Yoana 7
7
Abamura babo nibakungirisya Yesu
1Wejire ejo jawa Yesu naribata mu Galilaya, okuba atendere kuribata mu Buyaudi, okuba Bayaudi bayenjaga obwenge okumwita. 2Nawe amarya ga Bayaudi gariga gajo:kufugera, nigo age biuna. 3Mbe abamura babo nibamubwira ati, So:ka anu, ugende Buyaudi, korereki abeigisibwa bao one barore emirimu jao jinu oukora. 4Okuba atariwo mu:nu unu kakorera omusango mu bwitebe, ke:nu nenda okumenyeka. Ukakora ebyo, mbe wiyeresye ku ca:ro. 5Okuba na bamura babo batamwikirisisye. 6Mbe Yesu nababwira ati, Omwanya gwani gucari kwiya, nawe omwanya gwemwe gumaririye kusiku. 7I:si itakutura kubiirirwa emwe, nawe eibiirirwa anye, okuba ena:ika ejendemo kutyo jiri, ati emirimu jendemo ni mibi:bi. 8Emwe murinye ku marya ago, Anye nicari kuba kurinya ku marya ago, okuba omwanya gwani gucari kuku:misibwa.
9Wejire amara okubabwira ebyo, nasigara Galilaya. 10Nawe abamura babo wejire bamara okurinya ku marya, mbe niwo omwene one narinya, tari abweru, nawe uti mu bwitebe. 11Mbe Abayaudi nibamuyenja ku marya, niba:ika ati, ?Oyo abee aaki? 12Nikubao okwitoŋanira kwafu mu bise. Abandi nibamwaika ati, Ni wa kisi. Abandi niba:ika ati, Uri, nawe kabebeya ecise. 13Nawe atabeeo unu amwaikireko abweru kwo kuba bo:bayire Abayaudi.
Yesu nagenda mu kwikofyanya kwe biuna
14Mbe ku marya aagati Yesu narinya nengira mu yekaru ne:igisya. 15Abayaudi nibarugu:ra, nabaika ati, ?Unu amenyere kutiki okusoma, ke:nu ate:igiye? 16Mbe Yesu nabaindura na:ika ati, Okwiigisya kwani kutari kwani, nawe ni kwa unu antumire. 17Omu:nu akenda okukora wuriya binu kenda, arimenya okwiigisya kunu araba kwaso:kere ku Nyamuanga, araba ena:ika ebyani era. 18Unu ka:ika kubwae omwene era, kayenja ecibaro cae omwene. Nawe unu kayenja ecibaro ca unu amutumire, oyo ni wa cimari, na bunyamusi butamurimo. 19?Musa atabayae ebiragiro, nawe atariwo mwimwe unu kagwata ebiragiro? ?Kubaki omuyenja obwenge okunyita?
20Ecise niciindura ati, Si uri na musambwa. ?Niga unu kayenja obwenge okukwita? 21Yesu naindura nababwira ati, Nakorere omurimu gumwi, emwe bo:ne nimurugu:ra. 22Musa nikwo akorere nabayana okutenda, tari ati ni kwa Musa, nawe ni kwa basa:ja. Na ku sabato omutenda omu:nu. 23Omu:nu akatendwa ku sabato, ebiragiro bitaja kunyamuka, ?omumbiirirwa okuba naosisye omu:nu kata ku sabato? 24Musigega kuramurira me:so, nawe muramurega murengere. 25Mbe abandi abende Yerusalemi niba:ika ati, ?Tari niwe unu abayenja okumwita? 26Nawe rora, ka:ikira abweru, ka batakumubwira musango. ?Abakuru bamenyere kata ati unu niwe Kristo? 27Nawe unu cimenyere enu aso:kere. Nawe Kristo ariba:ja, atariwo unu kamenya enu kaso:ka. 28Mbe Yesu na:ikirira inguru mu yekaru, ne:igisya na:ika ati, Anye mu:menyere, ka enu naso:kere mumenyereyo. Anye nite:jire kubwani nenyere, nawe unu antumire ni wa cimari, unu emwe mutakumumenya. 29Anye nimumenyere, okuba namuso:kereko, ka niwe antumire. 30Mbe abo nibayenja obwenge okumugwata, nawe atariwo unu amuteeko okuboko, okuba omwanya gwae gwariga gucari kwiya. 31Nawe ba:fu aba mu cise nibamwikirisya, niba:ika ati, ?Kristo ariba:ja, arikora ebibarikisyo byafu kukira binu unu kakora?
32Abafarisayo nibongwa ecise nici:toŋanira kubwae kutyo. Abagabisi abakuru na Bafarisayo nibatuma abasirikare okumugwata. 33Mbe Yesu na:ika ati, Kasigae ka:nya kato:to niri aamwi nemwe, niwo enigenda ku unu antumire. 34Murinyenja nawe mutarimbona, na anu niri, emwe mutakutura kuja:yo. 35Mbe Abayaudi niba:ika abene era ati, ?Unu kenda kuja aaki, eswe cireme okumurora? ?Kenda okuja kwabo banyarambukire mu Bagiriki, e:igisye Abagiriki? 36?Ni cigambo ki cinu ka:ika ati, Murinyenja nawe mutarimbona, na anu niri, emwe mutakutura kuja:yo?
Emisima ja manji go buanga
(Yo. 4:14)
37Nawe ku rusiku rwa ku bute:ro, nirwo orusiku orukuru rwa marya, Yesu e:mereguyu na:ikirira inguru, na:ika ati, Omu:nu ake:twa obwiro a:je kwanye anywe. 38Unu kanyikirisya, rwa kutyo binu byandikirwe ebyaika ati, emisima ja manji go buanga jiriurura kuso:ka munda yae. 39Eco aca:ikire ku Mwoyo, unu bariga nibaja okuyabwa banu bamwikirisisye. Okuba Omwoyo ariga acari kugabwa, okuba Yesu ariga acari kukusibwa.
Nibabambasyanya ebya Yesu
40Mbe abandi aba mu cise, wejire bongwa emisango ejo niba:ika ati, Ni cimari unu niwe omuragi wuriya. Abandi niba:ika ati, Unu niwe Kristo. 41Abandi niba:ika ati, ?Kristo kaso:ka mu Galilaya? 42?Cinu candikirwe atakwaika ati, Kristo kaso:ka mu rwiburo rwa Daudi, mu Beteleemu, omusi gunu Daudi arigamo? 43Mbe nikubao okwaukana mu cise kubwae.
44Abandi nibenda okumugwata, nawe atabeeo wa kumutako kuboko. 45Nikwo bakorere abasirikare nibasuba ku bagabisi abakuru na Bafarisayo. Abene niba:ika ati, ?Niki cinu mwakora nimurema oku-mure:ta? 46Abasirikare nibaindura ati, Acariga kubao omu:nu wo kwaika rwoyo. 47Mbe Abafarisayo nibabaindura ati, ?Si imwe one ababebeya? 48?Ari a:ki mu bakuru unu amwikirisisye, nakabee mu Bafarisayo? 49Nawe ecise cinu batakumenya ebiragiro be:imirwe. 50Nikodemu, unu amwijireko kara, niwe owe:ja:bo, nababwira ati, 51?Nico eciragiro ceswe okutemera omu:nu eci:na bacari kumungwa omwene no kwamba okumenya binu kakora? 52Nibaindura nibamubu:sya ati, ?Awe one waso:kere mu Galilaya? Yenja urore ati, omuragi atakuso:ka mu Galilaya.
હાલમાં પસંદ કરેલ:
Yoana 7: KIJ1960
Highlight
શેર કરો
નકલ કરો
Want to have your highlights saved across all your devices? Sign up or sign in
Kijita New Testament © The British and Foreign Bible Society and The Bible Society of Tanzania, 1960.
