Mar 15
15
1Lăp 'brưch hơdah til pơgê na lu 'bok soi tih, lu đe kră, lu đe 'bok thây bơtho tơdrong juăt đe Juđê păng dôm lu 'bok sek tơlang, lu sư pơđâu dih băl. Đơ̆ng noh lu sư chô̆ Yêsu năm jao ăn kơ Pilat bơngai Rôm mă pơgơ̆r dêh Juđê. 2Pilat jet Yêsu: “Hăm trŏ kơ Ih pơm Pơtao đe Juđê?” Na Yêsu khan: “Trŏ kơ Inh boih.”
3Lu 'bok soi tih pơma jâu Yêsu lơ tơdrong. 4Na Pilat jet Sư dơ̆ng: “Đe jâu Ih lơlap lơlang, Ih kuă kơ kiơ kơ tơl?”
5Mă-lei Yêsu 'nhŏ kơ tơl na Pilat sơleng kơ đon.
Đe apinh Pilat pơ̆ng Yêsu tơ 'long pơglang
6Rim đe pơm Giĕng Năm Brih Pilat juăt kơ tơlĕch minh 'nu bơngai đơ̆ng hnam phak, bơngai bu mă kon pơlei apinh. 7Na năr noh trŏ kơ năr đe pơm Giĕng Năm Brih. Na đei minh 'nu bơngai, anăn sư 'Barra'ba, oei lăm hnam phak. Đe phak sư hơdai lu bôl mă pơm yoch thoi sư mơ̆n, yua kơ lu sư iung blah lu bơngai Rôm mă tŏk pơgơ̆r lăm teh đak sư; na kơplah ei, lu sư chă pơlôch đe mơ̆n. 8Na năr ei đei lơ bơngai năm apinh Pilat tơlĕch kơ lu sư minh 'nu bơngai. 9Na Pilat khan kơ lu sư: “Iĕm hăm wă inh tơlĕch kơ iĕm 'Bok Pơtao đe Juđê?”
10Pilat khan wă tơlĕch Yêsu kơlih kơ sư băt lu 'bok soi tih ơh klai jao wă pơlôch Yêsu noh, mă-lei sư ngêh kơ lu kon pơlei pơla wă kơ Yêsu. 11Mă-lei lu 'bok soi tih pơchŭt lu kon pơlei pơla athei Pilat tơlĕch kơ lu sư pôm 'Barra'ba đĕch. 12Pilat khan dơ̆ng kơ lu sư: “Tơ̆ng lei iĕm wă kơ inh pơm kiơ kơ bơngai mă iĕm anăn Sư Pơtao iĕm Juđê?”
13Na lu kon pơlei pơla pơma 'bơ̆r re khan: “Pơ̆ng pơlôch Sư tơ 'long pơglang.”
14Na Pilat jet lu sư: “Kơlih kơ kiơ iĕm wă pơlôch Sư? Sư pơm tơdrong yoch kiơ?” Mă-lei lu sư rai pơma re khan: “Pơ̆ng pơlôch Sư tơ 'long pơglang.”
15Thoi noh na Pilat wă kơ jơhngơ̆m đon lu kon pơlei pơla rơngơp hiôk, na sư tơlĕch ăn kơ lu sư 'Barra'ba. Na sư athei lu linh sư teh tach Yêsu păng sơnguĕt păng pơjao kơ lu linh sư pơ̆ng pơlôch Yêsu tơ 'long pơglang.
Lu linh che bơle kơ Yêsu
16Đơ̆ng noh na lu linh anhăk Yêsu mơ̆t tơ cham hnam Pilat, akŭm băl đĭ kơ minh grŭp sư tơ noh. 17Lu linh ei pơhrŭk kơ sư ao tai 'brê pơm thoi pơtao păng lu sư iŏk tơlei jơla chuă pơm agăl na pơyơ̆l tơ kơ̆l Yêsu. 18Lu linh ei kơkuh kơ Sư khan: “Kơkuh kơ Ih 'Bok Pơtao bơngai Juđê.”
19Lu sư tôn kơ̆l Yêsu păng 'long, kơsoh pơ'brơh đak hai tơ akâu akar Sư păng pơm sơtơ̆p kŭl-tăng kơkuh pơngiĕl kơ Sư. 20Lu sư che bơle đang boih na plôh ao tai 'brê noh, pơhrŭk ăn ao Sư kơdih dơ̆ng. Đơ̆ng noh lu linh anhăk Yêsu năm pơ̆ng pơlôch tơ 'long pơglang.
Đe pơ̆ng pơlôch Yêsu tơ 'long pơglang
21Đei minh 'nu bơngai, anăn sư Simôn đơ̆ng Pơlei Siren. Sư 'bă bre Aleksandrê păng Ruphus. Sư năm brih trong ei wă mơ̆t tơ Pơlei Jêrusalem ră na lu linh pơgŏ sư tôi kơ Yêsu 'long pơglang. 22Lu linh anhăk Yêsu tơ anih đe anăn Gôlgôtha wă khan anih kơting kơ̆l bơngai lôch. 23Lu sư ăn kơ Yêsu sik bơlŭ hăm pơgang sơmren, mă-lei Sư ưh kơ et ôh. 24Na lu linh pơ̆ng Sư tơ 'long pơglang. Lu sư pơpơn dih băl wă kơ băt bu gơh iŏk ao Yêsu, bu iŏk ao ayơ, bu iŏk ao ayơ. Lu sư asong băl ao Yêsu thoi noh. 25Đe pơ̆ng Sư tơ 'long pơglang ei lăm tơsĭn jơ til pơgê. 26Lu sư chih roi tơ gơ'bang iĕ pơ̆ng tơ kơpal kơ Sư, khan tơdrong kơnê̆ đe jô̆ kơ Sư pơm thoi âu: “'Bok 'nâu Pơtao đe Juđê.”
27Lu sư kư̆m pơ̆ng 'bar 'nu bơngai tơtông jê̆ hơdai Yêsu mơ̆n, minh 'nu gah 'ma, minh 'nu gah 'ngiĕo kơ Sư. 28Tơdrong noh 'blep trŏ thoi sơ̆p hla bơar 'Bok Kei-Dei khan lê̆ hơdrol thoi âu: “Đe lăng Sư thoi minh 'nu lăm khŭl bơngai kơnê̆.”
29Lu đe mă brŏk năm trong ei tơtreh kơ̆l tơhmăi Yêsu khan: “Hmăi Ih khan wă teng pơrăm hnam akŭm 'Bok Kei-Dei tơm wă pơm plơ̆ng kơtĕch pêng năr. 30Tơdŏng akâu Ih kơdih wăi, jur kơdih đơ̆ng 'long pơglang 'noh.”
31Lu 'bok soi tih păng lu thây bơtho tơdrong juăt đe Juđê kư̆m wang che bơle kơ Yêsu păng khan dih băl: “Sư gơh dŏng pơklaih đe, mă-lei Sư ưh kơ gơh dŏng pơklaih akâu Sư kơdih. 32Thoi Sư khan Sư 'Bok Krist Pơtao đe Isơrael, Sư athei jur kơdih đơ̆ng 'long pơglang dang ei hloi, na lu bơ̆n lui kơ Sư.” 'Bar 'nu bơngai mă đe pơ̆ng hơdai Yêsu kư̆m hơdai pơjăm Sư mơ̆n.
Yêsu lôch
33Lăp 'năr dơ̆ng, glĭp măng mu jơ̆p kơ teh đak truh tơ pêng jơ kơsơ̆. 34Lăp pêng jơ kơsơ̆ Yêsu pơma 'bơ̆r re khan: “Êli, Êli, lamma sabatthani” wă khan: “Ơ 'Bok Kei-Dei, ơ 'Bok Kei-Dei, yua kơ kiơ Ih achăng lê̆ Inh?”
35Đei lu bơngai oei kiơ̆ ei, lu sư kơtơ̆ng Yêsu pơma thoi noh na lu sư ngeh kơ Yêsu krao Êli. Lu sư khan: “Mơ̆ng deh, Sư krao Êli.”
36Na đei minh 'nu bơngai kơdâu iŏk tơmam thoi tơpu dơyĕn, djrŭ tơ đak sik 'nhŭ, na kiĕn tơ 'long na tơ'mơn ăn kơ Yêsu hrip. Bơngai ei khan kơ đe: “Bơ̆n gô lăng lăng, hăm 'bôh Êli năm tơjur Sư đơ̆ng 'long pơglang tơpă dah ưh.”
37Klaih kơ noh Yêsu ôr pơret na kơtĕch jơhngơ̆m hloi.
38Na che đe chô̆ pơgăn tơ hnam akŭm 'Bok Kei-Dei tơm tơhek chuơ̆ng tŏk-bŏk đơ̆ng kơpal tơ ala hloi. 39Đei minh 'nu 'bok tih linh dơ̆ng tơ anăp Yêsu 'bôh Sư kơtĕch jơhngơ̆m thoi noh, na sư khan: “Bơngai âu boih Kon 'Bok Kei-Dei tơpă.”
40Kư̆m đei lu bơngai drŏ-kăn oei tơ anih đe pơlôch Yêsu noh, lu sư lăng đơ̆ng ataih. Anăn lu sư noh: Mari đơ̆ng Pơlei Mađơla, Salômê păng Mari mĕ bre Jôsê hăm Yakơ mă oei tơdăm. 41Lu drŏ-kăn 'noh kiơ̆ awih awăn kơ Yêsu kơplah Sư oei tơ dêh Galilê. Kư̆m đei lơ bơngai drŏ-kăn nai kiơ̆ Yêsu năm tơ Pơlei Jêrusalem oei kiơ̆ ei mơ̆n.
Đe 'măn atâu Yêsu lăm bơsat
42-43Đei minh 'nu bơngai anăn sư Yôsep đơ̆ng Pơlei Armơthê. Sư bơngai khŭl kră sek tơlang kơ đe păng đe ư-ang kơ sư. Sư kư̆m chang gô 'Bok Kei-Dei pơgơ̆r mơ̆n. Lăp 'năr kơsơ̆ boih năr ei, năr đe hơmet lê̆ hơdrol tôm tơdrong wă yua lăm năr pơdơh Sa'bat dơning, na Yôsep pơprơ̆n năm tơ Pilat apinh iŏk 'bŭ atâu Yêsu. 44Na Pilat sơleng kơ đon tơdrong Yêsu 'bônh kơ lôch thoi noh. Na sư krao 'bok tih linh na jet sư Yêsu tam lôch. 45Lăp Pilat băt đơ̆ng 'bok tih linh roi kơ sư Yêsu lôch boih, na sư ăn kơ Yôsep iŏk 'bŭ atâu Yêsu. 46Yôsep răt minh blah che kok, na tơjur atâu Yêsu đơ̆ng 'long pơglang, lôm atâu Sư păng che ei. Klaih kơ noh sư năm 'măn atâu Yêsu tơ bơsat đe bŏk lăm tơmo thoi lăm hơgơp tơmo hmă. Sư tơgrŏl minh pôm tơnglơ̆p tơmo tih klơ̆p 'măng bơsat. 47Mari đơ̆ng Pơlei Mađơla păng Mari mĕ bre Jôsê hăm Yakơ, bre sư kư̆m 'bôh anih Yôsep 'măn atâu Yêsu.
Yêsu iung arih đơ̆ng lôch
હાલમાં પસંદ કરેલ:
Mar 15: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
