मत्ती 26
26
येसुलाई सैःन्या गुमुस्ता
(मर्कूस १४:१-२; लूका २२:१-२; यूहन्ना ११:४७-५३)
1येसुए आव पाँ भरी ओखेमोत उसिसरालाई है यादोक्यो, 2“आछिमकिन ऩेलात निस्तार पर्ब हुरिज़्या। नो बेलाक ज़ ङा मिँ मिन्सिउलाई क्रुसत तङ्गैद सैःनारिज़्यार,” है यादोक्यो।#प्रस १२:१-२७ 3येसुए है ओल्यो मिताव ज़ मुख्या पुजारीर स़ोनो यहूदीराए यास़ेरर तोबो कैयाफा यादोज़्याव प्रधान पुजारीए उझ़िमक दुप्सिद, 4येसुलाई झुकैद क्योःद सैःन्या गुमुस्ता दोकेर। 5खाली, “पर्ब बेलाक माता, मिँर मचिन्या ओछ्यास लिज़्या,” है लिकेर।
येसुए ओङ़ैत म़ास थीव मेंमा
(मर्कूस १४:३-९; यूहन्ना १२:१-८)
6हाः बेलाक येसु बेथानिया नाखारल तोबो सिमोन यादोज़्याव कुऱीए उझ़िमक उलिज़्याव। 7येसुए नो झ़िमक काँ उज़्युज़्याक तोबो मेंमाए बनै चाव ज़िम्ज़ा लुँ जाल उसी ङरो बनै ओएः ल्यो म़ास रैद येसुए ओङ़ैत ओपो·स ज़ थीदिक्यो। 8येसुए उसिसराए निताव रँःद जाँ यारिस चोद, “आव मेंमाए काराव नाः ओएः ल्यो म़ास खेर ओझाःज़्याव? 9बुरू नोलाई यो·द नो पैसाए काता ज़ माल्योरालाई भाःद ओराएकिन तान्या ओल्यो,” है यालिज़्याव। 10येसुए थैद, “काराव आव मेंमाए उयुँ केःद जेएज़्याव? नोए ते ङाजूँनी बनै चाव य़ेन दोक्यो। 11काता ज़ माल्योर ते जेस एकतार ज़ लिज़्यार, ङा ते जेस एकतार लिन्या ङामाले।#ब्य १५:११ 12आवए ङाक्याँताव थीद ओयाँव म़ास, ङा मासिद ज़ गादैन्या छ्यामकावए जूँनी ङामोरोलाई थीद ओयाँव मिताव ज़ ताके। 13है जैद ङा जेलाई साचो है ङादाचिज़्या, संसार भरिल जोङ जोङ आव चाव था यारासथैज़्यार, होङ होङ आव मेंमाए ओदोव य़ेन थास्द उमिन ब रहिन्या ले।”
येसुलाई धोका याज़्याव इस्करियोत
(मर्कूस १४:१०-११; लूका २२:३-६)
14नकिन बाह्र जना उसिसरानी यहूदा इस्करियोत मुख्या पुजारीराए ल्योक बाद, 15“ङा येसुलाई जेकुइत पारैद ङायाचिकिन ङालाई काता जेयाँके?” है ओरादोक ते, नोर खुसी ताद चाँदीए पैसा तीस गोता एकेर।#जक ११:१२ 16हाःकिन नोए येसुलाई धोका यान्या मौका खिम्क्यो।
माँदा भरेस ज़्यान्या पर्ब
(मर्कूस १४:१२-१६; लूका २२:७-१३)
17हाःत ज़ माँदा भरेस ज़्यान्या पर्ब सुरू ओतावत उस॰कताव छ्याम येसुए उसिसर ओल्योक हुद, “नँ कै नलिज़्या, आव पर्ब मानिन्याए जूँनी ज़्यावर काङ्क जैनान्या?” है यादोक ते, 18येसुए, “नो सहरल बाचिकेदा, नक तोबो मिँस दैसिन्या जेले। नोलाई, ‘गेगुर्बाए है दींज़्याव, ओल बान्या बेला ताद ले दी। है जैद गे उसिसरास आव पर्ब नझ़िमक मानिउ पैंज़्याव,’ है दोच्यो,” है दाद यापरींक्यो। 19येसुए है ओरादोव मिताव ज़ उसिसराए पर्बताव ज़्याव भरी जैकेर।
परमेस्वरए उमिनताव भत्यार
(मर्कूस १४:१७-२६; लूका २२:१४-२३; यूहन्ना १३:२१-३०; १ कोरिन्थी ११:२३-२५)
20हो छ्याम ऱिमक येसु बाह्र जना उसिसरास नो झ़िमल दुप्सिद ज़्यान्याए जूँनी च़ुसिकेर। 21ज़्यावर याज़्युज़्याक येसुए, “ङा जेलाई साचो है ङादाचिज़्या, जेनी तोबोए ङालाई धोका यान्या ले,” है ओरादोक ते, 22उसिसर यागहरास, “ङा ते माताखेहो सा, प्रभु,” है लिद पालास है दोकेर। 23नाःत ज़ येसुए, “जोए ङास भरेस चिपल छोइद ज़्युज़्याव, हो ज़।#भज ४१:९ 24ङा मिँ मिन्सिउए ते धर्मसास्त्रलाव सर्सिउ दुखर जुनी ब सयो·व ज़ परिए, खाली ङालाई धोका याज़्याव मिँलाई ते थैए माँतकन ज़ लिज़्या। निताव मिँ बुरू ओमाजर्मिकिन तान्या ओल्यो,” है ओरादोक ते, 25नो धोका याव पैंज़्याव यहूदा ओल ज़ पर्सिद, “सैं ङा ओताव, गुर्बा?” है ओदोक ते, येसुए, “हैज़, नँ ज़ है नलिके,” है दोक्यो।
26नकिन नो याज़्युज़्यावत ज़ येसुए उकुइत भरेस तोबो रैद, असिक ऩिद नो भरेसलाई केःद, “हाँ, आव ज़्युचिके। आव ङाक्याँ ज़,” है दाद भाःद याएक्यो। 27हो मिताव ज़ फरी खुरी उकुइत रैद धन्याबाद चरैःद, “जे प़ाइँए आव खुरीनी ज़ ओचिके,” है लिद नोरालाई याद, 28“आव जेओज़्याव कुधु मिँराए पाप क्याल्द्यान्याए जूँनी ङासोभोरिज़्याव ङाझी ज़। आनी ज़ परमेस्वरए जेस साःरो बाचा नैद्याचिरिज़्याव।#प्रस २४:८; यर ३१:३१-३४ 29ङा जेलाई है ङादाचिज़्या, ङा स्वर्गताव ङाबाबुए ओराज्याल जेस सिप गेमातावा पै आव भत्यारलाव दाखमद्य आछिमकिन ओन्या ङामाले,” है यादोक्यो। 30नकिन भजन तोबो गैद ननी पुलुस्द जैतून दाँदादा बाकेर।
पत्रुसए ओय़ेन येसुए ङ़ादा ज़ है ओदोव
(मर्कूस १४:२७-३१; लूका २२:३१-३४; यूहन्ना १३:३६-३८)
31नक याकेसोत येसुए उसिसरालाई, “जे आछिम रील ज़ ङालाई प़ाइँए ऱास्न्या जेले। धर्मसास्त्रल इताव सर्सिउ लिज़्या,
‘बेधाराए यार्गे गावलालाई प़ोद ङासैःवत,
बेधार चितराँ पुतराँ तारिज़्यार।’#जक १३:७
32हैदी ब सिउनी सैंसिद जेङ़ादा ज़ गालीलल ङाबारिज़्या,” है यादोक्यो। 33हाःत ज़ पत्रुसए, “उपुर्कावराए प़ाइँए याऱास्निदी ब ङा ते नँलाई खर्क ज़ ऱास्न्या ङामाले,” है ओदोक ते, 34येसुए, “ङा नँलाई साचो है ङादींज़्या, आछिम रील ज़ भाल्या ओमाकोद ङालाई स़ोंखेप ‘ङामासरेसे’ है दान्या नले,” है ओदोक ते, 35पत्रुसए फरी, “माःक, ङा नँस सिन्या ओतादी ब ङा नँलाई ङामासरेसे है लिन्या ङामाले,” है दोक्यो। उपुर्कावराए मनी हैज़ लिकेर।
येसुए गेतसमनील ओपोंखारिउ
(मर्कूस १४:३२-४२; लूका २२:३९-४६)
36नकिन येसु उसिसरास गेतसमनी यादोज़्याव बगैचाल बाद उसिसरालाई, “ङा जाँ होकसैकावक बाद ङापोंखारिवा पै जे आक ज़ लिच्यो,” है दाद, 37पत्रुस स़ोनो जब्दियाए ओज़ानी याकूब स़ोनो यूहन्नारालाई ओलस यालाँक्यो। हाःत ज़ येसु उयुँर स्यासे सतेद धो थाइव तानाद, 38नो स़ोम्लोरालाई, “ङायुँर स्यासे तेद सिवा सिवा ताद ङाले। जे आक ज़ लिद ङास सैंसिद लिचिके,” है दाद, 39नोराकिन छ्यावा होकसै बाद नामक फुलुप्सिद अइ लिद पोंखारिक्यो, “अ बाबु, आव ङाक्याँत हुरिज़्याव धो सहिउ दुखर भर्सकी वैंद्याँके। खाली ङा ङायुँ माःक, नँ नयुँ ओताकिन वाज़,” है लिद, 40नो स़ोम्लोराए ल्योक उहुवत नोर ङ़ल्द यालिज़्याव दैहुद पत्रुसलाई, “जे कै जैद ङास तघन्ता पै ब जेमालिधुज़्याव? 41सैंसिद पोंखारिचिके, म़ानी दुखराल जेमाथ॰रिधुया। जेयुँए ते दान्या ज़ पैंज़्याव, खाली पाखाताव जेक्याँए ते मासहिधुन्या ओछ्यास लिज़्या,” है दोक्यो।
42नकिन येसु फरी ब ङ़ादाङाव ओपोंखारिज़्याव पोक बाद अइ लिद पोंखारिक्यो, “ङाबाबु, आव ङाक्याँत हुरिज़्याव धो सहिउ दुखर ङा मासहिद ज़ मातान्या ओल्यो ताकिन, है नलिज़्याव मिताव ज़ ओताक,” है लिद, 43नो स़ोम्लोराए ल्योक उहुक फरी ङ़ल्द यालिज़्याव ज़ यादैक्यो। नोराए यामीर बनै पातिद मासहिधुकेर।
44है जैद नोरालाई ख्यानैद फरी ब ङ़ादाङाव पोक बाद ङ़ादाकिनकाव मिताव ज़ पोंखारिक्यो। 45नकिन फरी नो स़ोम्लोराए याल्योक हुद, “आःपै जेमीर मायो·ताए रो? अब ते ङा मिँ मिन्सिउ पापीराए कुइत सूँपिसिन्या बेला हुके। 46च्याँःसिचिके, गेबा। ङालाई धोका याज़्याव मिँ नक ज़ हुद ले,” है यादोक्यो।
येसुलाई याक्योःहुव
(मर्कूस १४:४३-५०; लूका २२:४७-५३; यूहन्ना १८:३-१२)
47येसु ओपाँज़्याक ज़ नो बाह्र जना उसिसरानिकाव यहूदा इस्करियोत बनै माहोल्या मिँरास तरवालीर खोंतार रैद हुकेर। नोर मुख्या पुजारीर स़ोनो यहूदीराए यास़ेरराए ल्योनी हुवर याल्यो। 48नो इस्करियोतए ङ़ादा ज़ नो क्योःना हुज़्यावरालाई, “ङा जोलाई माइँ ङादोए, होलाई ज़ क्योःच्यो,” लिद सरेस याद ओरानैज़्याव। 49है जैद बगैचाल याकेसो प़ाइँना इस्करियोत येसुए ल्योक बाद, “जेरो गुर्बा,” लिद माइँ दोक्यो। 50हाःत ज़ येसुए, “अ ङानैं, ङाक्याँत नदान्या दोके,” है ओदोव प़ाइँना ज़ नो माहोल्यार हुद येसुलाई ताप तप क्योःकेर।
51हाःत ज़ येसुसकाव तोबोए ओतरवाली हाइद प्रधान पुजारीए ओनोकोरलाई तँनिकाव ओर्ना पल्द सतेदिक्यो। 52येसुए निताव रँःद, “नतरवाली उसिपल झाःके। तरवाली चलैज़्यावर तरवालीनी ज़ सिरिज़्यार। 53ङा ङाबाबु परमेस्वरस ङाऩिकिन बाह्र पल्तन ओचाकर्यार तादी ब ङालाई परींद्यान्या ले, नो जेमासैंए रो? 54खाली निताव ङाऩिकिन आव ङाक्याँत ताव परिन्या धर्मसास्त्रलाव सर्सिउ पाँर कातानी ओयो·रिज़्याव?”
55नकिन येसुए नो क्योःना हुव माहोल्यारालाई, “काराव ङालाई दाँकालाई मिताव तरवालीर खोंतार दाद जेक्योःहुनाव? ङा जेलाई दिनकाव ज़ ध्यान झ़िमल परमेस्वरए ओपाँ ङासथैचिक जेमाक्योःनाके। 56खाली अगमबक्ताराए धर्मसास्त्रल यासरो मिताव सयो·न्याए जूँनी ची इताव ताके,” है ओरादोव प़ाइँना उसिस भरी येसुलाई ऱास्द चितराँ पुतराँ धोंःकेर।
येसुलाई घ्योःव कचरील यालाँव
(मर्कूस १४:५३-६५; लूका २२:५४-५५,६३-७१; यूहन्ना १८:१३-१४,१९-२४)
57नकिन नो क्योःना हुवराए येसुलाई प्रधान पुजारी कैयाफाए ल्योक लाँकेर। नक सास्त्रीर स़ोनो यहूदीराए यास़ेरर दुप्सिद यालिज़्याव। 58नो बेलाक पत्रुस जाँ तादाङ याछीं याछीं हुद नो प्रधान पुजारीए ओचतराक ज़ हुद ‘येसुलाई कै याजैज़्याव ब्याँ?’ लिद पाल्याराए छ्योक ज़ च़ुसिके। 59नो झ़िमल मुख्या पुजारीर स़ोनो घ्योःव कचरीलाव स़ेर भरिए येसुए ओङ़ैत माचाहिउ पाँर झाःद सैःन्या कर याखिम्ज़्याव। 60धुत गोहाई पाँन्यार कुधु ज़ ताकेर, खाली कर ते कान्त ज़ मादैकेर।
बल्ल प़ाइँरानी छींनी ऩेब्लो हुद, 61“आवए, ‘परमेस्वरए ओध्यान झ़िमलाई तैःद फरी स़ोंलात हिताव ज़ ङाजैरिज़्या,’ है ओल्यो गिन ज़ गिन्थैके,” है निरादोव प़ाइँना ज़, 62प्रधान पुजारी च्याँःसिद येसुलाई, “नँ नपाँ काता ज़ ओमालिज़्याव रो? आवनी नङ़ैत झाःद निईंव पाँ किताव उलिज़्याव?” है ओदोक ते, 63येसुए घाइ ज़ मादोक्यो। फरी प्रधान पुजारीए, “जींदो परमेस्वरए उमिननी है ङादींज़्या, नँ गेलाई है दासिके, नँ परमेस्वरए ओज़ा ख्रीस सैं माःक?” है ओदोक ते, 64येसुए, “नँ है नलिज़्याव मिताव ङा साचो हो ज़। तछा ङा मिँ मिन्सिउलाई माहान परमेस्वरए ओवोर्दा च़ुसिद ङालिज़्याव ब रँःन्या जेले, स़ोनो स्वर्गतिन बादलरास ङाहुज़्याव ब रँःन्या जेले,” है यादोक्यो।#दान ७:१३
65हो प़ाइँना ज़ प्रधान पुजारीए उरिसए ओक्वार चीए चीए, “जे ज़ जेथैके, आवए परमेस्वरए उमिन ओबले·ज़्याव। छुत गोहाई काता ओचाहिउ? 66जे कै जेलिज़्या?” है ओरादोक ते, नोराए प़ाइँए, “आवलाई सैःन्या ज़,” है लिद,#लेबी २४:१६ 67ख्वाराए मुत्काए प़ोकेर, ख्वाराए लप्ताए प़ोकेर, ख्वाराए त़िल्केर।#यसै ५०:६ 68नै जैज़्यावराए फरी, “नँ साचो ख्रीस ताकिन, गेलाई है दासिके, नँलाई प़ोज़्याव सु?” है लिद बरे·केर।
पत्रुसए ‘येसुलाई ङामासरेसे’ है ओरादोव
(मर्कूस १४:६६-७२; लूका २२:५६-६२; यूहन्ना १८:१५-१८,२५-२७)
69येसुलाई नै याजैज़्याक पत्रुस चतराक ज़ च़ुसिद उलिज़्याव। नो बेलाक ज़ तोबो नलाव य़ेन दाज़्याव मेंमा हुद पत्रुसलाई, “नँ मनी गालीललाव येसुस नल्यो सानी,” है ओदोक ते, 70पत्रुसए प़ाइँए याङ़ाक, “नँ काता नपाँज़्याव इताव, ङा ते ङामासैंए,” है दाद, 71साँबिलाक उच़ुसिनाक फरी छुत तोबो य़ेन दाज़्याव मेंमा हुद नक लिज़्यावरालाई है यादोक्यो, “आव मिँ ते नासरतलाव येसुसकाव ज़,” है ओरादोक ते, 72पत्रुसए किर्या झाःद, “ङा नो है नलिज़्यावलाई सरेस ज़ ङामासरेसे,” है दोक्यो। 73फरी छ्यावाक नक लिज़्यावर पत्रुसए ल्योक हुद, “नँ साचो उसिसरासकाव ज़, नपाँनी ज़ गेसरेस्निज़्या,” है यादोक ते, 74पत्रुस बनै थल्सिद किर्या झाःद, “ङा नो मिँलाई सरेस ज़ ङामासरेसे,” है ओरादोव प़ाइँना ज़ भाल्या कोके। 75नाःत ज़ ङ़ादा येसुए पत्रुसलाई, “भाल्या ओमाकोद ज़ ङालाई स़ोंखेप ‘ङामासरेसे’ है लिन्या नले,” है ओदोव पाँ ब चेतैक्यो। नो चेतैद पत्रुस लाँःक पुलुस्द धस धस घर्के।
Sélection en cours:
मत्ती 26: NKham
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2015, Wycliffe Bible Translators, Inc. All rights reserved.
