Matáyɔ 22
22
Yéso aɔtɔmia mɛní á jaí éyamani
(Ɔna phɔtɔ Lók 14.15-24)
1Yéso ɗáengoɗi goto ɓakpa nyɔngɔ ka mɛní áǒgea: 2«Koɓoamɛ á na koba akengeani na Moamɛ moci mmbé ɗáɓɔngisigi ka anakɛ jaí á eyamani. 3Áǒteka ɓabɛɗanigi nɛkɛ k'aphe á ɔphana á ɓakpa ɓunde ɗáɓáeɓɔphani ka jaí ndɔ. Ɓakpa ndɔ ɓákakondɛ gǎkɛ bika.
4Áǒteka ɓabɛɗanigi ɓuangbo na sosea aɓɔ te ɓáyɔngɛ: ‹Nětenisi ɓǔku á ngɔmbɛ na ɓampɔnjɔ á nyama ɗanga-ɗanga na ɓánɔnigi phɛɛ. Ɓe ye gi kema bui. Bikani ka jaí éyamani.›» 5Ɓakpa kau ɓákáɓɛ gǎkɛ na ka mɔphɛ í, ɓáoga k'ékuma nɛɓɔ: Moci ka ciko nɛkɛ, ɓaangbo ka sombisaga nkumba nɛkɛ. 6Ɓuangbo, ɓáǒdunga ɓabɛɗanigi, ɓáǒtambisaga, ɓáǒma. 7Moamɛ, áɔɓɛa phɛɛ. Áǒteka ɓato émani nɛkɛ ka gǎ kɔnda ɓundɔ ɗáɓáemowe ɓabɛɗanigi nɛkɛ na toɓoa á nji nɛɓɔ kó!
8Mpɔ áǒngoɗea ɓabɛɗanigi nɛkɛ te: «Cɔ, eea á ɛkɛka a ye biɗi. Ɓakpa nde ɓáɛɓɔphani gǎkɛ ka jaí ɓákákenani ně. 9Kaɓondɔ, gǎni ka makani á aphe ángbóngbó ɓɔ́ɓɔphanɛ ɓunde ɓǒdondande kó ka nyɔngɔ á jaí.» 10Ɓabɛɗanigi ndɔ ɓáoga ka makani á aphe ángbóngbó ndɔ, ɓáǒdondanisa ɓakpa ɓɔbu, ɓunde ɗáɓáedondi, ɓánjá na ɓunde ɓájeɗe. Mpɔ endu ɛ́kɛka áotúma na ɓakpa ndɔ ɓáɛɓɔphani.
11Ɓî moamɛ angí ye k'éndu ɛ́kɛka ka ɔna ɓato á ɛkɛka, áɔmɔna nkpa moci mmbé ɗákáɔ́li ngɔ́mbɛ ɛ́kɛka, 12áongea te: «Moko, ongi wani na kɔ́ɔ́li ngɔ́mbɛ ɛ́kɛka ka ɓo?» Nkpa ndɔ kásikisiɛ tanda nyɔngɔ moci. 13Moamɛ áǒngoɗea ɓabɛɗanigi nɛkɛ te: «Mɓóagani nkpa nde k'écinji na ka njaga, ɓómmakɛ na nsɛngɛ ka keiphe. Kondɔ unge agámande na ea á minyɔ.»
14Mpɔ Yéso áogea te: «Ɓunde ɓáɛɓɔphani ɓáɓiki phɛɛ. Ɓunde gǎkɛ ɓáɛsɔmbu ɓákáɓiki.»
Ɓaphaisáyɔ ɓáomúsia Yéso ka nyɔngɔ á ophendɔ á manjanja
(Ɔna phɔtɔ Mkɔ 12.13-17; Lók 20.20-26)
15Mpɔ Ɓaphaisáyɔ ɓáoga onca Yéso ka ɛkɛa akɛ mɛ̌kɔ ka gea, ɓánkoɗɛ ka yɔngɛa akɛ sisakɛ. 16Ɓáǒteka ka ɓagoigi nɛɓɔ kimoci na ɓakpa ndea moamɛ Ɛlɔ́dɛ#Ɔna Mkɔ 3.6. Ɓáongoɗea Yéso te: «Ngoisigi, ɓeoúba gea onde nto á ɗoni na ǒphangiaga ɓakpa nyɔngɔ á ɗoni ka ɓeá á Mokonga. Kóna kɔɓɔɓɔkɔ á mɔphɛ á ɓakpa na kóoɓongeaga kɔkɔta á ɓakpa. 17Ɔ́sɔtɔmia phɔ́ kanisia akɔ ka nyɔngɔ nde, aoɓá n'ande ɗoni kaɓɛ mbɛa gea: Ɛɔphi nɛsu asosi phenda á manjanja ka moamɛ angbóngbó á Ɓalɔ́ma?» 18Yéso ɗáúbi ye kanisia aɓɔ ájeɗe, áǒgea te: «Ɓato á maibe nde ca! Ɓoomotombaga ka ɓo? 19Cɔ, ómophangiani phɔ́ imɔna á ngɔa nde akeni ka phenda á manjanja.» Ɓáomphangia imɔna moci á ngɔa. 20Mpɔ Yéso áǒɓúsia te: «Keongi, na ina nde ɓáɗundu wani, ande á ani?» 21Ɓáonsikisia te: «Ande á moamɛ angbóngbó á Ɓalɔ́ma.» Mpɔ Yéso áǒgea te: «Mophani Kaisáa kema nɛkɛ, ɓómophɛ phɔtɔ Mokonga kema ínɛkɛ.» 22Ɓî ɓáɔ́ki tɔ nyɔngɔ ndɔ, ɓáoyayama phɛɛ. Mpɔ ɓáonɗeketa, ɓáoga.
Ɓaphaisáyɔ ɓáomúsia Yéso ka nyɔngɔ á jujúka ka kukuwa
(Ɔna phɔtɔ Mkɔ 12.18-27; Lók 20.27-40)
23Esa ndɔ tɔ, Ɓasadukáyɔ ɓɔ, ɗáɓákátúoɓeekea nyɔngɔ á jujúka ka kukuwa#Ɔna Eku 23.8, ɓáombîmisia Yéso ɓáomúsia te: 24«Ngoisigi, ɛɔphi ndea Mósa agi te: ‹Aoɓá mǒko n'aku kángá á ɓɔkɔta, muna-amakɛ angííande nke á kekusa ndɔ ka gea, ámɓɔkɔteɛ nkú ɓaniki. 25Cɔ, ɓǒko á komunamema ɗáɓátú ka ɔlɔ asu ngianjaga iɓɛ (7). Ánge ɗámuki nke, áokuwa kángá á ɓɔkɔta, áonɗeketea muna-amakɛ nke á kekusa ndɔɔ. 26Ɗátú tɔ ɓó ka mmbé ɓa ko baɓɛ, ɓa ko ɓasaɔ, na gǎ jua ka mmbé á ko ngianjaga iɓɛ (7), ɓɔbu ɓáokuwa kángá ɓɔkɔta. 27Mpɔ mbusa á kukuwa aɓɔ ɓɔbu, nke ndɔ â phɔtɔ okuwa. 28Cɔ, k'ésa á jujúka á ɓasí ka kukuwa, nke ndɔ aɓande nka ani? Nga, ɓɔbu ɗáɓámuki.›»
29Yéso áǒsikisia te: «Ɓǒdema sisanu nga, ɓókóoúba kaɓɛ Ɓuku á Mokonga kaɓɛ ɓukpɛkpɛ nɛkɛ. 30Nga, ɓî ɓasí ɓájujukande ka kukuwa, ɓǒko ɓákáeɓukɛku ye ɓake na ɓake ɓákáɔmanɛku ye nga, ɓáendande ɓea ɓamalaéka na koba. 31Ande gea te, ɓókótangimbɛ mɔnɔ suɓi á Ɓuku á Mokonga nyɔngɔ á jujúka á ɓasí ka kukuwa? Ɗági:
32‹Nende Mokonga ndea Abalaámu, Isáka, na Yakɔ́ɓɔ#Ɔna Jua 3.6.
Ké Mokonga ndea ɓasí,
ne ndiu á ɓakpa nde ɓáoenda.›»
33Usɛsɛ á ɓakpa ɓɔbu ɓunde ɗáɓáɔmɔ́ka, ɓáoyayama phɛɛ ka nyɔngɔ á ɓɔphɛi nɛkɛ.
Ɛɔphi sina nde anyɛ́nyi nɛngbo?
(Ɔna phɔtɔ Mkɔ 12.28-34; Lók 10.25-28)
34Mbenɔ nde Ɓaphaisáyɔ ɗáɓáɔ́ki gea, Yéso aedakanisi Ɓasadukáyɔ, ɓáodondanaga. 35Ka ɓɔ moci n'ande ngoisigi-ɛɔphi, áɔnɛkɛa Yéso mɛ̌kɔ ka músiɔ, áongea te: 36«Ngoisigi, ɛɔphi sina nde anyɛ́nyi ɛɔphi nɛngbo bui?»
37Yéso áonsikisia te: «‹Nkonda Mɔkɔta-Mokonga nɛkɔ na měma akɔ bui, na enda akɔ bui, na úbapha akɔ bui#Ɔna Tɔl 6.5.› 38Nndɔ unge ande ɛɔphi á k'ama mosá-mosá nnde anyɛ́nyi nɛngbo bui. 39Ɛɔphi á ko iɓɛ nnde akengeani ně ande: ‹Nkonda dakɔ ɓíndɔ ǒkondi sisakɔ#Ɔna Ɓlw 19.18.› 40Ɛɔphi bui ndea Mósa na ɓɔphɛi bui ndea ɓaɔtu-nyɔngɔ ndea Mokonga, atóki tɔ k'ɛɔphi iɓɛ ndɔɔ.»
Músiɔ ka nyɔngɔ á Kiísito
(Ɔna phɔtɔ Mkɔ 12.35-37; Lók 20.41-44)
41Ɓî ɓaphaisáiyɔ ɗáɓá phɔ́tɔ ka dondanaga, Yéso áǒɓúsia te: 42«Kanisia sina nde ɓoně ka phɔa Kiísito? Aɓɔkɔtɛani k'ékombo sina?» Ɓáonsikisia te: «Ande mosuko á Daúdi.» 43Yéso áǒgea te: «Ka nyɔngɔ éke nde Měma á kanga ɓojeɗe amphangi Daúdi gea ámɔphanɛ Kiísito, ‹Mɔkɔta› nɛkɛ? Daúdi áogea:
44‹Mɔkɔta-Mokonga angoɗi Mɔkɔta nɛmɔ:
Ika nkɛkɛɔ á njaga ani á mǔku,
na ka ɓî něbisande ɓaɓiɓia akɔ kusi á ecinji akɔ#Ɔna Jab 110.1.›
45Cɔ, aoɓá gǎkɛ Daúdi n'aɔmɔphana ‹Mɔkɔta› Kiísito aɓande gǎkɛ mosuko á Daúdi ka ɓo?»
46Kaɓɛ gǎkɛ na ka ɓɔ moci mmbé ɗátɔki sikisia akɛ nyɔngɔ moci. Kpanga esa ndɔ tɔ, nna na ka ɓakpa mmbé ɗákengi úsia akɛ.
Sélection en cours:
Matáyɔ 22: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
