2 Ba-Korinto 10
10
Paulo ulaamba aabwami bwaabuapostolo bwakwe
1 #
1 Kor 2:3; Gal 5:2 Lino ndamukumbila mebo ndemwini kululyeetezyo akulitontozyo lwa-Kristo. Ndime Paulo, oyo uubombede kubusyu bwanu ciindi ncendiwo pele ndaamba kaanzambwene ciindi ncentawo. 2#1 Kor 4:21Ndakumbila kuti nindasika kulindinywe nsikooyoosika cakwaamba kaanzambwene acabukali obo mbundasyoma kubakalalila bamwi bantu. Aba bantu mbibayeeya kuti ziyanza zyesu nzitweenda azyo nzyaansi buyo. 3Pele nikuba kuti tweenda ansi, kulwa kwesu takweensi kwaansi pe, 4#Ef 6:13-17nkaambo zintu zyesu zyakulwisya tazyeensi zyabantu buyo, nzyanguzu zya-Leza zyakumwaisya mampangala mayumu. 5Tulamwaisya miyeeyo yoonse azintu zyoonse zili buti zilisumpula cakulwisya luzibo lwa-Leza, alimwi tulaanga makanze oonse kuti aswiilile Kristo. 6#2 Kor 2:9Twalibamba kukubeteka muntu umwi aumwi uutaswiilili ciindi ncikuyoolondoka kuswiilila kwanu.
7Lino amulange aya makani aaboneka kumeso aanu. Na muntu ulayeeya kuti, Mebo ndi muntu wa-Kristo, oyo muntu aibaluke makani aya aalo, aakuti mbuli mbwali muntu wa-Kristo walo, tuli bantu ba-Kristo aswebo mbubonya, 8#2 Kor 12:6; 1 Kor 5:4,5Nikuba kuti tulainda kulikankaizizya bwami bwesu mbutwapegwa ku-Mwami (obu bwami mbwakuyaka, takweensi bwakumwaya pe), nsikooyoofwa bweeme pe. 9Pele nsiyandi kuba mbuli sikumutizizya magwalo pe. 10Balaamba kuti, Magwalo aakwe alijisi bulemu anguzu, pele naaboneka kumeso, ulikompeme buyo, alimwi kwaamba kwakwe nkusampusi. 11#2 Kor 13:2,10Pele muntu uuamba boobo azibe eci, kuti mbuli mbutubede kumajwi aamumagwalo esu ciindi ncetutawo, mbubonya obo mbutuzooba kumilimo yesu ciindi ncetuliwo.
12 #
2 Kor 3:1; 5:12 Nkaambo tatujisi bukozu bwakulyeelanya nibuba bwakulikozyanya abantu bamwi balikankaizya. Balo balalyeelesya ceelesyo cabo beni akulikozyanya cikozyanyo cabo beni, aboobo tabajisi busongo. 13#Rom 12:3Pele swebo tatulikankaizyi kwiinda mbukweelede, tulalyeelesya cipimo cakweeleka ncatwaabila Leza cakusika nikuba nkumutana inywe, 14Tatulyoololi cakwiinda mbuli basikutasika nkumutana pe, nkaambo ncobeni twakasika nikuba kulindinywe mumilimo ya-Makani Mabotu aa-Kristo, 15#Rom 15:20Tatulikankaizizyi kwiinda mbukweelede milimo yabamwi, pe, pele tulasyoma kuti lusyomo lwanu lulakomena aboobo tulakonzya kukomezya cipimo cesu cakwiinda, 16#Inc 19:21kuti tukambauke Makani Mabotu muzisi zili kunembo lyanu, tutalikankaizizyi cipimo cabamwi cibambidwe kale. 17#Jer 9:24; 1 Kor 1:31Oyo uulikankaizya alikankaizizye mu-Mwami. 18#1 Kor 4:5Nkaambo teensi oyo uulilubulula mwini uutambulika, oyo ngwalubulula Mwami nguutambulika.
Sélection en cours:
2 Ba-Korinto 10: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.
