Málikɔ 1
1
Ɓɔphɛi ndea Yoáni-Mɓatisi
(Ɔna phɔtɔ Mat 3.1-12; Lók 3.1-18; Yoá 1.19-28)
1Wani ande nkpangeɔ á Mbino-Ánjá á Yéso Kiísito, Muna-Mokonga. 2Cɔ, Mokonga ɗán'yɔngisi Isáya mɔtu-nyɔngɔ nɛkɛ ɓe:
«Cɔ, nenteki ntɔmi-mbino nɛmɔ mosá akɔ,
mmbé aɓɔngisiagande aphe nɛkɔ. #Ɔna Mkɔ 3.1
3Nkpa moci áoaba n'ɛsɔ akpɛ ka nkanda ɓe:
‹Ɓɔngisiagani aphe ndea Mɔkɔta!
Mamisani k'akɛ aphe kau dɛ!›» #Ɔna Isa 40.3
4Kaɓondɔ, Yoáni-Mɓatisi ɗásɛnɛki ka nkanda n'aɔ̌tɔmia ɓakpa ɓe: «Kětiani tambea anu ájeɗe, ɓánoɓatisɛ, mpɔ Mokonga áimɛ ɓojeɗe nɛnu.» 5Ɓakpa ɓɔbu á ka ntanga-nji á Yudɛ́a na ɓunde á ntanga-nji á Yɛusalɛ́ma, ɓáondonda, ɓáɔyɔnga nyɔngɔ á ɓojeɗe nɛɓɔ. Mpɔ, Yoáni áǒɓatisa ka iɓo Yɔɔdáni.
6Yoáni ɗáɔ́li ngɔ́mbɛ nde ɗáɓáɓɔngisi na sáá á ngamia, áɔ̌ɓɔɛa angeɗe á mpokɔ ka cina á kuju. Eea nɛkɛ ɗátú ɓaáphaa na ɓoki á k'osaa. #Ɔna 2 Ɓam 1.8 7Cɔ, Yoáni ɗéngoɗi ɓakpa áɔyɔnga ɓe: «Nkpa moci aobika mbusa ani, amɔnyɛ́nyi ka ɓukpɛkpɛ, mmbé kékeni gbuta ka koɗa á ngoi á ɓiato nɛkɛ. 8Eme ɗénóɓatisi ka iɓo. Yɛ gǎkɛ, anoɓatisande ka Měma á kanga ɓojeɗe.»
Ɓatisa á Yéso na tombaga akɛ
(Ɔna phɔtɔ Mat 3.13—4.11; Lók 3.21-22; 4.1-13)
9Ka mbenɔ ndɔ, Yéso áotóka na Najalɛ́ti á ka Galiláya, ka gǎ mɔtɛ á Yoáni. Yoáni áomɓatisa ka Yɔɔdáni. 10Mɔngɔ moci, ɓî Yéso ajúani ka iɓo, áɔɔna koba n'aúkukani, Měma á kanga ɓojeɗe áodida gǔ akɛ ɓea mboe. 11Ɛsɔ áotóka na koba: «Oɓɛ, onde miki nɛmɔ á ekondi. Nena maseye ka phɔakɔ.»
12Kɛ̌kɛndɔ, Měma á kanga ɓojeɗe áɔnsɔndɔɛa ka nkanda. 13Áoika ka nkanda esa nkama gena (40). Kó, Sɛtáni áontombaga. Yéso ɗátú kimoci na ɓanyama, na ɓamalaéka ɓáɔmbɛɗaneaga.
Ekuma ndea Yéso ka Galiláya
(Ɔna phɔtɔ Mat 4.12-22; Lók 4.14-15; 5.1-11)
14Esa moci Yéso áoga na Galiláya ka mbenɔ nde ɗáɓándungisi Yoáni. Áɔtɔmia Mbino-Ánjá ndea Mokonga. 15Áogea te: «Cɔ, mbenɔ ajú nga, koɓoamɛ ndea Mokonga a ye tɔ bíbí. Kětiani tambea anu ájeɗe, ɓóɓeekeɛ Mbino-Ánjá.»
Yéso aeɓɔphani ɓagoigi nɛkɛ á k'ama mosá-mosá
16Mbusa á wa, Yéso ɗátúɔnyɛ́nya ka motii á etǔ á Galiláya. Kondɔ, áɔ̌ɓɔna ɓaɔphigi ɓaɓɛ, Simɔ́ni na muna-makɛ Andeé, na ɓáomaka moaɓɔ ka etǔ ndɔɔ. 17Yéso áǒngoɗea: «Ómoɓeani, nenóbisande ɓaɔphigi á ɓakpa.» 18Kɛ̌kɛndɔ, ɓáoɗoa moaɓɔ, ɓáomɓea. 19Yéso áɔsɛkɛɗa mosá ábɔa, áɔ̌ɓɔna ɓana Jɛbɛdáyɔ: Yakɔ́ɓɔ na muna-makɛ Yoáni. Ɗáɓátú suɓi á koko na ɓáɔɓɔngisiaga moaɓɔ nɛɓɔ. 20Kɛ̌kɛndɔ, Yéso áɔ̌ɓɔphana. Ɓɔ, ɓáonɗeketa abaɓɔ Jɛbɛdáyɔ na ɓabɛɗanigi suɓi á koko, ɓáomɓea Yéso.
Yéso anamisi nto á kukuwa á ɓansombo
(Ɔna phɔtɔ Lók 4.31-37)
21Mbusa á wa, Yéso na ɓagoigi nɛkɛ ɓáoga na Kapɛɛnaúmu. Esa á saɓáto, kɛ̌kɛndɔ áongia suɓi éndu á madondanɔ ndea Ɓayúda ka nyɔngɔ á Mokonga, áǒgoisaga ɓakpa. 22Ɓundɔ ɗáɓátúɔɔ́ka goisaga ndɔ, ɓáotangaaga phɛɛ. Nkókó á goisaga kau ɗátingani n'índe á ɓaɗundu-ɛɔphi nga, ɗáogoisaga ú na kɔkɔta. 23Cɔ, suɓi éndu ndɔ, nkpa moci ɗátú na kukuwa á ɓansombo, áokoga, 24áogea: «Yéso ɓa Najalɛ́ti ekende ɓeogi ně? Obiki kosótindisa? Neokoúba, onde Nto á kanga ɓojeɗe ndea Mokonga.»
25Yéso áǒkea ɓansombo: «Kɔ́ɓani! Júanani ka nkpa ndee!» 26Ɓansombo ndɔ ɓáonsuga akpɛ. Ɓáonjuana na ɓáokoga. 27Ɓakpa ɓɔbu ɓáoyayama, na ka ɓî ɗáɓáoúsianaga: «Eke nde? Goisaga nde akiɗi kɛ̌kɛ ana ɓukpɛkpɛ. Mogáa nde áǒsosea ɓansombo, ɓɔ ɓáɔmɔ́ka.» 28Kɛ̌kɛndɔ tɔ, ɓoombia á Yéso áɔɛmba k'ɔ́ma bui ka ntanga-nji á Galiláya.
Yéso ěamisi ɓato á esambɔ ɓásii
(Ɔna phɔtɔ Mat 8.14-17; Lók 4.38-41)
29Ka juana aɓɔ k'éndu ndɔ á madondanɔ ndea Ɓayúda ka nyɔngɔ á Mokonga, Yéso, Yakɔ́ɓɔ na Yoáni ɓáoga mɔtɛ á Simɔ́ni na Andeé. 30Kó, ɓáondonda nyamɔtɔ akɛ na Simɔ́ni mmbé nke, n'aɓondi k'éka nga ɗátú na jónga akpɛ. Ka kiɗia á Yéso tɔ, ɓáongoɗea nyɔngɔ akɛ. 31Yéso áɔsɛkɛɗa bíbí akɛ, áondunga ka njaga, áommesia. Mɔngɔ moci, jónga áonsía. Mpɔ, nke ndɔ, áoúnanaga ka ɓɔ.
32Cɔ, ajú ye ɔgɔgɔ, ka gǎ á maní, ɓáombikia na ɓasambi ɓɔbu na ɓato á kukuwa á ɓansombo. 33Ka ntanga-nji ndɔ, ɓakpa ɓɔbu ɓáodondanaga k'íso á mpume. 34Yéso áǒamisa ɓato á esambɔ ɗanga-ɗanga ɓásii. Â phɔtɔ ǒjuanisa ɓansombo ɓásii. Áǒimisia ɓansombo gea, ɓákayɔngɛ nga, ɓansombo ɗáɓámúbi.
Yéso aɔtɔmba Galiláya
(Ɔna phɔtɔ Lók 4.42-44)
35Mama í, ka mɔkɛsuɛ esa n'a phɔ́tɔ na kaiphiɔ, Yéso áojuana, áoga ka nkanda. Kó, áɔmɛma Mokonga. 36Simɔ́ni na ɓadakɛ ɓáoga ka nkaɓɔ akɛ. 37Ɓî ɓándondi ye, ɓáongoɗea te: «Ɓakpa ɓɔbu ɓáokokaɓa.» 38Yéso áǒgea: «Ɓégɛni ka nji angbo, nnde a bîbíbí, nɛ́phɛɛ́ phɔtɔ ɓakpa kó nga, nndɔ ungɔ nebiki í.» 39Áoga n'aɔtɔmba nji bui nde á ka Galiláya. Áɔ̌phɛa ɓakpa suɓi éndu nɛɓɔ á madondanɔ ndea á Ɓayúda ka nyɔngɔ á Mokonga, â phɔtɔ ǒjuanisa ɓansombo kó.
Yéso anamisi nto á kukuwa á sǔ
(Ɔna phɔtɔ Mat 8.1-4; Lók 5.12-16)
40Nto á kukuwa á sǔ moci áobika bíbí á Yéso, áogbuka muanku mosá akɛ, áonɗengemisaga te: «Aoɓá n'okondi, ɔɔtɔka n'omosokosei.» 41Yéso áonkuia ngomi, áonanoa njaga, áondunga, áongea te: «Cɔ, nekondi, neosokosei.» 42Kɛ̌kɛndɔ sǔ áontóka, nyama akɛ áoama. 43Mosá á Yéso úkuia akɛ aphe, â gǎkɛ ɔmphɛa akpɛ te: 44«Kɔ́ntɔ̌miɛ mɔnɔ nkpa. Gǎ ndiu óphangisiɛ mosá á ntoɓeigi-phɛ́a, óphúiɛ phɛ́a nɛkɔ ɓíndɔ Mósa ɗásosi ka ubisa á ɓakpa gea oami.» 45Nto á kukuwa á sǔ ndɔ â ndiu oga okpanga tɔ̌miaga á nyɔngɔ nɛkɛ ka ntanga mosá á ɓakpa ɓɔbu. Kaɓondɔ, Yéso katɔkɛ ye ngia ka ntanga-nji k'íso á ɓakpa, â ndiu oga oika ka nkanda. Ɓakpa ɓâ gǎkɛ otóka ɔma bui, ɓáobika ondonda.
Sélection en cours:
Málikɔ 1: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
