Kuyamba 14
14
Abhuramu an'thandiza Loti
1Muntsiku za Amurafeli mambo wa Shinari na Ariyoki wa Erasa na Kedhorilaomeri wa Elamu na Tidhali wa Goyimu, 2mazimambo yamweya yadachita nkhondo namazimambo aya yaniti, Bhera mambo wa Sodhomu na Bhirisha mambo wa Gomora na Shinabhi mambo wa Adhima na Shemebheri mambo wa Zebhoyimu namambo waku Bhela iyo ikhachemelewa pomwe kuti Zoari. 3Awa adaphatana muchigowa cha Sidhimu, icho chikhachemelewa kuti Nyanja ya Munyu. 4Wanthu amwewo adatongewa namambo Kedhorilaomeri kwamagole khumi namawili, koma mugole lakhumi natatu adampandukila. 5Mugole lakhumi nanayi Kedhorilaomeri namazimambo yaadaphatana nayo adakunda Refayimu mu Ashiteroti-karinayimu naa Zuzimu mu Hamu nawanthu wachi Emimu mu Shavekiriatayimu, 6naa Hori muphili la Seira, mpaka ku Eriparani kukhamalila chipululu. 7Adazabwelela nkuyenda ku Enimishapati, iyo in'chemelewa pomwe kuti Kadheshi. Adakunda dziko lentse laa Amaleki naa Amori akhakhala mudziko la Hazazonitamari.
8Nakutenepo mambo wa Sodhomu, namambo wa Gomora, namambo wa Adhima, namambo wa Zebhoyimu nawa Bhela, iyo ikhachemelewa pomwe kuti Zoari, adaphatana munkhondo muchigowa cha Sidhimu, 9na Kedhorilaomere mambo wa Elamu na Tidhari mambo wa Goyimu na Amurafeli mambo wa Shinari na Ariyoki mambo wa Elasari Bhabhiloni na Ariyoki wa Elasari. Mazimambo mashanuyo yadamenyana namazimambo manayi. 10Tsapano muchigowa cha Sidhimu chikhana madindi mazinji yathala. Mazimambo yaku Sodhomu na Gomora paakhathawa anango wawo adagwelamo, anango wentse adathawila kumapili. 11Nakutenepo azondi adapamba chuma chentse chamu Sodhomu namu Gomora, nachakudya chawo chentse achiyenda nacho. 12Adatakulambo Loti mwana wam'bale wa Abhuramu uyo akhakhala mu Sodhomu nabzombo bzake, iwo nkuyenda.
13Koma m'bodzi adathawa adabwela, adakawuza Abhuramu mu Hebheru, uyo akhakhala chakumaoki ya Mamure mu Amori, m'bale wa Eshikoli na Aneri, awa akhali shamwali za Abhuramu. 14Abhuramu paadabva kuti m'bale wake Loti adapambiwa, adakocheza anyabezi, awo adabaliwa munyumba mwake, wentse pabodzi akhali mazana matatu nakhumi nasele (318), adateyela mazimambo manayiyo mpaka ku Dhani. 15Abhuramu usiku umwewo adapatula wamphamvu wake mubzipani, iye naalanda wake, adaamenya achiwateyela mpaka pa Hobha chakudzulu kwa Dhamasiko. 16Abhuramu adatakula bzinthu bzentse, adabweza m'bale wake Loti nabzinthu bzake, naakazi nawanthu wentse.
Merekizedheki an'dalisa Abhuramu
17Abhuramu padabwelela kuchoka kunkhondo kwaadakunda Khedhorilaomeri namazimambo yaakhanayo, mambo waku Sodhomu adamuchungula pachigowa cha Shave, icho chikhachemelewa pomwe kuti chigowa chamambo. 18#Ahe 7:1–10Merekizedheki mambo wa Salemu, uyo adampasa zingwa navinyu, akhali nyantsembe wa Mulungu Nyakudzulu-dzulu. 19Iye adamudalisa adati,
“Ngaadalisiwe Abhuramu na Mulungu Nyakudzulu-dzulu,
nyakukonza dzulu napantsi;
20Ngaadalisiwe Mulungu Nyakudzulu-dzulu,
uyo adayikha azondi wanu m'manja mwanu!”
Pamwepo Abhuramu adapeleka chakhumi kuchoka pabzinthu bzake bzentse.
21Mambo wa Sodhomu adati kwa Abhuramu, “Tola bzentse bzawudapamba, koma ubweze wanthu wangu.”
22Abhuramu adati kwamambo wa Sodhomu, “Ndidalumbila kwa Chawuta Mulungu Nyakudzulu-dzulu, nyakukonza dzulu napantsi, 23kuti ndileke kutakula usalu panango shango panango chinthu chako chentse, pakuti ungazati, ‘Ndine ndidakhupusa Abhuramu.’ 24Palibe ne chibodzi chanin'zatakula, koma bzidadyewa nawanthu wachilumbwana, nampagalo waawo wandidayenda nawo, lekani Aneri na Eshikoli na Mamure atole mpagalo wawo.”
હાલમાં પસંદ કરેલ:
Kuyamba 14: KUNDA
Highlight
શેર કરો
નકલ કરો
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe