Luka 13

In ge ta deke masharra ne eya wǝnǝ

1Ocha ocho ogomme, se aye ano se nga ze ayemme nga ze nga beze Yeso beleng ba ano Galili, se Bilatus ma we a wuza nye, ocho ogome se nga ze awatǝ topana tonye Ogomo Asharri aviskinye. 2Yeso ma garre magonnye, “Nane se ama wuza a ano Galili ageme, nye ya nǝrǝ ogo ano nga kera odangara ano Galili a masharra? 3Aye dan nanazene, miya gosan nyi, in ge ta wang garro ayimi erowa ekinyi ne e deke masharra ma geme se nyi wuzaza me ne, nyi ya wiju sakama nye. 4Nyi ya nǝrǝ ano biturrun uru ageme se upingǝri osaru se oma garra a nye a Siluwan, oma wuza nye, nyi ya gusa nga kera zal odangara ano Urshalima a masharra geme ni? 5Miya gosan nyi dan nanezene, in ge ta wang garro ayimi erowa ekinyi e deke masharra ma geme se nyi ya wuzaza me ne nyi ya wiju sakama nane se nga wiju.”

Unǝrǝ a tara otiti okwafu odera abiya

6Nze Yeso nya nye unǝrǝ mi ogina ma go, “Oye ono zanu se ma zen otiti okwafu ayimi uja ome. Ma ra atasa abiya okwafu mi mata morra koyabo ne. 7Nze ma gon ono ogome se maya wankǝli uja me, ‘Nǝrǝ, kane sewai se taro segina miya rasa a narra abiya otiti okwafu ogina, amin ta morra ko kovento ne. Wiya ome, oya opate ara kǝwǝi?’

8“Nze ono ogome se maya wankǝli uja me magarre ma go, ‘Achakura, a deke ome, in nya me rrewai rrivento in gǝsi anyanga me in gwǝrrǝ ome utaki. 9Inga se otiti mi oyo abiya me a arriwai yora ina rreze, inga se ota yo ne agwente ome a vati.’ ”

Yeso ma ngona oye owai a ngamo a dara Asabar

10Oye dara Asabar Yeso a masano ogora beroromo, 11oye owai maze a rame se uruhu obo ma wome a makwene ma puwa marro sewai biturru neng uru. Mata iya ma wǝtuni. 12Se Yeso nǝrǝ ni nze matisame ma go, “Owai ana ngonai a ngamo a makwene amai.” 13Ni se ma dorre me, nze ma dorra ma wǝtu, ma tongarra Ogomo Asharri.

14Nze ono saru ogora beroromo beme biruwa bi dorra bi sharro me, baka Yeso na ngona woi a ngamo a dara Asabar. Nze ma gon ana geme se nga za ara gemme, “Tumuru tuyanu se tudinye tase towoza etoma, erasa a tumuru tome a ngona nyi a ngamo den a daro Asabar ne.”

15Nze Achakura Yeso garre ma go, “Nyi ayebebo kǝwǝi, avizi ayima akanyi se mata buzu bivare abome ne bijake abome a daro Asabar ama ngamen beme aro shinǝ manyi ni? 16Owai ogina birruza ban Ibirahim beze Shetan matarǝ mi angame sewai biturrun uru gina, dan derte ze a ngona me a ngamo a daro Asabar ne?”

17Se Yeso buku nane nze emme ma me ano nya mene kame zal, odangara ano me ezalla baka to gogorro togeme se mana wuza.

Yemasanga a tara biwo be Masta

(Mat 13.31-32; Mar 4.30-32)

18“Togomo ta Asharri to neng yǝkǝnǝ neng yaya ze? Neng yaya ze mi neng ngona eme ayankǝnǝ neng no? 19Togomo to Ogomo Asharri toze sakama biwo be masta, se oye ono ma yete maka birra a me uja, bi bare bi we otiti, nze ididi ese todo abiya otiti mi.”

20Yeso ma kuru ma we bi sangarra, “Togomo ta Asharri to neng yǝkǝnǝ neng yaya ze? 21Eyǝnkǝnǝ oyis ze se oye owai ma sakala tomodu to taro ma embini mo wuza aborode, Nze embinin mi ma dorra mawe chebete.”

Arakai ageme se asheno

(Mat 7.13-14,21-23)

22Se Yeso meshe oruna angame a Urshalima, nze ma bete atu pepe neng tugwirigwiri, maya yemasanga ya ano. 23Nze oye ono ma sangarra me ma go, “Achakura in go kan, ano a bate keke ze ogomo Asharri maya buza nye?”

Nze Yeso gon nye, 24“Matana ne epete arakai awo shine, baka ano chebete nga ya narro opete ama amagarra akanyene. 25Inga se achakura na wera ma pate arakai atitǝu mi, nyi ana geme se nyi ya tora a kai, nyi ya terse arakai nyigusa kusu, ‘Achakura, pukudo arakai.’

“Me maya garra ma gon nyi, ‘Mintaru ara geme se nyi na kasuru anumi!’

26“Nyi ya gusa, ‘Koi woro ma wucu eyabo wucu e shi manyi neng ngo. Ngoma wuza yemasanga atu runa ta yima ape akado.’

27“Maya kuri magonyi, ‘Min ta ru nyi ni, in ta kuru in uru ara geme se nyikasuru anumi, warna neng me nyi ano wuza eyabo eburu.’

28“Ayemme nyi rriwa neng urrunza tini. Nga ya nǝri Ibirahim neng Ishaku neng Yakub zal neng to annabi ayima togomo to Ogomo Asharri, ama nyi a ya vati akǝi. 29Ano ya rasa asuru usunzu, neng uwarru, a tara neng adizi, nga ya chǝkǝnǝ atura tuchǝkǝnǝ tonye a nga wucu emo wucu obaki a togomo to Ogomo Asharri. 30Segina ano ageme se nga za a bimaso nga ze nga na kuru ano bibura ano bibura nga ze ano bimaso.”

Nane se Yeso ma damo neng Urshalima

(Mat 23.37-39)

31Nze ocho gina ze toye tuFarisi ta rai togon Yeso, “Deke ara agina baka Hiridus maya narro wonaye.”

32Nze ma gon nye, “Ngame ne eka beze ayebebo akanyi, ‘Kane miya zuzu turuhu tobo in ngona ano a ngamo, innyarru ma nanem meze, a daro otaro ze insa jamu etoma me. 33Zal neng nane meze in wucaji neng tano taton kane neng nyarru neng darono a Urshalima, baka edan rreze guna annabi wi ariya ne, inga dan a Urshalima ne.’

34“Ano Urshalima, ano Urshalima, nyi ma wuza to annabi ano tiza ana geme se ama Toma nye a nyi. Mina dakano a narro wora akanyi sakama bitokoro be worsa abiya me ama tugallun, a nyi ta deken in woronyi. 35E gina se atitǝu akanyi ana diya aping mi ze, miya biza ka nyi nyizi ma morra onǝra akan gaze ne, se nyi na ngona, ‘Ono sana ze onora ayimi rriji ya Achakura.’ ”

Sélection en cours:

Luka 13: JER

Surbrillance

Copier