Takwiin 13
13
1Wa khalaas, Abraam marag min Masir, hu wa martah wa kulla maalah wa macho le saharat Nagab. Wa Luut kula macha maʼaayah.
Abraam wa Luut anfarago
2Wa Abraam khani ziyaada. Indah bahaayim katiiriin wa fudda wa dahab katiir. 3Wa rahal min saharat Nagab lahaddi wisil al-bakaan al-awwal gaʼad foogah ambeen hillit Beet Iil wa hillit Aay. 4Wa da bas al-bakaan al-awwal Abraam bana foogah madbah le Allah. Wa battaan saʼal be usum Allah.
5Wa Luut al-maachi maʼa Abraam, hu kula indah khanam wa bagar wa naas katiiriin. 6Wa l-bakaan bigi leehum dayyig le marʼaahum achaan maalhum katiir. Wa fi chaan da, ma gidro yagoodu sawa, 7wa bigi khilaaf ambeen ruʼyaan Abraam wa ruʼyaan Luut. Wa fi l-wakit da, al-Firizziyiin wa l-Kanʼaaniyiin kula saakniin fi l-ard maʼaahum.
8Wa Abraam gaal le Luut : «Ma mumkin yabga khilaaf beeni wa beenak walla been ruʼyaani wa ruʼyaanak achaan aniina akhwaan. 9Daahu al-ard wasiiʼe giddaamak. Khalli ninfargu. Kan inta macheet wati, ana namchi munchaakh. Wa kan inta macheet munchaakh, ana namchi wati.»
10Khalaas, Luut chaaf turaab hana bahar al-Urdun lahaddi Suukhar kulla akhdar wa ajabah. Wa l-ard di samha bilheen misil Jannat Allah wa misil turaab Masir. Wa da gabul Allah ma dammar mudun Saduum wa Amuura. 11Wa khalaas, Luut gamma macha sabaah ale turaab bahar al-Urdun wa chaal al-turaab da le nafsah. Wa be misil da, Luut wa Abraam anfarago. 12Wa Abraam sakan fi balad Kanʼaan wa Luut bana fariigah min hillaal al-mantaga lahaddi Saduum. 13Wa naas Saduum humman fasliin ziyaada wa muznibiin giddaam Allah.
14Wa baʼad Luut anfarag min Abraam, Allah gaal le Abraam : «Min bakaanak al-gaaʼid foogah, arfaʼ raasak wa chiif min al-sabaah le l-kharib wa min al-munchaakh le l-wati. Chiifah adiil ! 15Kulla l-ard al-tichiifha di, ana nantiiha leek wa le zurriiytak ila l-abad. 16Wa nisawwi zurriiytak katiire misil turaab al-ard, ma yagdaro yahsubuuhum. 17Gumm amchi ! Wa ruukh al-ard di min tuulha le urdaha achaan ana nantiiha leek.»
18Wa Abraam hawwal be fariigah wa sakan fi bakaan al-chadar al-kubaar hana Mamra, gariib le Hibruun. Wa hinaak kula bana madbah le Allah le yigaddim foogah dahaaya.
Sélection en cours:
Takwiin 13: ADT19
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Arabe tchadien (alphabet latin) Bible © Alliance Biblique du Tchad, 2019.
