KELUARAN 2
2
Musa indag tibag ane
1Ari turuk latfag li itano unggul unuk Lewi ahun misihen Lewi hiyap eke hilibag. 2#Kis 7:20; Ibr 11:23Hilibagma hiyap inowen malik ahummu fet talug latfareg ap umalik indag tibag. Indag tibareg pen hibagma malik ino ebe fano latfagma isingan hirahoma foroho lit weregman pikalem hinahan atfag. 3Pikalem hinahan atfagma malik ino su atuken hiraho fuk fug tehen kou fili fam wirihon wibareg ik kuhu fug ulug il ke somug are rebelug malik ino kila fibareg ik Nil ayegma longgop sehelimu sa ribik libag. 4Owe hilani malik ino kou ino sa ribik libag ambeg tot yat toho unduhuk lit not ubam nungge ane atmisi ulug yet teg lit welatfag.
5Yet teg lit weregman Mesir inap onowe ahaloho nahap ik umag tamin ulug ikma waharukmu amingmingangge hiyap angge piren hinahan itano ik ayegma la wam turukmu ap suwon ahaloho inowen yet harukmen kou eke longgop palimu sa regma yet hibareg amingmingangge eke fam, ”Kou ari wak lag!” ulug hiyag itfagma wak libag. 6Walug watfagma ap suwon ahaloho inowen kou ino ele husoho kim harukmen malik fuwon eke uba yatuk latfagma kim hibareg indi haruk lit, ”Malik aru Ibrani umalik,” ibag.
7Ibagma itano owe hilani malik ino iraham watfareg ap suwon ahaloho ino fam ele uruk lit, ”Haren fano peruk lahen halug malik aru ag mondotuk laruhuwon fahet Ibrani hiyap ag werehon eke yami roho hondohik lamin,” ulug hiyag itfag.
8Hiyag itfagma ap suwon ahaloho inowen, ”Fano hondohik lamihin,” ulug hiyag itfagma hilani malik ino libareg malik ino isinga hondoholug watfag. 9Hondoholug watfagma ap suwon ahaloho inowen malik ino isinga fam ele uruk lit, ”Malik aru walug lamihinteg an fahet ag mondotuk laruhunmu anden onggo og huruhuk,” ibagma walug libareg isingan ag mondotuk latfag. 10#Kis 7:21Ag mondotukmen malik ino su atfagma isingan ap suwon ahaloho og itfagma aren malik ino amlohowap taruk lit malik aru ikman lisoho hilarikik ulug ap suwon ahaloho inowen unuk Musa suwalfag.#Musa: Unuk ari men ikman lisoho hilarikikon uruk ane men wirim teg.
Musa o Midian libag ane
11 #
Ibr 11:24-25
#
Kis 7:23-28
Musa ino kabini atfareg nori Israel inap pen isa lamin ulug libareg pen isarukmen yabuk wiriyek ulug ininggik lisoho emberukmu asengseng toho yabuk waruk lit weregman Mesir ahun misihen Musa are Ibrani ahun eke pinggi ware feserukmu yet hibag. 12Yet hibareg ap wereg ano ulug ambol fil aluke fil yet isibareg eleg latfagma Mesir ahun ino pinggi ware fisibareg kinang habuloho sale fisibag. 13Musa ino nin eke likiyamon libareg yet harukmen Ibrani inap piren it-it yik aptuk latfagma alem lahapfag ahun ino fam, ”Nungge fahet hare watuk lahen?” ulug hinog og hibag.
14Hinog og harukmen ap inowen, ”Nit fahet nonowe wereg lit unggum kong turuk lamag ulug ap san in haptisi? Haren Mesir ahun eke sono ware feserikin hag toho an eke nuwatmin ulug turuk lahen?” urukmu Musa inowen, ”Yihi, nakolen, ap watikikon fahet aben holtusa,” ulug indi akolen yuk libag. 15-16#Kis 7:29; Ibr 11:27Mesir inap onowe suwon inowen Musan Mesir ahun eke ware fisibag ane hol hibareg ke roho ware fusuhuk peruk ane Musa oluk atfareg nuwaruhu rohon ulug akolen folo-folo o Midian kinang fam libareg kel tamin ulug ik fahet kinang habulig ambeg iraham heriyeg latfag.
Musa Midian kinang fam libag li itano Allah fahet hubu lahaptuk ahun unuk Yitro welatfahon ino aholani sabiren welatfag. Yitro aholani sabiren itano Musa ik fahet kinang habulig ambeg heriyegma watfareg ninikni ambohom fahet ik hinang enebul ulug turukmen 17wam foroho inap winon watfareg hilani arimano yanggal eneptuk latfagma Musa ino hagmag in atlug windat enepfareg enembohom arimano ik nawag ulug hinang isibag. 18Hinang isibagma it inikni Yitro#Yitro ino unuk eke Rehuel suwaleg latfag. ambeg watfagma it unubam, ”Hit nungge fahet yoho folo-folo wahep?” ulug kapal isibag.
19Kapal isibagma iren inikni fam, ”Wam foroho inaben nit yanggal nenebehesama Mesir ahun ekeyen ninibil ahareg nenembohom ik nawag ulug hinang esehekma wahe,” ulug hiyag itfag.
20Hiyag itfagma Yitro inowen, ”Ap let henebehekon ino kema wereg? Nungge fahet embeselug wahep? Suburu namisiyen hondohik lalihip!” ibag.
21Hondohik libagma Musa inowen o aru welaruhuk pibareg Yitro men weregma ahaloho Zipora og itfag. 22Og itfagma malik ap umalik indag tibag. Indag tibagma Musa inowen an pog nahun tuma welahi ulug malik ino unuk Gersom suwalfag.#Gersom: Nit nenele roho pog ahun uruk.
23Mo amusun toho welatfareg Mesir inap onowe suwon ino war atfag angge famen Mesir inaben yabuk angginon Israel inap unubam emberukon eleg atfag fugmu enele ya nga uruk lit Allah fam, ”Yihi, onolok toho mingming neneptuken let nenebin,” ulug heng turuk latfag. 24#Kej 15:13-14Allahn iren uba yatukon hol hibareg Abraham, Ishak, Yakub unubam, ”Hit An numalikisi weregma An hit Hinikni welaruhuk,” ulug sali imbibag ane wenggel hibag. 25Wenggel hibareg Allahn Israel inap indi enesug lit let enebuhuk peruk latfag.
Sélection en cours:
KELUARAN 2: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
