Matta 17

Al-Masiih fi nuur al-majd

1Wa baʼad sitte yoom, Isa chaal maʼaayah Butrus wa Yaakhuub wa Yuuhanna akhuuh wa waddaahum wiheedhum fi raas hajar tawiil. 2Wa Isa alkhayyar giddaamhum. Wijhah nawwar misil nuur al-harraay wa khalagah bigi abyad karr misil al-nuur. 3Wa tawwaali, al-nabi Muusa wa l-nabi Iliyaas baano giddaamhum wa gaaʼidiin yihajju maʼa Isa.

4Wa Butrus hajja le Isa wa gaal : «Sayyidna, bigi leena sameh kadar aniina gaaʼidiin hini. Wa kan tidoorah, nisawwi lagaadiib talaata, waahide leek wa waahide le Muusa wa waahide le Iliyaas.» 5Wa wakit hu lissaaʼ gaaʼid yihajji, sahaabaay al-indaha nuur jaat wa khattathum be dullaha wa hiss min lubb al-sahaabaay ansamaʼ wa gaal : «Da bas Ibni al-nihibbah wa ana farhaan beyah bilheen. Asmaʼo kalaamah.»

6Wa l-talaamiiz simʼo al-hiss wa khaafo marra waahid wa wagaʼo be wujuuhhum fi l-ard. 7Wa Isa ja leehum wa khatta iidah fooghum wa gaal : «Gummu ! Ma takhaafo !» 8Wa rafaʼo ruuseenhum wa ma chaafo naadum illa Isa wiheedah.

9Wa wakit gaaʼidiin yanzulu min raas al-hajar, Isa amaraahum wa gaal : «Ma tihajju le naadum waahid kula be l-cheyy al-chiftuuh gubbaal Ibn al-Insaan ma yabʼas min ust al-maytiin.» 10Wa talaamiizah saʼalooh wa gaalo : «Maala al-ulama gaaʼidiin yuguulu akiid Iliyaas yaji gubbaalak ?» 11Wa Isa radda leehum wa gaal : «Sahiih Iliyaas yaji gubbaali achaan yiʼaddil kulla cheyy. 12Wa niʼooriiku Iliyaas ja khalaas wa ma irfooh wa sawwo foogah misil dawwaro. Wa baʼad chiyya yitaʼʼubuuni ana Ibn al-Insaan kula.» 13Wa khalaas al-talaamiiz fihmo hu yihajji leehum be Yahya al-Mukhattis.

Al-wileed al-indah amfitfit

14Wa gabbalo fi l-bakaan al-lammo foogah al-naas wa raajil waahid ja le Isa wa sajad giddaamah. 15Wa l-raajil gaal : «Ya sayyidna, arham wileedi. Indah amfitfit wa hu taʼbaan bilheen. Hu yagaʼ katiir. Marraat yagaʼ fi l-naar wa marraat yagaʼ fi l-almi. 16Wa waddeetah le talaamiizak wa ma gidro yachfuuh.» 17Wa Isa radda wa gaal : «Ya l-naas al-uwuj wa ma induku iimaan ! Lahaddi mata nagood maʼaaku ? Lahaddi mata nilhammalku ? Jiibu leyi al-wileed hini.» 18Wa Isa kachcha le l-cheetaan wa l-cheetaan marag min al-wileed wa fi l-wakit da bas al-wileed ligi al-aafe.

19Wa baʼadeen al-talaamiiz jo wa hajjo le Isa wiheedhum. Wa saʼalooh wa gaalo : «Maala ma gidirna taradna al-cheetaan da ?» 20Wa radda leehum wa gaal : «Achaan iimaanku daʼiif. Wa nuguul leeku al-hagg, kan iimaanku sakhayyar misil habbat kireeb kula, tagdaro tuguulu le l-hajar da : ‹Azhaf min hini wa amchi hinaak !› Wa khalaas, al-hajar yazhaf. Wa ayyi cheyy yabga leeku mumkin. 21Wa laakin al-cheetaan al-nafar da, ma yintarid illa be l-duʼa wa l-siyaam.»

Al-Masiih hajja battaan be mootah

22Wa wakit Isa wa talaamiizah gaaʼidiin yilimmu fi daar al-Jaliil, Isa gaal leehum : «Baʼad chiyya Ibn al-Insaan yisallumuuh le l-naas 23wa yaktuluuh. Wa fi l-yoom al-taalit, Allah yabʼasah min ust al-maytiin.» Wa talaamiizah bigo haznaaniin bilheen.

Miiri hana beet Allah

24Wa baʼad wislo fi hillit Kafar Naahuum, jo al-naas al-yichiilu al-miiri al-yikaffuuh kulla l-Yahuud le beet Allah. Wa jo le Butrus wa gaalo : «Sayyidku yikaffi al-miiri walla ?» Wa radda leehum wa gaal : «Aywa, yikaffiih.»

25Wa wakit Butrus andassa fi l-beet, Isa hajja leyah wa saʼalah wa gaal : «Simʼaan, fikrak chunu ? Al-muluuk al-fi l-dunya yichiilu miiri wa jamaarik min yaatu ? Yichiilu min iyaalhum walla min al-naas al-aakhariin ?» 26Wa Butrus radda leyah wa gaal : «Yichiiluuh min al-naas al-aakhariin.»

Wa Isa gaal leyah : «Khalaas, ma waajib le iyaal al-malik yikaffuuh. 27Wa laakin ma nidooru nibachtunu al-naas al-saʼalook al-miiri dool. Wa achaan da, amchi fi khachum al-bahar wa azgul jambaatak fi l-almi. Wa l-huutaay al-awwal takrubha, fukk khachumha wa talga daakhal riyaal waahid khiimtah tikaffi miiri hana naaseen. Wa chiilah wa kaffi beyah al-miiri hanaayi wa hanaak.»

Sélection en cours:

Matta 17: ADT19

Surbrillance

Copier