɔ busíə́ bɔ́ tukóló tɔ́lánɔ tɔ́ bɛndɔ, bɛkana bɛ́nɛ́á bɛ́ ná úndúə́kə ɔ bɛbɛ́sɛ́bɛsɛ ɔbɛ́á nɔ ná kɔ́táka əə́?» Bá sɛ́á: «Niómo na bɛ́fandɛ́.» 20A sɛ́á: «Ikúílí ɔyɛ́á mɛ ná bɛbɛlɛ́tɛ bɛ́lɛ́ndɔ́lɔ́mɔnɔ bísə́kə́níə́ ɔ busíə́ bɔ́ tukóló túnisə tɔ́ bɛndɔ, bɛkana bɛ́nɛ́á nɔ́ ná kɔ́táká na bɛbɛ́sɛ ɔbɛ́á bɛ́ ná tíkə́nə́kə əə́?» Bá sɛ́á: «Bɛ́lɛ́ndɔ́lɔ́mɔnɔ.» 21A sɛ́á: «Nɔ nana ɔ́kɔ́ əə́?»

Yə́susu a nɔ́ mundímə́ndímə niŋəsiə

22Yə́susu na báyɛ́á bɔkɔ́nɛna bá ná káfámá ɔ Bɛtɛsayíta; bá ná wɛɛ́ya mundímə́ndímə húlə́ninə, bá ná wɛɛ́ya bɛ́tɔ́kɔ́lɛ́na ɔwá a wɛɛ́ya itíə́lə. 23Ɛnaka á mundímə́ndímə itíə́ ɔ mɔkátá, a ná wɛɛ́ya fámána ɔ bɔnɔŋɔ. A ná malá tɛláka ɔ ɔwayɛ́ məə́sə, a ná wɛɛ́ya makátá talɛna, a ná wɛɛ́ya batá a sɛ́á: «Ɔ ndɔ bɔkɔa sinə əə́?»

24Ɛnaka a məə́sə úbúnə́, a sɛ́á: «Mɛ ndɔ bɛndɔ sinə, mɛ ndɔ bəə́bu sinə ɛ́sɛ́á malɛ́á, mba, bá ndɔ kɛnda.» 25Yə́susu a ná manyɔ́ makátá tála ɔ məə́sə, mɔndɔ a ná botólíə́ ɔ usinənə muɛsɛ; a ka niŋə, a siəkinə bikimə naŋátɔ. 26Yə́susu a ná wɛɛ́ya tilə́síə́ ɔ ɔwayɛ́ ɔmbɛ́la a sɛ́á: «Ɔ lɛ fínə́ ata ɔ bɔnɔŋɔ.»

Bíə́lə a sɛ́á Yə́susu a lɛa Mɛ́sia

(Mat 16.13-23; Lúk 9.18-21)

27Yə́susu a ná ákáná na báyɛ́á bɔkɔ́nɛna ɔ mɔnɔŋɔ má ɛmɛ́ŋɛ́ ɔ Sɛsalɛ́ na Filíbo. Ɔ ɛnɔ́mɛ, a ná bəə́bu bata a sɛ́á: «Ɔ nɛlaka nɛ́ bɛndɔ, mɛaŋɔ́á ɛ́yánɛ́ əə́?» 28Bá ná wɛɛ́ya lɛ́na bá sɛ́á: «Bɔ́mɔtɛ́ bɛndɔ bá sɛ́á aŋɔ́á Yɔhánɛsɛ Mɔsɔabɛndɔ, bɔ́mɔtɛ́ bá sɛ́á aŋɔ́á Ɛlíásɛ, bɔ́mɔtɛ́ tɔ́na bá sɛ́á aŋɔ́á wɔmɔtɛ́ Mɔhɛ́nátɔtányɛ́.»

29Yə́susu a ná bəə́bu batá a sɛ́á: «Mba uwənú, nɔ sɛ́á mɛaŋɔ́á ɛ́yánɛ́ əə́?» Bíə́lə a sɛ́á: «Aŋɔá ɔ lɛ́á Mɛ́sia.» 30Nɔ́yɛ́, Yə́susu a ná bəə́bu manɛ́ná ɔwá bá lɛ bɔ́táyɛ́ bɔkɔa lɛɛ́na ata mɔndɔ.

Yə́susu a ndɔ yayɛ́á ɛmɔ́kɛ́ na nɛ́áyɛ́á nɛhɔŋɔa nɔŋɔna

(Mat 16.21-23; Lúk 9.22-27)

31Əlimə yɛ nɔ́yɛ́, Yə́susu a ná botólíə́ ɔ uwəbú uwukúniə, a sɛ́á: «Yɛ́ ná hɔ́ánána ɔwá, Mɔná wa mɔndɔ á məsə́kə ɔkɔ́kɛ́ná mɔŋɛ́ŋa; bisə́lúkú bɛ́ Bɛyútɛnɛ, bisə́lúkú bɛ́ bətitiəmahánɛna na bamanyumbə́ndə́ bəkimə bá ŋɔ wɛɛ́ya bɛ́sáŋɔ́na, ɔwá a lɛ bá hɔ́ánánátɔ́ ɔ ɔnɔmɔ, bá wɛɛ́ya ɔnɔkɔ, mba, ɔ tunó tɔ́lálɔ́, a ŋɔ hɔŋɔa.» 32A ka bá a ndɔ bəə́bu bɛ́táyɛ́ bɛkɔa lɛna ɔ mianyɔ́. Bíə́lə a ná wɛɛ́ya bísúə́línə ɔ ɛmɛ́ŋɛ́, a ná botólíə́ ɔ ɔwayɛ́ ɔsɔ́kɔ́nɛna na bɛtambá. 33Nɔ́yɛ́, Yə́susu a ná bɛkɔŋɔna, a ná báyɛ́á bɔkɔ́nɛna siəlínə, a ná Bíə́lə bámálɛ́na a sɛ́á: «Hɔalɛ́na ɔ ɔwámɛ busíə́ á Sátana! Máwɔ́á mabɛ́kɔ́lɔmɔna má lɛ báá má Huɛlɛ́, mba, má bɛndɔ.»

Nəníə́ tɔ́ ná hɔ́ánána á Yə́susu ɔwɔŋgɔ

34A ná bilúkunə na báyɛ́á bɔkɔ́nɛna ɛ́lɛ́ákɛ́na, a sɛ́á: «Ábá mɔndɔ a ndɔ siə ɔ ɔwámɛ ɔwɔŋgɔ, á bɛ́sáŋɔ́ná wɛɛ́ya bɛ́múɛ́tɛ́, á wə́yíə́ ɔmbásá túáná, á mɛaŋɔ́á ɔ́ŋgɔ́kɔ. 35Yɛ́ lɛa ɔwá, ábá mɔndɔ a ndɔ hikiə ɔ bɔ́áyɛ́á buɔmɔ́ usuŋəniə, a ŋɔ bɔɛ́ta nímə́siə; mɔndɔ mukimə ɔwá a ŋɔ bɔ́áyɛ́á buɔmɔ́ nímə́siə ɛlɔ́áyɛ́ ámɛ na ɛlɔ́áyɛ́ Imbə́nú Yɛɛsɛ, a ŋɔ bá na buɔmɔ́ bɔ́ ikúílíə́kimə. 36Yatɛ́ mɔsɛ́ŋɛ́ mɔndɔ a ndɔ kusənə ɛlɔ́áyɛ́ nɛbɔ́ŋɔ nɛ́ misí mikimə ukusənə mbá a ná bɔ́áyɛ́á buɔmɔ́ nímə́síə́ əə́? 37Yatɛ́ mɔndɔ a óso uwíndiə ɔkɛaka ɔwá a bɔ́áyɛ́á buɔmɔ́ háŋɔ́ná əə́? 38Ábá mɔndɔ a ndɔ ɛsɛ́má ɔ́kɔ ɛlɔ́áyɛ́ ámɛ na bɛ́ámɛ́á bɛtambá ɔ ətíə́ yɛ́ bɛndɔ bá yɛ́ɛyɛ ɛnyɔŋɔnɔ, Mɔná wa mɔndɔ a ŋɔ bá na ɛsɛ́má ɛ́lɔ́áyɛ́ ayɛ́ ikúílí ɔyɛ́á a ŋɔ ndahíáná na tuúmə tɔ́ yayɛ́á isə́ iŋgində́ na Bɛáŋgɛlɛ bɛnaŋanaŋa.»

હાલમાં પસંદ કરેલ:

Mə́líkusu 8: tvu

Highlight

શેર કરો

નકલ કરો