SAN JUAN 5

Kuimbae jete jëogüe vae Betesda pegua

1Kuae jaɨkue rupi judío reta oyapo ñogüɨnoi iarete, jare Jesús ojo Jerusalén pe. 2Jare oime Jerusalén pe öke Vecha Röke jee vae iyɨpɨ pe metei ɨrɨru tuicha vae ñee hebreo pe Betesda jee vae. Kuae ɨrɨru iyɨ́vɨri rupi oime pandepo korero reta. 3Jókuae korero rupi oyapakua ñogüɨnoi jeta imbaerasɨ vae reta, jesambae vae reta, iköcho vae reta jare jete jëogüe vae reta. Opaete kuae reta oäro ñogüɨnoi ɨ omɨi vae. 4Echa amo ámope ogüeyɨ metei araɨgua omomɨi vaerä ɨ. Jare ɨ omɨi yave, jókuae imbaerasɨ vae tenonde voi oike ɨ pe vae okuera oipotagüe mbaerasɨ güi. 5Jare jókuae imbaerasɨ vae reta ipɨte pe oï metei kuimbae treinta y ocho año ma imbaerasɨ jete jëogüe vae. 6Jesús oecha jókuae kuimbae oyapakua oï joko pe, jare oikuaa ɨma yae ma imbaerasɨ vae. Jayave oparandu chupe:

—¿Reipota pa rekuera?

7Jókuae kuimbae jei:

—CheYa, mbaetɨ kia chemoinge vaerä ɨ pe ɨ omɨi yave. Che aja ramboeve, ïru vae chemopane.

8Jayave Jesús jei chupe:

—Epüa, evoɨ nderupa jare eguata.

9Jupiveiño kuimbae okuera, ovoɨ jupa jare oguata. Jare jókuae ara ko, ara mbutuu oï. 10Jayave judío reta jei kuimbae okuera ma vae pe:

—Añave ko, ara mbutuu. Jupiä ko revoɨ vaerä nderupa#Neh 13.19; Jer 17.21. ara mbutuu pe.

11Jókuae kuimbae jei chupe reta:

—Kuimbae chembogüera vae ko jei cheve: “Evoɨ nderupa jare eguata.”

12Jayave oparandu reta chupe:

—¿Kia pa jókuae: “Evoɨ nderupa jare eguata”, jei ndeve vae?

13Ërei jókuae okuera vae mbaetɨ oikuaa. Echa Jesús ojo ma jeta vae reta joko pe ñogüɨnoi vae ipɨte güi. 14Jaɨkue rupi Jesús oväe jókuae kuimbae tupao pe, jare jei chupe:

—Mase, rekuera ma. Agüɨye ye ndeyoa, agüɨye vaerä ou nderé mbae ikavimbae yae vae.

15Jayave jókuae kuimbae ojo omombeu judío reta pe, Jesús yepe ombogüera vae. 16Kuae jeko pegua judío reta oipota oyapo ikavimbae vae Jesús pe. Oipota vi oyuka. Echa jae oyapo amogüe kuae nunga mɨakañɨ reta ara mbutuu pe. 17Ërei Jesús jei chupe reta:

—CheRu mbaetɨ ko opoi iparavɨkɨ güi, jare che vi aparavɨkɨ.

18Kuae jeko pegua judío reta jeiete oipota oyuka Jesús. Echa jae omboeteä ara mbutuu jare jei vi Tumpa etei ko jae Tu vae, jókuae rupi oyemboyovake Tumpa ndive.#Jn 10.30-38.

Tumpa Taɨ imbaepuere

19Jayave Jesús jei chupe reta: “Añetete che jae peve, Tumpa Taɨ mbaetɨ iyeugüi aeño oyapo mbae. Oyapo ko jókuae oecha Tu oyapo oï vaeño. Echa opaete Tu oyapo vae Taɨ oyapo vi. 20Echa Tu oaɨu Taɨ jare oikuaauka ma chupe opaete iparavɨkɨ. Jare oikuaaukata vi chupe mbaravɨkɨ tuicha yae ete kuae reta güi vae, pepɨakañɨ yae vaerä jese. 21Tu omoingove ye omano vae reta. Jaeramiño vi Taɨ omee tekove, jae oipota vae pe. 22Tu mbaetɨ kia ave ojäa. Ërei omee Taɨ oporojäa vaerä. 23Opaete vae omboete vaerä Taɨ, Tu omboete reta rami. Mbaetɨ omboete reta Taɨ vae, omboeteä ko Tu, ombou vae.

24Añetete che jae peve, cheñee oendu vae jare chembou vae re güɨrovia vae, güɨnoi tekove opambae vae. Ngaraa ojo kañɨtei pe. Oasa ma ko mano güi tekove pe. 25Añetete che jae peve, oväeta ara, jae ko añave, omanogüe vae reta oendu vaerä che Tumpa Taɨ iñee jare opaete oendu vae reta oikoveta. 26Echa cheRu güɨnoi tekove iyé etei. Jaeramiño vi omee cheve anoi vaerä tekove cheyé etei. 27Omee vi cheve mbaepuere aporojäa vaerä, che Kuimbaerä ayeapo ramo. 28Agüɨye pepɨakañɨ kuae re. Echa oväeta ma ora opaete tɨvɨa pe ñogüɨnoi vae reta oendu vaerä cheñee. 29Ikavi vae oyapo vae reta oikove yeta tekove opambae vae peguarä, ërei ikavimbae vae oyapo vae reta oikove yeta kañɨtei peguarä#Dn 12.2.

Cristo regua omombeu vae reta

30Cheyeugüi aeño mbaetɨ chepuere mbae ayapo. Che aporojäa aendu rupi. Jáeramo aporojäa jupi rupi. Echa mbaetɨ ayapo cheremimbotaño. Ayapo ko cheRu chembou vae jemimbotaño. 31Che aeño chemiari cheyé yave, añeteä ko. 32Ërei ïru ko imiari cheré, jare aikuaa jókuae imiari cheré vae añete ko. 33Echa pe reta pemondo ñee jerajaa reta Juan pe oparandu, jare jae imiari vae añete ko#Jn 1.19-27; 3.27-30. 34Ërei che mbaetɨ aeka kia imiari vaerä cheré, ërei kuae che jae peve peyemboasauka vaerä. 35Juan kó jae metei mechero jendɨ jare omoembipe vae rami. Jare pe reta michi pegua yae peyerovia katu jese. 36Ërei che oime anoi imiari cheré vae, oasa yé chemombeu Juan imiari cheré vae güi. CheRu oipota opa ayapo vaerä mbaravɨkɨ omee cheve vae, jókuae ko oechauka cheRu ko chembou vae. 37CheRu chembou vae jae etei imiari cheré.#Mt 3.17; Mc 1.11; Lc 3.22. Yepe tëi mbaetɨi peendu cheRu iñee ani mbaetɨi peecha jova. 38Ani mbaetɨ ave vi peñovatu cheRu iñee pepɨa pe. Echa jae chembou reve, pe reta mbaetɨ chererovia. 39Pe reta peyemboe kavi Tumpa Iñee re. Echa peyemongeta pɨpe peväeta tekove opambae vae. Ërei jae ko imiari cheregua. 40Ërei mbaetɨ peipota peyu chekotɨ penoi vaerä jókuae tekove.

41Che mbaetɨ ko aeka chembotuicha vaerä ɨvɨ pegua reta. 42Echa aikuaa pe reta mbaetɨ ko penoi Tumpa iporoaɨu pepɨa pe. 43Che ayu cheRu jee re, ërei pe reta mbaetɨ chemboresive. Ïru vae ou yave jee re aeño, pemboresive. 44Pepuereä etei peporogüɨrovia. Echa peipota jekuaeño ïru vae reta pembotuicha vaerä, ërei mbaetɨ peeka yembotuicha Tumpa jae vaeño vae oipota tëi penoi vaerä vae. 45Agüɨye peyemongeta che pomboekota ko cheRu jóvai. Echa Moisés jembikuatía ko pemboeko, jókuae pe reta peyeko jese vae. 46Echa Moisés jembikuatía re perovia yave, chereroviata tëi ko. Echa jae oikuatía ko cheregua. 47Ërei mbaetɨ perovia Moisés oikuatía vae yave, ¿këraita pa cheñee re perovia?”

Sélection en cours:

SAN JUAN 5: GUABD

Surbrillance

Copier