Mar 16
16
1Lăp hloh kơ năr pơdơh Sa'bat boih, na Mari đơ̆ng Pơlei Mađơla, Salômê păng Mari mĕ bre Jôsê hăm Yakơ, lu sư răt pơgang 'bâu phu wă năm pik tơ atâu Yêsu. 2Lăp 'năr lĕch til pơgê hrôih, năr mă mônh lăm giĕng, lu sư năm tơ bơsat. 3Lu sư pơma tơduă lu sư: “Bu wă pơih kơ bơ̆n 'măng tơmo đơ̆ng klơ̆p bơsat?”
4Lu sư khan thoi noh yua kơ tơmo noh tih dêh. Lăp lu sư hue lăng tơ 'măng bơsat lu sư 'bôh 'măng tơmo tơpơih boih. 5Lu sư mơ̆t lăng lăm bơsat 'bôh minh 'nu bơngai tơdăm hrŭk ao tai kok tơoei gah 'ma, na lu sư hli. 6Tơdăm ei khan kơ lu sư: “Iĕm 'nĕ kơ hli. Iĕm chă Yêsu Pơlei Nasaret mă đe pơ̆ng pơlôch tơ 'long pơglang. Sư iung arih đơ̆ng lôch boih, Sư ưh pă oei tơ âu. Tơ̆ng iĕm ưh kơ lui apinh iĕm lăng anih đêl đe tơ'bĭch Sư âu. 7Na dang ei iĕm năm hloi tơ Pêtrôs păng đĭ-đăng lu bơngai pơhrăm păng Sư, khan Yêsu wă năm tơ dêh Galilê hơdrol kơ iĕm, iĕm gô tơ'bơ̆p Sư tơ noh thoi Sư khan kơ iĕm ki.”
8Thoi noh boih na lu sư lĕch kơdâu đơ̆ng bơsat. Lu sư hli tơrơ mah tơtey, yua kơ lu sư lăng hlĭch 'bôh tơdrong 'noh. Kơplah lu sư kơdâu lu sư ưh kơ roi kơ đe nai yua kơ lu sư hli dêh.
Yêsu tơ'bôh akâu Sư kơ Mari Pơlei Mađơla
9Yêsu iung arih til pơgê hrôih năr tơpơh lăm giĕng 'noh, na Sư tơ'bôh akâu Sư kơ Mari Pơlei Mađơla hơdrol kơ đe. Sư bơngai mă Yêsu pơpuh tơpơh 'nu yang kơnê̆ lĕch đơ̆ng akâu Sư sơ̆. 10Mari năm khan kơ lu bôl Yêsu kơplah lu sư oei hmoi ơh sơ'ngon kơ Yêsu. 11Lăp lu sư kơtơ̆ng Mari khan Yêsu iung arih păng Mari khan kơ lu sư, sư 'bôh Yêsu tơpă ră, mă-lei lu sư ưh kơ lui.
Yêsu tơ'bôh akâu Sư kơ 'bar 'nu bơngai pơhrăm păng Sư
12Klaih kơ noh Sư tơ'bôh akâu Sư kơ 'bar 'nu bơngai pơhrăm păng Sư kơplah bre sư oei năm rok trong lĕch đơ̆ng Pơlei Jêrusalem. Mă hơdrol bre sư lăng hlĭch tơpă mă đơ̆ng rŏng bre sư kơnăl nhên tơpă. 13Bre sư brŏk roi kơ lu bôl sư mă-lei lu bôl sư ưh kơ lui kơ bre sư mơ̆n.
Yêsu tơ'bôh akâu Sư kơ mơjĭt-mônh 'nu bơngai pơhrăm păng Sư
14Đơ̆ng rŏng kơ noh Sư tơ'bôh dơ̆ng akâu Sư kơ mơjĭt-mônh 'nu bơngai pơhrăm păng Sư kơplah lu sư oei sŏng sa. Na Sư lach kơ lu sư, kơlih kơ lu sư ưh kơ lui păng arăng kơ̆l, yua kơ lu sư ưh kơ lui kơ bơngai mă 'bôh Yêsu đơ̆ng rŏng kơ Sư iung arih đơ̆ng lôch. 15Yêsu khan kơ lu sư: “Iĕm athei năm jơ̆p-jang kơ teh đak bơtho tơdrong 'nao 'lơ̆ng kơ đĭ-đăng bơngai. 16Bơngai bu lui păng iŏk 'batem, bơngai 'noh sư gơh klaih đơ̆ng tơdrong yoch. Bơngai bu ưh kơ chu lui sư gô pŭ tơdrong phak. 17Lu bơngai mă lui gô đei tơdrong mơsêh lu sư gơh pơm: Lu sư gơnang kơ Inh gơh pơpuh yang kơnê̆; lu sư gơh pơma hloi nơ̆r đe; 18dah sư rôp 'bơm 'bih mă 'bih choh sư păng dah sư sa et 'bơm tơmam bơnhŭl, lu sư ưh kơ đei jĭ ôh; păng sư gô pel akâu đe jĭ jăn, na akâu đe gô klaih.”
'Bok Kei-Dei atŏk Yêsu tơ plĕnh
19Đang kơ Kră Yang Yêsu khan kơ lu bơngai pơhrăm păng Sư thoi noh boih, na 'Bok Kei-Dei atŏk Sư tơ plĕnh oei gah 'ma kơ 'Bă Sư 'Bok Kei-Dei. 20Klaih kơ noh lu bơngai pơhrăm păng Sư năm chă bơtho jơ̆p-jang. Kră Yang Yêsu kư̆m tơgŭm lu sư jang gơh pơm tôm tơdrong mơsêh wă kơ đe băt kơ lu sư bơtho tơdrong 'Bok Kei-Dei tơpă.
હાલમાં પસંદ કરેલ:
Mar 16: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
