Luka 14
14
Yeso ma ngona ono a ngamo a dara Asabar
1Oye dara owo Asabar nze Yeso pete aye atitǝu ono saru a tuFarisi, baka ama wucu eyabo wucu nze ano jorto me a ji. 2Ayemme nze oye ono se atawame neng tare atume tuna bijizi. 3Nze Yeso sangarra tuFarisi neng ano masano makirri ma Musa ma go nye, “Marruku ma geme se Ogomo Asharri ma nya musa mana garra guna a ngona woi ngamo a daro Asabar ne aye?” 4Nze nga ta buku koyabo ne, nze Yeso dorre ono me onome a ngamo ma kuru ma gom me nga na eya beye.
5Nze Yeso sangarra ano me ma go, “Avizi ayima ka nyi, inga bijake abome, ko bivare abome, bi garre arriba a daro asabar, mazima chonno mazuzuni bemene.” 6Nze nga dere beleng bigemse nga ya bukumi.
Yi ta apana a kai ngo dan eyabo ne
7Yeso ni nane se anagemese ama barre nye obaki nga ya chonno a zaka tora to chǝkǝnǝ to ana sassaru anu guna nga wucu eyabo wuchu, nze Yeso buki oye o nǝrǝmi a nye. Ma go, 8“Inga woi barra obaki owa nya a ngo, tego denye ochǝkǝnǝ aro chǝkǝnǝ na sasaru ni, baka ayǝnu a ya morra se ana barra awoi se makerai. 9Nze ono geme se mana barra obaki mi, maya ra ma gon ngo, ‘Wera onya ono gina arame.’ Nze ngo ya kunan emme ocha ogome se ngo ya kuru aro chǝkǝnǝ adǝmu. 10Inga abarre obaki a ngo tego ka chǝkǝnǝ aro chǝkǝnǝ ana sasaru ni, doguna inga ono barra obaki rai ma gon ngo, ‘Wantano era ochǝkǝnǝ ara chǝkǝnǝ asaru.’ Ana nem meze anagemese ama barra obaki a nye nga ya ru se ngo ono saru zi. 11Zal ono ogome se ma tongarra apana a me. A ya duza a me, inga se ono gome se ma duzu apana a me a ya tongarra me.”
12Nze Yeso gon ono geme se mana barra a me, “Inga se ngoya barra ano a wucu eyabo wucu, tego barra awantano akai ne, ne ano wanama kai ne, ne bisana boi ne, ne ono voton ngo se nga ze ano morra. Baka oye odara nga saga barre a ngo, a nane meze nga ya kurusa kai eyabo. 13Inga ngoya barra ano owucu eyebowucu, ubarra ano dera neng ano tanzǝ neng anuwasku neng aro. 14A nane meze Ogomo Asharri ya ngona kai omorra, baka se ana gina ze ma date nga barre a ngo ne, Ogomo Asharri ze akursakai a dara ogome se maya wersaza ano ageme se nga tarse beleng nga bome a ru weju.”
Unǝrǝ a tara rrite ye saru
(Mat 22.1-10)
15Ono vento ayima ano ogeme se ngazemme, nga chǝkǝnǝ a wucu ayebo wucu neng Yeso makune nane, nze ma gom me, “Ono sana ze ono geme se ma wucu eyabo wucu obaki a togomo to Ogomo Asharri!”
16Nze Yeso gom me, “Ama na ngona oye ono se mana barra rrite ye osaru ma tisa ano chebete. 17Se ocha rrite odenye, nze ma Toma a toma me a nga ka guna neng ana geme se ana barra a nye, ‘A nga rai, baka se ana jamu koyaya.’
18“Nze zalle okonye se ama barra rrite rreme a nye kowǝvi a nye ma bura gusa, nze woi ayima ka nye ma buki otoma me ma go, ‘Mina kwa ara miya ngame, in kanǝri nane se aze, ngame ka gunan me min ze ma morra orane tego apuru sharroine.’
19“Nze woi ma ga go, ‘Na kwa evare ewa vara eme biturru miya orona geme angame amasa eme, ngame ka gunan me min ze ma morra orane tego apuru sharroine.’
20“Woi ga go, ‘Asero seginna seze mina wuza a nya baka nane ze min ze ma morra owarri oworane.’
21“Nze otoma me ma kuru maka beze achakura me, epegeme se ana buka a me, nze biruwa bi sharro me. Ma gon otoma me, ‘Chonno sasa otara turuna to sasaru neng tora to bate bate ayima ape, otisaza ano dera neng ano tanzǝ neng aru neng ano wasku oranen nye arigina.’
22“Ana nem me se otoma me mana jamu epegeme se ana ngona ma nu, nze ma ra ma go, ‘Asharri dekei, na wuza eme geme se ngona guna amin wuza, zal nan nane ara zana dada.’
23“Nze achakura me ma gon, ‘Otoma me ama suru ayima ape ama ngame atu runa tusasaru neng tu ngame ze toja otipi ano a nga rai baka atitǝu akan binja. 24Miya beza akanyi woi ze ma ayima ana geme se min na barra a nye se maya kuna eyabo wucu rrite rrigina se mina mamarra ne.’ ”
Odera okona malo mano tarse Kiristi
(Mat 10.37-38)
25Oye dara ano chebete nga ya tarse Yeso, nze ma wangarro ma gon nye, 26“Zal ono geme se maya narro chǝkǝnǝ otoma okon nane meze oya kera a barsa akan neng a shome, ne ayimi, ne owai okome, ne abiya a me, ne anawaname anarrome neng awai, neng biruwa bome. Inga den nane ne mazema iya ochǝkǝnǝ utma okon ne. 27Zal ono geme se mata zǝkǝ otiti ogapa mene ma tarson ne, mazema chǝkǝnǝ onoyemasanga man ne.
28“Inga woi, ayima akanyi maya narro siya atitǝu ayo, se mana chǝkǝnǝ anyanga, maya chǝkǝnǝ ma barre ecebete iru egemese mazenno ne iya bare akame osiya atitǝu mi? 29Inga se mata ngona nane ne, mazema ogora ne, zal ano ageme se nga nǝri etoma me nga ya kerkozame. 30Nga ya guna, ‘Ono gina mana bura osiya ogora mina gamene me.’
31“Inga se oye ogomo maze neng tosoja toshoko shibi ka biturru, baka ma wuza okara neng ono gome se maze tosoja toshoko shibi ka turru repo, ai, se mana chǝkǝnǝ anyanga manari ne ma zen a gata ageme se manan wuza okara neng ogomo ogomme ne? 32Inga se mazema date ne, to ama tome a toma one binyarrana ama kada ayayau, doguna a nga ka mamarra beleng bo chǝkǝnǝ shammo. 33Nane ze zal ono geme se mazema deke epegeme se mazan no ne, mazema iya ochǝkǝnǝ one yemasaga man ne.”
O nǝrǝ a tara rrekon
(Mat 5.13; Mar 9.50)
34“Rrekon eyabo e ngoma ze, inga se ye warna neng malo ma me a ya ngona innizi a kursu malo ma me anu? 35Ama wuza eyabo neng no ne ko uja ko ayiburri se ko akunki.
“Deke ono totenye to kuna me ama kone.”
Sélection en cours:
Luka 14: JER
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©️2022 Luke Initiative for Scripture Translation
