Málikɔ 4
4
Mɛní á mmisi mbó
(Ɔna phɔtɔ Mat 13.1-9; Lók 8.4-8)
1Yéso ɗákpangi goto goisaga ka mpɛphɛ á etǔ á ka Galiláya. Usɛsɛ ángbó á ɓakpa ɓáodondanaga bíbí akɛ. Kaɓondɔ, áokamɓea ka koko, áoika kau. Ɓakpa ɗáɓátú ka motii iɓo. 2Mpɔ, áǒgoisaga nyɔngɔ ásii ka mɛní. Áǒngoɗea ɓe: 3«Cɔ, ɔ́kani! Nkpa moci ɗáge omisia mbó. 4Mbenɔ nde ɗátú omisia ú, nɛngbo áogua ka mpɛphɛ á aphe, ɓambǔ ɓáobika, ɓáoea ú.
5Nɛngbo áogua k'ɔ́ma á ɛtɛ nnde ɗákátú na oɗo ásii. Mbó ndɔ áɔtɛa mbangɔ nga, oɗo ndɔ ɗákátú ásii. 6Mbenɔ nde maní aɓɛti ye akpɛ, áotoɓoa ú. Mbó kau áɔɔmɔkaka nga, ɗákátú na mǐgi. 7Nɛngbo áogua ka oɗo á ngenge. Ngenge áɔtɛa, áophiphisa mbó kau, kagɔmbɛ ye. 8Nɛngbo áogua ka oɗo ánjá. Áɔtɛa, áophonda, áɔgɔmbisa. Ejoko moci áɔgɔmba mbuka nkama isaɔ (30), nɛngbo nkama ngianjaga (60), nɛngbo mia moci (100). 9Cɔ, mmbé ana kecue ka ɔkapha, ambe áɔ́kɛ.»
Yéso aɔyɔnga ka mɛní ka ɓo?
(Ɔna phɔtɔ Mat 13.10-17; Lók 8.9-10)
10Ɓî Yéso na ɓagoigi nkama na ɓaɓɛ (12) na ɓunde ɗátúotámbaga na ɓɔ ɗáɓátú sasaɓɔ, ɓáomúsia kantíti á mɛní. 11Yéso áǒsikisia te: «Mokonga anoúbisi nyɔngɔ á ɓɔsɔmɛa á koɓoamɛ nɛkɛ. Ka ɓundɔ ɓá gǎkɛ na nsɛngɛ, nyɔngɔ aɛsɔmɛani ka mɛní. 12Kaɓondɔ unge,
‹Ɓáɔɔnjia, ɓákaɔnɛ mɔnɔ gǎkɛ.
Ɓáɔɔ́ka, ɓákáengekisɛ.
Atúoɓá na ɓáengekisi, ámbé ɓáekěti ka Mokonga.
Yɛ, áoíma ɓojeɗe nɛɓɔ#Ɔna Isa 6.9-10.›»
Yéso aɔtɔmiaga base Mɛní á mmisi mbó
(Ɔna phɔtɔ Mat 13.18-23; Lók 8.11-15)
13Mpɔ, Yéso áǒgea te: «Ai! Ɓókóengekisimbɛ mɛní nde? Cɔ, ɓoengekisande gǎkɛ mɛní nɛngbo bui ɓo?
14Mbó nde nkpa ndɔ ɗátú omisia, ande Nyɔngɔ á Mokonga. 15Mbó nɛngbo ɗágu ka mpɛphɛ á aphe. Mpɛphɛ á aphe ndɔ, a ɓea ɓakpa nde ɓáɔɔ́ka Nyɔngɔ á Mokonga. Kángá iphia, Sɛtáni áophúia Nyɔngɔ kau suɓi aɓɔ. 16Mbó nɛngbo ɗágu k'ɔ́ma á ɛtɛ nnde ɗákátú na oɗo ásii. Oɗo ndɔ a ɓea ɓakpa nde ɓáɔɔ́ka Nyɔngɔ á Mokonga. Ɓáoɓeekea ú mɔngɔ ímoci na maseye. 17Aoɓá ka mbenɔ á kpǎ á minyɔ na tambaga ka Nyɔngɔ á Mokonga, ɓâ ndiu okamba ú. Ɓáogua nga, Nyɔngɔ á Mokonga ɗákángisi mǐgi suɓi aɓɔ. 18Mbó nɛngbo ɗágu ka oɗo á ngenge. Oɗo á ngenge ndɔ a ɓea ɓakpa ɓunde ɓáɔɔ́ka Nyɔngɔ á Mokonga. 19Nyɔngɔ ndɔ kaɓɛ na ɔma suɓi aɓɔ, ka nyɔngɔ á ianaga á kema á ka mokonda. Ɓá gǎkɛ ǒdemisaga n'ɛtɔi na konda kema ɗanga-ɗanga. Nndɔ bui áophiphisa Nyɔngɔ á Mokonga suɓi aɓɔ. Kagɔmbɛ ye. 20Mbó nɛngbo ɗágu ka oɗo ánjá. Oɗo ndɔ, a ɓea ɓakpa ɓunde ɓáɔɔ́ka Nyɔngɔ á Mokonga, ɓáoɓeekea, áɔgɔmba suɓi aɓɔ. Moci áɔgɔmba mbuka nkama isaɔ (30), nɛngbo nkama ngianjaga (60), nɛngbo mia moci (100).»
Mɛní á ɔbɛa
(Ɔna phɔtɔ Lók 8.16-18)
21Mbusa á wa, Yéso â phɔtɔ ǒɓúsia te: «Nkpa aɔtɔka n'abiki n'ɔbɛa áobisa suɓi á mbeka kaɓɛ kusi á eka? Ɓɛɛndɔ. Ɓá ndiu otoɓoa ka bisa í ka ngeɔ#Ɔna Mat 5.15; Lók 11.33. 22Nga, nna na ka kema á ɓɔsɔmɛa nde káɔnɛkanɛku. Nna phɔtɔ na ka nyɔngɔ á ɓɔsɔmɛa nde kángoɗokanɛku. 23Cɔ, aoɓá nkpa n'ana kecue ka ɔkapha, ambe áɔ́kɛ.»
24Mpɔ, Yéso áǒgea te: «Óengani na nyɔngɔ nde ɓɔɔɔ́ka. Moangɔ nde ɓɔɔbɛɗa ka tena á nyɔngɔ á ɓakpa ɓunɛngbo aunge Mokonga abɛɗande ka tena á nyɔngɔ ínɛnu. Ayameande phɔtɔ. 25Nga, mmbé ana ka kema aámbé ɓáyameande k'ínɛkɛ. Mmbé nna gǎkɛ na ka kema, ɓámutande n'ǐndɔ a ně.»
Mɛní á mbó nde atɛi sasakɛ
26Yéso â phɔtɔ ogea: «Koɓoamɛ ndea Mokonga akengeani na mɛní ndee: Nkpa ɗámisi mbó ka ciko. 27Ka mbenɔ nde nkpa ndɔ áoɗa kǐpha na jujúka kamɓimba, nna gǎkɛ oúba mbenɔ nde mbó áɔtɛa na mɔta. 28Nga, oɗo aɔtɛisa sasakɛ: Ngbángá, mpɔ ejoko á mbuka ka nkɔgɔ ndɔɔ. 29Mbuka â ye tɔ ɔmɔta, ɓáokpanga ɗungua í na nkumba á ɗungu nɛɓɔ nga, mbenɔ á ɗungu ajú#Ɔna Yɔɛ́li 4.13.»
Mɛní á mbó á Aladáli
(Ɔna phɔtɔ Mat 13.31-32,34; Lók 13.18-19)
30Yéso â phɔtɔ ogea: «Ɓekengeanisande koɓoamɛ ndea Mokonga na kema sina? Akengeani gǎkɛ na mɛní sina? 31Cɔ, ande ɓea mbó, nkpa n'akoni ka ciko. Mbó ndɔ a ɓea Aladáli. A gǎkɛ ábɔa phɛɛ ka mbuka bubui á ka mokonda. 32A ye gǎkɛ oɓá na ɓákoni, áɔtɛa, áoɓá ángbóngbó phɛɛ kɔnyɛ́nya mbó bubui nde ɓákoni ka ciko. Aɔtɛisa ntabi-ntabi ángbóngbó nnde ɓambǔ ɓáɔtɔka na ɓáphɛ̌ki íɓɔ aɓɔ kau ka nyɔngɔ á iimbiɔ í.»
33Yéso ɗátú gǎkɛ ɔ̌tɔmia ɓakpa mɛní ɗanga-ɗanga ka gea te, ɓáengekisɛ ú. 34Yéso ɗákátú okamba mɛní ka ɓɔphɛi nɛkɛ. Â gǎkɛ ǒngoɗeaga ɓagoigi nɛkɛ kantíti í bui ka ɓɔsɔmɛa.
Kɔkɔta á Yéso gǔ á sumbu
(Ɔna phɔtɔ Mat 8.23-27; Lók 8.22-25)
35Ɗátú ye ɔgɔgɔ ésa ndɔ, Yéso áǒngoɗea ɓagoigi nɛkɛ: «Ɓéjabɛni kubi ndó.» 36Ɓáǒkamba ɓakpa, ɓáoga ka koko nde Yéso ɗátú kau. Ɓakpa ɓuangbo, ɓâ phɔtɔ oga na koko nɛngbo. 37Wa, sumbu akpɛ áobika. Kɛtɛmbɔ akpɛ áɔɓɛta, iɓo ásii â ye tɔ ongia suɓi á koko. 38Yéso ɗátú gǎkɛ oɗa nci á na ɓɔɓa á koko, n'abisi mɔ̌ akɛ gǔ á monga. Ɓáonjujukisa na gea akɛ te: «Ngoisigi, nna kema k'óɓɛ aoɓá na ɓesi?» 39Yéso ajujúki ye, áokea sumbu, áongoɗea iɓo á etǔ te: «Phɔnga phio!» sumbu áɔphɔnga, etǔ áɔkɔɓa phio! 40Mpɔ, Yéso áǒngoɗea: «Ɓotúoɓánga ka ɓo? Ɓókóɓimbɛ na ɓeekea?» 41Ɓagoigi ɓâ gǎkɛ oɓánga phɛɛ, ɓáoianaga gea: «Ani mmbé? Sumbu n'etǔ, áɔmɔka ɓende!»
Sélection en cours:
Málikɔ 4: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
