Maaku 9
9
1Ŋɔi Jesu í sɔ̃ ŋa má í ni, ntɔ ntɔ, inɛ ŋa iyi à wa ihɛ̃ si nsɛi, gɔgɔ nŋa ŋa aa yɛ bommai Ilaaɔ̃ wa naa do gbugbã a bɛi a ku.
Arai Jesu í daana
(Cɔ Matie 17:1-13; Luku 9:28-36)
2Si anyii ajɔ mɛɛfa Jesu í kpe Piɛɛ do Zaaki do Zãa í nya ŋa ikã nɔ à koo à gũ iri kuta nla gɔ aŋa duusɔ̃ɔ. Si bɛi à waa cɔɔ ŋɔi à ba araɛ í kpaasi. 3Ŋɔi jaaɛ ŋa wa daana jiida í fũuta pai pai hee inɛ gɔ kù wɛɛ si andunya ihɛ̃ iyi á yɔkɔ ku fɔ acɔɛ ku fũuta bɛɛbɛ má. 4Si anyiɛ ŋɔi Elii do Moizi à faata wa à waa baa ide ku fɔ. 5Nɔ Piɛɛ í sɔ̃ Jesu í ni, Mɛɛtu, á sĩa ka maa wa ihɛ̃. Jɔ̀ ka ce ilei acɔ mɛɛta, akã titɛɛ, akã mɔ ti Moizi, akã mɔ ti Elii. 6Wa fɔ bɛɛbɛi si na iyi í jɔ̀ njo í mu ŋa hee í jɔ̀ kù mà baa bɛi á ni. 7Ŋɔi bukɔɔ gɔ í naa í bii ŋa, nɔ hai si bukɔɔu à gbɔ ide ku fɔ gɔ í ni, inɛ ihɛ̃i í jɛ amam, ǹ buu jiida jiida. I ya gbɔ ideɛ ŋa. 8Ŋɔi gbakã mɔcɔɛ ŋau à cɔ bii fei, nɔ a kù yɛ inɛ gɔ bii kù jɛ Jesu nŋu akã do aŋa taka nŋa.
9Ŋɔi à waa kita wa hai iri kutau nɔ Jesu í sɔ̃ ŋa í ni a maà sɔ̃ inɛ gɔ mii iyi à yɛ hee nŋu Amai Amanɛ koo ku nɔ ku jĩ hai si balɛ má. 10Nɔ à jirima ide iyi í sɔ̃ ŋau amma à waa bee njɛ ide à waa ni, yoomai í jɛ inɛ ku ku nɔ ku jĩ má. 11Nɔ à bee Jesu à ni, na mii í ce woo kɔ inɛ ŋa si wooda ŋau à ni Elii á tako Kirisi ku naa. 12Ŋɔi í jɛ nŋa í ni, ntɔi Eliii á tako ku naa ku teese mii fei sãa sãa. Amma kukɔi idei Ilaaɔ̃ í ni má, inɛ ŋa aa kpã Amai Amanɛ iju jiida nɔ a dondaɛ, mà iboi. 13Amma ǹ wa n sɔ̃ ŋɛ iyi Elii í naa tã, nɔ inɛ ŋa à wahalaɛ bɛi à bi, si bɛi kukɔi idei Ilaaɔ̃ wa fɔ.
Jesu í faaba ama gɔ iyi í nɛ inɛi inɔɔko
(Cɔ Matie 17:14-21; Luku 9:37-43)
14Waati iyi Jesu do mɔcɔ mɛɛta ŋau à waa to wa kɔkɔi mɔcɔ bubu ŋau, ŋɔi à yɛ zamaa nla nla gɔ í kaako ŋa, do woo kɔ inɛ ŋa si wooda gɔ ŋa iyi à waa ba ŋa kakɔɔ ku ce. 15Iyi inɛ ŋau à yɛ Jesu gbakã à biti nɔ à sɛi à koo à coo fɔɔ. 16Ŋɔi Jesu í bee mɔcɔɛ ŋa í ni, kakɔɔi mii ì waa ce iŋɛò ŋa. 17Ŋɔi si inɔi zamaau inɛ akã í jɛaa í ni, Mɛɛtu, ǹ naaɛ ama inɛmɔkɔm wa si na iyi í jɔ̀ í nɛ inɛi inɔɔko iyi í jɔ̀ ci ya fɔ ide. 18Waati iyi í dede siɛ fei í ya kɛkɛɛ ilɛi nɔ gɛlɛɛ ku ce antɔ foko ku maa ŋɔ inyi nɔ ku kasãm. Wee ǹ tɔɔ mɔcɔɛ ŋa a leleaa, amma a kù yɔkɔ. 19Ŋɔi Jesu í sɔ̃ ŋa í ni, iŋɛ hai dasi naanɛ ŋa, hee waati yoomai an maa n wa inɔ nŋɛ. Mà hee waati yoomai an maa n temuaò ŋɛ. I naam amau wa ihɛ̃ ŋa. 20Nɔ à naaɛ wa. Iyi amau í yɛ Jesu gbakã, ŋɔi inɛi inɔɔkou í yayaɛ do gbugbã, nɔ amau í cuku ilɛ wa bimbili í ce antɔ foko si gɛlɛɛ. 21Nɔ Jesu í bee baaɛ í ni, hai waati yoomai inɛi inɔɔkou ihɛ̃ í muu. Ŋɔi baau í jɛaa í ni, hai waati iyi í wɛɛ keekei. 22Nɔ inɛi inɔɔkou í nɛ dɔ̃ɔnɛi ku dasiɛ inɔ inai walakɔ inɔ inyi ku ba ku kpaa. Amma, bii aa yɔkɔ i ce ngɔgɔ, ce araare nwa, i sobi wa. 23Ŋɔi Jesu í jɛaa í ni, ì ni bii an yɔkɔ wo. Inɛ iyi í dasi naanɛ á yɔkɔ ku ce fei ndɛɛ. 24Ŋɔi gbakã baai amau í dɔ̃ anu hee lele í ni, ǹ dasi naanɛ. Sobim ku ba n maà n sika si naanɛ ku dasim.
25Iyi Jesu í yɛ akpɔi inɛ ŋau wa kɔ̃ɔsi à sɛi à waa naa bi ti nŋu ŋɔi í lasi inɛi inɔɔkou í ni, awɔ iyi ì ya dasi inɛ dekĩ ku mɔngɔ ide ku fɔ, amui ǹ ni, fita si amau nɔ i maà nyi wa siɛ má. 26Ŋɔi inɛi inɔɔkou í dɔ̃ anu nɔ í yaya amau do gbugbã í bɛi í fita. Ŋɔi amau í kasãm hee inɛ nkpɔ í ni í kui. 27Amma Jesu í mu awɔɛ í dedeɛ nɔ amau í leekĩ.
28Si anyiɛ Jesu í lɔ kpasɛ̃ gɔ, nŋu do mɔcɔɛ ŋa aŋa duusɔ̃ɔ. Ŋɔi mɔcɔɛ ŋau à beeɛ à ni, na mii í ce awa a kù yɔkɔ a kù lele inɛi inɔɔkou. 29Ŋɔi Jesu í jɛ nŋa í ni, do kutɔɔ nŋu akãi aa yɔkɔ i nyaò dimii inɛi inɔɔkou bɛ ŋa.
Jesu í nyi wa fɔ idei ikuɛ do kujĩɛ má
(Cɔ Matie 17:22-23; Luku 9:43-45)
30Si anyiɛ, Jesu do mɔcɔɛ ŋa à nɛ hai bɛ nɔ à koo à dabii dabii si ilɛi Galilee. Jesu kù bi inɛ ŋa a mà bii nŋu í wa, 31domi wa kɔ mɔcɔɛ ŋau si cio nɔ í sɔ̃ ŋa í ni, aa mu amu Amai Amanɛ a daa inɛ ŋa si awɔ. Aa kpam, amma si ajɔ mɛɛtasia an jĩ hai si balɛ má. 32Amma mɔcɔɛ ŋau a kù gbɔ yaasei ideu, nɔ à waa ce njoi ku beeɛ.
Yooi í jɛ inɛ ngbo
(Cɔ Matie 18:1-5; Luku 9:46-48)
33Ŋɔi à to wa Kapɛranumu. Waati iyi à to kpasɛ̃ ŋɔi Jesu í bee mɔcɔɛ ŋa í ni, kakɔɔi mii ì waa ce wa si kpãau bɛ ŋa. 34Ŋɔi à coko, domi hai kpãa à waa ce kakɔɔ wai aŋa duusɔ̃ɔ a ba a mà inɛ iyi í jɛ inɛ ngbo. 35Ŋɔi Jesu í buba, nɔ í kpe mɔcɔ maateeji ŋau í sɔ̃ ŋa í ni, inɛ iyi wa bi nŋu ku jɛ inɛ sinte, lafɛ̃ɛi á jɛ inɛi ankãanyii inɛ fei nɔ ku jɛ woo ce icɛi inɛ fei. 36Ŋɔi í so ama keeke gɔ í leekĩɛ si anini nŋa, nɔ í so amau si ikpaɛ, í bɛi í sɔ̃ ŋa í ni, 37inɛ iyi í gba ama keeke bɛi inɛ ihɛ̃ na irim, amui í gba. Inɛ mɔ iyi í gbam, kù jɛ amu akãi í gba, inɛ iyi í bɛm wai í gba.
Inɛ iyi kù jɛ mbɛɛ nwa inɛ nwai
(Cɔ Luku 9:49-50)
38Ŋɔi Zãa í sɔ̃ɔ í ni, Mɛɛtu, à yɛ inɛ gɔ iyi í ya maa lele inɛi inɔɔko ŋa do iriɛ, nɔ à kɔ̀a domi kù waa tooɛ kù jɛ inɛ nwa. 39Amma Jesu í jɛaa í ni, i maà kɔ̀a ŋa. Inɛ gɔ kaa yɔkɔ ku ce maamaake do irim nɔ bii í tɛkɛɛ gbakã ku fɔ laalɔm má. 40Do ntɔ, inɛ iyi kù jɛ mbɛɛ nwa inɛ nwai. 41Ntɔ ntɔ, inɛ iyi í mu nŋɛ inyi ku mɔ na irim, si na iyi í jɔ̀ ì jɛ titom ŋa, lafɛ̃ɛ kaa kua ribaɛ pai.
Idei dulum
(Cɔ Matie 18:6-9; Luku 17:1-2)
42Ŋɔi Jesu í sɔ̃ ŋa má í ni, inɛ iyi í dasi inɛ akãi ama keeke ŋa iyi à dasim naanɛu ihɛ̃ kurara, á tia a dĩa lafɛ̃ɛ alɔ gɔ si kɔ̃ɔɛ, nɔ a sɔsiɛ si tenku. 43Bii í jɛ awɔ akãɛi wa dasiɛ kurara, buu. Á tia i lɔ si kuwɛɛ iyi ci ya tã do awɔ akã do iyi aa nɛ awɔ minji fei nɔ i lɔ si inyai wahala si ina iyi ci ya ku. [ 44Tengi bɛ kokoo ku ŋɔ ara ŋa a kaa ku nɔ inau mɔ kaa ku.] 45Bii í jɛ kutɛ akãɛi wa dasiɛ kurara, buu. Á tia i lɔ si kuwɛɛ iyi ci ya tã do kutɛ akã do iyi aa nɛ kutɛ minji fei nɔ i lɔ si inyai wahala. [ 46Tengi bɛ kokoo ku ŋɔ ara ŋa a kaa ku nɔ inau mɔ kaa ku.] 47Nɔ bii í jɛ iju akãɛi wa dasiɛ kurara, nyaa. Á tia i lɔ si bommai Ilaaɔ̃ do iju akã do iyi aa nɛ iju minji fei nɔ i lɔ si inyai wahala. 48Tengi bɛ kokoo ku ŋɔ ara ŋa a kaa ku nɔ inau mɔ kaa ku.
49Ntɔ ntɔ si bɛi à ya fãsi iŋa fei imu, bɛɛbɛ mɔi inɛ fei á yɛ ijuukpã iyi í yɛ bɛi ina ku cɔ laakaiɛ.#9:49 Cɔ Ezekiɛli 43:24.
50Imu mii ncɛɛi, amma bii didɔ̃i imu í ku, mii aa dasi i jɔ̀ ku dɔ̃ má ŋa. Iŋɛ fei í sĩa i yɛ bɛi imu ŋa, nɔ i maa gbɔ si njɛ ŋa.
હાલમાં પસંદ કરેલ:
Maaku 9: MKL
Highlight
શેર કરો
નકલ કરો
Want to have your highlights saved across all your devices? Sign up or sign in
2021, SIM International et UEEB
