LOS HECHOS 9

Apyanmonquiscama apvalhoc Saulo

(Hch 22.6-16; 26.12-18)

1Aplovquic alhta mataa Saulo. Apquiltamjoc alhta elnapoc enlhit melyasquiyam tasic amyaa. Yejemoc alhta apyacmo apnaclha apquimja apmamyi sacerdote. 2Apquiltamjoc alhta elhca vaycajac, yoyam esovc apcaneyquiclhilha judíos tingma Damasco. Apquiltamjoc alhta elmoc najan elpilhtetic enlhit melyasquiyam tasic amyaa najan quilvanaa. Apquiltamjoc alhta enalanta tingma Jerusalén. 3Aplhinquic alhta. Lhama alhta apcamquitvocmo tingma Damasco. Pilapcasquic alhta aptajanya ayitsayolhma ayinyema netin. Inquiltotcasquic alhta. 4Yejemoc alhta apquilpolintamo nalhpop Saulo. Aplingac alhta lhama appayvam:

—Saulo, Saulo. ¿Soctomja seyamasamcaa nac? —alhta intomjac aplingay.

5Apcatingmavoc alhta Saulo:

—Visqui, ¿soc lhip enlhit qui? —alhta aptomjac.

Apcatingmavoc alhta:

—Coo nac Jesús aptomja lhip seyamascam —alhta aptomjac. Incascoc sat lhip, acno actoyam vayqui acyinyovascama navá ningilticlhaycaoc.

6Appilhyinimquic alhta Saulo. Aptomjac alhta apcanya:

—Visqui, ¿soc asoc apquiltamjoc olana? —alhta aptomjac.

Aptomjac alhta apcanya Visqui ingac:

—Itnimiclha netin. Iyas maa tingma. Colhic sat altimnasa asoc yoyam ellana —alhta aptomjac.

7Apcanvocmec alhta apquillhalhmaa. Apquilvanmamquic alhta. Apquillinga alhta inyicje appayvam. Am alhta elvitac aptomja appayvam. 8Yejemoc alhta apquinmaclho netin Saulo. Lhama alhta apquilyajamcaa. Am alhta eta olhma. Inmalhquic alhta apmic Saulo. Apquilyantimquic alhta tingma Damasco. 9Acvaycmo natqui acnim alhta metay olhma. Am alhta etavac aptom. Am alhta najan eynac apvoycamlha.

10Apnec alhta tingma Damasco lhama enlhit meyasquiyam tasic amyaa apvisay Ananías. Apvitoc alhta napaat Visqui ingac, appamejitsa:

—Ananías —alhta aptomjac.

Apcatingmavoc alhta Ananías:

—Acnec coo asi, Visqui —alhta aptomjac.

11Yejemoc alhta aptomja apcanya Visqui:

—Ingva, iyas sat lhip malamong tingma acvisay Amay Acpeyvomo. Ipeyvojo sat Judas tingma pac. Ilmalhnam sat apnaclha enlhit apvisay Saulo co Tarso. Apquilmalhnaquic quilhvoc maa Dios Ingyapam. 12Apvitac nic lhac Saulo malha ningaat. Aptalhningvaac nic lhac enlhit apvisay Ananías. Apninquinquic nic lhac apmeoc tacjaplhit, yoyam eteclha olhma —nic alhta aptomjac Visqui ingac.

13Lhama alhta aplinga Ananías aptomja apcanya:

—Visqui, aclingac coo aptemaclha Saulo apnatovascama enlhit melyasquiyam tasic amyaa tingma Jerusalén. 14Jave apvoy apanco. Apquilimja apmamyi sacerdotes nic lhac apquilapajascama, yoyam elmoc aplhamoclhojo apquiltomja apquillhanma lhip apvisay —alhta aptomjac.

15Aptomjac alhta apcanya Visqui ingac:

—Ingva, iyas sat maa. Acyacyesquic alhta as enlhit. Altamjoc etnejic apsoycam sicvisay nipyesicsa enlhit metnaja judíos najan nipyesicsa apquilviscaa apancaoc najan nipyesicsa enlhitaoc Israel. 16Olhicmocsic sat actemaclha ayasquiscama apyimpejic ayinyema apsoycam sicvisay —alhta aptomjac.

17Yejemoc alhta aplhinga Ananías. Aptalhningvocmec alhta tingma apnaclha Saulo. Apninquinquic alhta apmeoc tacjaplhit. Aptomjac alhta: “Eyalhing Saulo. Eyapajasquic lhac Visqui ingac Jesús aptajanyey alhta lhip nalhit amay apmiyamlha alhta. Apquiltamjoc yoyam eteclha olhma mocjam lhip. Yoyam najan colanojoc apvalhoc Espíritu Santo —alhta aptomjac.

18Yejemoc alhta aclicalhco asoc apataoc, malha quilasma ayimpeoc. Yejemoc alhta apvitaclho olhma Saulo. Apquinmaclho netin najan aptingyac yapasquiscama yingmin. 19Aptovquic alhta aptom. Yejemoc alhta apyimnaclho mocjam. Anit acnim alhta apnacmoc lhama enlhit melyasquiyam tasic amyaa tingma Damasco.

Apquiltimnaycam Saulo tingma Damasco

20Apquiltimnamcaa alhta Saulo tingma apquilaneyquiclhilha. Jesús alhta aplhenac mataa aptomja Dios Apquitca. 21Pilapcasquic alhta aplhamoclhojo apquillinga aplhanma:

—¿Jave ya enlhit apminlhinaycam alhta enlhit melyasquiyam tasic amyaa tingma Jerusalén? ¿Jave ya apvaa alhta, yoyam elmoc enlhitaoc (cristianos), yoyam najan enalaclha apnaclha apquilimja apmamyi sacerdotes? —alhta apquiltomjac.

22Inyangvocmec alhta apyascamco apquiltimnaycam Saulo. Appeyvescaseclho alhta aplhenamap apvisay Jesús aptomja Cristo. Inquilactalhquic alhta apquilvalhoc judíos apnaycam tingma Damasco.

Saulo apquinquitomap apnaclha judíos

23Nanoc alhta apquilpamejitsacpo judíos, yoyam elajic Saulo. 24Apyasingvocmec alhta as amyaa Saulo. Apquililjalhnec alhta mataa apatnaoc tingma acnim najan alhtaa, yoyam elajic Saulo. 25Alhtaa alhta intomjac apquilyilhacpo enlhit melyasquiyam tasic amyaa aptipsa Saulo. Apcalhimsacpec alhta aynapa acyiviy, apquilvayvesantamo nalhpop napocja tingma. Apquinquitacpec alhta Saulo.#2 Co 11.32-33.

Saulo apma tingma Jerusalén

26Lhama alhta apvoclho Saulo tingma Jerusalén. Apquiltamjoc alhta epalhavomoc enlhit melyasquiyam tasic amyaa. Apquilacac alhta. Apcanyacpec alhta meyanmonquiscama apvalhoc Saulo. 27Yejemoc alhta apma tacja Bernabé. Apyantimquic alhta apnamcaclha apóstoles apquilapajasomap. Apquiltimnam alhta actemaclha amyaa: Apvitac nic alhta Visqui ingac nalhit amay as enlhit apvisay Saulo. Appamejitcasquic nic alhta Visqui ingac. Apquiltimnasam nic alhta tasic amyaa mepqui apcay tingma Damasco. Actemaclha aplhanma apvisay Jesús —alhta aptomjac Bernabé. 28Apnec alhta mocjam Saulo tingma Jerusalén. Apquillhalhmaa alhta aptomjac apóstoles apquilapajasomap. 29Aplhenquic alhta mataa apvisay Jesús mepqui apcay. Apquilatingmavoc alhta mataa Saulo nipyesicsa judíos apquilmopvan griego appayvam. Apquillovquic alhta. Apquililtamjoc alhta elajic Saulo. 30Lhama alhta apquillinga amyaa apquilyalhinga. Apquilyantamaclhec alhta Saulo tingma Cesarea. Natamin alhta apquilapajasa eyacsic tingma Tarso.

31Yitnec alhta altamilaycam apquilvalhoc Jesucristo apmolhama yoclhilhma Judea najan yoclhilhma Galilea najan yoclhilhma Samaria. Inquilyimnatesalhquic alhta apquilvalhoc. Apquilacoc alhta mataa Visqui ingac. Aplhameclhec alhta ayinyema appasmom Espíritu Santo.

Mactamilquisquiyam apvisay Eneas

32Aplhinquic alhta Pedro. Maycaa alhta aptomjac apquilyalhinga. Apquilvitac alhta enlhit melyasquiyam tasic amyaa apnaycam tingma Lida. 33Apvitangvaac alhta maa enlhit apvisay Eneas. Ocho años alhta invaycmoc apyitnama. Apquilyelcomap alhta intemac. 34Aptomjac alhta apcanya Pedro:

—Eneas, Jesucristo aptamilquiscacmoc lhip. Ilha netin, ilaniclha aptajanma —alhta aptomjac.

Yejemoc alhta apna netin. 35Apquilvitac alhta aplhamoclhojo enlhit apnaycam tingma Lida najan tingma Sarón. Apquilyanmoncasquic alhta apquilvalhoc. Apquilyiplovcasquic alhta aptemaclha Visqui ingac.

Maclhaticjasquiyam quilvana acvisay Dorcas

36Innec alhta tingma Jope quilvana coyasquiyam tasic amyaa acvisay Tabita. Griego appayvam acvisay Dorcas (nincoo ningiltimem popyit). Intasic alhta mataa actemaclha as quilvana. Inquimlacmoc alhta mataa actomja alaymomalhca inlhojo asoc. 37Ningmasquem alhta incajac Dorcas. Inquitsepquic alhta. Inlicasquic alhta ayimpejic yingmin ayitsepma. Inquilpicanvoclhec alhta netin congne tingma. 38Inlingalhquic alhta amyaa apvaa Pedro tingma Lida. Ningatoc alhta maa tingma Jope. Yejemoc alhta apquilapajasacpo apcanit enlhit, yoyam eliltimnasquiclha Pedro.

—Ipecjicsojo etyaningvomjo tingma Jope —alhta apquiltomjac.

39Yejemoc alhta apquilyiplaclho Pedro. Apquilvoclhec alhta tingma. Apquilyantamaclhec alhta acyitnaclha ayitsepma. Inquilvocjingvoclhoc alhta lhintampaa. Inyipcalhquic alhta. Inquillhicmosquic alhta apava ningilantalhnama alanay Dorcas yicpintama ayitsepma. 40Yejemoc alhta apquilanya Pedro colanteypoc quilvanaa. Apquilticlhiquic alhta aptapnaoc Pedro apquilmalhna. Apquilanoc alhta acyitnaclha ayitsepma. Aptomjac alhta apcanya:

—Tabita colhaticja —alhta aptomjac.

Yejemoc alhta alyipteclho ataoc. Invitac alhta Pedro apna. Yejemoc alhta acnaclho netin. 41Yejemoc alhta apma amic apquinimsaclho netin. Natamin apquilevam alhta apquilyalhinga najan lhintampaa. Invitalhquic alhta actomjayclha alhnancoc. 42Inlingalhquic alhta amyaa tingma Jope. Aplhamoclhojo alhta apquiltomjac melyasquiyam Visqui ingac. 43Acvoncaclho alhta apma Pedro tingma Jope. Apnacmec alhta lhama tingma pac Simón aptomja apquilanay asoyimpejic.

Sélection en cours:

LOS HECHOS 9: ENHL

Surbrillance

Copier