Yele-za-pɛr-tib 9

A Naaŋmɩn maal'ɩ nɩ a Nowe wõ-taa

1A Naaŋmɩn tɩ maal'ɩ a Nowe nɩ a ʋ bidɛbr ɛ́ yel bɛ: «Nyɩ dɔwr yɛ̀rɛ, nyɩ paalɩ a tẽw. 2A tẽw zu dʋn za nɩ a lili za na zɔ nyɩ na tɩ lo vũumí. A tẽsɔw bʋ̃-vura za nɩ a kʋ̃ɔ-kpɛ̃ɛ zʋ́mɛ́ za a, ɩ̃ de a na ƴãw a nyɩ nuru pʋɔ. 3Bom za na vure a tẽw ɛ́ tɛr vʋʋrʋ a na ɩ n bʋ̃-dɩra a nyɩ zie. Mɛ̃ a lɛ ɩ̃ na tɩ dãw kʋ̀ nyɩ a mɔ̃-ɓaar a, ɩ̃ kʋ̀rɛ nyɩ nɩ à á ŋá za. 4Ɛcɛ nyɩ kʋ̃ 'wɔb a nɛn lãwnɩ a ʋ nyɔ-vʋʋrʋ ɛ, a pɛr lɛ k'aa ʋ zɩ̃ɩ. 5A nyɩ zɩ̃ɩ mɩ̀ na ɩ a nyɩ nyɔ-vʋʋrʋ a, ɩ̃ na sowr'ɩ a san dʋ̃w za zie ɛ́ mɩ̀ sowri a san a nɩsaal zie. Ŋa za zie n'a ɩ̃ na mɩ́ sowri a ʋ nɩsaal-tɔ nyɔ-vʋʋrʋ san.

6Nɩr wa ɩ nɩsaal zɩ̃ɩ a cir a,

nɩsaal'ʋ na ɩ a ʋ zɩ̃ɩ a cir.

Bʋ̃ʋ n'ʋ vɛ̃, Naaŋmɩn ír'ɩ a nɩsaal

ʋ ɩ a ʋ ŋmɛ̃-ta-tɔ.

7Nyɩɩm ƴãw a, nyɩ dɔwr, nyɩ yɛ̀rɛ, nyɩ paalɩ a tẽw ɛ́ yãwmɛ yaga za a ʋ zu.»

8A Naaŋmɩn tɩ yel'ɩ a Nowe lãwnɩ a ʋ bidɛbr: 9«Mãa n'ʋ maalɛ nɩ nyɩ a ɩ̃ wõ-taa, mãa nɩ a nyɩɩm nɩ a nyɩ bʋʋrɛ a nyɩ pùorí, 10nɩ a bʋ̃-vʋʋrɩ za na be a nyɩ zie a: a lili, a yir dʋn, a wɛ-dʋn, a al na lãw nɩ nyɩ yi a gbor-kpɛ̃ɛ pʋɔ a, nɩ a al za na na be a tẽw zu a pùorí a. 11A ɩ̃ wõ-taa n'ɩ ŋa ɩ̃ na maalɛ nɩ nyɩ a: a kʋ̃ɔ-paalʋ-kpɛ̃ɛ kʋ̃ɔ bɛ lɛb kʋrɛ bʋ̃-vʋʋra kãw za ɩ, kʋ̃ɔ-paalʋ-kpɛ̃ɛ kʋ̃ lɛb be be sãw a tẽw ɛ.» 12A Naaŋmɩn tɩ yel'a ƴãw pʋɔ: «A wõ-taa bãwfʋ ɩ̃ na ƴãwnɛ mãa nɩ a nyɩɩm cara pʋɔ a, mãa nɩ bʋ̃-vʋʋra za na be a nyɩ zie a cara pʋɔ, a nɩbɛ za na na dɔwr lɩɛrɛ taa a ƴãw a, ʋlɛ n'ɩ ŋa: 13Ɩ̃ ƴãwnɛ nɩ a ɩ̃ tam a zũzuwe pʋɔ. Ʋ na ɩ n wõ-taa bãwfʋ mãa nɩ a tẽw cara pʋɔ. 14Mãa wa ƴãw a saa ʋ kore a, ɛ́ a sa-gõguo wa sãá a, 15ɩ̃ na lɛb'a bãwnɩ a ɩ̃ wõ-taa mãa nɩ a nyɩɩm nɩ a bʋ̃-vʋʋrɩ za cara pʋɔ. A kʋ̃ɔnɩ kʋ̃ lɛb lɩɛbɩ kʋ̃ɔ-paalʋ-kpɛ̃ɛ kʋ bʋ̃-vʋʋra za ɩ. 16A sa-gõguo na mɩ́ be n a zũzuwe pʋɔ, ɩ̃ɩ na mɩ́ jɩ́r ʋ na lɛb bãwnɩ a wõ-taa ɩ̃ na ƴãw ʋ be kʋralɛ mãa nɩ a tẽw zu bʋ̃-vʋʋrɩ bʋʋrɛ za cara pʋɔ a.» 17A Naaŋmɩn tɩ lɛb'a yel a Nowe: «A wõ-taa ɩ̃ na maal'ɩ bʋ̃-vʋʋra za na be a tẽw zu a bãwfʋ n'ɩ a sa-gõguo.»

A Nowe bidɛbr ata: Sɛ́m, Kam nɩ Zafɛtɩ

18A Nowe bidɛbr na tɩ yi a gbor-kpɛ̃ɛ pʋɔ a tɩ n'ɩ Sɛ́m, Kam nɩ Zafɛtɩ. A Kam tɩ n'ɩ a Kanãa sãà. 19A Nowe bidɛbr tɩ n'ɩ a bɛ ŋa ata, ɛ́ bɛlɛ nɛbɛ tɩ dɔw paalɩ a tẽw za.

20A Nowe tɩ n'ɩ a ka-kʋɔra dãw-niwn sob na ƴãw divɛ̃ tɩɩr púo a. 21Ʋ tɩ nyũ n divɛ̃ kuoli, ɛ́ yaa a kparɩ za bɛr a ʋ pɛn-sɛw pʋɔ. 22A Kam na ɩ a Kanãa sãà a tɩ nyɛ̃ nɩ a ʋ sãà faalʋ, ɛ́ yel kʋ̀ a ʋ yɛbr ayi na tɩ be a yẽw a. 23Lɛ n'a a Sɛ́m nɩ a Zafɛtɩ tɩ de kpar-kpɛ̃ɛ dɔwlɩ a bɛ bawŋmamɛ zu, ɛ́ tɩ̃w nɩ nɩ pùor tɩ kpɛ a pɛn-sɛw pʋɔ, pàw a bɛ sãà faalʋ. Bɛ tɩ jɩ́rɛ nɩ a bɛ nidaa kɛ́ bɛ ta nyɛ̃ a bɛ sãà faalʋ ɛ. 24A divɛ̃ na wa cɩ a, a Nowe wõ n a lɛ a ʋ bidɛb-bile za na ɩ a. 25Lɛ n'a ʋ tɩ yel:

«Ŋmɛ-ƴãw, a tuur a Kanãa!

Ʋ ɩ a ʋ yɛbr za gbãgbaar za gbãgbaa!»

26Al pùorí ʋ yel:

«A Sore, a Sɛ́m Naaŋmɩn tɛr'ɩ puoru!

A Kanãa, ʋ ɩ a Sɛ́m gbãgbaa!

27A Naaŋmɩn, ʋ ɩ a Zafɛtɩ nyɛ̃ zie!

Ʋ ɩ ʋ kpɩɛr a Sɛ́m pɛnɛ-sɛwr pʋɔ,

ɛ́ a Kanãa ɩ a ʋ gbãgbaa!»

28A Kʋ̃ɔ-paalʋ-kpɛ̃ɛ pùorí a, a Nowe tɩ cãà na maalɩ yome kɔbr ata dɔwlɩ yome lɩz'a ayi nɩ pie (350). 29A ʋ yome za tɩ ɩ n túr vʋ̃ɔ kʋba dɔwlɩ yome lɩz'a ayi nɩ pie (950), ʋʋ kpi.

Sélection en cours:

Yele-za-pɛr-tib 9: DBDC

Surbrillance

Copier