NGÛGÎ 2

Kîrundu Ûmûtheru aaya ntugû ya Pentekosti

1Ntugû ya *Pentekosti îgûkinya, eetîgîri bonthe i beethîreene amwe. 2Nthûti îmwe beegua gîtuma ta gîa kîbuubani kîauma îgûrû, kîaûyûra nyomba înu baakari. 3Bagûcûûba boona ta ndîrîmbî cia mwanki ciarî îgûrû rîa kîongo kîa woora ûmwe wao. 4Bonthe baûyûrwa i Kîrundu Ûmûtheru. Baanjîîria kwaria na nthiomi ingî ingeni, kûringana na bûra Kîrundu Ûmûtheru aabaûmbithiirie.

5Na ikwarî na Ayaundi gûku Njerusaremu baakuthûkaga Ngai. Baarî ba kuuma gûntû mwanya mwanya, nthîgûrû yonthe. 6Bakwîgua gîtuma gîku kîrîndî kiingî kîethîrana kîyîîte kwona kîarî kîa mbi. Bakûbathikîîria baarigara mûno n'ûntû woora muntû neegagua rûthiomi rwake rûkîarua. 7Kîrîndî kîarigara mûno. Kîaûrania, “Anga antû baba bonthe bakwaria ti ba kuuma Gariiri? 8Aabu n'ata bakûûmba kwaria nthiomi cionthe cia gûntû kûra twinthe bara tûrî aaga tuumîîte? 9Aaga tûrî Abarithi, Amende, Aarami, na bangî i ba kuuma Mesopotamia, Njundea, Kapandokia, Pontas, Îcia, 10Burugia, Pamburia, na Miisiri. Na bangî i ba kuuma gûntû kûmwe kwa Rîbia akubî na Kureni. Na bangî n'ageni ba kuuma Rooma, 11Ayaundi, na antû batarî Ayaundi bara bathingataga watho bwa Kîîyaundi. Bangî n'Arabu na antû ba kuuma Kiriti, na twinthe tûrî aaga itûkwîgua bûra bakuuga mantû maanene mara Ngai arûthîîte.” 12Kîrîndî kîonthe kîarigara kîarigicana. Gîakara gîkîûranagia, “I bûrîkû bûbû?”

13Îndî kûrî antû baabathekagîîra bakauga, “Antû baba ibarî batogoonu.”

Petûrû aarîria kîrîndî

14Rîru Petûrû aarûngama mbere ya kîrîndî barî amwe na atûmwa bara bangî îkûmi na ûmwe. Aatûmîîria na inya eera antû, “Ayaundi beetû na atûûri ba aaga tûrî Njerusaremu, kûrî bu nkwenda bûmenya. Kwoogu nthikîîriani bwega bwîgue bûra nkwenda kûbwîra. 15Antû baba tika barî batogoonu bûra bûkûthûgaania, n'ûntû îîndî i thaa ithatû cia rûkîîrî na gûtirî muntû aûmba kwîgua arî mûtogoonu. 16Ûûgû gwakarîka i bûra kîroria Njoeri aaroriirie kûringana na mîgambo îra Ngai aariirie gûkûrûkîîra kîrî we auga,

17‘Ntugûûni cia mûthia ngeetûûrîria

antû bonthe Kîrundu wakwa.

Aana beenu, nthaka na aarî, bakaaroragia.

Aana beenu beethî bakoonaga bioneki.

Na akûrû beenu bakaarootaga irooto.

18Na wana aruti ngûgî baakwa ba aka na ba arûme,

nkabeetûûrîria Kîrundu wakwa

ntugûûni inu na bakaaroragia.

19Nkoonania magegania îgûrû na biama nthîgûrû.

Gûkeegagua kûrî na gwîtîga kwa nthakame,

gwakana kwa mwanki, na kîrûngûrû gîa ntoogo.

20Riûa rîgaatiga kûmûrîka

na mweri ûgaatunîa tunî ta nthakame,

mbere ya ntugû îra nene ya Mwathani îkinya,

îra îrî mwago.

21Na gûgaakara ûûgû, ûra wonthe

agaakaîra Mwathani akoonokua.’#Njoeri 2:28-32

22“Antû ba Isiraeri, thikîîriani ntheto ino nkûbwîra! Yiesû wa kuuma Nasareethi aarî muntû bwooniirue bwega aatûmîîtwe i Ngai kûringana na biama, magegania na iriga bira Ngai aaringaga gûkûrûkîîra kîrî we. Biû bwingwa ibwiyî mantû mama n'ûntû maakarîkîîre kwenu. 23Kûringana na mûbango wa Ngai ûra aabangîîte kuuma tene, Yiesû aûragirwe bûkûmûnenkanîra kîrî antû ba meeyia bamwamba mûtharabaani. 24Îndî Ngai naamûriûkiirie amûruta inyaani ya gîkuû n'ûntû gûtikîûmbîka gîkuû gîkara kîmûrigîîrîîtie. 25Ndaundi augire ûûgû îgûrû rîa Yiesû,

‘Ndoonaga Mwathani mbere yakwa rîonthe.

Na n'ûntû arî rûteere rwakwa rwa ûrîo,

ntienyenyeka.

26Kwoogu nkoro yakwa îrî na gîkeno,

mîgambo yakwa n'ya gîkeno.

Mwîrî wakwa ûgaakaraga rîonthe ûrî na wîrîgîîro,

27n'ûntû woû ûtiireka nkara ndî ûmûkuû.

Ûtiireka mûtheru waku oora.

28Nûmmenyithîîtie njîra ya mwoyo,

ûkaambûyûria gîkeno ndakwona.’#Cabuurî 16:8-11

29“Antû beetû, imbagîrîtwe mbwîra mantû mara maatuîkîkire kîrî Ndaundi, kîûyûûyû gîetû. Gûtirî nkanja naakuire na aathikwa, nthiko yake îrî oogo wana îmunthî tûrî. 30Na n'ûntû aarî kîroria, naiyî Ngai wabu naathiîtiirie rîra aamwîrire ûmwe wa rûciaro rwake akaathûkia gîtî gîake kîa ûnene. 31Na n'ûntû naiyî bûra Ngai akaarûtha, i kîo gîatûmire aaria mantû ma kûriûka gwa Kîrîstû auga, ‘Ataarekwa akara arî ûmûkuû, mwîrî wake ûtoora.’ 32Yiesû wooyu n'we Ngai aariûkiirie na twinthe, atûmwa baake, tûrî akûûyî ba ûntû bûbu. 33Yiesû agwîtithua îgûrû aakarire rûteere rwa ûrîo rwa Ngai, eewa Kîrundu Ûmûtheru n'Îthe kûringana na wîrane bûra aamwete. Na Kîrundu ûyu n'we twetûûrîîrue wata bûra biû bwingwa bûkwona na bûkeegua. 34Ndaundi we ateetia îgûrû, îndî naugire ûûgû,

‘Mwathani Ngai neerire Mwathani wakwa,

“Kara nthî rûteere rwakwa rwa ûrîo,

35mwanka rîra ntuîkithie anthû baaku

ûkinyo bwa magûrû maaku.” ’#Cabuurî 110:1

36Kwoogu antû bonthe ba Isiraeri, menyaani atî, Yiesû woora bwambire i mma n'we Ngai atuîkithîîtie Mwathani na Kîrîstû.”

Antû ba mbere gûtûmîîrua i Petûrû na boonoka

37Antû bakwîgua ûgu, beegua baaringithua mûno nkorooni ciao. Baûria Petûrû na atûmwa bara bangî, “Aruayia, n'ata tûkaarûtha?”

38Petûrû abeera, “Îîrireeni bwinthe na bûbaatithue riîtwaani rîa Yiesû Kîrîstû kaingo bûrekerwa meeyia meenu na bwewa kîewa gîa Kîrundu Ûmûtheru. 39N'ûntû biû, aana beenu, na bonthe bara barî kûraaya bûrî baape wîrane, bara Mwathani Ngai wetû ageeta kîrî we.”

40Petûrû aathi na mbere kûbakinyîîria na mîgambo îngî îmingî. Abeera, “Onokaani bûrekane na mantû maathûûku ma ntugû ino!” 41Bara beetîgiirie ûgu Petûrû augaga ibaabaatithiirue. Ntugû înu, antû ta ngiri ithatû boongeereka baatuîka eetîgîri. 42Beeruta baamenya mantû kuumania na atûmwa, barî na ngwatanîro amwe, bakîrîyanagîra mûgaate na bakîrombaga.

Ngwatanîro ya eetîgîri

43Gûtirî muntû ataarigara i magegania na biama bira biaringagwa gûkûrûkîîra kîrî atûmwa. 44Eetîgîri bonthe baathiire na mbere baakarania barî na ngwatanîro na bagîtûmagîra into biao bionthe birî amwe. 45Bamwe baathûkagia into biao bakabiendia bakagaîra mbia bara baciao baarî na ûbatu. 46Baarîîkanaga nyomba ya Ngai wakîra ntugû. Baarîyanagîra mûgaate amwe mîciî mwanya mwanya, bagîcookagia nkaatho cia mma bakeneete n'ûntû bwa Ngai kûbaa irio. 47Baakumagia Ngai, antû bonthe baboona barî antû beega. Wakîra ntugû bara Mwathani oonokagia aaboongagîîra kîrî eetîgîri.

હાલમાં પસંદ કરેલ:

NGÛGÎ 2: thk

Highlight

શેર કરો

નકલ કરો