Akt de Zapot 7
7
Diskour Etyenn
1Gran-Pret ti demann Etyenn, “Eski sa i vre?”
2Etyenn ti reponn: Mon bann frer e mon bann papa! Ekout mwan. Bondye dan son mazeste ti aparet avek nou zanset Abrahanm, kan i ti pe reste dan Mezopotami, avan ki i ti al reste Harann. 3I ti dir li: Kit ou pei ek ou fanmir e al dan sa pei ki mon pou montre ou#7.2-3 War Zen 12.1..
4Alor, Abrahanm ti kit pei bann Kaldeen e i ti al reste Harann.
Apre lanmor son papa, Bondye ti fer li sorti Harann pour vin reste la kot zot pe reste ozordi#7.4 War Zen 11.31; 12.4.. 5Bondye pa ti donn li okenn propriyete, pa menm en pti morso later pour met son lipye, me i ti promet pour donn li ek son desandans, sa pei. Kan Bondye ti fer sa promes, Abrahanm ti napa zanfan#7.5 War Zen 12.7; 13.15; 15.18; 17.8..
6La sa ki Bondye ti dir li: Ou desandans pou viv dan en pei etranze, koman lesklav e zot pou ganny maltrete pandan 400 an. 7Me mon pou pas mon zizman lo sa nasyon ki'n fer zot lesklav. Apre, zot pou kit sa pei e zot pou vin ador mwan isi dan sa pei#7.6-7 War Zen 15.13-14; Egz 3.12..
8Bondye ti fer en lalyans avek Abrahanm e donn li sirkonsizyon koman en siny. Alor, Abrahanm ti sirkonsi son garson Izaak, wityenm zour apre son nesans. Izaak ti fer parey: I ti sirkonsi Zakob, e Zakob ti sirkonsi nou douz patriars#7.8 War Zen 17.10-14; 21.4..
9Nou bann patriars ti zalou Zozef#7.9 War Zen 37.11,28; 39.2,21., e zot ti vann li koman lesklav pour ganny anmennen Lezip. Me Bondye ti avek li. 10I ti delivre li dan tou son bann difikilte. Bondye ti fer Zozef#7.10 War Zen 41.39-41. ganny faver Faraon, lerwa Lezip, ki ti etabli li koman gouverner Lezip ek son pale.
11Plitar, ti annan en gran lafanmin dan pei Lezip#7.11 War Zen 41.57. antye ek pei Kanaan ki ti fer nou bann zanset soufer en kantite. Zot pa ti ganny nanryen pour manze.
12Kan Zakob ti tande ki ti annan dible Lezip#7.12 War Zen 42.1-2., i ti anvoy nou bann zanset pour en premye fwa. 13Kan zot ti al dezyenm fwa, Zozef ti fer son bann frer konn li, e konmsa, Faraon ti konn bann fanmir Zozef#7.13 War Zen 45.1,16.. 14Alor, Zozef ti anvoy sers son papa Zakob ek tou son fanmir; ti annan an tou, 75 dimoun. 15Zakob#7.15 War Zen 46.1-7; 49.33. ti al reste Lezip kot i ti mor, e kot nou bann zanset osi ti mor. 16Zot lekor ti ganny transporte Sikenm e ganny antere dan en latonm ki Abrahanm ti'n aste pour en sonm larzan avek bann garson Hamor#7.16 War Zen 23.3-16; 33.19; 50.7-13; Zoz 24.32..
17Kan letan ti pros pour Bondye realiz son promes ki i ti'n fer avek Abrahanm, nou pep ti'n ogmante e vin nonbre dan Lezip. 18Dan sa letan, ti annan en nouvo lerwa Lezip ki pa ti'n konn Zozef#7.18 War Egz 1.7-8.. 19Sa lerwa ti tronp nou pep, maltret nou zanset e obliz zot abandonn zot bann pti baba e les zot mor.
20Se dan sanmenm sa lepok ki Moiz ti ne. Moiz ti en zoli baba ki Bondye ti kontan. I ti ganny sonnyen pandan trwa mwan dan lakaz son papa. 21Kan i ti ganny abandonnen, fiy Faraon ti ranmas li, e sonny li koman son prop garson. 22Alor, Moiz ti ganny edike dan tou sa ki bann Ezipsyen ti devre konnen. I ti vin en zonm byen enportan, par parol koman par aksyon.
23Kan Moiz ti ganny 40 an, i ti deside pour al war son bann frer Izraelit. 24Kan i ti war en Ezipsyen pe maltret enn parmi zot, i ti pran defans sa zonm ki ti pe ganny maltrete. Pour vanze, i ti touy sa Ezipsyen. 25I ti mazinen ki son bann frer Izraelit ti ava konpran ki Bondye ti pou servi li pour delivre zot; me zot pa ti konpran.
26Lannmen, Moiz ti war de Izraelit pe lager e i ti oule met lape ant zot. I ti dir zot: Mon bann zanmi! Zot frer, akoz zot pe maltret kanmarad? 27Me sa enn ki ti pe fer ditor son kanmarad ti pous Moiz. I ti dir li: Lekel ki'n etabli ou koman nou sef e ziz? 28Eski ou oule touy mwan parey ou ti touy sa Ezipsyen yer?
29Kan Moiz ti antann sa bann parol, i ti sove e i ti al viv dan pei Madyann, la kot i ti ganny de garson.
30Anviron 40 an plitar, dan dezer pre avek Montanny Sinai, en lanz ti aparet avek Moiz dan laflanm en zarbis ki ti pe brile. 31Moiz ti etonnen ler i ti war en tel vizyon. I ti al pli pre pour gete, e i ti antann lavwa Senyer ki ti dir: 32Mwan Bondye ou bann zanset, Bondye Abrahanm, Izaak ek Zakob! Moiz ti konmans tranble e i pa ti oze gete.
33Senyer ti dir li: Tir ou sandal, akoz landrwa kot ou pe debout i sen. 34Mon'n war soufrans mon pep dan Lezip. Mon'n antann zot soupir e mon'n desann pour delivre zot. Vini! Aprezan, mon pou anvoy ou Lezip#7.34 Pour verse 30-34, war Egz 3.1-10..
35Sa Moiz ki bann Izraelit ti rezete, kan zot ti dir li: Lekel ki'n etabli ou koman sef e ziz? Bondye ti anvoy li koman sef e liberater, par lentermedyer sa lanz ki ti aparet avek li dan sa zarbis.
36Pour li fer bann Izraelit sorti Lezip, Moiz ti fer serten siny ek mirak dan sa pei, dan lanmer Rouz e pandan 40 an dan dezer#7.36 War Egz 7.3; 14.21; Nm 14.33..
37Se sa menm Moiz ki ti dir avek bann Izraelit: Bondye pou anvoy zot en profet parey mwan, ki pou sorti parmi zot prop pep#7.37 War Det 18.15, 18.. 38Li menm ki ti la avek pep Izrael ki ti'n rasanble dan dezer. I ti la avek nou bann zanset e avek lanz ki ti koz avek li lo montanny Sinai. I ti resevwar bann parol lavi pour transmet avek nou#7.38 War Egz 19.1—20.17; Det 5.1-33.. 39Nou bann zanset ti refize obei li. Zot ti rezet li, e dan zot leker, zot ti oule retourn Lezip#7.39 War Nm 14.3.. 40Alor, zot ti dir avek Aaron: Fer bann bondye pour nou, ki pou mars devan nou. Nou pa konnen ki'n devenir avek sa Moiz ki'n tir nou Lezip#7.40 War Egz 32.1..
41Alor, zot ti fabrik en zenn toro; zot ti ofer li sakrifis; e zot ti fete, selebre avek sa ki zot prop lanmen ti'n fabrike#7.41 War Egz 32,2-6.. 42Me Bondye ti tourn ledo kont zot, e les zot ador bann zetwal dan lesyel, parey in ekri dan liv bann profet:
Pep Izrael! Eski pour mwan
ki zot ti ofer bann sakrifis lape
ek sakrifis konplet,
pandan 40 an dan dezer?
43Zot ti anmenn latant Molek,
zot Bondye, ek zetwal zot bondye Refann,
sa bann zidol ki zot ti fer pour adore.
Pour sa rezon, mon pou deport
zot lo lot kote Babilonn.
44Nou bann zanset ti annan Latant Temwannyaz avek zot dan dezer. Sa Latant ti'n ganny fer egzakteman parey Bondye ti'n ordonn Moiz. Annefe, Bondye ti'n dir Moiz reprodwir sa model ki i ti'n war. 45Sa Latant ti ganny transmet avek nou bann zanset ki ti vin apre. Plitar, zot ti anmenn li avek zot, kan avek Zozye, zot ti pran pei bann nasyon ki Bondye ti fer disparet devan zot. Sa Latant ti reste ziska lepok David#7.45 Egz 25.9,40; Zoz 3.14-17., 46ki ti'n resevwar faver Bondye. I ti demann permisyon pour fer en lakaz pour Bondye Zakob#7.46 War 2 Sam 7.1-16; 1 Kro 17.1-14.. 47Me se Salomon ki ti fer en lakaz pour Bondye.
48Me parey profet i deklare, Bondye ki dan lesyel, pa reste dan lakaz konstri par zonm:
49Lesyel i mon tronn,
Senyer i deklare.
Later i marspye anba mon lipye.
Ki kalite lakaz ou kapab konstri pour mwan?
Kote mon pou kapab repoze?
50Pa mwan menm ki'n kree tousala#7.50 Eza 66.1-2.?
51Zot bann zonm antete; zot leker ek zot zorey pa'n ganny sirkonsi. Zot fermen avek mesaz Bondye. Zot touzour pe reziste Lespri Sen. Zot parey zot bann zanset. 52Lekel profet ki zot bann zanset pa'n persekite? Zot in touy tou bann ki'n anons larive sa enn ki Zis. Aprezan, li menm ki zot in trai e ki zot in touye. 53Zot ki'n resevwar Lalwa Bondye par lentermedyer bann lanz, zot pa'n obei sa Lalwa.
Lanmor Etyenn
54Kan zot ti antann sa bann parol, bann manm Konsey ti pran en gran lakoler, e zot ti grens zot ledan kont Etyenn. 55Me ranpli avek Lespri Sen, Etyenn ti lev lizye e fikse lesyel. I ti war mazeste Bondye, avek Zezi pe debout lo kote drwat Bondye. 56I ti dir, “Mon war lesyel ouver, e Fis-de-Lonm pe debout lo kote drwat Bondye.”
57Alor, zot ti konmans kriye; zot ti bous zot zorey e zot tou ansanm, zot ti sot lo li. 58Zot ti trenn li an deor lavil e konmans saboul li avek ros pour touy li. Bann temwen ti kit zot lenz pour veye, avek en zennonm ki ti apel Sol. 59Pandan ki i ti pe ganny saboule, Etyenn ti fer sa lapriyer, “Senyer Zezi! Resevwar mon lespri!”
60I ti tonm azenou e kriye avek en lavwa for, “Senyer! Pardonn zot pour sa pese!”
Apre sa bann parol, Etyenn ti mor.
હાલમાં પસંદ કરેલ:
Akt de Zapot 7: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
