مَتَّى 5

ناس هنا مملكة اللّه

1وَ وَكِتْ عِيسَى شَافْ نَاسْ كَتِيرِينْ يِدَوْرُوا يَسْمَعَوْا كَلَامَهْ، هُو طَلَعْ فِي الْحَجَرْ وَ قَعَدْ تِحِتْ وَ تَلَامِيذَهْ جَوْا لَيَّهْ. 2وَ بَدَا يِعَلِّمْهُمْ وَ قَالْ:

3«مَبْرُوكْ لِلنَّاسْ الْيَعَرْفُوا نُفُوسْهُمْ مَسَاكِينْ قِدَّامْ اللّٰهْ

أَشَانْ مَمْلَكَةْ اللّٰهْ هِنْتُهُمْ.

4مَبْرُوكْ لِلنَّاسْ الْحَزْنَانِينْ

أَشَانْ اللّٰهْ يِصَبِّرْهُمْ.

5مَبْرُوكْ لِلنَّاسْ الضَّلُولِينْ

أَشَانْ هُمَّنْ يَوْرُثُوا الْأَرْض.

6مَبْرُوكْ لِلنَّاسْ الْعَطْشَانِينْ وَ جِيعَانِينْ لِلْعَدَالَةْ

أَشَانْ اللّٰهْ يِشَبِّعْهُمْ.

7مَبْرُوكْ لِلنَّاسْ الْيَرْحَمَوْا أَخْوَانْهُمْ

أَشَانْ هُمَّنْ يَلْقَوْا رَحْمَةْ مِنْ اللّٰهْ.

8مَبْرُوكْ لِلنَّاسْ الْقَلِبْهُمْ طَاهِرْ

أَشَانْ هُمَّنْ يِشِيفُوا اللّٰهْ.

9مَبْرُوكْ لِلنَّاسْ الْيِجِيبُوا السَّلَامْ

أَشَانْ اللّٰهْ يَجْعَلْهُمْ عِيَالَهْ.

10مَبْرُوكْ لِلنَّاسْ الْيِتَعُّبُوهُمْ فِي شَانْ الْعَدَالَةْ

أَشَانْ مَمْلَكَةْ اللّٰهْ هِنْتُهُمْ.

تلاميذ المسيح نور و مِلِح

11«مَبْرُوكْ لَيْكُو إِنْتُو وَكِتْ النَّاسْ يِعَيُّرُوكُو وَ يَطُرْدُوكُو وَ بِالْكِدِبْ يُخُطُّوا فَوْقكُو كَلَامْ شَيْن أَشَانْ إِنْتُو تَلَامِيذِي. 12أَفْرَحَوْا وَ أَنْبَسْطُوا زِيَادَةْ أَشَانْ أَجُرْكُو فِي السَّمَاءْ يَبْقَى كَتِيرْ بِلْحَيْن. أَشَانْ أَوَّلْ النَّاسْ تَعَّبَوْا الْأَنْبِيَاء الْجَوْا قُبَّالْكُو. وَ خَلَاصْ إِنْتُو كُلَ تَبْقَوْا مِثِلْهُمْ.

13«إِنْتُو مِثِلْ مِلِحْ لِنَاسْ الْأَرْض. وَ كَنْ طَعَامْ الْمِلِحْ بِقِي مَا فِيهْ، شُنُو يِقَبِّلَهْ؟ مَا عِنْدَهْ فَايْدَةْ وَ خَلَاصْ يِدَفُّقُوهْ بَرَّا وَ النَّاسْ يِفَجُّقُوهْ. 14وَ إِنْتُو نُورْ لِنَاسْ الدُّنْيَا. كَنْ حِلَّةْ كَبِيرَةْ قَاعِدَةْ فِي رَاسْ حَجَرْ، مَا مُمْكِنْ يِلَبُّدُوهَا. 15وَ النَّاسْ مَا يِأَوْقُدُوا فَانُوسْ وَ يِدِسُّوهْ فِي تِحِتْ دَوْزَمْ لَاكِنْ يُخُطُّوهْ فِي بَكَانْ فَوْق أَشَانْ يِضَوِّي لِكُلَّ النَّاسْ الْفِي الْبَيْت. 16وَ مِثِلْ دَا، خَلُّوا نُورْكُو يِضَوِّي قِدَّامْ النَّاسْ. وَ خَلُّوهُمْ يِشِيفُوا خِدْمِتْكُو السَّمْحَةْ وَ يَشْكُرُوا أَبُوكُو اللّٰهْ الْقَاعِدْ فِي السَّمَاوَاتْ.

المسيح ما يبطِّل الكُتُب

17«مَا تِفَكُّرُوا أَنَا جِيتْ أَشَانْ نِبَطِّلْ التَّوْرَاةْ وَ لَا كُتُبْ الْأَنْبِيَاء. أَنَا مَا جِيتْ أَشَانْ نِبَطِّلْهُمْ لَاكِنْ أَشَانْ نِتَمِّمْهُمْ. 18نُقُولْ لَيْكُو الْحَقّ، حَرِفْ وَاحِدْ مَا يِنْقَشَّ مِنْ التَّوْرَاةْ وَ لَا نُقْطَةْ وَاحِدَةْ كُلَ لَحَدِّي السَّمَاءْ وَ الْأَرْض يَبْقَوْا مَا فِيهُمْ وَ كُلَّ شَيّءْ يِتِمّ.

19«وَ أَيِّ نَادُمْ الْيِخَالِفْ وَصِيَّةْ مِنْ الْوَصَايَا دَوْل، كَنْ هِي صَغَيْرَةْ كُلَ، كَنْ يِعَلِّمْ أَخْوَانَهْ يِسَوُّوا نَفْس الشَّيّءْ، خَلَاصْ يَجْعَلَوْا النَّادُمْ دَا صَغَيَّرْ فِي مَمْلَكَةْ اللّٰهْ. وَ لَاكِنْ النَّادُمْ الْيِطَبِّقْ الْوَصَايَا دَوْل وَ يِعَلِّمْهُمْ لِأَخْوَانَهْ، يَجْعَلَوْه كَبِيرْ فِي مَمْلَكَةْ اللّٰهْ. 20وَ نُقُولْ لَيْكُو كَنْ إِنْتُو مَا بِقِيتُوا صَالِحِينْ زِيَادَةْ مِنْ الْعُلَمَاءْ وَ الْفَرِيزِيِّينْ، أَبَداً مَا تَدْخُلُوا فِي مَمْلَكَةْ اللّٰهْ.

الكتِل و الغضب

21«وَ إِنْتُو سِمِعْتُوا اللّٰهْ كَلَّمْ لِنَاسْ الزَّمَانْ وَ قَالْ: <مَا تَكْتُلْ دِمَّةْ>#5‏:21 الكلام دا تلقوه في خُروج 20‏:13. وَ <النَّادُمْ الْكَتَلْ دِمَّةْ، وَاجِبْ يِشَارُعُوهْ.>#5‏:21 الكلام دا تلقوه في تَثْنِية 17‏:8. 22وَ لَاكِنْ أَنَا نُقُولْ لَيْكُو أَيِّ نَادُمْ الزَّعْلَانْ مِنْ أَخُوهْ، وَاجِبْ يِشَارُعُوهْ. وَ أَيِّ نَادُمْ الْيُقُولْ لِأَخُوهْ: ‹إِنْتَ عَجَمِي›، وَاجِبْ يِقَدُّمُوهْ قِدَّامْ الْمَجْلَسْ الْكَبِيرْ. وَ أَيِّ نَادُمْ الْيُقُولْ لِأَخُوهْ: ‹إِنْتَ جَاهِلْ›، وَاجِبْ يَزْقُلُوهْ فِي نَارْ جَهَنَّمْ.

23«وَ كَنْ جِيتْ تِقَدِّمْ ضَحِيَّةْ فِي الْمَدْبَحْ وَ هِنَاكْ بَسْ فَكَّرْت كَدَرْ أَخُوكْ عِنْدَهْ مَعَاكْ مُشْكِلَةْ، 24خَلِّي ضَحِيّتَكْ فِي الْمَدْبَحْ وَ أَمْشِي عَجَلَةْ وَ أَسَّامَحَوْا مَعَ أَخُوكْ. وَ بَعَدْ دَا بَسْ، قَبِّلْ وَ قَدِّمْ ضَحِيّتَكْ لِلّٰهْ. 25وَ كَنْ نَادُمْ مَضْلُومْ فَوْقَكْ، يَلَّا أَسَّامَحَوْا مَعَايَهْ عَجَلَةْ وَكِتْ إِنْتُو لِسَّاعْ فِي الدَّرِبْ وَ قُبَّالْ مَا تَوْصَلَوْا فِي بَكَانْ الشَّرِيعَةْ. أَسَّامَحَوْا مَعَايَهْ قُبَّالْ مَا يِوَدِّيكْ لِلْقَاضِي أَشَانْ الْقَاضِي مَا يِوَدِّيكْ لِلْعَسْكَرْ وَ يَكُرْبُوكْ وَ يِدِسُّوكْ فِي السِّجِنْ. 26نُقُولْ لَيْك الْحَقّ، إِنْتَ مَا تَمْرُقْ إِلَّا كَنْ كَفَّيْت كُلَّ الْقُرُسْ الْيِدَوْرُوهْ مِنَّكْ.

الزِنى و الطلاق

27«سِمِعْتُوا اللّٰهْ قَالْ: <مَا تَزْنَى.>#5‏:27 الكلام دا تلقوه في خُروج 20‏:14. 28وَ لَاكِنْ أَنَا نُقُولْ لَيْكُو أَيِّ رَاجِلْ الْقَاعِدْ يِشِيفْ مَرَةْ بِشَهْوَةْ، هُو زَنَاهَا خَلَاصْ فِي قَلْبَهْ. 29وَ كَنْ عَيْنَكْ الزَّيْنَةْ تِدَوْر تَمُرْقَكْ مِنْ الدَّرِبْ الْعَدِيلْ، سِلَّهَا! أَزْقُلْهَا بَعِيدْ مِنَّكْ! أَشَانْ كَنْ وَدَّرْت شَيّءْ وَاحِدْ مِنْ جِسْمَكْ أَخَيْر لَيْك مِنْ يَزْقُلُوا كُلَّ جِسْمَكْ فِي نَارْ جَهَنَّمْ. 30وَ كَنْ إِيدَكْ الزَّيْنَةْ تِدَوْر تَمُرْقَكْ مِنْ الدَّرِبْ الْعَدِيلْ، أَقْطَعْهَا! أَزْقُلْهَا بَعِيدْ مِنَّكْ أَشَانْ كَنْ وَدَّرْت شَيّءْ وَاحِدْ مِنْ جِسْمَكْ أَخَيْر لَيْك مِنْ يَزْقُلُوا كُلَّ جِسْمَكْ فِي نَارْ جَهَنَّمْ.

31«وَ بَتَّانْ قَالَوْا لَيْكُو: <أَيِّ نَادُمْ الطَّلَّقْ مَرْتَهْ وَاجِبْ يَنْطِيهَا مَكْتُوبْ هَنَا طَلَاقْ.>#5‏:31 الكلام دا تلقوه في تَثْنِية 24‏:1. 32وَ لَاكِنْ أَنَا نُقُولْ لَيْكُو أَيِّ نَادُمْ الْيِطَلِّقْ مَرْتَهْ مَا بِسَبَبْ الزِّنَى، يِسَوِّيهَا زَانِيَةْ. وَ النَّادُمْ الْيَاخُدْ الْمَرَةْ الْمُطَلَّقَةْ، هُو زَانِي.

كلام الحليفة

33«سِمِعْتُوا قَالَوْا لِنَاسْ الزَّمَانْ: <مَا تِبَطِّلْ حَلِيفْتَكْ لَاكِنْ النَّذِرْ الْإِنْتَ سَوَّيْتَهْ لِلّٰهْ، دَا بَسْ وَاجِبْ تِتِمَّهْ.>#5‏:33 الكلام دا تلقوه في عَدد 30‏:2. 34وَ لَاكِنْ أَنَا نُقُولْ لَيْكُو مَا تَحْلِفْ أَبَداً وَ لَا بِالسَّمَاءْ أَشَانْ هُو كُرْسِي اللّٰهْ 35وَ لَا بِالْأَرْض أَشَانْ دَا بَكَانْ رِجِلَيْنَهْ وَ لَا بِمَدِينَةْ الْقُدُسْ أَشَانْ هِي مَدِينَةْ الْمَلِكْ الْعَظِيمْ. 36وَ مَا تَحْلِفْ بِرَاسَكْ أَشَانْ مَا تَقْدَرْ تِسَوِّي صُوفَايْ وَاحِدَةْ بَيْضَةْ وَلَّا زَرْقَةْ. 37كَنْ كَلَامَكْ ‹أَيْوَى›، قُولْ ‹أَيْوَى›. وَ كَنْ كَلَامَكْ ‹لَا›، قُولْ ‹لَا›. وَ أَيِّ كَلَامْ الزِّيَادَةْ مِنْ دَا جَايِ مِنْ شَرّ إِبْلِيسْ.

عَيْن بعَيْن

38«سِمِعْتُوا قَالَوْا: <عَيْن بِعَيْن وَ سِنّ بِسِنّ.>#5‏:38 الكلام دا تلقوه في خُروج 21‏:24. 39وَ لَاكِنْ أَنَا نُقُولْ لَيْكُو مَا تِقَبِّلْ الْفَسِلْ لِلنَّادُمْ السَّوَّى لَيْك الْفَسِلْ. وَ كَنْ نَادُمْ دَقَّاكْ فِي شِدْقَكْ الزَّيْنَةْ، أَنْطِيهْ الْإِسْرَةْ كُلَ. 40وَ كَنْ نَادُمْ يِوَدِّيكْ لِلشَّرِيعَةْ أَشَانْ يِشِيلْ جَوَّانِيّتَكْ، خَلَاصْ خَلِّي يِشِيلْ جَلَّابِيّتَكْ كُلَ. 41وَ كَنْ نَادُمْ جَبَرَاكْ أَشَانْ تِوَدِّي خُمَامَهْ مَسَافَةْ قَرِيبَةْ، خَلَاصْ زِيدْ لَيَّهْ مَسَافَةْ آخَرَةْ. 42وَ كَنْ نَادُمْ سَأَلْ مِنَّكْ شُغُلْ، أَنْطِيهْ. وَ كَنْ نَادُمْ يَسْأَلْ مِنَّكْ دَيْن، مَا تِقَبِّلَهْ يَابِسْ.

حِبّوا عدوكو

43«سِمِعْتُوا قَالَوْا: ‹حِبّ أَخُوكْ وَ أَكْرَهْ عَدُوكْ.› 44وَ لَاكِنْ أَنَا نُقُولْ لَيْكُو حِبُّوا عَدُوكُو وَ أَسْأَلَوْا اللّٰهْ بِالْخَيْر لِلنَّاسْ الْيِتَعُّبُوكُو وَ يَطُرْدُوكُو. 45وَ كَنْ تِسَوُّوا مِثِلْ دَا، إِنْتُو تَبْقَوْا عِيَالْ أَبُوكُو اللّٰهْ. أَشَانْ هُو يَمْرُقْ الْحَرَّايْ لِلنَّاسْ الْفَسْلِينْ وَ لِلنَّاسْ الصَّالِحِينْ كُلَ. وَ يِخَلِّي الْمَطَرْ يُصُبّ لِلنَّاسْ الْعَدِيلِينْ وَ لِلنَّاسْ الْمَا عَدِيلِينْ كُلَ.

46«وَ كَنْ تِحِبُّوا النَّاسْ الْيِحِبُّوكُو بَسْ، أَجُرْكُو شُنُو؟ نَاسْ الْفَسْلِينْ الْيِشِيلُوا الْمِيرِي، هُمَّنْ مَا يِحِبُّوا النَّاسْ الْيِحِبُّوهُمْ وَلَّا؟ 47وَ كَنْ إِنْتُو تِسَلُّمُوا أَخْوَانْكُو بَسْ، إِنْتُو مَا تِسَوُّوا خَيْر زِيَادَةْ مِنْ أَيِّ نَادُمْ. النَّاسْ الْمَا مُؤمِنِينْ كُلَ مَا يِسَوُّوا نَفْس الشَّيّءْ وَلَّا؟ 48خَلَاصْ، أَبْقَوْا نَاسْ كَامِلِينْ مِثِلْ اللّٰهْ أَبُوكُو فِي السَّمَاءْ كَامِلْ.»

Sélection en cours:

مَتَّى 5: ع.د.ت19

Surbrillance

Copier