KELUARAN 1
1
Mesir inaben Israel inap unubam onolok toho turuk latfag ane
1 #
Kej 46:8-27
Hun Yakub unuk eke Israel urukon umalikisi men unuhesi malik men Mesir kinangma libag. Yakub umalikisi ununuk te 2Ruben, Simeon, Lewi, Yehuda, 3Isakhar, Zebulon, Benyamin, 4Dan, Naftali, Gad, Asyer men libag. 5Yakub umalikisi o Mesir libahon enebe mangno roho teng hinahan 70 welatfag angge famen Yusuf ino atam o Mesir libareg welatfag. 6Welatfagma Yusuf men owesi otsi men at minon arimano obog toho war atuk latfag. 7#Kis 7:17-19It arimano unumalikisiyen indag eneptukonen endetukmen eneg folo-folo anggolo atuk lit o Mesir keleg atuk latfagma winag isa fug teg latfag.
8Winag isa fug teg latfag li Mesir kinang seneg ahun ap suwon eke lahibahon inowen Yusuf fahet apeleg toho welatfag. 9Ap suwon inowen umalikisi fam hiyag isaruk lit, ”Israel inap enebe anggolo atuk lit inine anggolo rehen nit men ambi reg lam fug teg lahe. 10Ap seliyon nit nunusul ulug waharukmu Israel inap ap seliyon men mangno atlug nit nunusuhupteg kinang aru famen linggik-longgo uhup tohon. It enebe anggolo amuhup tohon niren unubam nungge ane tuhuk ulug wenggel hulteg tuhuk,” ulug hiyag isibag. 11Ari ibagma Israel inaben yabuk angginon wituk lit inindi anggin atug wiyig amag ulug Mesir inaben yabuk wal taneg mingming eneptuk inap lahap enepfag. Lahap enepfahon arimanowen, ”O pumbuk ap suwonen mun angge man angge foroho ambeg wituk lamuhup,” ulug hiyag isarukmu o Pitom men Raamses men wituk latfag. 12Yabuk angginon wimiyek ulug ininggik lisoho emberuk latfag angge famen o men kinang men sat toho witukmen eneg Israel inap enebe anggolo atuk lit kinang atogman atogma keleg atuk latfagma Mesir inaben it fahet enekol atuk latfag. 13-14Enekol atuken nin yabuk anggolo roho wimiyek ulug Mesir inaben Israel inap inindi isa fug angge onolok teg lit unubam ouk amag ulug ininggik lisoho emberukmu kinang tag toho o wituk lit suburu yabuk oho sat toho wituk latfag.
15Ari roho turukmu Mesir inap onowe suwon inowen Ibrani#Ibrani: Israel inap fahet uruk. hiyap malik indag tarukon let eneptuk hiyap Sifra men Pua men wol enepfareg 16hiyag isaruk lit, ”Ibrani hiyaben malik indag tarukmu hiren let eneptuk lit ap umalik ano hiyap umalik ano indag atukon fahet kim haruk lamuhup. Ap umalik indag atuk halug ware feseruk lamuhup, hiyap umalik halug anum paltuk lamuhup,” ulug hiyag isibag. 17Hiyag isibag angge famen hiyap piren itano Allah fahet enekol toho wereg lit Mesir inap onowe suwon inowen ibag ane holuk fug angge ap umalik oho onoluk welamag ulug enenum pal eneptuk latfag. 18Enenum pal eneptuk latfagma Mesir inap onowe inowen hol hibareg hiyap piren itano wol enepfareg, ”Nungge fahet hiren ap umalik oho enenum pal eneptuk lahep?” ulug kapal isibagma 19iren hebeloho hiyag utuk lit, ”Ibrani hiyap arimano Mesir hiyap men wirim teg eleg lit inine roho wereg ane ariyen nit uwan wam fugmu tam enemu indag taruk,” ulug hiyag itfag. 20-21Hiyap piren itano Allah fahet enekol toho wenggel haruk latfagma Allahn indi enesug lit it unumalikisi oho anggolowap eneptuk latfagma Israel inap oho enebe teng-teng angge atuk lit inine anggolo atuk latfag. 22#Kis 7:19Inine anggolo atuk latfagma Mesir inap onowe suwon inowen, ”Ibrani inap unumalikisi ap angge indag atukon ik Nil ikma hik isa laruk lamuhup, hilani malik eneg embeseruk lamuhup,” ulug umalikisi Mesir inap hiyag isibag.
Sélection en cours:
KELUARAN 1: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
