Genesis 3
3
Nan Login Di Sinmokilan Di Ipogaw
3:1-24
1Nan oweg nan kasikapan isnan atap ay animalis ay binoliw nan apo ay Dios. Isnan esay agew sinoot nan oweg isnan babai, “Ay tet-ewa ay inbagan Apo Dios en adiyo kankanen nan begas nan kak-aiw isnan galdin?” 2Dat kanan san babai, “Egay. Mabalin kano ay kanenmi nan begas di kak-aiw isnan galdin malaksig nan esay kaiw isnan tengana. 3Inbagan Apo Dios en adimi kankanen wenno gen-gen-an nan begas nan deey ay kaiw tay no ikkanmi et matey kami.” 4Dat kanan san oweg, “Baken kadi tet-ewa ay matey kayo. 5Aped kinwanin Apo Dios di tay getkena ay no kanenyo di et komaneg kayo ken siya ay mangtek is gawis ya ngawi.”
6Inilan san babai ay gawigawis san deey ay kaiw ya gawigawis gedan nan begasna is makan danat nemnemen ay kagagasing nan menbalin is masilib isonga dat pomoting et kanena danat agtan si asawana danat abes kanen. 7Idi kinanda di dadat manalikna ay ninlalabosda dadaet menbinain isonga dadat mendait is tobon di kaiw et igatengda.
8Issan nalabiyana dadat dengngen ay mendad-aan nan apo ay Dios isnan galdin. Dadat men-gago isnan kak-aiw 9ngem dat bogawan nan apo ay Dios san lalaki ay mangwani, “Intoka?” 10Danat kanan, “Dinngek ay wadaka isnan galdin isonga inmegyatak daket men-gago tay ninlalabosak.” 11“Sino nan nangibaga en ninlalaboska? Ay kinanmo san begas di kaiw ay inbagak en adim kankanen?” sinoot Apo Dios. 12Dat kanan san lalaki, “Nan babai ay inyalim ken sak-en nan nangyali isnan begasna daket kanen.” 13Dat sooten nan Apo ay Dios issan babai, “Ay tay dakan inikkan di?” Danat kanan, “Nan oweg nan nangbali ken sak-en en kanek di.”
14Dat kanan nan apo ay Dios issan oweg, “Madosaka gapo isnan inikkam et kedengka isnan am-in ay matmatago nan maikkanan nan naay. Menlogi id wani et menbob-ooska isnan lota engganay mateyka. 15Menbosowek dakayo isnan babai et nan ap-ona ya nan ap-om et awnit menbibinosoda gedan. Tegtegen di ipogaw nan toktokmo dakapay abes bangten nan mokodna.” 16Danat kanan isnan babai, “Paad-adowek nan ligatmo isnan kalilitonam ya nan sakit isnan omanakam. Ngem olay no siya di et laylaydem kayet nan asawam ya siya nan apom.” 17Danat kanan isnan lalaki, “Pinatim nan asawam dakapay kinan nan inbagak en adiyo kankanen. Gapo isnan inikkam et baosek nan lota isonga masapol ay menligatka ay men-obla isnan lota enggana isnan katatagowam tasiyay waday ommaam is kanenyo 18tay awnit tomobo nan loglogam ya sibsibit et awnit nan kankanenyo et logam. 19Masapol ay menling-etka ay men-obla isnan lota esapay waday kanenyo engganay somagongka isnan lota ay nagapowam. Tay nan lota nan nagapowam et awnitka kasin menbalin is lota no mateyka.”
20Nan ngadan san lalaki et Adam et nginadnana nan asawana is Eva#3:20 Nan ngadan san lalaki ay Adam et siya nan pangwanida isnan ipogaw ya nan ngadan san babai ay Eva et siya nan pangwanida isnan biyag. tay siya nan inan nan am-in ay ipogaw.
21Ninsapo nan apo ay Dios is badon da Adam ken Eva isnan kodil di animal. 22Dat kanan nan apo ay Dios, “Id wani kaneg inawat san ipogaw sak-en isnan mangtekanda isnan gawis ya ngawi isonga masapol ay adida maipalobos ay kanen nan begas nan kaiw di biyag ta adida matatago ay eng-enggana.” 23Isonga dat pakaanen nan Apo ay Dios daida isnan galdin id Eden danat pakaykayen daida isnan lota ay nagapowanda. 24Et isnan batog di balaan di agew isnan galdin et inpaeyna nan babaana ay makwani en kerubim ya nan menposposipos ay menbidbidang ay kaneg ispada nan ilana. Siya dadi nan mangiyadi isnan somagsag-en isnan kaiw di biyag.
હાલમાં પસંદ કરેલ:
Genesis 3: xnn
Highlight
શેર કરો
નકલ કરો
Want to have your highlights saved across all your devices? Sign up or sign in
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.