MARK 15
15
Pilat po Ango Jisu yok Kiwan
(Mot. 27:1-2,11-14; Luk. 23:1-5,13-16; Jhn. 18:39—19:16)
1Adap tha-ango, bor-bangthehel kithe-kiding aro akisar helpen, aro kanong paklang helpen, aro lake ajal-dungsi ason amel long anali lam chirwal-chirhepmo. Anali Jisu yok hirkuli pen bamo, anangyok pono, aro Pilat po arideng champilo. 2Pilat po anangyok lam arjulo, “Nang Jihudi hel Arecho ma?” Jisu anangyok pulo, “Nang bithangsi thando.” 3La-aporsi bor-bangthe hel Jisu yok amokha adai pijap mo. 4Laparake Pilat po anangyok arju phakngo, “Nang lam itheta pudun chetche ma? Langot, anali nang pangho si konbak adai pido.” 5Manta Jisu ke lam ithe ta harlek dun chetche yongo, lasi Pilat po asombhik hlongo.
Pilat po Jisu yok Kamaritol Alam
(Mot. 27:15-26; Luk. 23:18-25; Jhn. 18:38—19:16)
6Minonke Kijoktang-kamai kido aphongten Pilat po akrol kibeng arleng jaibake ihutyok, rat kihang ateng hlopiman. 7La-amun rat-ahul wansi arleng kamari Barabas amen ihut arleng akrol along kido. 8Lasi rat ke wango aro la-amun abi-pun ateng lahel aphan katikipi ayok Pilat po adung chindukngo. 9Aro anang analiyok thano, “Jihudi hel Arecho po ayok nali pajokpi yok anengdo ma?” 10Piyok pu tene anang bor-bangthe helsi Jisu yok amek kiso anatsi anang rideng champido pusi Pilat po kachithan un. 11Manta bor-bangthe hel ratyok lam chutkreng si anali phanke Jisu aholan Barabas po yoksi kipahlo tolyok Pilat po yok pathan tolo. 12Pilat po ratyok pudun phakngo, “Laparake, nali ingho yok Jihudi hel Arecho pudo, anangyok ke ne pot ote nang?” 13Anali hang solsi pulo, “Anangyok kros long tarnot!” 14Pilat po lahelyok arjulo, “Piyok, anang pot te ado tiki lo?” Manta lahel hang chot-chotsi pulo, “Anangyok kros long tarnot!” 15Lasi Pilat po ratyok aneng kapangsam anengsi, analiyok Barabas po pajokngo; aro Jisu yok sabuk pen pasapsi, kros long kitar yok pekngo.
Sonturihel Jisu yok Kapatharak
(Mot. 27:27-31; Jhn. 19:2-3)
16Laparake sonturi hel gobornor po ahem sotalyok Jisu yok pono; aro anali ahuwit sonturi helyok taramo. 17Aro Jisu yok hapek arohon ape pa-ikngo; aro ingsu meresi phurkup badi otesi, anang phu long pa-ikngo. 18Aro lahel anangyok chirdomo, “Jihudi hel arechopo, ajiu pading nang!” 19Aro anang phulong prichek atokok pen arbulo, aro anangyok ingthi ingthok ngo, aro anali tarhuksi anangyok aman pisi chirdomo. 20Anang yok ajatjat chongnek tangsi, anang hapek arohon apehel ingsekngo aro anang bithang ape hel pa-ik phakngo. Laparake anali Jisu yok kros kitaryok pono.
Jisu yok Kros Kitar
(Mot. 27:32-44; Luk. 23:26-43; Jhn. 19:16-27)
21Anali duwar ibengsi, Kuriniya para kiwang arleng, ape-apoke Alekjendar po aro Ruphas pe kido, Simon amen arleng pochakngo aro sonturi hel Jisu kros po parung ponkek ngo. 22Laparake anali Jisu yok Golgotha, lake “Aphu akhorlop” kipuman athem anangyok wano. 23Aro lahel anangyok hor pen thengpe arong aphek pachiloksi kijunyok pilo manta anang bangpo junje yongot. 24Aro anangyok kros along tardongo, aro anang pehel abhak kapahlong ayok, akorom kime chilangsi, anang pehel chithaksi eno. 25La-amun adap baji sirkep apun, lahel anang yok kros kitar. 26Anangyok kilang setset alamthe ke “Jihudi hel Arecho” pusi kiwi alampen aphu tang athak tarduno. 27Aro lahel anang pen bang-hini dakuwal, ihutke anang ancho-ari aga aro ihutke anang debera-ari aga kros tarduno. 28“Lalong anangyok kithi nangehel pen alekha chokngo,” kipu labang lo-kangthir alamthe chok peno. 29Ingho duwar kidam abang anali phu chihujuk chihujuksi anang patharak jok-joksi pulo, “Lalo, nang Arnam ahem panghosi ni-thom arni ke Arnam ahem kikem unpo,” 30nang bithang chiralne kros para wangsun. 31Labenthotsi bor-bangthe pen kanong kapaklang abangta anang patharak jok-joksi pulo, “Bang helyok ke anang ralo; anang bithang yok ke chiral un-eh. 32Khristo, Israel longri Arecho, minon kros para wang pasun nang, tangsi hali ta theknge aro krolle.” La bang-hini anang pen kros kitar dun abangta, anangyok patharak ngo.
Jisu Kithi Alam
(Mot. 27:45-56; Luk. 23:44-49; Jhn. 19:28-30)
33Laparake baji kere-hini apor, nelo sitem dut-dut amun ghonta kithom sukam alongri dung ingting klakngo. 34Baji kithombak apun Jisu suru ghuk-ghuk si pulo, “Eloi Eloi, lama sabachthani?” Labang acho alampo ke, “Ne Arnam, ne Arnam piyok te nang netikango?” 35Aro adhok arjap dingne kidodun abang labang arjuhlongsi pulo, “Langnot te anangke Elija po yok taramdo.” 36Aro ihutke katno, pe kang-ar ipakpen hor akithor long nimo aro dharim alonso long labang homsi kijunyok pilo aro pulo, “Inghong tha, Elija po wangsi anangyok wang pasun ma wang pasun-se ili langsonang.” 37Laparake Jisu iphong hang-wongsi anang ki-or ashithe eno. 38Aro Arnam ahem kihing kachi-ar ape athak para alingyok phlakni chingsek phleno. 39Minonke konam Jisu adungsi kros amahang semsemsi arjapsi kido Santuri aghaipo, ladi haksi anang ki-or asithe ki-en thekngo, aro anang pulo, “Khanangsi labang arlengpo Arnam Aso.” 40La-apor Megdalini Mary pe, akibek Jems po, aro Josi po anang ai Mary pe, aro Salomi pe, la-ahuwit arloso hel, Jisu Galili kido amun, anang aphel-phel wang kidun. 41Ananli Jisu yok al-poson ki-en, anali, aro kamprek ako-ong arloso anang pen Jerusalem yok wang-kidun, lamehel arloso kaholo para langsi kido.
Jisu yok Kipep Alam
(Mot. 27:57-61; Luk. 23:50-56; Jhn. 19:38-42)
42Anithu aporo, aro labang arni ke kisang-arni ango Kachihonjok-arni kido, 43Arimathiya arongpe Josep po, ihut ason amel abangphu aro Arnam-alongri kiwang aphan kanghong ding arleng kido. Anang chipahadut si Pilat po adung ayok damo aro Jisu kithi arangpo anangyok hango. 44Manta Pilat po asombhik pahlongsi, Jisu la-an thidapmo ma welang, ladi neng ihik-bihik chiplangsi, aphoro sonturi aghaipo yok pawang tolsi arjulo, “Anang dakne para thi tango ma?” 45Sonturi aghaipo para lampo chithan unsi, Pilat po Josep po yok Jisu kithi arangpo pilo. 46Josep po kang-ar ape ipak wano aro kithi arangpo papasun si labang ape pensi pero. Anang arlong kangtang long kihuk thiri ahilikpo long pa-isi bilo; laparake anang thiri amahang arlong aplang akithe paklongsi bilo. 47Mary Magdalini pe aro Josep po anang ai Mary pe, daklong kithi arangpo kibi athem langdingsi kido.
હાલમાં પસંદ કરેલ:
MARK 15: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
