Kuyamba 12
12
Abhuramu an'chemelewa na Mulungu
1 #
Mab 7:2,3; Ahe 11:8 Chawuta adati kwa Abhuramu, “Choka mudziko lako, pakati paabale wako, uchoke panyumba yaapayi wako, uyende kudziko landichakuwonesa. 2Nin'zakuchita nshowo ukulu, pomwe nin'zakudalisa, nin'zachita kuti dzina lako likhale nambili, nakutenepo iwe un'zakhala daliso.
3 #
Aga 3:8
Nin'zadalisa ankudalisa,
Nin'zatembelela ankutembelela.
Mabanja yentse yapadziko yan'zakhala yakudalisiwa thangwe layiwe.”
4Nakutenepo Abhuramu adayenda, ninga kuwuziwa kwaakhadachitiwa na Chawuta, adayenda pabodzi na Loti, Abhuramu paadachoka mu Harani akhana magole makumi manomwe nashanu (75). 5Abhuramu adatola nkazi wake Sarayi na Loti mwana wam'bale wake, nachuma chake chentse chaakhanacho, naalanda waadawona mu Harani nkuyenda ku Kenani.
Paadafika mu Kenani, 6Abhuramu adapita namudziko m'mwemo achikakhala ku Shekemu pamuti ukulu wamuoki waku More. Nthawe imweyo a Kenani akhali mudziko limwelo. 7#Mab 7:5; Aga 3:16Chawuta adabziwonesa kwa Abhuramu, adati kwayiye, “Dziko limweli ndichalipeleka kum'badwe wako.” Nakutenepo Abhuramu adamangila mbuto yakupelekela ntsembe Chawuta uyo adambabziwonesa kwayiye. 8Adachoka pamwepo nkuyenda kuphili, chakumabveladzuwa kwaguta la Bheteli, kwaadakazika matenti yake. Bheteli likhali chakumadokelo, guta la Ayi likhali chakumabveladzuwa. Kumweko Adamangila Chawuta mbuto yakupelekela ntsembe, adachemela dzina la Chawuta. 9Abhuramu adapitiliza ulendo wake mpaka adafika ku Negebhu.
Abhuramu mudziko la Ijipiti
10Tsapano mudziko la Kenani mudagwa njala. Nakutenepo Abhuramu adayenda kakhala ku Ijipiti, pakuti njala ikhadakula mudziko. 11Paakhali pafupi kufika mu Ijipiti, iye adati kwankazi wake Sarayi, “Pakuti iwe ndiwe nkazi wabwino kwene-kwe, 12a Ijipiti akakuwona, iwo ankati, ‘Uyu ninkazi wake,’ ankandipha iwe achikusiya uli wamoyo. 13#Kuya 20:2; 26:7Tsapano iwe ukaawuze kuti ndiwe nana wangu, ukatenepo iwo ankandipha lini, ankandichitila bwino thangwe layiwe.” 14Abhuramu paadapita mu Ijipiti, wanthu wamu Ijipiti adawona kuti nkaziyo akhali wabwino. 15Manduna yamambo Farawo paadamuwona, adadumbiza kwamambo Farawo kukoma nkhope kwaakhadachita. Nakutenepo Sarayi adazatolewa achiyendesewa kunyumba kwa mambo Farawo. 16Tsapano Farawo adazaphata bwino Abhuramu nathangwe la Sarayi, adampasa mabila nambuzi nang'ombe namadhonki yaamuna naalanda wachimuna naalanda wachikazi nangamela.
17Koma Chawuta adayikha mulili kwa Farawo nawamunyumba mwake, nathangwe la Sarayi nkazi wa Abhuramu. 18Nakutenepo Farawo adazachemelesa Abhuramu, nkuti kwayiye, “Nchinyi chawachita kwayine? Thangwe lanyi ulibe kundiwuza kuti ninkazi wako? 19Thangwe lanyi udati, ‘Ninana wako,’ nakutenepo ndidamutakula kuti akhale nkazi wangu? Tsapano, takula nkazi wako uyende naye!” 20Farawo adawuza wanthu kuti achose Abhuramu nankazi wake mudziko limwelo, nabzinthu bzake bzentse bzaakhanabzo.
હાલમાં પસંદ કરેલ:
Kuyamba 12: KUNDA
Highlight
શેર કરો
નકલ કરો
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe