wandījo 6
6
Ng'holò ya ng'wa SEEBA kūpīnīhala
1A banhū aho bakwīla ū mu sī, būbyala na baana bakīma bingī, 2a baana ba ng'wa Mulungu būbabona a bashīke ba banhū gīkī basoga; bandya kūyūbatoola gīt'umo baalī batogelilwe boi benīkīlī. 3Hūna ū SEEBA ūhaya gīkī, “Ū moyo gwane gūtikala gūkwilwishaga na munhū shikū jose, nguno ū wei alī mīlī gwa kūcha; ī shikū ja būlamu bokwe jikūbiza myaka igana na makūmi abīlī (120).” 4Ū mu shikū jenījo nī ja kū būtongi baalīho Banefili ū mu sī; a baana ba ng'wa Mulungu bajaaga kūbatoola bashīke ba banhū babyala hamò nabo. A Banefili benabo baalī banhū ba nguzu,#6:4 Nguzu: Būdūlū wa kwīta mihayo ya būlī mbika. na bakumūku kūfuma kale na kale. 5Ū SEEBA ūbona gīkī ī nhūngwa ja ng'wa munhū jilī ja malofu no ū mu sī, na gīkī pye a maganiko ga ng'holò ya ng'wa munhū galī masoso būl'ikanza. 6Ū mhayo gwenūyū gūkampīnīhaja no ū SEEBA, gūminya ū mu ng'holò, kūlwa nguno ya kūmeeja na kūntūūla mu sī ū munhū. 7Hūna lūūlū ū SEEBA ūhaya gīkī, “Ū munhū ūyo nameeja nakūmpyaagūla agaye gete ū mu sī. Bakūshila pye a banhū nī shiinū, pyī nī sha kwigweesa ha sī, nī noni ja higūlya; nguno nalī na būpīna no īkī nakashibeeja!” 8Alīyo walīho Noa, ū ng'wene ūbalīlwa wiza#6:8 Wiza: Nūūlū, ūbalīlwa būtūngīlīja. ū kū būtongi bo ng'wa SEEBA.
Noa abeeje ngalaba
9Īyī yene mihayo ya mu shikū ja ng'wa Noa. Ū Noa walī munhū ntūngīlīja ū mu banhū ba shibyalīlwe shakwe; walī atī na shisembo, nīyo washimīzaga mu kūng'wigwa Mulungu pye a makanza. 10Ū Noa ng'wenūyo walī na bitūnja badatū, ba Shemu na Hamu na Yafeti. 11Ali lūūlū, ū kū būtongi bo ng'wa Mulungu ī sī yalī yabiipa no; yalī yokala wiboneeji. 12Ū Mulungu akabona gīkī ī sī yakenaagūkile; nguno ī nhūngwa ja banhū ba mu sī pye a bose, jikabiza ja malofu no! 13Hūna lūūlū ū Mulungu ūng'wīla ū Noa gīkī, “Lyashikaga ikanza lya kūbayagaja pye a banhū, nguno ī sī yokalile wiboneeji kūlwa nguno yabo. Nakūbakenaagūla a boi hamò nī sī. 14Hūna lūūlū, ū bebe beejaga ngalaba#6:14 Ngalaba: Lī shikolo lya kūbiza gītī meeli nhaale. ya ntī gwa gofa;#6:14 Gofa: Ī lina lya Shiheblania ī lya ntī gwenūyū lītamanīkile chiza; gwike gwalī ntī ndiimu (gītī gembe). ū mu gatī wītūūlīle masenge ībize na chumba, hūna wīteleleje na laami ū mu gatī nī hanze. 15A kabeegeje kayo kalī gīkī, Ī ngalaba yenīyo ū būlīhu wayo būkūbiza makono igana na makūmi anè, ū būgalī galī wayo makono makūmi abīlī n'idatū, ū būgūngūhu makono ikūmi n'idatū na nusu. 16Ūkwīkundīkīja ū kwigūlya, alīyo ī likundīkījo līlekeele ng'wanya gwa būgalī bo nusu nkono (0.5). Ū ng'wanya gwenūyo gwīpīndīlīje pyī ī yose, kūlwa kwingīja būpe ū mu gatī. Ū nyango ūkwītūūlīla mu kabazu; nīyo wīyīte ībize na golofa ibīlī. 17Nakwenha ihūūma lya minzī ū mu sī līshiyagaje pyī īsho shilī na myūyī ya būpanga. Shose na shose ī sha būpanga īsho shilī ha sīlīlī y'igūlū shikūcha. 18Alīyo ū bebe nakūkwinha ilagane#6:18 Nakūkwinha ilagane: Nūūlū, nakūbeeja nang'ho ilagane. lyane īlo nakūlyīta lībize na nguzu. Ū bebe kwingīla ū mu ngalaba na a bitūnja bako, nū nke wako; na a bīnga bako bakūbiza hamò nang'ho. 19Ū mu shiseeng'wa shose ī shipanga, ūkwenha ū mu ngalaba shibīlī shibīlī, ng'hosha na ng'hīma; shilang'hanwe ng'wenūmo hamò nang'ho, shiikale shipanga. 20Pyī ī shiseeng'wa shikūbiza shibīlī shibīlī, mbika jose na jose ja noni na ja shiinū, pyī nī ja kwigweesa ha sī, jikwiza ū kūlī bebe jilang'hanwe jikale mhanga. 21Ūkūsola na shilīwa sha būlī mbika, sha kūlya ū bing'we, nī shiseeng'wa īsho shilī hamò nang'ho; na shingī ūlatūūle kūlwa shikū ja kū būtongi.” 22Ū Noa wīta būlī mhayo gīt'umo akalagīlīlwa na Mulungu.
Sélection en cours:
wandījo 6: SUKBI15
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Sukuma Bible © Bible Society of Tanzania, 2019.
