Matáyɔ 23
23
Ɓɔphɛi ka phɔa á Ɓaphaisáyɔ na ɓaɗundu-ɛɔphi
(Ɔna phɔtɔ Mkɔ 12.38-39; Lók 11.43-46; 20.45-46)
1Mpɔ Yéso áǒngoɗea usɛsɛ á ɓakpa na ɓagoigi nɛkɛ gea: 2«Ekuma á ɓaɗundu-ɛɔphi na Ɓaphaisáyɔ ande tɔ̌miaga base ɛɔphi ndea Mósa. 3Kaɓondɔ, ɔ́kani na tɔtɔkisa á kema bubui nde ɓáonóngoɗea. Ɓókóɓeɛmbɛ gǎkɛ tambea aɓɔ ka nyɔngɔ nde tambea aɓɔ, atingani na nyɔngɔ nde ɓáɔyɔnga. 4Ɓáoɓóaga nkumba áɗoko nnde aákpɛ ka kumba í. Ɓáobisa ú k'ɛkɔta á ɓǒko, ɓɔ gǎkɛ ɓákáɓɛ tanda na kanisia á enga ɓǒko ka nkumba ndɔɔ. 5Goto, ɓáogea kema nɛɓɔ bui ka gea te ɓakpa ɓáɛɓɔnɛ. Ɓáɔ̌ɓɔɛa phaeka á bɔngɔ ágbae kaɓɛ k'éndóndó, kaɓɛ ka njaga nnde ɓáɗundu kau nyɔngɔ moci-moci á Mokonga. Nkanjo nɛɓɔ an'ɛɔkɔ á koaga#Ɔna Mɔɔ 15.38-41. 6Ɓáokonda ika k'ɔ́ma á mosá ka mbenɔ á jaí, na k'éndu á madondanɔ ndea Ɓayúda ka nyɔngɔ á Mokonga. 7Ɓákondi gea te ɓáɓɛǒsesea n'obebɔ k'ɔ́ma nde ɓakpa ɓáɓiki, ɓɛ́ɓɔphanɛ ɓɔ: ‹Ɓagoisigi›.
8Ɓenu gǎkɛ, ɓókóɓeekeɛmbɛ ɓánɔɔphanɛ: ‹Ɓagoisigi›. Nga, ɓenu ɓɔbu ɓonde ɓato á komunamema na ɓona ngoisigi moci tɔndɔ. 9Ɓɔ́kɔmɔphanɛ mɔnɔ gǎkɛ nkpa ka mokonda nde: ‹Abɛ›. Nga, Abanu a tɔ moci mmbé á na koba. 10Ɓákanɔ́ɔphanɛmbɛ tanda: ‹Ɓakɔta›. Nga, ɓo tɔ na Mɔkɔta moci, Kiísito. 11Nto angbóngbó ka ɔlɔ anu akeni áɓɛ ndiu mbɛɗanigi nɛnu. 12Mmbé aǒtáisa, ɓándidisande. Mmbé a gǎkɛ ǒdidisa, ɓántáisande.
Yéso aɔnisi odemayɔ ndea ɓaɗundu-ɛɔphi na Ɓaphaisáyɔ
(Ɔna phɔtɔ Mkɔ 12.40; Lók 11.39-52; 20.45-47)
13Ngomi anu ɓaɗundu-ɛɔphi na Ɓaphaisáyɔ. Ɓona maibe! Ɓǒɗakea ɓakpa aphe á ngia ka koɓoamɛ ndea na koba na ɓenu ɓókóongia sasanu kau. Ɓókóokonda gea ɓunde ɓána mɔphɛ á ngia ɓángiɛ. [14Ngomi anu ɓaɗundu-ɛɔphi na Ɓaphaisáyɔ. Ɓona maibe! Ɓǒúta ɓake á kekusa nkumba nɛɓɔ bui, goto ɓɔɔmɛma éndǎ ka gea ɓakpa ɓánɔɔnɛ. Kaɓondɔ unge ɓátenande nyɔngɔ nɛnu akpɛ phɛɛ#Ɔna Mkɔ 12.40!]
15Ngomi anu ɓaɗundu-ɛɔphi na Ɓaphaisáyɔ. Ɓona maibe! Ɓooga tamba ɔma bui ka mokonda na k'óɓenge ka tɔá mɓêki moci tɔndɔ. Mbusa á tɔá akɛ, ɓóombisa nto á koɓoamɛ ndea Sɛtáni, mɔngɔ iɓɛ kɔnɔ́nyɛ́nya.
16Ngomi anu ɓasɔndɔi íɓunde ɓókóɔɔnapha! Ɓoogea te: ‹Aoɓá nkpa n'aɔphí k'ína éndu á Mokonga, nndɔ nnaogea kema. Aoɓá gǎkɛ n'aɔphí k'ína á láté nnde a suɓi éndu á Mokonga, áɔgɔnana.› 17Ɓabóbó á ɓakeíme-íme nde ca! Káu sina nde ana kantíti kɔnyɛ́nya nɛngbo, kaɓɛ láté nde a suɓi éndu ndea Mokonga, kaɓɛ endu á Mokonga nnde aosokosea láté? 18Ɓo phɔtɔ ogea te: ‹Aoɓá nkpa n'aɔphí k'ína á ɛtɛ-ɔ́phɛ́ɔ, nndɔ nnaogea kema a gǎkɛ oɓá nkpa n'aɔphí k'ína á ɔphɛ́ɔ nde a ka ɛtɛ-ɔ́phɛ́ɔ, ambe átɔtɔkisɛ ɛɔphi nɛkɛ.› 19Ɓakeíme-íme nde ca! Kema sina nde aánjá phɛɛ, ɔphɛ́ɔ ndɔ? Ɛtɛ-ɔ́phɛ́ɔ nde aosokosea ɔphɛ́ɔ?
20Kaɓondɔ, nkpa nde aɔɔpha k'ína á ɛtɛ-ɔ́phɛ́ɔ, aɔphí k'ɛtɛ-ɔ́phɛ́ɔ na kema bui nde a gǔ í. 21Nkpa nde aɔɔpha k'ína éndu á Mokonga, aɔphí phɔtɔ k'ína á Mokonga mmbé aiki suɓi í. 22Nkpa nde a ndiu ɔɔpha k'ína á koba, aɔphí k'ína á kankaanga á kɔkɔta ndea Mokonga na k'ína á Mokonga mmbé aikiɗíí#Ɔna Isa 66.1; Mat 5.34.
23Ngomi anu ɓaɗundu-ɛɔphi na Ɓaphaisáyɔ. Ɓonde ɓato á maibe! Ɓoomopha Mokonga phaeka á nkama á kasa ɓea ɓoili. Ɓô ndiu ɔɓɛnjiaga ɓɔphɛi ánjá ɛ́ɔphi ɓea: Koɗoni, ɓonjánja na ɓá na ɓeekea kángá anganisa. Atókeni ɓɔ́tɔtɔkisɛ nndɔ kángá á ɓosea ɛɔphi angbo. 24Ɓasɔndɔi ɓunde ɓɔ́kɔ́ɔnapha nde ca! Ɓɔɔkɛndɛa makana nɛnu ka phúia ɓampapha, ɓô ndiu kommia nyama angbóngbó ɓea ngamia!
25Ngomi anu ɓaɗundu-ɛɔphi na Ɓaphaisáyɔ. Ɓonde ɓato á odemayɔ! Ɓoosokosaga mpɛphɛ á cǎ n'ɔphɛphɛ nde kádúumani, suɓi í n'atúmi ndiu na kema á kuɓa na nnde á mɔphɛ ájeɗe nɛnu. 26Ɓenu ɓakeíme-íme á Ɓaphaisáyɔ nde ca! Sokosani phɔ́ suɓi á cǎ, mpɔ mpɛphɛ í â phɔtɔ ɔsɛnga.
27Ngomi anu ɓaɗundu-ɛɔphi na Ɓaphaisáyɔ, ɓato á maibe! Ɓo ɓea bóta nde ɓásǐ na ɗɔphɛ ábu. Nci á na nsɛngɛ aophenuaga ánjá suɓi í n'atúmi na nkua á ɓasí n'etéte á ɓɔjɔɔkiɔ ɗanga-ɗanga. 28Ɓo phɔtɔ ɓó nga, ɓíndɔ ɓakpa ɓáɔnɔɔna gǔ-gǔ ɓáokanisia te ɓonde ɓato á ɗoni, suɓi anu n'atúmi ndiu na maibe na ɓojeɗe.
29Ngomi anu ɓaɗundu-ɛɔphi na Ɓaphaisáyɔ, ɓato á maibe! Ɓɔ̌phɛkɛa ɓaɔtu-nyɔngɔ ndea Mokonga bóta kema ánjá, ɓɔɔtɔnda bóta á ɓato á koɗoni, 30na gea te: ‹Ɗátúoɓá na ɓeendi ka mbenɔ á ɓatatasu, ámbé ɗéɓékéɓeekeani na ɓɔ ka mowa ɓaɔtu-nyɔngɔ ndea Mokonga.› 31Kaɓondɔ, ɓoɗigimisi sisanu gea, ɓonde ɓasukɔ á ɓakpa ndɔ ɗáɓěme ɓaɔtu-nyɔngɔ ndea Mokonga. 32Aánjá, suiani tɔ ka gea ɓɔ́gɔɓɛɛ kema ndɔ ɓatatanu ɗáɓákpangi! 33Ɓanjɔka, ekombo á ɓakaɓokosa nde ca! Ɓookanisia gea ɓoúkaeka ka tena á nyɔngɔ nɛnu akpɛ k'ɛɛmbɛ á nsa nde nnaoímika ɓo?
34Kaɓondɔ unge ɔ́kani phɔ́: Nenótekisiande ɓaɔtu-nyɔngɔ ndea Mokonga, ɓato á kɔɓɔɔngɛ na ɓaɗundu-ɛɔphi. Ɓǒmande ka ɓɔ, ɓɔ́ɔ̌kɔkɛaga ɓuangbo gǔ á moyangɔ. Ɓǒɓindande ɓuangbo k'éndu á madondanɔ ndea Ɓayúda ka nyɔngɔ á Mokonga na ɓeaga aɓɔ ntanga-nji ka ntanga-nji. 35Cɔ, nyɔngɔ á magia á ɓakpa nde ɗáɗǔkani ka mokonda na ɓákági ɓojeɗe, aɓande gǔ anu kpanga ka Abɛ́li nto á koɗoni na ka ɓî ɗáge osungiaga ka Jakaíya, muna Baakíya, mmbɔ ɗóɓomowe k'éndu á Mokonga, sɔsɔɓɛ á ɔma á kanga ɓojeɗe na ɛtɛ-ɔ́phɛ́ɔ#Ɔna 2 Nyɔ 24.20-22. 36Nenóngoɗi ɗoni gea, nyɔngɔ á magia ndɔ ɗáɗuukani bui, aɓande gǔ anu!
Yéso akui Yɛusalɛ́ma ngomi
(Ɔna phɔtɔ Lók 13.34-35)
37Yɛusalɛ́ma, Yɛusalɛ́ma! Oɓɛ aámbé ǒmowe ɓaɔtu-nyɔngɔ ndea Mokonga, óǒmowa n'etae ɓunde Mokonga akotekisíí. Mɔngɔ ángaáni nde netókondi dondanisa á ɓakpa nɛkɔ ka mpɛphɛ ani ɓea ama-gbɔ̌kɔ n'aódodanisa ɓ'anakɛ kusi á kepupe akɛ, kókondɛ gǎkɛ. 38Aánjá! Endu nɛkɔ ajigande esimɔ#Ɔna Yɛɛ 22.5. 39Cɔ, nekongoɗi ɗoni gea: Kpanga á kɛ̌kɛnde, ɓókómɔɔnɛeka ye, na ka ɓî ɓɔyɔngande gea:
‹Mokonga ábisɛ njaga akɛ gǔ á nkpa nde abiki k'ína á Mɔkɔta#Ɔna Jab 118.26.›»
Sélection en cours:
Matáyɔ 23: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
