Mar 14
14
1'Bar năr hơdrol kơ Năr Giĕng Năm Brih păng giĕng sa 'Bĕng Mi Ưh Kơ Đei 'Buih Pông na lu 'bok soi tih hăm lu thây bơtho tơdrong juăt đe Juđê, lu sư pơđâu chă tơdrong gơh rôp tơtông Yêsu na pơlôch. 2Na lu sư khan: “Kơplah năr giĕng âu bơ̆n 'nĕ kơ pơm tơdrong noh, yua kơ năr giĕng âu kon tơring tơrang truh lơ, hli kơ lu sư blah bơ̆n.”
Minh 'nu drŏ-kăn tuh đak pơgang tơ kơ̆l Yêsu
3Yêsu oei tơ hnam Simôn, bơngai mă jĭ chin, tơ Pơlei Bethani. Kơplah lu sư sŏng sa na đei minh 'nu drŏ-kăn năm tơ Sư chĕp minh pôm gŏl đak pơgang 'bâu phu đe gĭt tơpă. Gŏl noh đe pơm păng tơmo, na duch noh teh pơchah trơi gŏl ei na tuh đak pơgang 'bâu phu ei tơ kơ̆l Yêsu. 4Na đei 'bar pêng 'nu bơngai nai hil kơ drŏ-kăn noh na lu sư khan dih băl: “Lơliơ duch 'noh pơhuach kư̆ kă ưh kơ 'mêm kơ đak pơgang sư? 5Đak pơgang 'bâu phu 'noh kăp pêng-hrĕng hlak jên hu. Lơliơ sư ưh kơ wă tĕch chă jên asong kơ lu bơngai dơnuh hin?” Lu sư hil ơh kơ duch 'noh bơbrơ̆k bơbrăk măk. 6Na Yêsu khan kơ lu sư: “Lê̆ sư pơm thoi noh bưh, iĕm mah hil kiơ kơ sư? Sư pơm kơ Inh thoi noh trŏ boih. 7Bơngai dơnuh sư oei păng iĕm ling-lang. Dah iĕm wă mơnat kơ sư mă layơ kư̆m gơh, yua kơ Inh âu ưh kơ oei păng iĕm ling-lang ôh. 8Duch âu pơm tôch tơdrong sư 'mêm păng sư gơh pơm. Sư tuh đak pơgang 'bâu phu tơ akâu Inh hơdrol kơ đe wă 'bŭ Inh thoi đe juăt kơ pơm hơdrol kơ 'bŭ bơngai lôch. 9Inh khan kơ iĕm tơpă, mă jơ̆p-jang kơ teh đak lu bơngai bơtho tơdrong 'nao 'lơ̆ng, lu sư kư̆m roi kơ đe tơdrong duch noh pơm kơ Inh wă kơ đe ư-ang kơ tơdrong sư pơm.”
Juđa wă plơ̆ plĕch Yêsu
10Klaih kơ noh đei minh 'nu bơngai anăn sư Juđa Ikariôt, bơngai đơ̆ng mơjĭt-'bar 'nu bơngai pơhrăm păng Yêsu, năm tơ lu 'bok soi tih wă jao Yêsu kơ lu sư. 11Lăp lu 'bok soi tih kơtơ̆ng thoi noh, lu sư lăp đon tơpă mah pơkă khan wă apah kơ Juđa jên. Đơ̆ng noh na Juđa chă tơdrong wă plơ̆ plĕch Yêsu.
Yêsu sŏng sa hơdai hăm lu bơngai pơhrăm păng Sư
12Đe juăt kơ pơm giĕng sa 'Bĕng Mi Ưh Kơ Đei 'Buih Pông kơplah tơhngam năr. Na năr mă mônh lăm giĕng noh đe kư̆m juăt kơ 'bet sa triu kơ Năr Giĕng Năm Brih. Na trŏ kơ năr noh lu bơngai pơhrăm păng Yêsu jet Sư: “Ơ 'Bok Thây, Ih wă kơ nhôn hơmet kơ Ih tơmam sa Giĕng Năm Brih tơ yơ?”
13Na Yêsu wơh 'bar 'nu bơngai pơhrăm păng Sư năm tơ Pơlei Jêrusalem. Sư khan: “Đơ̆ng âu biĕm mơ̆t tơ Pơlei Jêrusalem, tơ ei biĕm gô tơ'bơ̆p minh 'nu bơngai glơng ge đak na biĕm kiơ̆ hloi sư. 14Sư mơ̆t tơ hnam ayơ, biĕm mơ̆t kiơ̆ sư tơ noh hloi mơ̆n. Na biĕm apinh tơ'ngla hnam noh thoi âu: ‘'Bok Thây athei nhi jet ih, tơ yơ anih Sư wă sŏng sa kơ Năr Giĕng Năm Brih, lu bơngai pơhrăm păng Sư kư̆m wă sŏng sa hơdai hăm Sư mơ̆n?’ 15Biĕm apinh sư thoi noh boih na sư gô tơ'bôh kơ biĕm minh pôm anih să tôch tơ kơpal ti, đei bơ̆n gơ'bang tang-dŏ sư hơmet lê̆ tôm boih. Na biĕm hơmet kơ bơ̆n tơmam sa tơ ei.”
16Thoi noh boih na 'bar 'nu bơngai pơhrăm păng Sư ei năm tơ Pơlei Jêrusalem 'bôh tơpă dôm tơdrong Yêsu pơkă noh hei. Na bre sư hơmet lê̆ tơmam sŏng sa kơ Năr Giĕng Năm Brih tơ ei hloi.
17Truh adrơ̆m kơsơ̆ 'năr mơ̆t boih, na Yêsu năm tơ noh hơdai păng lu bơngai pơhrăm păng Sư. 18Kơplah lu sư oei sŏng sa na Yêsu khan: “Inh khan kơ iĕm tơpă, đei minh 'nu lăm lu iĕm oei sŏng sa hơdai păng Inh dang ei, sư wă plơ̆ plĕch Inh.”
19Yêsu khan kơ lu sư thoi noh, na lu sư ơh sơ'ngon. Na rim 'nu lu sư kơdih kơdih jet Sư khan: “Hăm trŏ kơ inh?” Mơ'nah dơ̆ng khan: “Inh hă?”
20Yêsu khan kơ lu sư: “Bơngai ei minh 'nu lăm mơjĭt-'bar 'nu lăm lu iĕm mă pơhrăm păng Inh, minh 'nu lăm lu iĕm mă chơ̆m sa 'bĕng mi tơ pơnhan đak 'nhot hơdai hăm Inh. 21Inh Kon Bơngai gô lôch 'blep trŏ thoi đe chih roi lê̆ hơdrol lăm sơ̆p hla bơar 'Bok Kei-Dei. Mă-lei mơnat kơ bơngai mă plơ̆ plĕch Inh noh đĕch pŭ tơdrong pơmat, 'lơ̆ng hloh đe dah lê̆ kơ tơpŭ kơ sư sơ̆.”
Yêsu sŏng sa hơdai lu bơngai pơhrăm păng Sư pơtih gia kơ tơdrong Sư wă lôch
22Kơplah lu sư sŏng sa Yêsu iŏk 'bĕng mi krao khan bơnê kơ 'Bok Kei-Dei na phĕ hloi 'bĕng mi noh asong kơ lu sư păng khan: “Iŏk sa 'bĕng âu bĕ, 'bĕng âu boih akâu Inh.”
23Sư iŏk dơ̆ng minh pôm kơchŏk đak hơmu, krao khan bơnê kơ 'Bok Kei-Dei na ăn kơ lu sư. Klaih kơ noh đĭ-đăng kơ lu sư huch. 24Na Yêsu khan kơ lu sư: “Đak hơmu âu boih pham Inh wă lĕch tang ăn lơ bơngai na 'Bok Kei-Dei pơklaih tơdrong yoch lu sư. 25Inh khan kơ iĕm tơpă, Inh ưh pă huch boih đak hơmu âu tơ̆p mă truh tơ năr 'Bok Kei-Dei pơgơ̆r ning-mônh 'mơ̆i, na Inh gô huch đak hơmu 'nao.”
26Đang Sư pơma thoi noh boih lu sư hơri minh tơdrong 'Bok Kei-Dei, lĕch năm hloi tơ kông Ôliwơ.
Yêsu roi tơdrong Pêtrôs wă sơngah kơ Sư
27Na Yêsu roi kơ lu bơngai pơhrăm păng Sư: “Đĭ-đăng kơ iĕm kơdâu achăng lê̆ Inh, yua kơ đei nơ̆r chih roi lê̆ hơdrol boih thoi âu:
‘'Bok Kei-Dei gô pơlôch tơ'ngla wei triu,
triu kơdâu tơklah đơ̆ng tơ'ngla sư.’ 28Mă-lei lăp 'Bok Kei-Dei tơiung arih Inh đơ̆ng lôch, Inh năm tơ dêh Galilê hơdrol kơ iĕm.”
29Na Pêtrôs khan kơ Yêsu: “Mă đĭ lu đe âu achăng lê̆ Ih, gah inh kuă kơ achăng Ih ôh.”
30Yêsu khan kơ sư: “Inh khan kơ ih tơpă, măng kơnh boih, hơdrol kơ iĕr ŏ 'bar 'măng, ih gô sơngah kơ Inh pêng 'măng khan ih ưh kơ băt kơ Inh.” 31Mă-lei Pêtrôs oei nŏng kơ pơjah khan kuă kơ sơngah. Sư khan: “Mă đe wă pơlôch inh hơdai hăm Ih, inh kư̆m kuă kơ sơngah ôh.” Đĭ-đăng lu bôl sư kư̆m khan lei-lăi thoi noh mơ̆n.
Yêsu krao khan kơ 'Bă Sư tơ pơgar Gêtsêmanê
32Đơ̆ng noh lu sư năm tơ anih mă đe anăn Gêtsêmanê. Yêsu khan kơ lu bơngai pơhrăm păng Sư: “Iĕm ngôi 'bơ̆t dâu. Inh wă năm krao khan kơ 'Bă Inh.” 33Yêsu anhăk ba lăp pêng 'nu đĕch truh tơ anih Sư krao khan. Anăn lu pêng 'nu noh Pêtrôs, Yakơ, Yôhan. Yêsu mơ-mreh hli dêh yua kơ Sư băt kơdih wă đei tơdrong gleh truh. 34Na Sư khan kơ pêng 'nu noh: “Dang ei Inh sơ'ngon dêh dang lĕ kơ wă lôch, na iĕm ngôi 'bơ̆t dâu, kral kơchăng ngôi hơpong kơ Inh 'biơ̆ hŏ.”
35Yêsu năm ataih 'biơ̆ đơ̆ng lu pêng 'nu noh, na Sư 'nap kŭp kơ̆l krao khan apinh 'Bă Sư, dah gơh, ăn Sư klaih đơ̆ng tơdrong noh. 36Sư khan: “Aba, ơ 'Bă, Ih gơh pơm tôm tơdrong. Apinh Ih ăn kơ Inh klaih đơ̆ng tơdrong gleh âu. Mă-lei Ih 'nĕ pơm kiơ̆ kơ Inh, pơm kiơ̆ kơ Ih đĕch.”
37Đang boih Sư wih tơ pêng 'nu noh 'bôh lu sư tep, na Sư khan kơ Pêtrôs: “Ơ Simôn, ih tep hă? Lơliơ ih ưh kơ gơh kral ngôi hơpong kơ Inh hơya minh jơ? 38Inh wă kơ iĕm kral ngôi hơpong kơ Inh păng wă kơ iĕm krao khan kơdih wă kơ iĕm huay kơ lui kơ yang Satan pơhlŭ. Inh băt kơ jơhngơ̆m đon iĕm wă ră, mă-lei akâu iĕm ưh kơ kĕ.”
39Yêsu năm krao khan thoi đêl dơ̆ng. 40Klaih kơ noh Sư wih, 'bôh lu sư oei tep lei-lăi yua kơ măt lu sư trăp ưh kơ kĕ kral. Na lu sư ưh pă gơh tơl Sư thoi yơ dơ̆ng.
41Lăp Yêsu wih đơ̆ng krao khan 'măng mă pêng Sư khan kơ lu đe noh: “Iĕm oei tep pơdơh 'biơ̆ hă? Thôi, dang ei truh jơ đe wă rôp Inh Kon Bơngai jao kơ lu bơngai yoch boih. 42Iung bĕ, bơ̆n jah năm tơ lu sư. Iĕm lăng to, bơngai mă plơ̆ plĕch Inh wă jê̆ truh boih.”
Đe rôp Yêsu
43Kơplah Yêsu oei pơma 'bôh blư kơ Juđa truh, bơngai mă đơ̆ng lăm mơjĭt-'bar 'nu bơngai pơhrăm păng Yêsu. Đei lơ bơngai kiơ̆ sư chĕp tak đao, mơ'nah chĕp 'long tơnôn yua kơ lu 'bok soi tih, lu thây bơtho tơdrong juăt đe Juđê păng lu đe kră sek tơlang wơh lu sư năm rôp Yêsu. 44Juđa bơngai mă plơ̆ plĕch Yêsu, sư tơbăt ăn kơ lu bơngai mă năm rôp Yêsu thoi âu: “Bơngai mă inh chŭm, bơngai 'noh boih Yêsu; iĕm rôp anhăk Sư mă brĕ hŏ.”
45Na Juđa năm hloi tơ Yêsu păng khan: “Ơ 'Bok Thây.” Na chŭm hloi Yêsu kiơ̆ thoi đe Juđê juăt kơ kơkuh băl. 46Na lu sư tơkan rôp kơjăp Yêsu hloi. 47'Bơ̆t ei đei minh 'nu bơngai dơ̆ng hơdai Yêsu hloch đao koh kơtĕch hloi hla đon đĭch 'bok soi tơm. 48Yêsu khan kơ lu bơngai mă rôp sư: “Lơliơ iĕm năm tơ âu chĕp tak đao 'long tơnôn dang lĕ đe rôp bơngai tơtông klĕ? 49Bĭ rim năr Inh oei tơ tŏk-bŏk lu iĕm, bơtho iĕm tơ lăm hnam akŭm tơm, iĕm kuă kơ kiơ kơ rôp Inh tơ noh lĕ? Mă-lei tơdrong noh 'Bok Kei-Dei ăn wă kơ 'blep kơ tơdrong đe chih roi lê̆ hơdrol lăm sơ̆p hla bơar Sư sơ̆.”
50Đang Sư pơma thoi noh bru đĭ-đăng lu bơngai pơhrăm păng Sư achăng Sư kơdâu jăk tơ nai.
51Đei minh 'nu bơngai tơdăm kiơ̆ Yêsu, sư asu minh blah khăn kok đĕch, na lu đe ei rôp sư ră. 52Mă-lei ti sư achăng lê̆ khăn kok noh kơdâu tŏ akâu hoh đĕch.
Yêsu dơ̆ng 'bơ̆t anăp lu kră sek tơlang
53Lu đe mă rôp Yêsu ei anhăk Sư tơ 'bok soi tơm. Đĭ-đăng lu 'bok soi tih, lu đe kră sek tơlang păng lu thây bơtho tơdrong juăt đe Juđê, lu sư akŭm tơ hnam 'bok soi tơm. 54Pêtrôs kiơ̆ lăng đơ̆ng rŏng Yêsu ataih ataih, na mơ̆t hloi tơ cham hnam 'bok soi tơm. Pêtrôs oei nhur ŭnh hơdai lu bơngai gak. 55Lu 'bok soi tih păng đĭ-đăng lu kră sek tơlang, lu sư chă bơngai mă 'bôh Yêsu pơm tơdrong kơnê̆ wă kơ lu sư gơh pơlôch Yêsu. Mă-lei sư chă ưh kơ đei bu. 56Đei lơ mơ̆n lu bơngai hơlĕnh jâu Yêsu, mă-lei lu sư jâu ưh kơ hơnơ̆ng. 57Đei lu bơngai mơ'nah hơlĕnh pơma jâu kơ Yêsu khan: 58“Nhôn kơtơ̆ng Sư khan wă yuih hnam akŭm 'Bok Kei-Dei tơm đêl đe pơm păng ti, na Sư gô pơm ming plơ̆ng dơ̆ng kơtĕch pêng năr keh hloi, mă-lei ưh kơ pơm păng ti.”
59Đei lơ mơ̆n lu bơngai iung pơma thoi noh mă-lei lu sư pơma ưh kơ hơnơ̆ng dih băl. 60Thoi noh boih na 'bok soi tơm iung tơ anăp bôl na jet Yêsu: “Đe jâu Ih, Ih kuă kơ kiơ kơ pơma?”
61Mă-lei Yêsu oei thĕng ưh kơ đei tơl sư thoi yơ ôh. 'Bok soi tơm jet Sư dơ̆ng: “Hăm trŏ kơ Ih 'Bok Krist Kon 'Bok Kei-Dei mă bơ̆n ư-ang dah ưh?”
62Yêsu tơl: “Inh boih Krist. Ning-mônh iĕm gô 'bôh Inh Kon Bơngai oei gah 'ma kơ Kră Yang 'Bok Kei-Dei mơsêh tih-tin, na đơ̆ng noh jur đơ̆ng plĕnh hăm hơmơ̆l.”
63'Bok soi tơm kơtơ̆ng Yêsu pơma thoi noh boih, na sư hek hloi ao sư kơdih yua kơ sư ơh tơpă. Na sư khan: “Bơ̆n mah kăl kơ kiơ chă bơngai nai wă jâu Sư dơ̆ng? 64Iĕm kơtơ̆ng boih Sư pơma thoi noh hei, Sư pơma blông kơ 'Bok Kei-Dei dêh. Na iĕm tơchĕng lăng bơ̆n wă pơm kiơ kơ Sư?” Na đĭ-đăng kơ bôl khan: “Bơngai âu trŏ kơ pơlôch.”
65Đei lu mơ'nah chă kơsoh pơ'brơh kơ Sư đak hai, đơ̆p muh măt Sư păng che, tŭr akâu Yêsu păng khan: “Roi lăng kơ nhôn wăi, bu tŭr Ih?” Lu linh gak kư̆m tap tơ'bŏk Sư mơ̆n.
Pêtrôs sơngah kơ Yêsu.
66Pêtrôs oei ngôi 'bơ̆t cham hnam, đei minh 'nu drŏ-kăn đĭch đam 'bok soi tơm năm tơ ei. 67Drŏ-kăn ei 'bôh Pêtrôs oei nhur ŭnh, na sư lăng Pêtrôs păng khan: “Ih kư̆m oei hơdai Yêsu bơngai mă đơ̆ng Pơlei Nasaret mơ̆n.”
68Na Pêtrôs sơngah khan: “Inh ưh kơ hlôh ih wă pơma kơ inh tơdrong kiơ ră.” Na Pêtrôs lĕch đơ̆ng noh ngôi kiơ̆ trong 'măng tơm. 69Na drŏ-kăn ei 'bôh dơ̆ng Pêtrôs, sư khan kơ lu bơngai oei kiơ̆ ei: “Bơngai âu kư̆m khŭl Yêsu.”
70Mă-lei Pêtrôs oei sơngah dơ̆ng. Lăp đunh 'biơ̆ kơ noh lu bơngai oei kiơ̆ ei khan kơ Pêtrôs: “Ih khŭl lu sư tơpă yua kơ ih bơngai đơ̆ng dêh Galilê thoi lu sư mơ̆n.”
71Na Pêtrôs sơngah hiap akâu sư kơdih khan: “Inh ưh kơ băt tơpă bơngai mă iĕm khan noh.”
72Đang sư pơma thoi noh lêk kơ iĕr ŏ hloi 'măng mă 'bar. Pêtrôs 'blŏk hơdơ̆r hloi kơ tơdrong Yêsu khan kơ sư khan: “Hơdrol kơ iĕr ŏ 'bar 'măng, ih gô sơngah kơ Inh pêng 'măng.” Pêtrôs 'blŏk hơdơ̆r kơ tơdrong 'noh na sư hmoi ơh kơdih.
Yêsu dơ̆ng 'bơ̆t anăp 'bok tih Pilat
હાલમાં પસંદ કરેલ:
Mar 14: bdq
Highlight
શેર કરો
નકલ કરો
Want to have your highlights saved across all your devices? Sign up or sign in
©Bahnar Bible Association. All rights reserved.
