Málikɔ 5
5
Yéso anamisi nto á kukuwa á ɓansombo
(Ɔna phɔtɔ Mat 8.28-34; Lók 8.26-39)
1Mbusa í, Yéso na ɓagoigi ɓáokiɗia kubi á etǔ, ka nji ndea Ɓagɛási. 2Yéso áotóka suɓi á koko. Kɛ̌kɛndɔ, nto á kukuwa á ɓansombo moci áotóka na bóta#5.2 Bóta nɛɓɔ ɗátú okanga, nɛngbo ɗáɓáotongea kubu í k'etae. ka dondana na Yéso. 3Ɔma á ɓuiki nɛkɛ ɗátú ka bóta. Ɗákátú ye na nkpa nde aɔtɔka ɓoaga akɛ nanga áɓá na ngoi á ngɔa. 4Nga, ɗátú okakoaga ngoi á ngɔa nde ɗáɓátú ombóaga ně k'écinji. Nna na nkpa nde ɗáɔtɔka phɔngisa akɛ. 5Keiphe n'esa, ɗátú ɔkɔɓa ka bóta na ka mamba, n'aokoga, n'aǒtumaga n'etae.
6Ɓî nto á kukuwa á ɓansombo ndɔ amɔni ye tɔ Yéso ɗanga, áoga mbangɔ kuɓî, áogua k'écinji akɛ, 7áokoga akpɛ phɛɛ: «Eke nde ɓe n'ɔɓɛ kau Yéso Muna-Mokonga mmbé ana kɔkɔta bui? Nɛɔmɛmi k'ína á Mokonga, komotambisɛgɛmbɛ!» 8Nga, Yéso ɗángi te: «Ɓansombo ca! Júanani suɓi á nkpa ndee!» 9Mbusa, Yéso áomúsia: «Ina akɔ ande eke?» Áonsikisia te: «Ina ani ande Ekombo á ɓato émani nga, ɓeɓiki phɛɛ.» 10Ɓansombo ndɔ, ɓâ gǎkɛ onɗengemisaga Yéso gea: «Kósóɓeɛgɛmbɛ ɗanga á nji.»
11Cɔ, bíbí á mamba nde ɗátú wa, nsamba ángbó á ɓangɛa#5.11 Ɔna Ɓlw 11.7; Tɔl 14.8. Ngɛa ɗátú nyama á otaɔ ka Ɓayúda nga, ɗáɓáoɓánga jɔɔkana mbusa á ea akɛ. Wani ɓɛɔni gea nyɔngɔ nde ɗágeani ka nji nde nna á Ɓayúda. ɗáɓátú oeaga. 12Ɓansombo ndɔ ɓâ phɔtɔ onɗengemisaga Yéso te: «Ósoteka gea ɓéngiɛ suɓi á ɓangɛa ndosi.» 13Yéso áǒsosea. Mpɔ ɓáojuana suɓi á nto á kukuwa á ɓansombo, ɓáongia suɓi á ɓangɛa. Nsamba á ɓangɛa ndɔ ɓáodida mamba mbangɔ, ɓáoguia suɓi á iɓo, ɓáosía. Ɗáɓátú ɓangɛa ɓea ɛlɛphu iɓɛ (2.000).
14Ɓaɓondigi-ɓangɛa ɓáɔni ye ɓó, ɓáotea, na gǎ tɔ̌miaga nyɔngɔ ndɔ ka ntanga-nji na ka nji abɔbɔbɔa. Mpɔ, ɓakpa ɓáoga k'aphe á engekisa á nyɔngɔ nde ɗágeani. 15Ɓáobika bíbí á Yéso, ɓáɔmɔna nto á kukuwa á ɓansombo ɓásii n'aiki ka oɗo, n'aɔ́li bɔngɔ ánjá, n'aye tɔ oúbapha. Ɓakpa ndɔ ɓâ gǎkɛ oɓá na kɔɓɔɓɔkɔ. 16Cɔ, ɓundɔ ɗáɓáɔni nyɔngɔ ndɔ, ɓáɔ̌tɔmia ɓadaɓɔ nyɔngɔ nde ɗátɔtɔkɛani ka phɔa á nto á kukuwa á ɓansombo na ka phɔa á ɓangɛa.
17Kaɓondɔ, ɓáokpanga ɗengemisaga á Yéso te, átokɛ ka nji nɛɓɔ. 18Mbenɔ nde Yéso ɗáokambea ka koko, nami ka kukuwa á ɓansombo ndɔ áonɗengemisaga gea, ɓágɛ na yɛ. 19Yéso kaɓeekeɛ. Â ndiu ongoɗea te: «Gǎ mɔtɛ-akɔ, ɔ́ɔtɔ̌miɛ ɓakpa nɛkɔ kema bui nde Mɔkɔta Mokonga agi k'óɓɛ na ɓî aokui ngomi.» 20Yɛ, áoga nɛkɛ, áokpanga tɔ̌mia nyɔngɔ bui nde Yéso ɗági ka phɔakɛ. Áɔtɔmiaga ka Ntanga-nji nkama. Ɓakpa ɓɔbu ɓáotangaaga.
Yéso anamisi nseka ndea Yaílɔ na nke nde ɗátú na kukuwa-ɛ́yɛna
(Ɔna phɔtɔ Mat 9.18-26; Lók 8.40-56)
21Mbenɔ nde Yéso ɗákai goto ka koko kubi á etǔ, usɛsɛ á ɓakpa ɓásii ɓáodondanaga bíbí akɛ n'aka motii á iɓo. 22Nkpa moci áokiɗia ina akɛ Yaílɔ. Ɗátú ka ɓakɔta á endu á madondanɔ ndea Ɓayúda ka nyɔngɔ á Mokonga. Mbenɔ nde ɗámɔni Yéso, áogua k'écinji akɛ, 23áonɗengemisaga phɛɛ na gea akɛ te: «Miki á nseka nɛmɔ aogea ákuwɛ. Bika óbisɛ njaga akɔ gǔ akɛ ka gea, áamɛ na áendɛ.» 24Mpɔ, Yéso ɓáoga na yɛ. Usɛsɛ á ɓakpa ɓásii ɓáomɓea na ɓáɔmɓɔkanisaga.
25Cɔ, nke moci ɗátú ka ɔlɔ aɓɔ, n'aíphí na kukuwa-ɛ́yɛna ka ɓasaga nkama na ɓaɓɛ (12). 26Ɗátú otambaga ka gǎ mɔtɛ á ɓasaku ɓásii, áɔgɔɓa imɔna nɛkɛ bui kángá á ama. Kukuwa â ndiu ɔntɔka. 27Nke ndɔ áɔɔ́ka ɓakpa na ɓáoaba ka phɔa Yéso. Mpɔ áongia suɓi á usɛsɛ á ɓakpa ɓunde ɗáɓáɔmɓɔkanisaga Yéso. Áodunga bɔngɔ ndea Yéso mbusa akɛ. 28Nga, nke ndɔ ɗáyɔngi ka měma akɛ gea: «Aoɓá na nedungi phɔ́ taa ka bɔngɔ ndea Yéso, neamande.» 29Kɛ̌kɛndɔ tɔ, magia ndɔ ɗátú onjuana, áotenekeana. Yɛ, áɔ̌yɔka ka nyama akɛ gea aámi ka tambaga nɛkɛ.
30Kɛ̌kɛndɔ tɔ Yéso áɔ̌yɔka gea ka ɓukpɛkpɛ antóki. Áǒpháia ka nkíndí á usɛsɛ á ɓakpa, áǒgea te: «Ani mmbé adungi bɔngɔ nɛmɔ?» 31Ɓagoigi nɛkɛ ɓáonsikisia te: «Ai! Kɔ́máɔɔna usɛsɛ á ɓakpa ɓî ɓáɔɓɔkanisi nde? Oosoúsia gea te: ‹Ani mmbé amodungi?›» 32Yéso â gǎkɛ ǒtimaneaga ka gea ámɔnɛ nkpa nde agi kema ndɔɔ. 33Ɓî nke ndɔ aúbi ye gea aami, áoɓánga, áɔɛkanaga, áobika ogua k'écinji á Yéso, áongoɗea nyɔngɔ bui á ɗoni. 34Mpɔ, Yéso áongoɗea te: «Nseka nɛmɔ, ɓeekea nɛkɔ akoamisi. Cɔ, gǎ ka ɓujɛjɛ, oami ka kukuwa ndɔɔ.»
35Ɓî Yéso ɗá phɔ́tɔ ɔyɔnga na nke ndɔ, ɓakpa ndea Yaílɔ, ɓáokiɗia, ɓáongea te: «Kɔ́nɛisɛgɛmbɛ Ngoisigi nga, nseka nɛkɔ a ye ku.» 36Yéso ɗákábisi gǎkɛ měma ka nyɔngɔ ndea ɓakpa ndɔ, â tɔ ongoɗea Yaílɔ te: «Kɔ́ɓɛmbɛ na kɔɓɔɓɔkɔ, ɓá tɔ na ɓeekea.» 37Yéso ɗákáɓeeki ka ɓakpa ágɛ na yɛ, tɔndɔ: Pɛ́tɛɛ, Yakɔ́ɓɔ na Yoáni, muna-amakɛ na Yakɔ́ɓɔ. 38Ɓî ɓákiɗi ye mɔtɛ á Yaílɔ, Yéso áɔ̌ɓɔna ɓakpa na ɓáyomboki na ɓáogáma na koga akpɛ. 39Yéso áongia suɓi éndu. Aǒgea te: «Nyɔngɔ sina nde ɓoogea eongo kau, na ɓoogama? Nseka ndɔ káku. A ndiu tɔ ka tɔ̌.» 40Ɓakpa nde ɗáɓátú wa, ɓáɔntɛbɛa. Yéso â gǎkɛ ǒjuanisa ɓɔbu, â tɔ ojiga na aba-miki na amakɛ na ɓunde ɗáɓáge na yɛ. Ɓáongia kuɓî ɗáɓábisi mǒnda á miki. 41Yéso áondunga miki ndɔ ka njaga, áongoɗea ka ɛyɔngi nɛɓɔ: «Talita kum#5.41 Talita kum: ɗátú Kialamɛ́a, ɛyɔngi nde Ɓayúda ɗáɓáɔyɔnga ka matú ndea Yéso.!» Ande gea te: «Nseka, nekongoɗi, ómesia!»
42Kɛ̌kɛndɔ, áǒmesia, áotamba. Kaɓondɔ, ɓakpa nde ɗáɓátú wa, ɓáotangaaga ásii phɛɛ. Nseka ndɔ ɗátú na ɓasaga nkama na ɓaɓɛ (12). 43Mpɔ, Yéso áǒimisia akpɛ gea, ɓákangoɗeɛ mɔnɔ nkpa. Â goto ǒsosea gea, ɓámophɛ miki ndɔ eea.
Sélection en cours:
Málikɔ 5: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
