مَتَّى 4

إِبْلِيس جرّب المسيح

1وَ الرُّوحْ الْقُدُّوسْ وَدَّى عِيسَى فِي الْخَلَاءْ أَشَانْ إِبْلِيسْ يِجَرِّبَهْ. 2وَ هُو صَايِمْ لَيْل وَ نَهَارْ 40 يَوْم وَ بَعَدْ دَا، جُوعْ سَوَّاهْ.

3وَ إِبْلِيسْ الْمُجَرِّبْ جَاءْ لَيَّهْ وَ قَالْ: «كَنْ صَحِيحْ إِنْتَ إِبْن اللّٰهْ، قُولْ لِلْحُجَارْ الدُّقَاقْ دَوْل يَبْقَوْا لَيْك أَكِلْ.» 4وَ عِيسَى رَدَّ لَيَّهْ وَ قَالْ: «مَكْتُوبْ فِي كِتَابْ اللّٰهْ: <الْإِنْسَانْ مَا يِعِيشْ بِالْأَكِلْ وِحَيْدَهْ لَاكِنْ يِعِيشْ بِكُلِّ كِلْمَةْ الْيُقُولْهَا اللّٰهْ.>»#4‏:4 الكلام دا تلقوه في تَثْنِية 8‏:3.

5وَ إِبْلِيسْ وَدَّاهْ فِي مَدِينَةْ الْقُدُسْ وَ خَطَّاهْ فِي بَكَانْ عَالِي فِي رَاسْ بَيْت اللّٰهْ. 6وَ قَالْ لَيَّهْ: «كَنْ صَحِيحْ إِنْتَ إِبْن اللّٰهْ، نُطّ أَقَعْ تِحِتْ أَشَانْ فِي الْكِتَابْ مَكْتُوبْ: <اللّٰهْ يَامُرْ مَلَائِكَتَهْ أَشَانْ يَحْفَضَوْك. يِشِيلُوكْ فِي إِيدَيْهُمْ أَشَانْ رِجِلَيْنَكْ مَا يِنْطَقَّوْا فِي حَجَرْ.>»#4‏:6 الكلام دا تلقوه في زَبُور 91‏:11‏-12. 7وَ عِيسَى قَالْ لَيَّهْ: «وَ كُلَ مَكْتُوبْ فِي الْكِتَابْ: <مَا تِجَرِّبْ اللّٰهْ إِلٰـهَكْ.>»#4‏:7 الكلام دا تلقوه في تَثْنِية 6‏:16.

8وَ إِبْلِيسْ وَدَّاهْ بَتَّانْ وَ خَطَّاهْ فِي رَاسْ حَجَرْ طَوِيلْ بِلْحَيْن وَ وَصَّفْ لَيَّهْ كُلَّ الْمَمَالِكْ الْفِي الدُّنْيَا وَ دَرَجَتْهُمْ. 9وَ قَالْ لِعِيسَى: «نَنْطِيكْ كُلُّهُمْ كَيْ كَنْ إِنْتَ تَسْجُدْ قِدَّامِي وَ تَعَبُدْنِي.» 10وَ عِيسَى قَالْ لَيَّهْ: «أَمْشِي مِنِّي بَعِيدْ، يَا شَيْطَانْ، أَشَانْ مَكْتُوبْ فِي الْكِتَابْ: <لِلّٰهْ إِلٰـهَكْ بَسْ تَسْجُدْ وَ هُو وِحَيْدَهْ بَسْ تَعَبُدَهْ.>»#4‏:10 الكلام دا تلقوه في تَثْنِية 6‏:13.

11وَ خَلَاصْ إِبْلِيسْ خَلَّاهْ وَ مَلَائِكَةْ جَوْا لِعِيسَى وَ سَاعَدَوْه.

المسيح بدا خِدِمْته

12وَ يَحْيَى كَرَبَوْه فِي السِّجِنْ. وَ عِيسَى سِمِعْ الْخَبَرْ دَا وَ قَبَّلْ فِي دَارْ الْجَلِيلْ. 13وَ خَلَّى حِلَّةْ النَّاصِرَةْ وَ مَشَى سَكَنْ فِي حِلَّةْ كَفَرْ نَاحُومْ الْقَاعِدَةْ جَنْب الْبَحَرْ فِي تُرَابْ بَنِي زَبُلُونْ وَ تُرَابْ بَنِي نَفْتَالِي. 14وَ مَشَى هِنَاكْ أَشَانْ مِثِلْ دَا، الْكَلَامْ الْاللّٰهْ قَالَهْ بِخَشُمْ النَّبِي إِشَعْيَا يِتِمّ. النَّبِي قَالْ:

15<تُرَابْ بَنِي زَبُلُونْ

وَ تُرَابْ بَنِي نَفْتَالِي

قَاعِدْ فِي الدَّرِبْ جَنْب الْبَحَرْ

وَ غَادِي لِبَحَرْ الْأُرْدُنْ

وَ هُو تُرَابْ هَنَا دَارْ الْجَلِيلْ

وَ هِي دَارْ الْأَجَانِبْ.

16هِنَاكْ الشَّعَبْ الْقَاعِدِينْ فِي الضَّلَامْ

شَافَوْا نُورْ عَظِيمْ

وَ السَّاكْنِينْ فِي بَلَدْ الضَّلَامْ الْهَالِكْ،

نُورْ طَلَعْ لَيْهُمْ.>#4‏:16 الكلام دا تلقوه في إشَعْيا 9‏:1‏-2.

17وَ مِنْ الْوَكِتْ دَاكْ، عِيسَى بَدَا يِبَلِّغْ كَلَامْ اللّٰهْ وَ قَالْ: «تُوبُوا مِنْ ذُنُوبْكُو! أَشَانْ مَمْلَكَةْ اللّٰهْ قَرَّبَتْ.»

التلاميذ الأوّلانيّين

18وَ وَكِتْ عِيسَى رَايِغْ فِي خَشُمْ بَحَرْ الْجَلِيلْ، هُو شَافْ أَخْوَانْ إِتْنَيْن وَ هُمَّنْ سِمْعَانْ الْبِنَادُوهْ بُطْرُسْ وَ أَخُوهْ أَنْدَرَيَّسْ. وَ هُمَّنْ حَوَّاتِينْ وَ قَاعِدِينْ يَزْقُلُوا شَرَكْهُمْ فِي الْبَحَرْ أَشَانْ يَكُرْبُوا حُوتْ. 19وَ عِيسَى قَالْ لَيْهُمْ: «تَعَالُوا تَابُعُونِي. أَوَّلْ إِنْتُو قَاعِدِينْ تَكُرْبُوا حُوتْ وَ لَاكِنْ مِنْ الْيَوْم أَنَا نِسَوِّيكُو تَكُرْبُوا النَّاسْ لِتِوَصُّفُوهُمْ دَرِبْ اللّٰهْ.» 20وَ طَوَّالِي خَلَّوْا شَرَكْهُمْ وَ قَمَّوْا تَابَعَوْه.

21وَ عِيسَى مَشَى قِدَّامْ شِيَّةْ وَ شَافْ أَخْوَانْ إِتْنَيْن آخَرِينْ وَ هُمَّنْ يَعْقُوبْ وَ يُوحَنَّا أَوْلَادْ زَبَدِي. هُمَّنْ قَاعِدِينْ فِي الْمَرْكَبَةْ مَعَ أَبُوهُمْ وَ قَاعِدِينْ يِعَدُّلُوا شَرَكْهُمْ. وَ عِيسَى نَادَاهُمْ أَشَانْ يِتَابُعُوهْ. 22وَ طَوَّالِي خَلَّوْا الْمَرْكَبَةْ وَ أَبُوهُمْ وَ تَابَعَوْا عِيسَى.

23وَ عِيسَى قَمَّ رَاغْ فِي كُلَّ بَكَانْ هَنَا دَارْ الْجَلِيلْ وَ قَاعِدْ يِعَلِّمْ النَّاسْ فِي بُيُوتْ الصَّلَاةْ وَ يِبَشِّرْ لَيْهُمْ بِشَارَةْ مَمْلَكَةْ اللّٰهْ. وَ قَاعِدْ يَشْفِيهُمْ مِنْ أَيِّ وَجَعْ وَ أَيِّ مَرَضْ الْفِي لُبّ الشَّعَبْ. 24وَ أُسْمَهْ طَلَعْ فِي كُلَّ بَلَدْ سُورِيَا وَ نَاسْ جَابَوْا لَيَّهْ أَخْوَانْهُمْ الْمَعْضُورِينْ وَ التَّعْبَانِينْ مِنْ أَيِّ مَرَضْ. جَابَوْا الْمُشَوْطِنِينْ وَ النَّاسْ الْعِنْدُهُمْ أَمْ فِتْفِتْ وَ النَّاسْ الْجِلِدْهُمْ مَيِّتْ وَ دَاوَاهُمْ كُلُّهُمْ. 25وَ نَاسْ كَتِيرِينْ مَرَّةْ وَاحِدْ تَابَعَوْه. وَ النَّاسْ دَوْل جَوْا مِنْ دَارْ الْجَلِيلْ وَ مِنْ الْمُدُنْ الْعَشَرَةْ وَ مِنْ مَدِينَةْ الْقُدُسْ وَ مِنْ دَارْ الْيَهُودِيَّةْ وَ مِنْ الْبُلْدَانْ الْغَادِي لِبَحَرْ الْأُرْدُنْ.

Sélection en cours:

مَتَّى 4: ع.د.ت19

Surbrillance

Copier