Akt de Zapot 11
11
Pyer devan Legliz Zerizalenm
1Bann zapot ek bann frer dan Zide ti tande ki bann non-Zwif osi ti'n aksepte Parol Bondye. 2Alor, kan Pyer ti retourn Zerizalenm, bann krwayan ki ti'n ganny sirkonsi, ti kritik li. 3Zot ti dir li, “Akoz ou'n antre dan lakaz dimoun ki pa sirkonsi, e manz avek zot?”
4Alor, Pyer ti rakont zot an detay tou sa ki ti'n pase, 5“Mon ti dan lavil Zope e mon ti pe priye kan mon ti ganny en vizyon. Mon ti war en lobze pe desann: En keksoz koman en gran nap atase par son kat kwen sorti dan lesyel e desann kot mon ti ete. 6Mon ti get byen ladan e mon ti war zannimo kat lapat, bebet feros, reptil ek zwazo. 7Mon ti antann en lavwa ki ti dir mwan: Pyer! Leve, touye, e manze.”
8Mon ti reponn, “Non Senyer! Zanmen keksoz enpir in deza antre dan mon labous.”
9Me sa lavwa sorti dan lesyel ti dir en dezyenm fwa: Pa apel enpir sa ki Bondye in pirifye.
10Sa ti ariv pandan trwa fwa. Apre, tou ti remont dan lesyel.
11Dan sa menm moman, trwa zonm ti ariv kot lakaz kot nou ti ete. Zot ti'n ganny anvoye sorti Sezare pour vin kot mwan. 12Lespri Sen ti dir mwan al avek sa bann zonm san okenn ezitasyon. Sa sis frer ki mon'n anmenn isi ti akonpanny mwan Sezare e nou tou, nou ti antre dan lakaz Korney.
13Sa zonm ti rakont nou koman i ti war dan son lakaz, en lanz ki ti pe debout e ki ti dir li: Anvoy detrwa zonm Zope pour al sers Simon ki osi apel Pyer. 14I ava anons ou mesaz Bondye ki pou sov ou avek tou ou fanmir.
15Letan mon ti'n konmans koze, Lespri Sen ti desann lo zot tou, parey i ti desann lo nou o konmansman.
16Alor, mon ti rapel parol ki Senyer ti dir: Zan ti batiz avek delo, me zot pou resevwar batenm dan Lespri Sen#11.16 War 1.5..
17Si Bondye in ofer zot menm kado ki i'n donn nou kan nou ti krwar dan Senyer Zezi-Kri, ki mwan mon ete pour kapab al kont Bondye?
18Apre ki zot ti'n antann sa bann parol, zot ti reste trankil e zot ti rann glwar Bondye. Zot ti dir: Alor i vre ki Bondye in donn bann ki pa Zwif, posibilite pour sanz zot fason viv e resevwar sa nouvo lavi!
Legliz Antyos
19Persekisyon#11.19 War 8.1-4. ki ti swiv lanmor Etyenn ti obliz bann krwayan pour disperse. Serten ti al ziska Fenisi, zil Sip ek Antyos. Me zot ti anons mesaz Bondye zis avek bann Zwif. 20Sepandan, detrwa krwayan ki ti sorti Sip ek Sirenn ti vin Antyos. Zot ti osi koz avek bann Grek e anons zot Bonn Nouvel lo Senyer Zezi. 21Pwisans Senyer ti avek zot: En gran kantite dimoun ti krwar e aksepte tourn ver Senyer.
22Sa nouvel ti ariv dan Legliz Zerizalenm. Alor, zot ti anvoy Barnabas Antyos. 23Kan i ti ariv Antyos, i ti war ki mannyer Bondye ti'n beni son pep. I ti kontan e i ti ankouraz zot pour reste fidel anver Senyer. 24Annefe, Barnabas ti en zonm bon, ranpli avek Lespri Sen; i ti annan lafwa. En kantite dimoun ti krwar e aksepte swiv Senyer.
25Alor, Barnabas ti al Tars pour al rod Sol. 26Kan i ti'n war li, i ti anmenn li Antyos. Zot ti pas enn an ansanm avek sa Legliz e zot ti ansenny en kantite dimoun. Se la Antyos ki pour premye fwa, bann krwayan ti ganny apele kretyen.
En Zes Solidarite
27Dan sa letan, serten profet ti sorti Zerizalenm pour al Antyos. 28Enn parmi zot ki ti apel Agabis, ti leve. Gide par Lespri, i ti anonse ki pou annan byento en gran lafanmin lo later antye. Sa ti arive dan lepok kan Klod ti lanperer#11.28 Klod ti senkyenm lanperer Ronm. I ti renny 41-54 apre Zezi-Kri. 29Alor, bann disip ti deside dapre zot mwayen, anvoy en kontribisyon pour bann frer ki ti reste dan Zide. 30Zot ti anvoy zot don kot bann ansyen dan Zide par lentermedyer Barnabas ek Sol.
હાલમાં પસંદ કરેલ:
Akt de Zapot 11: BSK
Highlight
શેર કરો
નકલ કરો
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
