MARK 14
14
Pilat po Jisu yok Kilangset-Set
(Mot. 26:1-5; Luk. 22:1-2; Jhn. 11:45-53)
1Kijoktang-kamai, lake pholo-kipipe Ahim-kamai ayok aro ni-ni ango kido. Bor-bangthe aro kanong paklang abang Jisu yok joljolsi kinep yok aro kamari aphan awak chilangsi dolo; 2piyok pu tene anali pulo, “Kamai-arnike kalek, arleng hel ahul wang ta hal.”
Jisu yok Bethani Long Jangthu Kihel
(Mot. 26:6-13; Jhn. 12:1-8)
3Konam Bethani arong along Simon arje ibeng kisopo ahem kicho ayok, kangning apor ihut arloso pe kanempru aro adorchot ajangthu atema isi wansi, temaso pangholo aro anang phu along kanempru jangthu dungo. 4Manta lalong kido abang neng kangsi thano, “Piyokte ladisi akime ajangthu panghon det do? 5Piyok pu tene labang ajangthu jorsi phoro kithom ayok ta ongchot nohok hlongo hoi aro kicho kangwe abang ayok banta pajir uno hoi.” 6Manta Jisu pulo, “Anang yok ahudet tikangot; piyok nali anangyok aduk pido? Anang nephan akimechot asal tikilo. 7Piyok pu tene kicho kangwehel nalipen arnijon doman, aro konam nali kar-ih apor la-amun analiyok jinsodun un; manta ne ke nalipen arnijon dode. 8Arlosope ki-un ateng anang tikilo; anang bangpoke thiri long kibi angodapsi ne abangpo long jangthu nehelo. 9Khanangsi ne nali thando, pirthepe adak jotmehel labang kime-alamthe paharpon, labang athemlong anangyok neng chipurki aphan, anang pot asal tikilo, bangpota parju ponne.”
Judas po Jisu yok Kachobel Kachikeng
(Mot. 26:14-16; Luk. 22:3-6)
10Laparake bang kere-hini asitem ihut Judas Iskariyot Jihuda po, anang Jisu yok bor-bangthe hel arideng kichampiyok, anali dungyok damo. 11Anali anang lam onesi, aneng arongsi, anang ayok tanga kipiyok ching-akngo. Lalong anangyok me-at apor langsi kichampi ayok chirwalsi dolo.
Kijoktang Kamai Pen Adunhel
(Mot. 26:17-25; Luk. 22:7-13; Jhn. 13:21-30)
12Pholo kipipe ahim kamai kicheng arni, lake Kijoktang-kamai bik-aso buli karkli arni, anang adun hel anangyok pulo, “Daklongte hali damsi Kijoktang-kamai ahim nang phan kicho honjok damnang?” 13La-apor anang anali adun bang-hini yok tolsi pulo, “Nali rongpe yok damot, aro lalong arleng ihut lang kolho isi kiwan jongne kido naliyok pochak nge; alang aphel phel damot, 14aro anang kilut along, hem ahemphu yok pu, “Hemphu nang arjudo, dak longte ne adun helpen Kijoktang-kamai arni ne don ahem apulupo do? 15Anang abithang kahonjok lapen kapangning, angsong ihum akithe hem apulu nali paklange aro lalong honjok ngot.” 16Lasi bang-hini adun hel damo, aro Jisu pot badi kithan labadi hlongo; aro Kijoktang-kamai arni cho-jun honjok pilo. 17Konam anithulo, Jisu bangkere-hini pen wang iningo. 18Aro konam anali cho-jun athem iningo aro chosi kido amun, Jisu pulo, “Khanangsi ne nali thando, ne pen kicho arleng asitem ihutsi neyok champi ye.” 19La apor anali neng aduk wangjin noh, aro ihut ihutsi anangyok arjulo, “Khanangke ne lo ma?” 20Jisu analiyok thano, “Lake bangkere-hini adak, ingho ihut ne pensi kicho-asenge long him jokplup, bangpo ke anango. 21Piyok pu tene Arleng Aso alam jibadi lo-kangthir long wido, latengsi anang chok pone; manta pot arleng pensi Arleng Aso ayok champidet, anang phan konbak kaphere meme do; labang arlengke kiplangple detsi akime kido.”
Arnam Abhok Kapangning
(Mot. 26:26-29; Luk. 22:14-23; 1 Ko. 11:23-26)
22Anali chojunsi kido amun, anang him eno, bor-eh kihang aphel anang ingbengo, bangpo analiyok pilo, aro pulo, “Enot; labang ke ne abangpo.” 23Laparake anang kijun alanghan eno, aro kardom kapajir aphel anang bangpo analiyok pilo, aro anali ahuwit bangpo para juno. 24Anang analiyok pulo, “Lalo Angton along ne wi, lake ako-ong aphan kepsi lilo. 25Khanangsi ne nali thando, Arnam-alongri long akimi athe alang junje leng arniyok, minon para rihanthu athe alang aro junjelo.”
Pitor po Hoi Kichoche Alam Kithanphrot
(Mot. 26:30-35; Luk. 22:31-34; Jhn. 13:36-38)
26La-amun para anali pingkit alun lunsi, anali Olip anglong yok olephlungsi damo. 27Aro Jisu analiyok pulo, “Nali ahuwit tikang detne; piyok pu tene lo-kangthir long wido, ne khokhre yok paduknge, aro bherabik hel chisamphru detne. 28Manta ne kiburphak aphel, ne nali ngo-ngosi Galili ayok dame.” 29Pitor po anangyok pulo, “Ahuwit tikang det, yong ta neke tikangke ye; 30Jisu anangyok pulo, “Khanangsi ne nang thando, labang anuwe, wopo bar-ni kiku ango, nang bar-thom neyok kachobel alam puye.” 31Manta anang ingtangdut si pulo, “Ne nangpen thidun hlong yongta, ne nangyok chobelbe ye.” Aro anali lamat matsi abangten ta pulo.
Jisu Gethsemani Long Kapingkit
(Mot. 26:36-46; Luk. 22:39-46)
32Anali Gethsemani kipu athemyok damo; aro Jisu anang adun helyok pulo, “Ne kapingkit amun, nali holek iningne do.” 33Anang pen Pitor po aro Jems po aro Johon po yok chipono aro kaphere aro aneng ihik-bihik chiplango. 34Aro anang analiyok pulo, “Ne jiu kithibo ateng aduk wangjin do; holek long donot, aro inghongot.” 35Aro bekso ango damsi, anang lungle athak tongki lo aro lake labang aduk apor un pu tene anang para tereksi kapangwe aphan, pingkit si pulo, 36anang pulo, “Apa, nang ahuwit katiki pachok un; bangpo alanghan ne para terek ngot; yongta, ne kar-ih ateng kalek, manta nang kar-ih ateng.” 37Anang wango, aro ahuwit amek jangphril kido thekngo; aro anang Pitor po yok pulo, “Simon, nangmek jangdo ma? Ghonta isi inghongke do un-eh yongo ma? 38Inghongne do aro pingkit, nang hongjat apor wangwe ye; jiuli ke ar-ihman, manta a-ok long un-eh.” 39Aro Jisu chiterek si damo aro lamat mat alamthesi, pingkit no. 40Aro anang wang phakngo, aro analiyok mekjangsi kido thekngo, piyok pu tene anali ami-ih hel kardipsi kido; aro anali pot si kithan dunnange kido, chithan un-eh yongo. 41La aphel anang phong-thomyok wango aro analiyok pulo, “Nali minon hok amek jangsi aro sangsi dolang ma? Dor ro! Apor wang hlengo; Arleng Aso yok papi arleng arideng champilo. 42Thurnot, ili dam minang. Langot, neyok kichampi po adung wang hlengo.”
Jisu yok Kachobel Aro Kinep
(Mot. 26:47-56; Luk. 22:47-53; Jhn. 18:1-11)
43Lajong jongsi, anang kithan jong apor, Judas po bang kere-hini asitem ihutpo, wang hlengo; aro anangpen bor-bangthe, aro kanong paklang hel, aro sar-lar para nok aro kalbong ki-en amokha arleng hel wango. 44Minonke anangyok kichampi arlengpo analiyok isi atewa pisi, kipu, “Ne kimung arleng polo, anangyok nepmot, aro mesone komrenne ponot!” 45Lasi konam anang wango, anang photsi Jisu adung damo aro pulo, “Paklang po” aro, anangyok mungo. 46Laparake anali anang abanglong otno, aro anangyok nepmo. 47Manta anali adung kido ihutpo anang nok hungthero aro bor-bangthe hel aturu ihut yok dolsetsi, anang ano rot hlet no. 48La-amunsi Jisu analiyok pulo, “Nali ke nokjir aro tokok ensi ihut kanghu kinep badisi wangdo ma? 49Arnita ne nalipen Arnam ahem along lamthe kipaklang hong, aro nali la-apor ke nepne yongo. Manta bangpo lo-kangthir alamthe kipachok aphansi chiplango.” 50Lapor anali ahuwit anangyok tikangsi kat phlungo. 51La-apor riso ihut anang kang-ar ape, abang long chi-ik loksi aphel phel kidun. Anali anangyok ta nepmo, 52manta anang kang-ar ape, tikangsi abang darang klungsi kat dungo.
Jisu Rongbong Amel Ango
(Mot. 26:57-68; Luk. 22:66-71; Jhn. 18:12-14,19-24)
53Anali Jisu yok bor-bangthe aghaipo adung pono; aro ahuwit bor-bangthe, aro akisar hel aro kithek-kire abang ta wang chingrumo. 54Pitor po ta, kaholo do si anang aphel-phel, bor-bangthe ahem adungyok duno, aro kihon abang pen me chinghipsi kido. 55Minonke bor-bangthe pen ahuwit melpe dungsi Jisu yok kimari ado kipi aphan neng kachiri akangho alam hakhi arwalo, manta pahlong un-eh yongo. 56Ako-ong arleng akijolsi anangyok ado kipi hakhi pilo, manta analihel hakhi chikengke yongot. 57Angkhan arjapsi Jisu yok asisiksi hakhi pisi pulo, 58“Ari pen kikem labang Arnam ahem hane panghosi, nithom yok, aripen kikemke prek ihum keme, anang ladi alam kipu arjulo!” 59Manta, holek ta anali hakhi hel chingbar un-eh detno. 60Aro aghai bor-bangthepo analingo arjapsi, Jisu yok arjulo, “Nang ke isi alam ta thanthe ma? Nang panghosi anali pot hakhi pido?” 61Manta anang isi alam pupesi, dositsi dolo. Bor-bangthepo anangyok arju phakngo, “Nang ihut bor-eh kichok Aso Khristo ma?” 62La-amun Jisu pulo, “Ne lo; aro nali Arleng Aso yok apharan kithechotpo ancho-ari abak iningsi kido theknge, aro suneng athak inghun pen kiwang thek hlonge.” 63La-amun aghai bor-bangthepo abithang achol ingseksi pulo, “Ili minon hok pot hakhi kanange dolang? 64Nali Arnam ayok kapatharak arjulo! Nali pot pachipdo?” La-amun ahuwit anangyok kithi nango pusi adai kolo. 65Adhok ke anang bang along ingthi ingthok ngo, aro anang mahang dipsi anangyok tengsi pulo, “Arnam alam turkinot!” Aro kihon sonturi abang ta anang ang-om ardep mo aro sap pono.
Pitor po Jisu yok Hoikicho-che
(Mot. 26:69-75; Luk. 22:54-62; Jhn. 18:15-18,25-27)
66La-apor Pitor po aling sotal along kido, aro aghai bor-bangthepo aturu arloso pe wango. 67Konam Pitor po yok me chinghipsi kido thekngo, anangyok lang-etsi pulo, “Nang ta la Najaret Jisu pen kido,” 68manta anang chobelsi, pulo, “Nang pot nethan do, lale nang potsi pudo ne abhu hlonghle yong.” Aro anang sotal aghai ayok olesi damo. Laparake wo alopo kulo. 69Aro labang so-arloso pe, anangyok theksi, adung arjapsi kido abangyok puphakngo, “Bang arlengpo ta anali sitem ihut.” 70Manta anang bangpo chobel phakngo; laparake bekso aphel ke adung arjapsi kido abang Pitor poyok pulo, “Khanangsi anali sitem nang ihut; piyok pu tene nang Galili arleng.” 71Manta anang hao pisi aro hopot chosi pulo, “Nali pot arlengpo alam pudo, ne anangyok chinine pen.” 72La-aporsi phong-ni yok wo alopo kulo. Laparake Jisu anangyok kipu alam, “wopo phong-ni kiku ango nang neyok phong-thom chobele,” labang aneng chipurkilo. Aro anang neng doho-ongo aro suru ching-ak ngo.
હાલમાં પસંદ કરેલ:
MARK 14: AMRI-BSI
Highlight
શેર કરો
નકલ કરો
Want to have your highlights saved across all your devices? Sign up or sign in
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.
