Matta 19

Al-zawaaj wa l-talaag

1Wa wakit Isa kammal kalaamah da, hu gamma min daar al-Jaliil. Wa macha fi daar al-Yahuudiiya wa gataʼ bahar al-Urdun. 2Wa naas katiiriin marra waahid taabaʼooh. Wa fi l-bakaan da, hu daawa al-mardaaniin al-maʼaahum.

3Wa Fariiziyiin waahidiin jo le Isa achaan yijarrubuuh. Wa saʼalooh wa gaalo : «Halaal le raajil yitallig martah be ayyi sabab walla ?» 4Wa hu radda leehum wa gaal : «Ma gareetu al-Kitaab ? Buguul : <Fi l-awwal, Allah khalag al-insaan. Raajil wa mara, hu khalagaahum.>#19:4 Al-kalaam da talgooh fi Takwiin 1:27. 5Wa buguul : <Be sabab da, ayyi raajil yikhalli ammah wa abuuh wa yilimm maʼa martah wa l-naaseen yabgo jisim waahid.>#19:5 Al-kalaam da talgooh fi Takwiin 2:24. 6Wa be misil da, humman ma naaseen battaan achaan bigo jisim waahid. Allah bas rabataahum wa ma waajib al-insaan yifarrighum.»

7Wa saʼalooh wa gaalo : «Kan misil ke, kikkeef Muusa amaraana wa gaal raajil waajib yanti maktuub hana talaag le martah wakit yitalligha ?» 8Wa Isa radda leehum wa gaal : «Muusa antaaku izin titallugu awiinku achaan raasku gawi. Wa laakin ma misil da fi l-awwal. 9Wa nuguul leeku ayyi naadum al-yitallig martah ma be sabab al-zina wa yaakhud mara aakhara, hu zaani.»

10Wa talaamiizah gaalo leyah : «Kan haalat al-raajil maʼa martah misil da, akheer le raajil ma yaakhud !» 11Wa Isa radda leehum wa gaal : «Ma kulla l-naas yagdaro yakhbalo kalaamku da, illa l-naas al-Allah antaahum. 12Naas waahidiin ma yaakhudu achaan min wildoohum humman misil khasiyiin. Wa naas waahidiin ma yaakhudu achaan al-naas khasoohum. Wa naas aakhariin yabgo misil khasiyiin achaan chaalo niiye yakhdumu le mamlakat Allah. Khalaas, ayyi naadum al-yagdar yakhbal al-kalaam da, khalli yakhbalah.»

Al-Masiih salla le l-iyaal

13Wa baʼadeen naas waahidiin gaddamo iyaalhum al-dugaag le Isa achaan yukhutt iideenah fooghum wa yisalli leehum. Wa talaamiizah harajoohum. 14Wa laakin Isa gaal : «Khallu al-iyaal yaju leyi wa ma tadharoohum achaan mamlakat Allah hana l-naas al-misilhum.» 15Wa baʼad khatta iideenah fooghum, hu faat min al-bakaan da.

Al-sabi siid al-maal

16Wa naadum waahid ja le Isa saʼalah wa gaal : «Ya sayyidna, chunu al-amal al-adiil al-waajib nisawwiih achaan nalga al-haya al-abadiiye ?» 17Wa Isa radda leyah wa gaal : «Maala tasʼalni be l-amal al-adiil ? Waahid bas adiil wa hu Allah. Wa laakin kan tidoor tadkhul fi l-haya al-abadiiye, tabbig al-wasaaya.» 18Wa l-sabi saʼalah wa gaal : «Ween humman ?» Wa Isa radda leyah wa gaal : «<Ma taktul dimme wa ma tazna wa ma tasrig wa ma tachhad be kidib. 19Wa karrim ammak wa abuuk>#19:19 Al-kalaam da talgooh fi Khuruuj 20:12-16. wa <hibb akhuuk misil tihibb nafsak.>»#19:19 Al-kalaam da talgooh fi Laawiyiin 19:18.

20Wa l-sabi gaal : «Min wakit ana sakhayyar, nitaabiʼ kulla l-wasaaya dool. Wa chunu gassar leyi ?» 21Wa Isa radda leyah wa gaal : «Kan tidoor tabga naadum bala eeb, amchi biiʼ kulla cheyy al-indak wa anti tamanah le l-masaakiin wa misil da, talgaah giddaamak. Wa khalaas taʼaal taabiʼni.»

22Wa wakit al-sabi simiʼ al-kalaam da, hu bigi haznaan wa faat achaan indah maal katiir. 23Wa Isa gaal le talaamiizah : «Nuguul leeku al-hagg, al-dakhuul fi mamlakat Allah gaasi le l-naadum al-indah maal katiir. 24Wa battaan nuguul leeku, dakhuul al-jamal fi gadd al-ibre hayyin min dakhuul siid al-maal fi mamlakat Allah.»

25Wa l-talaamiiz alʼajjabo bilheen min al-kalaam da wa saʼalooh wa gaalo : «Kan misil da, yaatu yagdar yanja ?» 26Wa Isa chaafaahum adiil wa gaal leehum : «Da gaasi marra waahid le l-naas wa laakin ma fi cheyy gaasi le Allah.»

27Wa Butrus gaal : «Wa aniina, khalleena kulla cheyy al-indina achaan nitaabuʼuuk. Wa aniina nalgo chunu ?» 28Isa radda leehum wa gaal : «Nuguul leeku al-hagg, wakit ana Ibn al-Insaan nagood fi l-kursi al-aziim fi l-zaman al-foogah Allah yisawwi kulla cheyy jadiid, intu al-taabaʼtuuni tagoodu fi karaasi 12 wa tahkumu gabaayil Bani Israaʼiil al-atnaachar. 29Wa ayyi naadum al-gamma fi chaan usmi wa khalla beetah aw akhwaanah aw akhwaatah aw abuuh aw ammah aw iyaalah aw ziraaʼtah, Allah yantiih 100 marra ziyaada wa yantiih al-haya al-abadiiye. 30Wa laakin naas katiiriin al-gaaʼidiin wara, yabgo giddaam. Wa naas katiiriin al-gaaʼidiin giddaam kamaan yabgo wara.»

Sélection en cours:

Matta 19: ADT19

Surbrillance

Copier