मत्ती 27
27
येसुलाई रोमी सरकारए ल्योदा यासूँपिउ
(मर्कूस १५:१; लूका २३:१-२; यूहन्ना १८:२८-३२)
1छकाल्न्या घग ज़ मुख्या पुजारीर स़ोनो यहूदीराए यास़ेरराए येसुलाई सैःन्याए जूँनी सल्ला दोकेर। 2येसुलाई किद रोमी सरकारलाव पिलातसए ल्योक लाँद सूँपिकेर।
इस्करियोत झुन्दैसिद ओसैःसिउ
(ओसाचीर १:१८-१९)
3नाःत ज़ येसुलाई धोका याज़्याव यहूदा इस्करियोतए येसुलाई सैःन्या ज़ याथ·रैव रँःद, ‘ङा ते मादान्या य़ेन ची ङादोव ओल्यो’ लिद उयुँर माचाव दाद मुख्या पुजारीर स़ोनो यहूदीराए यास़ेरराए ल्योक बाद नो यायो तीस गोता चाँदीए पैसा यालाई ज़ सोवोल्द्याद, 4“ङा ते कान्त ज़ ओखत माल्योलाई अऩाकल ज़ धोका याद मादान्या ची ङादोव ओल्यो,” है ओरादोक ते, नोराए, “जो तादी ब ताधुके, गेलाई घाइ तादासियो,” है यादोव प़ाइँना ज़, 5इस्करियोतए नो यायो चाँदीए पैसा याङ़ाक ज़ ध्यान झ़िमल ओदोइद ख्यानैद ननी पुलुस्द बाद ओल ज़ झुन्दैसिद सैःसिके।
6मुख्या पुजारीराए ते नो ओख्याव पैसार तीद, “आव ते झीए ओएःलाव पैसा ची, ध्यान झ़िमलाव भितील थोम्न्या माताए,” लिद, 7या याल सल्ला दाद नो पैसाए तादा तादानी हुव मिँरालाई यासिक गादैन्याए जूँनी तोबो कुमाल्याए ओएँः लँःकेर। 8है जैद हो छ्यामकिन ज़ नो एँःए उमिन ‘झीए एँः’ ताके। 9आनी ज़ यर्मिया अगमबक्ताए ओसरो मिताव यो·के। नोए ओसरो आव ज़,
‘इस्राएलीए ओथोराए नोए ओक्याँताव यामुलिउ ओएः चाँदीए पैसा तीस गोताए
10परमेस्वरए है ओल्यो मितावनी ज़ कुमाल्याए ओएँः लँःन्या लेर।’#जक ११:१२-१३
रोमी सरकारलाव पिलातस
(मर्कूस १५:२-१५; लूका २३:३-५,१३-२५; यूहन्ना १८:३३–१९:१६)
11नाःत ज़ येसुलाई रोमी सरकारलाव पिलातसए ओङ़ाक यासच्याँक पिलातसए येसुलाई, “नँ साचो यहूदीराए याराजा ज़ रो?” है ओदोक ते, येसुए, “नँ ज़ नथ·रैनाके सानी,” है दोक्यो। 12नाःत ज़ मुख्या पुजारीर स़ोनो यहूदीराए यास़ेरराए येसुलाई खत यालैज़्यावत ब येसुए घाइ ज़ मारादोक्यो। 13निताव थैद पिलातसए येसुलाई, “काता नाः कुधु पाँर नङ़ैत झाःद याईंज़्याव नमाथैए रो?” है ओदोक ते, 14झन ज़ घाइ मालिद तोबो ब मापाँके। निताव रँःद पिलातस बक्क ताके।
15नोए सालकाव तखेप निस्तार पर्बत यहूदीराए जो कैदीलाई ‘ऱास्द्यासिके’ है लिज़्यार, होलाई ज़ ऱास्द ओराएज़्याव। 16नो बेलाक तोबो बारब्बा यादोज़्याव बनै उमिन थासो कैदी झ्यालखानाल उलिज़्याव। 17है जैद माहोल्यार यादुप्सिज़्याक पिलातसए, “झ्यालखानाल लिज़्याव बारब्बालाई ऱास्न्या सैं ख्रीस यादोज़्याव येसुलाई ऱास्द्यान्या? जे ज़ है लिचिके,” है यादोक्यो।
18ओल पिलातसए ते ‘आवराए येसुलाई अऩाकल ज़ यामी तूद सूँपिद नैनार’ लिन्या सैंद ओनैज़्याव। 19फाल्न्याए जूँनी उच़ुसिउत पिलातसए ओज्याए येसुए उजूँनी अइ लिद तोबो था परींक्यो, “नो सैःव यापैंज़्याव धर्मी मिँए उउपर्त नँ मादान्या तादोयो। आछ्या रीलाव ङामँल आव मिँए उजूँनी ङायुँर स्यासे तेद बनै धो थाइव ङाताके,” है लिद परींक्यो। 20मुख्या पुजारीर स़ोनो यहूदीराए यास़ेरराए ते झन मिँरालाई प़ाइँ याल्योदा जैद नो झ्यालखानाल लिज़्याव बारब्बालाई ऱास्द येसुलाई सैःन्या है लिच्यो है दाद यारानैज़्याव।
21पिलातसए फरी, “नोनी काताकावलाई ऱास्द्यान्या?” है ओरादोक ते, “बारब्बालाई ऱास्द्यासिके,” है दोकेर। 22पिलातसए, “हुकी नो ख्रीस यादोज़्याव येसुलाई ङा कै जैन्या की?” है ओरादोक ते, नोराए प़ाइँए तपाँ जैद, “क्रुसत तङ्गैद सैःन्या,” है दोकेर। 23पिलातसए फरी, “काराव? आवए मादान्या काता दाद ओनैज़्याव?” है ओरादोक ते, नोर झन ज़ मचिद, “क्रुसत तङ्गैद सैःन्या,” है लिद बनै ज़ क़िकेर।
24नाःत ज़ पिलातसए, आवरालाई ते कै जैद ब माताके, झन ज़ मचिरिकेर लिद ऱी रैद नोराए याङ़ाक उकुइर हुर्सिद, “दे चिऊनाचिके, आव य़ेननी ङाछेसिके। आवए उझी ङालाई तालागिस्क, जेलाई ज़ ओलागिस्क,” है ओरादोक ते,#ब्य २१:६-९ 25नो माहोल्याराए, “नोए उझी ओलागिस्किन गे गेक्याँत स़ोनो गेज़ाराए क्याँत ज़ ओलागिस्क,” है याल्यो प़ाइँना ज़, 26पिलातसए बारब्बालाई ऱास्द्याद येसुलाई रीःद, क्रुसत तङ्गैद सैःन्याए जूँनी सिपाईंरालाई ज़ यासूँपिक्यो।
सिपाईंराए येसुलाई यागिल्लैव
(मर्कूस १५:१६-२०; यूहन्ना १९:२-३)
27नकिन पिलातसए उसिपाईंराए येसुलाई दरबार जींल लाँद रोमी पल्तन भरी यारादुप्केर। 28नोराए येसुए ओक्वार सिउःद्याद राजाराए याक्वाइसिज़्याव मिताव घ्यामो क्वा जास्द, 29ज़ुए मुकुत तोबो ऱ॰द ओङ़ैत जास्द वोर्फताव उकुइत भाताए झुइ तोबो सक्योःद ओङ़ाक याघूँदानी तिकिसिद, “ए यहूदीराए याराजा, जय जय ओताक,” है लिद बरे·द, 30त़िल्द, उकुइताव भाताए झुइए ज़ ओङ़ैत प़ोदिकेर। 31गिल्लैद गिल्लैद च़िम यादोवत नो घ्यामो क्वा सिउःद्याद ङ़ादाङाव ओक्वार ज़ जास्द क्रुसत तङ्गैना लाँकेर।
येसुलाई क्रुसत यातङ्गैव
(मर्कूस १५:२१-३२; लूका २३:२६-४३; यूहन्ना १९:१७-२७)
32येसुलाई सैःना यालाँज़्याक येमक तोबो कुरेनीलाव सिमोन यादोज़्यावस यादैसिक नोलाई येसुए ओलाँज़्याव क्रुस सुघुर्द, 33गलगथा यादोज़्यावक केस्केर। नो पोए उमिन ‘खप्पर्या पो’ है ब यादोज़्याव। 34नक येसुलाई काव वासः झाःसिउ दाखमद्य सवैकेर। येसुए दार्द ओव माभैंःके।#भज ६९:२१ 35येसुलाई क्रुसत तङ्गैद ओक्वारात गोला झाःद भाःद,#भज २२:१८ 36नक ज़ च़ुसिद येसुलाई गुद नैकेर। 37ओललाई तङ्गैद यानैज़्याव क्रुसए ओङ़ैत,
“आव यहूदीराए याराजा येसु ज़”
है लिद तोबो फल्यात ओखत सर्द चकेर। 38हो छ्याम ऩेब्लो चोरनिलाई मनी, तोबोलाई ओवोर्दा तोबोलाई ओदाबर्यादा जैद क्रुसत तङ्गैद यारानैज़्याव।
39आनी हुनी भाल्सिना हुवराए याङ़ैर ङ़त ङ़त जैद थल्द,#भज २२:७; १०९:२५ 40“नँ ध्यान झ़िमलाई तैःद स़ोंलात ङाजैरिज़्या है लिज़्याव मिँ, नक्याँलाई कै जैद नमाबाँचैधुज़्याव? नँ साचो ज़ परमेस्वरए ओज़ा ताकिन नो क्रुसतिन झरिद हुन्के,” है दोकेर। 41हिताव ज़ मुख्या पुजारीर स़ोनो यहूदीराए यास़ेरर, सास्त्रीराए मनी येसुलाई गिल्लैद, 42“आवए छुतरालाई ताकितर याबाँचैज़्याव, ओल ओक्याँलाई कै जैद ओमाबाँचैधुज़्याव? इस्राएलीराए याराजा है लिज़्याव नो क्रुसतिन झरिद उहुकिन वाज़ ओपाँ पतिन्या गेले। 43आव मिँ परमेस्वरए ओक्याँत ख्यासिद लिज़्याव ओताव ताकिन परमेस्वरए ओल्योदा उयुँ थू जैद पला·हुखेहो। ओल कै जैद ‘ङा परमेस्वरए ओज़ा ज़’ है उलिज़्याव?” है लिकेर।#भज २२:८ 44ओलस तङ्गैसिउ चोरनी मनी नोराए है याल्यो मिताव ज़ है लिकिनी।
येसु उसिउ
(मर्कूस १५:३३-४१; लूका २३:४४-४९; यूहन्ना १९:२८-३०)
45नकिन अधमर लावाकिन तीन बजे पै देस भरी काल्या कले झ्याके। 46तीन बजेवाक येसु बनै चोइस, “इलोई, इलोई, लामा सबखथनी?” है लिद क़िके। नोए ओसै, “अ ङापरमेस्वर, अ ङापरमेस्वर, ङालाई काराव नऱास्नाव?”#भज २२:१ 47नक च्याँःसिद लिज़्यावराए नो पाँ थैद ख्वाराए, “आवए ते एलियालाई ची उखुल्ज़्याव सा,” है लिद, 48तोबोए धोंःनाद भाताए उतुपात थाकना पो·द सिरो दाखमद्यल छिम्द येसुए ओयाःत झाःद्याद पिउ परींक्यो।#भज ६९:२१ 49उपुर्कावराए ते, “अब ते चिऊद गेनैया, एलिया कातारानी हुद माहाइज़्याव?” है लिकेर। 50नाःत ज़ येसु फरी ब बनै चोइस क़िद उस॰ सफ्या·क्यो।
51हो प़ाइँना ज़ ध्यान झ़िमलाव बारिसिउ क्वा ब उतुपानी ओजराङ पै ओलनी ज़ ऩेपरा ताद चिस्के। नामर थोनो·सिद, हाँर पा·द,#प्रस २६:३१-३३ 52सिउराए याखादरर ब फुकेर। सिउ धर्मी मिँर ब कुधु सैंसिद सोकेर। 53खाली येसु सिउनी सैंसिद ओसोव छींनी वाज़ नोर याखादरनी पुलुस्द यरूसलेम सहरल याबावत कुधु मिँराए याङ़ाक सरैंःसिकेर। 54नो येसुलाई गुज़्याव कप्तान स़ोनो ओलस लिज़्याव पाल्याराए निताव भोंचालोर, अचम्ब अचम्बलावर रँःद नोर बनै छे·द, “आव ते साचो ज़ परमेस्वरए ओज़ा ची ओल्यो,” है लिकेर।
55हो बेलाक गालीलनी हुव मेंमार येसुस बाऱिद ओसेवा दाज़्यावर जाँ तादानी येसुलाई चिऊद यानैज़्याव। 56नोरानी मरियम मग्दलिनी, याकूब स़ोनो योसेफनी निआमा मरियम, जब्दियाए ओज़ानी निआमा ब ओल्यो।
येसुए ओमोरो खादर पुपल याझाःव
(मर्कूस १५:४२-४७; लूका २३:५०-५६; यूहन्ना १९:३८-४२)
57र्याम्या रिमी ओझ्यानाक तोबो अरिमाथियालाव धनी मिँ योसेफ यादोज़्याव हुके। नो मिँ ओल मनी येसुए ओपाँत बाज़्याव मिँ ज़ ओल्यो। 58नोए पिलातसए ल्योक बाद येसुए ओमोरो ऩिक्यो। पिलातसए नोए ओपाँ थैद येसुए ओमोरो लाँव एक्यो। 59है जैद योसेफए येसुलाई नो क्रुसतिन हाइद पालो क्वाए लुम्बैद, 60ओल उजूँनी दावन खुपिद पुप जैद ओनैज़्याव साःरो खादरल झाःद ओय़ामक घ्योःव लुँए कद ख्यानैक्यो। 61योसेफए येसुलाई खादरल ओझाःज़्याव बेलाक मरियम मग्दलिनी स़ोनो ओनैं मरियमनी नक चिऊद निनैज़्याव।
खादरक पाल्यार यारानैव
62हो पराःती ऩासिन्या छ्याम ओतावत मुख्या पुजारीर स़ोनो फरिसीर दुप्सिद पिलातसए ल्योक बाद, 63“हाकिम सायेब, नो छुल्या ओमासिद ज़, ‘स़ोंलात सैंसिद ङासोरिज़्या,’ है उलिज़्याव थैद गेनै। 64है जैद नँ नो स़ोंला भरी ओमाखेमा पै गुन्या पाल्या खादरक नैद्याव ताके, म़ानी कातारानी उसिसर हुद ओमोरो हाइद लाँद मिँरालाई ‘सिउनी सैंसिद सोके’ है ल्यो ब पैंर्या। नै ओताकिन ङ़ादाङावकिन झन ज़ बलेस्न्या ले,” है यादोक ते, 65पिलातसए, “सिपाईंर लाँद जे ज़ नोरालाई पाथस गुव यारापरींचिके,” है ओरादोक ते, 66नोर ननी बाद नो खादर पोक सु ज़ माबाधुन्या जैद पाल्यार नैद नो कसिउ लुँत माफैन्या छाप ब झाःकेर।
Sélection en cours:
मत्ती 27: NKham
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2015, Wycliffe Bible Translators, Inc. All rights reserved.
