2 Ba-Korinto 11
11
Paulo mbwaakaliimya bwami bwazintu zimwi kukubagwasya
1Inga mulandizuminina kwaamba bufubafuba buniini. Ee, amundizuminine ncobeni. 2#Ef 5:26,27Nkaambo ndamufwida bufwi-bufwi bwa-Leza, ikuti ndakamweebela mwaalumi omwe, kuti nkamutole kuli-Kristo mbuli musimbi uusalala uutanakwetwe umbi. 3#Matl 3:1-5,13Pele ndayoowa kuti mbuli inzoka mbuyakalengawida Eva kubupyungi bwayo, inga myoyo yanu ilibisizidwe akuleka lukakatilo abusalazi kuli-Kristo. 4#Gal 1:8,9Naasika muntu uukambauka umbi Jesu ngutwatakakambauka swebo, na mwatambula muuya umbi ngumwatakatambula, na Makani ambi ngimwatakatambula, ncobeni mulazumina. 5#2 Kor 12:11; 1 Kor 15:10; Gal 2:6,9Lino ndasyoma kuti mebo nsityompokezegwi nibuba buniini kubaapostolo bapati cakwiinda. 6#1 Kor 2:1,2,13; Ef 3:4Nikuba kuti ndi mufubafuba kubwaambe, nsili mufubafuba kuluzibo pe, Lyoonse majwi aangu akaswiililika kulindinywe.
7 #
1 Kor 9:12,18 Pele ambweni ndakabisya kukulibombya kuti inywe mukasumpuzigwe, nkaambo ndakamukambaukila makani aa-Leza cakutapegwa cintu. 8#Flp 4:10,15Ndakanyanzya imbungano zimwi, ndakavola kulinzizyo, kuti nkagwasye ndinywe. 9#Flp 4:15-18; 2 Kor 12:13Ciindi ncindakacili kulindinywe ndaka bula bulilu, nekubaboobo teendakakataazya muntu naba omwe, nkaambo babunyina bazwa ku-Makedoniya bakandiiata kabotu akundipa zintu nzindakali kubula. Aboobo ndakalikasya muziyanza zyoonse kumulemena, nkabela nzoolikasya obo lyoonse. 10#1 Kor 9:15Mbuli lusinizyo lwa-Kristo mbululi mulindime, taakwe muntu uuyoondisinkila olu lulikankaizyo mumasi oonse aa-Akaya. 11Ino nkaambonzi? Sa nkukuti nsimuyandi? Leza nguuzi. 12Pe, nzooya kuya bucita mbubonya mbuncita lino, kuti nkabatesule aziimino zyabo abo bantu bayanda kulikankaizya cakwaamba kuti balyeelene aswebo, 13#2 Kor 2:17; Flp 3:2Nkaambo aba bantu mbaapostolo babeji, mbasimilimo basilweeno, mbibalisandula mbuli baapostolo baKristo. 14Nkabela aya makani taagambyi pe, nkaambo Saatani mwini alakwe ulalisandula mbuli angelo wamumuni, 15Aboobo tacili cintu cipati na balanda bakwe abalo balalisandula mbuli balanda babululami. Mamanino aabaaba azooba mbuli milimo yabo.
16 #
2 Kor 12:6
Ndaamba lwabili kuti kutabi muntu uuyeeya kuti ndi mufubafuba. Nekubaboobo, na mwayeeya boobo, amunditambule mbubonya mbuli mufubafuba, kuti ambebo nkalikankaizye buniini. 17Aya ngindaamba lino taazwide ku-Mwami, pe, ndaamba mbuli cabufubafuba buyo kumakani aya aakulikankaizya, 18Bantu banji mbuli mbubalikankaizya kumakani aakumeso, ambebo ndalikankaizya mbubonya, 19Bafubafuba mulabakazikila myoyo yanu cakubotelwa, inywe nubasongo. 20Nkaambo mulakazikila myoyo yanu muntu uumutola kubuzike, nanka uumulida imbono, nanka uumweena, nanka uulisumpula, nanka uumuuma kumeso.
Paulo ulaamba aamapenzi aakwe
21Ndafwa bweeme kwaamba kuti swebo tuli bakompeme kumakani aali boobu, Pele kumakani aali buti ngibafumba-fumba, ambebo ndafumbafumba ngaonya, Ndaamba mbuli cabufubafuba. 22#Flp 3:5Sa mba-Hebrayo? Ambebo ndi mu-Hebrayo. Sa mba-Israyeli? Ambebo ndi mu-Israyeli. Sa mbalunyungu lwa-Abrahamu? Ambebo ndi walunyungu lwa-Abrahamu, 23#Inc 16:23; 1 Kor 15:10Sa mbasimilimo ba-Kristo? Ndaamba cabusondosi, Mebo ndainda, Ndabainda kumapakasyo, ndabainda kumaange, ndakwipaulwa zyuumo cakwiinda, kanjikanji ndili mulufu. 24#Dt 25:3Kuba-Juda ndakakwipaulwa kosanwe zyuumo, kwabula cimwi buyo kuti zibe makumi one, 25#Inc 16:22; 14:19Ndakaumwa misako kotatwe, ndakafuswa mabwe lomwe, ndakafwidwa bwaato kotatwe, ciindi cimwi ndakali mukati kalwizi buzuba boonse isikati amasiku. 26#Inc 9:23; 14:15Kanjikanji ndili mumisinzo, ndajana matambo aakumilonga, matambo aabacamukwapa, matambo aakuba-Judama, matambo aakubamasi, matambo aamumunzi, matambo aamusokwe, matambo aamulwizi, amatambo aakubabunyina babeji. 27#2 Kor 6:5Lyoonse ndili mumilimo amumakataazyo, kanjikanji ndafubwa ŋonzi, ndafwa nzala anyota, kanjikanji ndaliimya kulya, ndafwa rmpeyo akubula zyakusama. 28#Inc 20:18-21Nkabela antoomwe azintu zimwi zyoonse nkucili cimwi cindilemena mazuba oonse, ndijisi milimo yakubambila imbungano zyoonse. 29#1 Kor 9:22Na muntu ulikompeme, sa nsikompeme ambebo? Na muntu walebegwa, sa mebo nsipyi mucamba
30 #
2 Kor 12:6
Na kweelede kulikankaizya, ndinoolikankaizizya makani aabukompami bwangu. 31#2 Kor 1:23Ulizi Leza, wisi Mwami Jesu, uutembaulika lyoonse, kuti nsibeji.
32 #
Inc 9:23-25
Ku-Damasko, mweendelezi wamwami Areta wakali kuyandaula moonse mumunzi kuti andijate, 33#Inc 9:24,25pele ndakaselusigwa mucizongo kuzwa kumpulungwido yakubwaanda, aboobo ndakaloboka kuzwa kumaanza aakwe.
Sélection en cours:
2 Ba-Korinto 11: Ibbaib63
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
The Bible in Tonga (Zambia) © United Bible Societies, 1963.
