NGÛGÎ 3

Kworua gwa kîonje

1Ntugû îmwe Petûrû na Njoana ibaathiîte nyomba ya Ngai. Kwarî thaa kenda cia mûthenya, thaa cia maromba. 2Agu mwîrîgaani igwakaraga muntû aarî kîonje kuuma gûciarwa. Kîonje gîku gîakamatagwa n'antû ba kîo ntugû cionthe bagakîaiga agu mwîrîgaani ûra antû beetaga ‘Mwîrîga ûmûthongi,’ kaingo kîromba mbia antû bara baathûngagîra nyomba ya Ngai.

3Kîonje gîku gîkwona Petûrû na Njoana barî akubî kûthûngîra, kîabaromba gîntû. 4Petûrû na Njoana bamûcûûba kii. Petûrû akîîra, “Tatûcûûbe.” 5Kîonje gîku gîaûkîîria meetho, kîabacûûba gîkîthûgaanagia i gîntû beendaga gûkîa. 6Petûrû aakîîra, “Gûtirî fetha kana thaabu#3:6 Fetha na thaabu ciarî mbia. ndî na cio. Îndî kîra ndî na kîo i kîo ngûkwa. Na kîo i gîkî, n'ûntû bwa riîtwa rîa Yiesû Kîrîstû wa Nasareethi, ndîkwîra rûngama, ûtue kûthi!”

7Rîru Petûrû aagwata kîonje gîku njara ya ûrîo agîteetheeria kûrûngama. Warîru kîonje gîku kîegua mbayo na ncûng'ua ciagwata inya, kîarûngama. 8Aathûngûtha aanjîîria kûthi. Aathiyania na Petûrû na Njoana baathûngîra nyomba ya Ngai akîthûngûthangaga agîkumagia Ngai. 9Antû boona muntû ûyu athiîte agîkumagia Ngai. 10Boona n'we aakaraga akîrombaga arî mwîrîgaani wa nyomba ya Ngai ûra beetaga ‘Ûmûthongi’. Baarigara mûno n'ûntû bwa ûgu gwakarîkîîte kîrî we.

Rwaria rwa Petûrû kîrî antû akworia kîonje

11Antû baugia barigarîîte mûno, bathiîte bwa rwembea rûra beetaga rwa Soromoni, naara muntû ûyu aabuîte aarî agwete Petûrû na Njoana njara. 12Petûrû akwona antû beethîrana agu abaûria, “Antû ba Isiraeri, i mbi yabûrigaria? Ka bûkwona ta inya yetû kana wega bwetû bwatûma muntû ûyû abua n'ûntû bwatûkûnîîra meetho ûûgû? 13Ngai wa Îburaîmu, Isaka na Njakubu, ta we Ngai wa biûyûûyû bietû n'we eete Yiesû, mûruti ngûgî wake ûkumio bûbu. Na Yiesû ûyu nwa we ûra bwanenkanîîrie kîrî Piraatû, bwamûkaana wana Piraatû we wengwa akûgiita îgamba auga arekue. 14Bwakaanire ûra mûtheru na ûmwagîru bwenda mûûragani athaûrwa, aarekeerua bantû a Yiesû. 15Bwaûragithiirie kiumo kîa mwoyo. Îndî Ngai amûriûkia, amûcookia mwoyo, na tiû atûmwa baake tûrî akûûyî ba ûntû bûbu. 16Muntû ûyû bwiyî na bûkwona, aabua n'ûntû bwa wîtîgio bwetû ndeni ya riîtwa rîa Yiesû. I wîtîgio bwetû kîrî Yiesû bwatûma abua kûrû, wata ûûgû bûkwona.

17“Îîndî, antû beetû, inkûmenya bûra bwarûthire Yiesû bûrî na anene beenu, bwarûthire n'ûntû bwa kwaga ûmenyo. 18Îndî ûgu i bu Ngai aûyûriirie ûroria bûra aaroriirie tene gûkûrûkîîra kîrî iroria bionthe. Aaroriirie auga Kîrîstû wake akaanyamaarua akue. 19Kwoogu îrireeni bûûye kîrî Ngai kaingo abuuta meeyia meenu. 20Mwathani Ngai akabwaa kagiita ka mîoyo yenu kûgîa inya na akabûtûmîra *Mesia ûra aathuurire tene, ta we Yiesû. 21Yiesû nwa mwanka akare îgûrû mwanka rîra mantû monthe magaacookanîrua, wata bûra Ngai augire tene gûkûrûkîîra kîrî iroria biake. 22Musa aaroriirie auga, ‘Mwathani Ngai wenu akabûthuurîra kîroria kuuma wakîrî biû, wata bûra aanthuurire.#3:22 Kana: akari ta niû. Na nwa mwanka bwathîkîre bûra kîroria gîku gîkaabwîraga. 23Ûra wonthe atakîathîkîra kîroria gîku naakaathûranwa na antû ba Ngai buru, athîîrue.’#Kûririkanania Maathana 18:15-16, 19 24Iroria bionthe, kwanjîîria Samweri na bara bangî baamûthingatîîre wana bo nwa baagwetire mantû wamama marîku ntugû ino.

25“Biû i biû eene mawîrane ma Ngai mara iroria biagwetire. Na nwa biû eene kîrîîkanîro kîra Ngai aarîîkanîîre na biûyûûyû bietû. Eerire Îburaîmu, ‘Rûciaro rwaku rûgaatûma antû bonthe ba nthîgûrû bathaarimwa.’#Kîambîrîria 22:18 26Ngai agûtûma mûruti ngûgî wake, aamûtûmire kîrî biû mbere kaingo abûthaarima atûma woora ûmwe wacienu agarûka arekana na mantû maathûûku mara arûthaga.”

હાલમાં પસંદ કરેલ:

NGÛGÎ 3: thk

Highlight

શેર કરો

નકલ કરો