Maaku 10
10
Jesu wa fɔ idei njɛ ku kɔ̀i abo do mɔkɔ
(Cɔ Matie 19:1-12; Luku 16:18)
1Ŋɔi Jesu í nɛ hai bɛ í bɔ ilɛi Zudee. Si anyiɛ nɔ í kua í bɔ ikpa icei idoi Zuudɛ̃ɛ. Ŋɔi zamaa gɔ í tɔtɔɔ kɔkɔɛ má, ŋɔi í lɔsi ku kɔ nŋa si cioi idei Ilaaɔ̃ si bɛi í nɛ dɔ̃ɔnɛi ku ce.
2Ŋɔi Farisi gɔ ŋa à naa bi tɛɛ ku ba a cɔ laakaiɛ, nɔ à beeɛ bii í jɛ amanɛ í nɛ kpãa ku kɔ̀si aboɛ. 3Ŋɔi Jesu í jɛ nŋa í ni, si ideu bɛ, wooda yoomai Moizi í kɔ nŋɛ wo. 4Ŋɔi à ni, Moizi í ni, bii ì waa kɔ̀si aboɛ aa ceaa tiai njɛ ku kɔ̀i i bɛi i kɔsiɛ. 5Ŋɔi Jesu í sɔ̃ ŋa í ni, na idɔ ku le nŋɛi í jɔ̀ Moizi í kɔ nŋɛ bɛɛbɛ. 6Amma hai sinte, waati iyi Ilaaɔ̃ í taka andunya, í ce inɛmɔkɔi do inaabo.#10:6 Cɔ Kusintii Andunya 1:27; 5:3. 7Na nŋu, mɔkɔ á jɔ̀ iyeò baaɛ nɔ nŋu do aboɛ a maa wɛɛ 8nɔ aŋa minji fei a baa a jɛ ara akã. Si bɛɛbɛ a kù jɛ aŋa minji má, ara akã dei à jɛ.#10:8 Cɔ Kusintii Andunya 2:24. 9Na nŋu, amanɛ ku nɛ ku fɛɛfɛ mii iyi Ilaaɔ̃ í tɔtɔɔ.
10Iyi í fɔ bɛɛbɛ í tã ŋɔi à bɔ kpasɛ̃ nɔ mɔcɔɛ ŋau à waa beeɛ ide si ide akãu má. 11Ŋɔi Jesu í sɔ̃ ŋa í ni, inɛ iyi í kɔ̀si aboɛ nɔ í so mmuɛ dulum nii í ce bi abo sinteu si na iyi í jɔ̀ í ce sakara. 12Bɛɛbɛ mɔi bii inaabo í kɔ̀ mɔkɔɛ nɔ í so mɔkɔ titɔ̃ í ce sakarai.
Jesu í weea ama keeke ŋa
(Cɔ Matie 19:13-15; Luku 18:15-17)
13Ŋɔi inɛ ŋa à gbã ama keeke ŋa à naaa Jesu wa ku lu ŋa. Amma mɔcɔɛ ŋau à waa lasi inɛ ŋa iyi à naaò ŋa wa. 14Iyi Jesu í yɛ mii iyi à waa ceu, ŋɔi idɔɛ í kɔ̃, í sɔ̃ ŋa í ni, i jɔ̀ amu ŋau a naa bi tom, i maà ganji ŋa, domi bommai Ilaaɔ̃ í jɛ ti inɛ ŋa iyi à jɔ ŋa. 15Ntɔ ntɔ, inɛ iyi kù waa sũa Ilaaɔ̃ iri ilɛ bɛi ama keeke, kaa lɔ si bommai Ilaaɔ̃ pai. 16Ŋɔi í so amu ŋau si ikpaɛ í lesi aŋa fei awɔ, nɔ í wee nŋa.
Idei ilu fia gɔ
(Cɔ Matie 19:16-30; Luku 18:18-30)
17Ŋɔi Jesu í dasi kpãa. Iyi wa nɛ, ŋɔi inɛ gɔ í sɛi wa í naa í gulɛ si wajuɛ í ni, Mɛɛtu, awɔ inɛ ncɛɛ, mii an ce n baò kuwɛɛ hai tã. 18Ŋɔi Jesu í beeɛ í ni, na mii í ce ì waa kpem inɛ ncɛɛ. Inɛ gɔ kù wɛɛ iyi í jɛ ncɛɛ bii kù jɛ Ilaaɔ̃ nŋu akã. 19Ì mà sãa sãa mii iyi wooda í ni. Mii iyi wooda í ni wee. Maà kpa inɛ, maà ce sakara, maà ce ile, maà jɛ sɛɛda ibo si gãmɛi inɛ gɔ, maà takii inɛ gɔ, jirima iyeò baaɛ.#10:19 Cɔ Kufita 20:12-16; Wooda ku kɔsi 5:16-20. 20Nɔ inɛɛu í ni, Mɛɛtu, ǹ wa n jirima iyi bɛ fei tã hai keekem. 21Ŋɔi Jesu í cɔ inɛɛu do kubi nɔ í ni, í gbeɛ mii akã. Koo i ta mii iyi ì nɛ fei nɔ i kpɛ̃a ilu are ŋa fiau. Bii ì ce bɛɛbɛ aa ba amani jiida lelei Aɔ̃. Si anyiɛ nɔ i naa i toom. 22Ide iyi Jesu í fɔu kù dɔ̃a inɛɛu si. Nɔ si bɛi í jɛ ilu amani nla nla, í sinda wa nɛ do inɔ ku fɔ.
23Ŋɔi Jesu í cɔ inɛ ŋa iyi à kaakoɛu nɔ í sɔ̃ mɔcɔɛ ŋa í ni, á gaabua ilu fia ku lɔ tengi bii Ilaaɔ̃ í jɛ bommaɛ. 24Ŋɔi mɔcɔ ŋau à biti do ide iyi Jesu í fɔu. Nɔ Jesu í ni má, kpaasim ŋa, á gaabu hee ku caa inɛ ku jɛsi Ilaaɔ̃ ku jɛ ilaaluɛ. 25Á faalaa kpookpo ku lɔ si iwoi abɛɛ do iyi ilu amani á lɔò tengi bii Ilaaɔ̃ í jɛ bommaɛ. 26Ŋɔi mɔcɔɛ ŋau à biti hee í caa nɔ à bee njɛ à waa ni, bii bɛɛbɛi nɔ yooi á ba faaba. 27Ŋɔi Jesu í cɔ ŋa tii, nɔ í ni, bi amanɛ ŋai kaa ce, amma bi Ilaaɔ̃ á ce, domi Ilaaɔ̃ á yɔkɔ ku ce fei ndɛɛ.
28Ŋɔi Piɛɛ í sɔ̃ɔ í ni, wee à jɔ̀ mii fei tã à waa tooɛ. 29Ŋɔi Jesu í ni, ntɔ ntɔ, inɛ iyi í jɔ̀ kpasɛ̃ɛ wa, walakɔ igbãɛ ŋa walakɔ ifɔɛ ŋa walakɔ wecĩɛ ŋa, walakɔ iyeò baaɛ, walakɔ amaɛ ŋa, walakɔ ikoɛ ŋa na irim do na laabaau jiidau, 30baa hai si andunyau ihɛ̃ á ba mii ŋau bɛ fei ikɔ cĩɔ. Á ba kpasɛ̃ ŋa, do igbã do ifɔ ŋa do wecĩ ŋa, do iye ŋa, do amu ŋa, do iko ŋa, nɔ si antaiɛ á ba ijuukpã mɔ má. Nɔ ala á ba kuwɛɛ iyi ci ya tã. 31Amma inɛ ŋa iyi à jɛ inɛi waju ŋa si nsɛi, nkpɔ nŋa á na ku jɛ inɛi anyi ŋa nɔ inɛi anyi ŋa mɔ aa na a jɛ inɛi waju ŋa.
Jesu wa fɔ idei ikuɛ do kujĩɛ isɛ gbɛɛtasia
(Cɔ Matie 20:17-19; Luku 18:31-34)
32Nɔ Jesu do mɔcɔɛ ŋa à dasi kpãa má, nŋu takaɛ wa cua nŋa. À waa bɔ Zeruzalɛmu. Ŋɔi njo í mu mɔcɔɛ ŋau nɔ inɛ mmu ŋa iyi à waa too anyi nŋau, zigi nŋa í da. Ŋɔi Jesu í nya mɔcɔ maateeji ŋau ikã í lɔsi ku sɔ̃ ŋa mii iyi á na ku ba nŋu. 33Í ni, wee à waa bɔ Zeruzalɛmu. Bɛi aa mu amu Amai Amanɛ a dasim awɔi inɛ ngboi woo weei Ilaaɔ̃ ŋa do woo kɔ inɛ ŋa si wooda ŋa. Aa yɛ taalem a ni a kpam. Si anyiɛ nɔ a dasim si awɔi dimi mmu ŋa, 34aa yaakom nɔ a tusim antɔ, aa tɛɛm kpɔtɔɔ, nɔ a kpam. Nɔ si ajɔ mɛɛtasia an jĩ má hai si balɛ.
Kutɔɔi Zaaki do Zãa
(Cɔ Matie 20:20-28)
35Ŋɔi Zaaki do Zãa, amai Zebedee ŋa, à bɔ bi Jesu à sɔ̃ɔ à ni, Mɛɛtu, à waa bi i ce nwa mii iyi à waa tɔɔɛ. 36Nɔ í bee ŋa í ni, mii ì bi n ce nŋɛ ŋa. 37Ŋɔi à jɛaa à ni, waati iyi aa na i jɛ bomma do amboe, jɔ̀ ka buba inɛ akã awɔ njɛɛ, inɛ akã mɔ awɔ cangaɛ. 38Nɔ Jesu í ni, i kù mà mii iyi ì waa tɔɔm ŋa mɔm. Aa yɔkɔ i temuaò ijuukpã iyi an yɛ ŋa? Zaka bɛi inɛ ŋa aa kpãm iju á caa. Aa jɛsi aa ce nŋɛ dimiɛ ŋa? 39Nɔ à ni aŋa aa jɛsi. Nɔ í sɔ̃ ŋa má í ni, ntɔi, aa yɛ ijuukpã iyi an yɛ ŋa. Zaka bɛi inɛ ŋa aa kpãm iju, bɛɛbɛi aa cea iŋɛ mɔ. 40Amma kù jɛ amui an cica inɛ ŋa iyi aa buba canga do njɛm. Bi ku bubau bɛ, inɛ ŋa iyi à cea sɔɔluɛ ŋai aa buba si.
41Ŋɔi mɔcɔ mɛɛwa ŋau à gbɔ ideu nɔ idɔ nŋa í kɔ̃ si Zaaki do Zãa. 42Ŋɔi Jesu í kpe ŋa í ni, iŋɛ mɔ ì mà ŋa si andunyau ihɛ̃ ilaalu ŋa à ya maa taa inɛ nŋa ŋa gbugbãi. Nɔ inɛ ngbo nŋa ŋa mɔ a maa nyisi yiiko nŋa. 43Amma bi tu ŋɛ kaa ce bɛɛbɛ. Inɛ nŋɛ iyi wa bi nŋu ku jɛ inɛ ngbo, nŋui á jɛ woo ce nŋɛ icɛ. 44Bɛɛbɛ mɔi inɛ iyi wa bi nŋu ku jɛ woo cua nŋɛ, nŋui á jɛ arui inɛ fei. 45Nɔ baa amu Amai Amanɛ n kù naa inɛ ŋa a ceem icɛ, amma amui an ce nŋa icɛ, nɔ n na kuwɛɛm n yaò inɛ nkpɔ hai si dulum.
Jesu í jɔ̀ fɛɛju gɔ iyi à ya kpe Baatimee í yɛ ilu
(Cɔ Matie 20:29-34; Luku 18:35-43)
46Si isɛɛnɛu Jesu do mɔcɔɛ ŋa à to Zeriko nɔ à waa fita hai bɛ. Waati iyi à waa fitau zamaa nla gɔ wa too ŋa. Wee fɛɛju woo bara gɔ iyi à ya kpe Baatimee, amai Timee, wa buba itĩ kpãa. 47Iyi í gbɔ à ni Jesu inɛi Nazarɛtiui wa lɔ, ŋɔi í wasi ku dɔ̃ anu wa ni, Jesu, tɔkui Davidi, ce araarem. 48Nɔ inɛ nkpɔ wa la siɛ à waa ni ku coko. Amma bɛi à waa ni ku cokou, bɛɛbɛ mɔi í ya dɔ̃ anu hee lele ku maa ni, tɔkui Davidi, ce araarem. 49Ŋɔi Jesu í leekĩ í ni a kpoo wa. Nɔ à kpe fɛɛjuu à sɔ̃ɔ à ni, maà jɔ̀ inɔɛ ku fɔ, dede wa. Jesu wa kpeɛ. 50Ŋɔi fɛɛjuu í nyɔ kumbooɛ í dede gbakã í koo bi Jesu. 51Nɔ Jesu í beeɛ í ni, mii ì bi n ceɛ. Ŋɔi fɛɛjuu í jɛaa í ni, Mɛɛtu, ǹ bi n yɛ ilui. 52Nɔ Jesu í sɔ̃ɔ í ni, koo. Naanɛɛ í faabaɛ.
Ŋɔi gbakã í yɛ ilu, nɔ í too Jesu si isɛɛnɛɛu.
હાલમાં પસંદ કરેલ:
Maaku 10: MKL
Highlight
શેર કરો
નકલ કરો
Want to have your highlights saved across all your devices? Sign up or sign in
2021, SIM International et UEEB
