Takwiin 14

Al-muluuk karabo Luut

1-2Wa fi l-wakit daak, fiyah majmuuʼteen hana muluuk al-gaaʼidiin yilhaarabo ambeenaathum. Al-majmuuʼa al-awwalaaniiye, muluukha humman Amraafal malik Chinʼaar wa Aryuuk malik Alasaar wa Kadarlaʼoomar malik Ilaam wa Tidʼaal malik Guuyim. Wa l-majmuuʼa al-taaniye, muluukha humman Baaraʼ malik Saduum wa Birchaʼ malik Amuura wa Chinaab malik Adma wa Chimiibar malik Sabuuyiim wa malik Baalaʼ al-binaaduuha Suukhar. 3Wa l-majmuuʼa al-taaniye lammat rujaalha fi waadi Siddiim al-binaaduuh al-yoom al-bahar al-Mayyit. 4Achaan min 12 sana gaʼado tihit hukum Kadarlaʼoomar wa fi sanit 13, abo hukmah.

5Wa fi sanit 14, Kadarlaʼoomar wa l-muluuk al-maʼaayah annasaro fi l-Rafaayiin fi hillit Achtaruut Garnaayim wa fi l-Zuziyiin fi hillit Haam wa fi l-Imiyiin fi sahalat Khiryataayim. 6Wa annasaro fi l-Huuriyiin kula fi hajarhum al-fi Saʼiir wa taradoohum lahaddi El Faaraan fi huduud al-sahara. 7Wa baʼad da, gabbalo fi hillit Een Michfaat al-binaaduuha Khaadich. Wa hinaak annasaro fi l-Amaalikh fi kulla baladhum wa annasaro fi l-Amuuriyiin al-gaaʼidiin fi Hassuun Taamaar kula.

8Wa khalaas, al-majmuuʼa al-taaniye al-humman muluuk Saduum wa Amuura wa Adma wa Sabuuyiim wa Baalaʼ al-binaaduuha Suukhar kula, marago fi waadi Siddiim le yihaarubu udwaanhum. 9Wa udwaanhum al-majmuuʼa al-awwalaaniiye, humman Kadarlaʼoomar malik Ilaam wa Tidʼaal malik Guuyim wa Amraafal malik Chinʼaar wa Aryuuk malik Alasaar. Khamsa muluuk lammo didd arbaʼa muluuk.

10Fi turaab Siddiim, fiyah nugaar hana zift. Wakit malik Saduum wa malik Amuura arrado, waahidiin min rujaalhum wagaʼo fi l-nugaar dool wa l-aakhariin jaro min al-duwaas wa allabbado fi l-hajar. 11Wa l-naas al-annasaro fi Saduum wa fi Amuura chaalo kulla l-khaniime wa l-maʼaach wa faato beyah. 12Wa Luut al-saakin fi Saduum, hu kula karabooh wa waddooh maʼaahum be kulla khumaamah. Wa Luut wileed akhu Abraam.

Abraam najja Luut

13Baʼad chiyya ke, naadum waahid arrad min al-duwaas ja khabbar Abraam al-Ibraani al-saakin jamb al-chadar al-kubaar hana Mamra al-Amuuri. Wa Mamra al-Amuuri da, hu akhu Achkuul wa Aniir. Humman kulluhum induhum alaakha maʼa Abraam.

14Min Abraam simiʼ kadar Luut wileed akhuuh karabooh, gamma lamma kulla rujaalah al-yagdaro yihaarubu wa gaaʼidiin fi beetah. Wa adadhum 318 raajil. Wa chaal derib hana udwaanah lahaddi balad Daan. 15Wa Abraam gassam naasah wa hajamo udwaanhum be l-leel. Wa annasaro fooghum wa taradoohum lahaddi hillit Huuba al-gaaʼide munchaakh le hillit Dimachkh. 16Wa khalaas, Abraam galaʼ minhum kulla l-maal al-chaalooh wa Luut wileed akhuuh wa kulla maalah wa l-awiin wa l-naas al-karaboohum fi l-harib.

Malkisaadikh baarak Abraam

17Wa baʼad Abraam annasar fi Kadarlaʼoomar wa l-muluuk al-maʼaayah, malik Saduum marag wa laagaah le Abraam fi waadi Chawa, maʼanaatah waadi al-malik. 18Wa Malkisaadikh malik hillit Chaaliim jaab le Abraam khubza wa khamar. Wa Malkisaadikh da, hu raajil diin hana Allah al-Aali. 19Wa baarak Abraam wa gaal :

«Ya Abraam, khalli Allah al-Aali

khaalig al-samaawaat wa l-ard yibaarikak !

20Baarak Allah al-Aali

al-nasaraak fi aduuk.»

Wa khalaas, Abraam antaah al-uchur min kulla cheyy al-chaalah fi l-harib.

21Wa baʼad da, malik Saduum gaal le Abraam : «Antiini naasi wa chiil kulla l-maal le nafsak.» 22Wa Abraam radda leyah wa gaal : «Narfaʼ iidi le Allah Ilaah al-Aali khaalig al-samaawaat wa l-ard. 23Wa nahlif ana ma nichiil cheyy minnak wa la kheet wa la seer hana naʼaal achaan baʼadeen ma tuguul : ‹Ana sawweet Abraam khani.› 24Ana ma nichiil cheyy illa l-akil al-naasi akalooh. Wa l-naas al-jo maʼaayi Aniir wa Achkuul wa Mamra, humman dool, khalliihum yichiilu hagguhum.»

Sélection en cours:

Takwiin 14: ADT19

Surbrillance

Copier