Málikɔ 2
2
Yéso anamisi nɗɔti
(Ɔna phɔtɔ Mat 9.1-8; Lók 5.17-26)
1Mbusa á ɓ'esa ábɔa, Yéso áosikianaga na Kapɛɛnaúmu. Ɓakpa ɓáɔɔ́ka te a mɔtɛ-aɓɔ. 2Kaɓondɔ, ɓakpa ɓásii ɓáodondanaga wa, na ka ɓî ɓakpa ɗáɓáɓɔkani suɓi éndu phɔtɔ k'íso á mpume, Yéso n'aɔ̌phɛa nyɔngɔ á Mokonga. 3Mpɔ ɓakpa gena ɓáobika mɔtɛ á Yéso na ɓánkumbigi nɗɔti. 4Ɗáɓákátɔki gǎkɛ bîmisia á Yéso ka nyɔngɔ á ɓika á ɓakpa. Kaɓondɔ, ɓáoɗapha gǔ á endu, ɓáobaa ntɔndɔ#Ɔna Lók 5.19, ɓáondidisa nɗɔti ka nsinɔ n'aɗe k'éka. 5Yéso aɔni ye ɓeekea nɛɓɔ, áongoɗea nɗɔti te: «Mukuamɔ, ɓojeɗe nɛkɔ aímiki.»
6Cɔ, ka ɓaɗundu-ɛɔphi ɓunde ɗáɓáiki wa, ɓáoianaga suɓi aɓɔ te: 7«Mogaa nde ayɔngi ɓo ka ɓo? Ambómi Mokonga nga, ani mmbé aɔtɔka n'aími ɓojeɗe na nna tɔndɔ Mokonga sasakɛ#2.7 ambómi Mokonga: Ɔna phɔtɔ Ɓlw 24.16; Mokonga sasakɛ: Ɔna phɔtɔ Jab 103.3; Isa 43.25?» 8Kɛ̌kɛndɔ Yéso áoúba ianaga aɓɔ. Mpɔ, áǒngoɗea: «Ɓona ianaga ndɔ ka měma anu ka ɓo? 9Cɔ, kema sina nde aáphǒ ka ngoɗea á nɗɔti te: ‹Ɓojeɗe nɛkɔ aímiki›, na yɔnga: ‹Má, kumba kɛsɛ nɛkɔ, ótambɛ›? 10Ka gea ɓóúbɛ te, eme Muna-Nkpa, nena kɔkɔta á ima á ɓojeɗe ka mokonda.» Mpɔ, áǒpháia, áongoɗea nɗɔti te: 11«Má, bɛɗa kɛsɛ nɛkɔ, ósikianɛgɛ mɔtɛ-akɔ.» 12Mɔngɔ moci, áoma, áokumba kɛsɛ nɛkɛ, áojuana mosá á ɓakpa ɓɔbu. Ɓɔ, ɓáotangaaga, ɓáombeba Mokonga, ɓáogea: «Ɓékéɔnimbɛ mɔnɔ k'índe!»
Yéso amɔphani Láwi
(Ɔna phɔtɔ Mat 9.9-13; Lók 5.27-32)
13Yéso â goto oga ka mpɛphɛ á etǔ Galiláya. Ɓakpa ɓásii ɓáobika ondonda. Yɛ, áǒgoisaga. 14Cɔ, ɓî ɗátúotamba, áɔmɔna Láwi,#2.14 «Láwi» ɗátú ina angbo ndea Matáyɔ. Muna Alpháyɔ, n'aiki ka ntua á phendisaga á manjanja. Yéso áɔmɔphana, áongea: «Ómoɓea!» Kɛ̌kɛndɔ, Láwi áoma, áomɓea.
15Mbusa, Yéso áoeaga mɔtɛ á Láwi. Ɓaphendisigi-manjanja ɓásii na ɓato á ɓojeɗe ɓáoeaga kimoci na Yéso na ɓagoigi nɛkɛ nga, ɓakpa ɓásii á etéte ndɔ unge ɗáɓáomɓea. 16Ɓaphaisáyɔ ɓunde ɓánde ɓaɗundu-ɛɔphi ɓáɔni ye ɓî Yéso ɗátú oeaga na ɓato á ɓojeɗe na ɓaphendisigi-manjanja, ɓáǒngoɗea ɓagoigi nɛkɛ te: «Ka nyɔngɔ sina nde Yéso aoeaga na ɓaphendisigi-manjanja na ɓato á ɓojeɗe?» 17Yéso aɔ́ki ye músiɔ nɛɓɔ, áǒgea: «Ɓasambi ɓáunge ɓána siki á nsaku. Nna ɓunde ɓánáosamba. Kébiki k'aphe á ɔphana á ɓato á ɓonjánja. Nebiki ndiu ka ɔphana á ɓato á ɓojeɗe.»
Yéso aɔphɛa ka nyɔngɔ á ika kángá á eaga ka nyɔngɔ á mɛma á Mokonga
(Ɔna phɔtɔ Mat 9.14-17; Lók 5.33-39)
18Esa moci, ɓagoigi ndea Yoáni na Ɓaphaisáyɔ ɓáoika kángá á eaga ka nyɔngɔ á mɛma á Mokonga. Kaɓondɔ, ɓakpa ɓáondonda Yéso, ɓáomúsia te: «Nyɔngɔ sina nde ɓagoigi ndea Yoáni na Ɓaphaisáyɔ, ɓáoika kángá á eaga ka nyɔngɔ á mɛma á Mokonga, ɓagoigi nɛkɔ ɓákáogea ɓó ka ɓo?» 19Yéso áǒsikisia te: «Ɓato á ɛkɛka ɓáikimbɛ mɔnɔ kángá á eaga na mǒko-ɛ́kɛka a kimoci na ɓɔ? Ɓɛɛndɔ. Ka mbenɔ bui nde mǒko-ɛ́kɛka a kimoci na ɓɔ, ɓánáɔtɔka na ɓáiki kángá á eaga. 20Aɓande n'esa nde ɓámphúiande mǒko-ɛ́kɛka sɔsɔɓɛ aɓɔ, k'ésa ndɔ unge ɓáikande kángá á eaga.» 21«Nna na nkpa nde aophopha phaeka á bɔngɔ á kɛ̌kɛ gǔ á bɔngɔ á kala. Aogea ɓó, phaeka á bɔngɔ á kɛ̌kɛ nnde ɓáyami abomande nnde á kala, bomoka í áondanda phɛɛ. 22Nna phɔtɔ na nkpa nde aoɗukia divai á kɛ̌kɛ suɓi á mboso á kala nnde ɓáɓɔngisigi na mpoko á nyama#Ɔna Mat 9.17. Aogea ɓó, divai á kɛ̌kɛ abomande mboso. Divai na mboso bui áoújukana. Akeni ndiu ɗukia á divai á kɛ̌kɛ suɓi á mboso á kɛ̌kɛ.»
Yéso ande Mɔkɔta á saɓáto
(Ɔna phɔtɔ Mat 12.1-8; Lók 6.1-5)
23Esa á saɓáto#2.23 Saɓáto ande esa á múmbiɔ ndea Ɓayúda., Yéso na ɓagoigi nɛkɛ ɗáɓáɔnyɛ́nya ka ciko á nganɔ#2.23 Nganɔ ande mbó ɓea mponga nnde ɓáɔbɛɗanaga na mpusu í ka ɔmba mokati.. Ɓagoigi nɛkɛ ɓáokpanga kɔɗaga á mbuka í ka mpɛphɛ á aphe#Ɔna Tɔl 23.26. 24Mpɔ, Ɓaphaisáyɔ ɓáongoɗea Yéso te: «Ɛnjia phɔ́! Ɓagoigi nɛkɔ ɓáɔbɛɗanaga esa á saɓáto na ɓáphení bɛɗanaga k'ésa ndɔ ka ɓo#Ɔna Jua 34.21?» 25Yéso áǒsikisia te: «Ɓókótangimbɛ mɔnɔ kema nde Daúdi na ɓakpa nɛkɛ ɗáɓági mbenɔ nde ɗáɓáku na nja? 26Ɗátú mbenɔ nde Abiatáli ɗátú ngbɛga á ɓatoɓeigi-phɛ́a. Ka nyɔngɔ á nja, Daúdi ɗángí suɓi éndu ndea Mokonga, áoea mokati á ɔphɛɔ. Â phɔtɔ ǒgabea ɓakpa nɛkɛ. Nanga eea ndɔ ɗátú tɔ ka ɓatoɓeigi-phɛ́a sasaɓɔ#2.26 mokati: Ɔna 1 Sam 21.2-7; Abiatáli: Ɔna 2 Sam 15.35; ɓatoɓeigi-phɛ́a: Ɔna Ɓlw 24.9.» 27Yéso â phɔtɔ ɔ̌tɔmia te: «Mokonga ɗábisi saɓáto ka phɔa á nkpa. Ɗákámbisi gǎkɛ nkpa ka phɔa á saɓáto. 28Úbani gea te, Muna-Nkpa aámbé ande phɔtɔ Mɔkɔta á saɓáto.»
Sélection en cours:
Málikɔ 2: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
