KELUARAN 15
15
Allahn let neneptisi ulug Musan sini yunggultuk latfag ane
1 #
Why 15:3
Wenggel haruk lit Musa men otsi Israel inap menen Ninikni Allah wel turuk lit sini yunggultuk latfahon tu,
”Ninikni Allah suwon ino
palimu atisimu
At sini fam wel turuk latmin.
Wam kuda men emberimu lahalug heriyeg inabet
ik ahummu hik isarisi.
2 #
Mzm 118:14; Yes 12:2 Ninikni Allahn ine roho ili og neneptuk latisi.
Aren eneg windat neneptuk latisi.
Nit Ninikni At wereg ulug
hi ruruk latmin.
An numbasi Inikni Allah ino
anden palimuwap turuk latmin.
3At ahako roho tog aptuken
Unuk Ninikni Allah suwaleg.
4Mesir inap sehen senehonet keretayet obog toho ikma hik isarisi.
Tog olohotma laruk inap arimano oho ik Longgop ahummu ubuk urusa.
5Ik ahum yaronen hondo eneptisimu
it helep wamburuk hag toho
ik ahum apma wamburusa.
6Hat hinggik mondabi ineyonen
ap seliyon lilibug-lalabag toho unusuruk lahen.
7Hat mondabi palimu welahenonen
Hele ying haptuk inap obog toho siyahap eneptuk lahen.
Hat hundama ahe laharukon indok ambulpul hag toho werehen
ulu angge indoken naruk hag toho inawag ulug unubam
hik isaruk lahen.
8Ik ahum hambiliken fu ririkinmu
elehet hag toho in arik laharisireg
kinang ik ahummuwon lilog atisi.
9Ap seliyonen enele uruk lit,
’It muko lulteg sen enebul.
Tog sap tulteg sele roho lin usul.
It enengge obog toho huhulangge hululteg
fibir amulmu ninindi yuwag atmisi,’ urusa angge famen
10Hat hambilik aheyen fu ririkinmu
Mesir inap arimano obog toho iken hondo eneptisi.
Helep simbuk wamburuk hag toho
ik haglabut watuk ambeg ubuk urusa.
11Aben nunumba ulug
wel eneptukon arimano enesehelimuwon sa Hat Ninikni Allah hahon wereg?
Hebe usa fulu reg lit
Hat eneg palimu welahen.
Aben tuk fug teg ane men
yihi ulug enekol haruk ane men
Haren turuk lahen hag toho
ap san tuk teg?
12Hat hinggik pikiron pok harukmu
ap seliyon kiling elma longgo uruk hag toho eleg atusa.
13’Israel inap An numalikisi welamuhup,’ ulug sali emberikinon hikit toho
Haren windat neneptikinteg
og neneplug laruk lahen.
Hat hinggik ineyonen
kinang fanowon Haren tohon fam hondoko imbisik lahun.
14-15Haren turuk lahen ane fahet ap o pumbuk wal taneg werehonen hol haruk lit enekolen hirimuruk turuk.
Filistin inap men Edom inap onowesi men enekolen unuwag elek turuk.
Moab inap inine roho werehon arimanowen oho yuk lagmag uruk.
Kanaan inap oho enekolen inindi pong-pong angge turuk.
16Hat Ninikni Allahn hine roho turukmu yet hiyaruk lit
it arimanowen yihi ulug inindi anggin atuken
humalikisi Israel inap larukmu unum enebuk fug teg lamuhup.
Ap Haren windat eneptikinon arimano lawag ulug inil embeseruk lamuhup.
17Israel inap hondog eneplug
Hat welaruhuk ulug hiyako emberikin ambeg imbisik lahunteg
punu Haren tohon fam o hinggareg hinggiken witikin ibam iraham
yug toho welamuhuben
yag enebuhun.
18Hat Ninikni suwon
Hunuk palimu welahenonen
nit fet nenesugmen eneg welaruhun,” ulug yunggultuk latfag.
Miryamen sini fam Allah wel tibag ane
19Israel inap ik fimag fil nindig amul ulug ik pul ke kinang lilog teg keyen nindig atfagma Mesir inap enembohom kuda men kereta men kereta waruk inabet obog toho ik ahummu kurukmen Ninikni Allahn ik ino hur isibagma waharuk lit hondo enepfag.
20Hondo enepfagma hiyap Miryam hun Harun owe Allah amingmingangge nabi inowen waruk wibareg teltukmu hiyap obog toho at ombolim waruk tel til laruk lit yunggultuk latfag. 21Miryam inowen sini wilipfahon tu,
”Ninikni Allah suwon ino palimu atisimu
At sini fam wel turuk lamek!
Wam kuda men emberimu lahalug heriyeg inabet
ik ahummu hik isarisi,”
ulug yunggultuk latfag.
Ik sihon fanowap tibag ane
22Welatfareg Musa inowen Israel inap ik Longgop ayegman hondog eneplug o Syur lekma libareg o hinahanam lekma laruk lit ik elehen na fug angge libag. 23Libareg o unuk Mara libag ambeg ino ik sig anggolowen na fug teg latfag. Ik sihon eneg werehen o ino unuk Mara#Mara: Nit nenele roho Sig Ambeg uruk. suwaleg. 24Israel inap ik oboken Musa fam enele siyag toho uruk lit, ”Ik nungge nul?” uruken 25Musan ele ine roho Ninikni Allah fam sembahyang ibagma Ninikni Allahn e paleg eke hiyag itfag. Hiyag itfagma Musa inowen e ino ikma hik isarukmen ik unduk fano atfag.
O Mara inowen Ninikni Allahn, ”Hunubabut fano roho wereg lit tu men tu men turuk lamuhup,” ulug hiyag isaruk lit An nubam wenggel niyalusa ano ulug wal isibag. 26Wal isibareg ele hiyag isaruk lit, ”An nele fum toho holtuk lit Anden fano perukon eneg turuk lamuhup! Hiyag hisihiyon hininggik ine roho senetuk lamuhup halug Anden Mesir inap ouk fam unusuruk latikik hag toho hir oho ouk alem winon-winon fam unusuhuk fug. Ouk hit hunubam werehon hihit heneptukon Hinikni Allah An tu welahi,” ibag.
27Ari ibagma Israel inap o unuk Elim libag. O Elim ino ik eleruk nisanggowen men e kurma wiramna hahon teng piren nubam hilag 70 men weregma ik iraham o sabo wiroho welatfag.
Sélection en cours:
KELUARAN 15: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
