Yoana 8
8
Omugasi unu agwatirwe naromerwa
1(Nibagenda mu:nu wo:ne ika ewae. Nawe Yesu nagenda ku ci:ma ce Mijeituni. 2Namweja mu ruguru na:ja rindi mu yekaru, aba:nu bo:ne nibamutako. Nenyanja nabe:igisya. 3Abandiki na Bafarisayo nibare:ta omugasi unu bagwatire mu buromerwa, nibamutu:ra aagati. 4Niba:ika ati, Omwiigisya, omugasi unu bamugwata mu buromerwa. 5Mbe mu biragiro Musa aciragiriye okubarasira mabui abe:ja:bo abo. ?Awe mbe oumwaika kutiki? 6Ba:ikire kutyo nibamusaka, korereki babe no musango gwo kumubu:ra. Nawe Yesu ne:nama, nandika a:si ne ca:ra. 7Nawe wejire beyongesya okumubu:sya, ne:gorora nababwira ati, Unu acariga kukayako ambe okumurasa ribui. 8Nasuba okwinama, nandika ne ca:ra a:si. 9Abene wejire bongwa emitima jebwe nijibabu:ra nibauruka umwiumwi, abakaruka nibo batangatire kukinga ku ba ku bute:ro. Yesu nasigarao enyere era, no Mugasi uyo ariga:ri aagati. 10Yesu ne:gorora namubu:sya ati, Mugasi awe, ?bari a:ki banu bagwekubu:ra? ?Atariwo unu akuramura? 11Omwene na:ika ati, Atariwo mu:nu, Ratabugenyi. Yesu na:ika ati, Anye one nitakukuramura. Genda, okwambira rero utarisuba kukaya rindi.)
Yesu obweru bwe ca:ro
(Yo. 1:9; Mt. 5:14)
12Mbe Yesu na:ika nabo rindi, na:ika ati, Nanye obweru bwe ca:ro. Unu kandu:ba ataribatirega mu cisu:te, nawe arabaga no bweru bwo buanga. 13Mbe Abafarisayo nibamubwira ati, Awe owiimako omwene era. Okwimako kwao kutari kwa cimari. 14Yesu naindura nababwira ati, Nakabee nire:imako omwene era, okwiimako kwani ni kwa cimari, kwo kuba nimenyere enu naso:kere, ne:nu enija. Nawe emwe mutakumenya enu eniso:ka nakabee enu enija. 15Emwe omuramura rwa ba:nuba:nu, anye nitakuramura mu:nu. 16Nakabee anye niraramura, okuramura kwani ni kwa cimari, okuba anye nitari nenyere, nawe anye na Rata unu antumire. 17Na mu biragiro byemwe byandikirwe ati, Okwaika kwa ba:nu babiri ni kwa cimari. 18Anye eniimako omwene, na Rata unu antumire kanyimako. 19Mbe nibamubu:sya ati, ?Esomwana ari a:ki? Yesu naindura ati, Anye mutamenyere, nakabee ari Rata mutamumenyere. Mwakabee mumenyere anye, mwakamumenyere Rata one. 20Emisango jinu aja:ikiye mwibikiro anu ariga ne:igisya mu yekaru. Amwi atario unu amugwatire, okuba omwanya gwae gwariga gucari kwiya.
21Mbe nababwira rindi ati, Anye enigenda, nemwe murinyenja, nimufwira mu bibi:bi byemwe. Anye enu enigenda, emwe mutakutura kuja:yo. 22Mbe Abayaudi niba:ika ati, ?Kajo:kwiita, okuba ka:ika ati, Anye enu enigenda, emwe mutakutura kuja:yo? 23Nababwira ati, Emwe muri be mwaro, anye ndi wa inguru. Emwe muri ba mu:si munu, anye nitari wa mu:si munu. 24Kwonakora nimbabwira ati, Murifwira mu bibi:bi byemwe. Okuba mukarema okwikirisya ati, nanye Oyo, murifwira mu bibi:bi byemwe. 25Mbe nibamubu:sya ati, ?Nawe:ga? Yesu nababwira ati, Rwa kutyo nababwiraga kuso:ka ku bwambiro. 26Ndina byafu ebyo kubabwirako no kuramura, nawe unu antumire niwe owe cimari, nanye binu namunguyweko, nibyo ena:ika mu ca:ro. 27Batamenyere ati, ababwira ebya Rata. 28Mbe Yesu nababwira ati, Ariba mwamara okuyanika Omwana wo mu:nu, niwo murimenya ati, nanye Oyo, amwi anye nitana cinu enikora kubwani era, nawe rwa kutyo Rata anyiigisisye, nikwo kutyo ena:ika. 29Na unu antumire ari aamwi nanye. Rata acariga kunsiga nenyere, okuba enikora kusiku binu bimukondee. 30Wejire a:ika emisango ejo, ba:nu ba:fu nibamwikirisya.
31Mbe Yesu nababwira Abayaudi banu bamwikirisisye ati, Mukaguma mu misango jani, muriba be:igisibwa bani cimari. 32Na murimenya eje cimari, ne je cimari jiribakora be:bure.#Abe:bure ni ba:nu batari bagaya. 33Nibaindura ati, Eswe riri rwiburo rwa Iburaimu, cicariga kuba bagaya ba mu:nu wo:ne. ?Owaika kutiki ati, muriba be:bure?
34Yesu nabaindura ati, Ni cimari cimari enibabwira ati, Unu wo:ne kakora ebibi:bi, niwe omugaya we bibi:bi. 35Omugaya atakwikara mu nyumba kajambo, nawe Omwana ke:kara kajambo. 36Mbe Omwana ariba abakora be:bure muriba be:bure cimari. 37Nimenyere ati, muri rwiburo rwa Iburaimu, nawe omuyenja obwenge bwo kunyita, okuba omusango gwani gutakwiyagara mwimwe. 38Anye ena:ika binu narorere ku Rata. Mbe nemwe omukora binu mwonguywe kwisomwana.
39Nibaindura nibamubwira ati, Iburaimu niwe rata. Yesu nababwira ati, Kumba mwariri ba:na ba Iburaimu, mwakakorere ebikorwa bya Iburaimu. 40Nawe woryanu omuyenja obwenge bwo kunyita anye unu ndi mu:nu unu ababwiriye ebye cimari binu nonguywe ku Nyamuanga. Iburaimu atakorere kutyo. 41Emwe omukora emirimu ja esomwana. Nibamubwira ati, Eswe citari ba:na be mwira. Cirina Rata umwi niwe Nyamuanga. 42Yesu nababwira ati, Kumba Nyamuanga ni:somwana, mwakanyendere anye, okuba naso:kere ku Nyamuanga nini:ja. Amwi nite:jire kubwani omwene era, nawe Oyo niwe antumire. 43?Niki cinu ecibaingirira okumenya inyaika yani? Kwo kuba mutakutura kungwa omusango gwani. 44Emwe muri ba:na be:somwana niwe Syetani, ka omwenda okukora okurigira kwesomwana. Oyo ni mwiti kuso:ka ku bwambiro, ka atakwikara mu bye cimari, okuba ebye cimari bitamurimo. Wora a:ika ebyo rurimi, ka:ika cinu eciso:ka mu byae, kwo kuba ni wa rurimi, na ka nesemwene orurimi. 45Nawe okuba anye ena:ika ebye cimari, mutakunyikirisya. 46?Niga kwimwe unu katura okunkomeresya eribi:bi? ?Nika:ika ebye cimari niki cinu ecibaganya okunyikirisya? 47Owa Nyamuanga kongwa emisango ja Nyamuanga. Emwe nikwo omukora nimurema okungwa, okuba mutari ba Nyamuanga. 48Abayaudi nibaindura nibamubwira ati, ?Eswe citakwaika kisi ati, Awe uri Musamaria, na ka uri no musambwa? 49Yesu naindura ati, Nitari na musambwa, nawe anye eniyana Rata cibaro, nawe mutakunana cibaro. 50Nawe anye nitakuyenja ecibaro cani. Ariwo unu kayenja no kuramura. 51Ni cimari cimari enibabwira ati, Omu:nu akagwata omusango gwani, ataribona rufu kajanende na kajanende. 52Abayaudi nibamubwira ati, Wori camenya ati, uri no musambwa. Iburaimu afu:ye na baragi. Ka:we owaika ati, Omu:nu akagwata omusango gwani, atarirabako rufu kajanende na kajanende. 53?Awe uri mukuru kukira Iburaimu unu afu:ye? Na baragi bafu:ye! ?Owitogaga? 54Yesu naindura ati, Nike:kusya omwene, okwikusya kwani ni kwa kutyo era. Unu kankusya ni Rata, unu omwaika ati ni Nyamuanga wemwe. 55Oyo mucari kumumenya, nawe anye nimumenyere. Nika:ika ati, nitakumumenya, enijo:kuba mubei rwemwe. Nawe nimumenyere, ka no musango gwae nigugwatire. 56Sa:ja wanyu Iburaimu akondeywe okurora orusiku rwani, narurora nakonderwa.
57Mbe Abayaudi nibamubu:sya ati, ?Ucari kumara myaka makumi gata:nu, na Iburaimu wamurorere? 58Yesu nababwira ati, Ni cimari cimari enibabwira ati, Iburaimu anu ariga acari kubao, anye ndio. 59Mbe nibagega amabui okumurasa, nawe Yesu ne:ibisa, nauruka mu yekaru.
હાલમાં પસંદ કરેલ:
Yoana 8: KIJ1960
Highlight
શેર કરો
નકલ કરો
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
