KELUARAN 14

Ik Longgop ikman Allahn Israel inap windat enepfag ane

1Ari turukmu Ninikni Allahn Musa fam ele hiyag utuk lit, 2”Israel inap suhuloho wamusareg o Migdol men ik unuk Longgop yenggelehon men honggolegma o pumbuk Baal-Zefon aluke fil o Pi-Hahirot iraham o sabo wibuhuben hiyag isamihin. 3Mesir inap onowe suwon inowen, ’Israel inap lekman kalem fahet inindi nonghong uruken mase ril laruk,’ puhu. 4Anden at indi arikap tuhukmu mug heneplug laruk laruhu angge famen An nine inam amag ulug ap suwon ino men otsi sehen senehon men siyahap enebuhukmu Mesir inaben An nubahet, ’Israel inap Inikni tu wereg,’ ulug onoluk aruhu,” ibag. Ari ibag ane hikit toho Israel inaben tibag.

5”Israel inap hirag-hirag wilip ahasa,” ulug hiyag itfagma Mesir inap onowe men otsi men, ”Nungge fahet it lawag ulug embeserukukmu nit nenemingmingangge eleg angge welamuhuk?” ulug inindimu yihi peruk latfag. 6Ari pibareg Mesir inap onowe suwon inowen kereta tog abik oho lit wam kudan lisoho walug laruk angge ililtuk lit otsi sehen seneg inap palu enepfag. 7Palu enepfagma kereta waruk inap arimano wal taneg lahibagma#Ari hag toho uruk ano onowesi wal tanehen milal eneptukmu uruk ano. kereta fanowon ine roho larukon teng-teng angge 600 men kereta winon obog toho men wilip atfag. 8Ninikni Allahn Mesir inap onowe ino indi arikap tibagma wilip atfareg Israel inap arimano mug eneplug larukmu Allahn wanggi wat enesuhen Israel inap inindi se roho laruk latfag. 9Mesir inap wam kudan lisoho walug laruk angge kereta fam lahibahon arimano men sehen senehon winon men obog toho Israel inap mug eneplug libareg ik yenggelehon ayegma o Pi-Hahirot iraham Israel inap o sabo wiroho weregma hiyag enebik libag.

10Hiyag enepfareg larukmu Israel inaben yet isibareg Mesir inap onowe men otsi men nunusuk oho lit waharuk ulug enekol anggolowen, ”Allah Ninikni, let nenebin!” ulug enele hi roho uruk latfag. 11Ari ibareg Musa fam enele uruk lit, ”O Mesir ap warehon sal eneptuk ambeg eleg ulug hondog neneplug lekma tuma waharikinmu nit war amul? Nungge fahet o Mesiren hondog neneplug wilip atikin? 12O Mesir wereg lit niren te, ’Mesir inap enemingmingangge fano welamuhuken hele nunubam imihin fug,’ ulug hiyag hutukuk. Nit Mesir inap enemingmingangge roho fano welala angge famen haren hondog neneplug waharikinmu lekma tuman war atuk ane ninirim,” ulug Musa hiyag itfag.

13Hiyag itfagma Musan, ”Henekol ha fug! Hinindi yuwag toho welamek! Ninikni Allahn o yoho windat nenepmisi ane yet halihip. Mesir inap hiren ketiya yet isaruk lahebon fobik oho yet isaruk lamuhup fug. 14Ninikni Allah inggarehen hit fahet it men tog abusan hiren nungge-nungge tilihip fug,” ulug hiyag isibag.

15Ari ulug hiyag isibagma Ninikni Allahn Musa fam hiyag utuk lit, ”Nungge fahet An fam, ’Let nenebin!’ ulug hele ine roho uruk lahen? Israel inap lawag tohon hiyag isamihin! 16Hiyag isamihinteg wanggun seneg lahenon ari ik ahum pali fil leg hamihinmu ik pul ke minggiroho lamisimu Israel inap kinang lilog teg keyen ik fumag fil nindig amusa. 17Mesir inap Anden inindi arikap timinmu iren hit mug heneplug wamusa angge famen An nine inam amag ulug it onowe men otsi sehen senehon men kereta fam lahibahon oho Anden siyahap enepmin. 18Siyahap enepminmu Mesir inaben yet niyalusareg, ’Israel inap Inikni Allah wereg,’ ulug onoluk atmisi,” ibag.

19Ari ibagma Allah ot malaikat Israel inap eneluke fil laruk latfahon ino enembol fil atfag. Hina alem ino oho Israel inap enembol fil atfareg 20it men Mesir inap men honggolegma unduhuk latfag. Unduhuk lit Mesir inap fil o hikap tibareg Israel inap fil selehap tibagma hup ino sambil it fumag-fumag ambimu am fug teg latfag.

21Ari regma Musan inggik ik ahum pali fil leg hibagma Ninikni Allahn ik eleg amag ulug siyelu yali filen monde fibagma hup ino sambil ine roho fu rurukmen eneg ik yenggeleg ambeg ino kinang lilohap tibag. Ik minggiroho 22#1Kor 10:1-2; Ibr 11:29pikit fil hare fil elehet hag toho wir atukmu pul ke kinang lilog teg keyen Israel inap arimano nindig atuk latfag.

23It nindig atukmu Mesir inap wam kudan lisoho walug laruk angge kereta fam lahibahon arimano obog tohowen mug eneplug libareg ik ahum pulmu libag. 24O sakan tik ohoma Ninikni Allahn indok ambulpul men hina men itano undaman Mesir inap sehen senehon arimano pilap enesug latfareg inindi nonghonga feseruk lit 25kereta uyug roda singgonggo hahon arimano oho sen eneptukmu folo-folo mug eneplug la fug teg latfag. La fug tehen Mesir inap arimanowen, ”Israel inap Inikni Allah inowen umalikisi let eneptuk lit siyahap neneptuken folo-folo suhul amul,” uruk latfag.

26Uruk latfagma Ninikni Allahn Musa fam, ”Hinggik ik ahum fil leg hamihinmu ik suhuloho waharuk lit Mesir inap keretayet enebeyet hondo enepmisi,” ibag. 27Ibagma Musa inowen inggik ik ahum fil leg hibagma o ket sakan tirikim ik ino tam welatfag ambeg suhuloho kik waharukmu Mesir inap arimano wilip amul ulug turukmen Ninikni Allahn miyal heheg ik ahummu kilap eneptuk latfag. 28Kilap eneptukmu ik ino suhuloho waharuk lit Mesir inap sehen senehon mug eneplug ik ahummu kibahon arimano keretayet enebeyet hondo enepfagma misig oho wilip atfag fug. 29Israel inap arimano ik minggiroho pikit fil hare fil elehet hag toho wir atukmu pul ke kinang lilog teg keyen ik fimag fil libag.

30O ino sambil Mesir inaben Israel inap unusul ulug mug eneplug larukmen Ninikni Allahn windat enepfagma Israel inaben yet isarukmen Mesir inap arimano ik pili ke waroho lin-lan urukmu yet isibag. 31Ninikni Allah inggik ineyonen Mesir inap arimano unusurukmu yet hibareg Israel inap arimano enekol anggolo haruk lit, ”Ninikni Allah men amingmingangge Musa menen fet nenesug lamuhup,” ulug wenggel haruk latfag.

Sélection en cours:

KELUARAN 14: YLI

Surbrillance

Copier