LOS HECHOS 8

Saulo apminlhinaycam Jesucristo apmolhama

1Apcavoc alhta Saulo apmatnam Esteban. Yejemoc alhta actomja macminlhinaycam acvanyam. Apquiltovasacpec alhta cristianos Jesucristo apmolhama apnaycam Jerusalén. Apquilhpanec alhta. Apquilyasquic alhta yoclhilhma Judea najan yoclhilhma Samaria. Apquilnaclhec alhta mocjam apóstoles apquilapajasomap. 2Apquilatonquic alhta enlhit apquilpeyvomo Esteban apquitsepma. Avanjec alhta apyipcalhem. 3Yejemoc alhta apnatovasamcaa Saulo Jesucristo apmolhama. Apquilantalhnam alhta mataa tingma. Apquilmec alhta enlhit najan quilvanaa. Apnescacmec alhta mataa singilpilhtetomaclha.#Hch 22.4-5; 26.9-11.

Apquililtimnaycam tasic amyaa yoclhilhma Samaria

4Apquillhinquic alhta Jesucristo apmolhama co Jerusalén. (Apquilhpanec alhta). Apquililtimnasam alhta mataa tasic amyaa apquilyasaclha. 5Apmiyaclhec alhta Felipe tingma apvisay Samaria. Aplhenquic alhta mataa apvisay Cristo. 6Am alhta coyeycajalhca apquiljalhenmo Felipe apquiltimnaycam. Pilapcasquic alhta apquilvita asoc monquinatquiscama apquillanay. 7Apquiltamilquiscacmec alhta aplhamoclhojo enlhit actovascama somquic quilyicjamo. Inquiliclhangvam alhta mataa alantepa somquic quilyicjamo. Apquiltamalvocmec alhta najan enlhit apquilyelcomap najan apquilyateyaycam. 8Avanjec alhta apquilitsovascama tingma Samaria.

9Apnec alhta lhama enlhit maa apvisay Simón. Apyojolhma alhta as enlhit. Apquilyinimcasquic alhta mataa enlhitaoc co Samaria. Apyimtalhnesomacpo apanco mataa. 10Apquiljalhnoc alhta mataa appayvam aplhamoclhojo najan apquitcaoc najan apquilvanyam.

—Apmopvan innac as enlhit ayinyema Dios aptomja Apyimtalhnamo —alhta intomjac amyaa aplhenacpo. Apquiltimec alhta acvisay Acyiviy Apmopvan.

11Apquiljalhnoc alhta mataa. Apcacpec alhta. Acvoncaclhojo alhta apquilyinimcascam aptimem apyojolhma. 12Am alhta elyascacmoc apquiltimnaycam tasic amyaa Felipe. Apquiltimnam alhta actemaclha Dios apquilnancascama najan apvisay Jesucristo. Inyiplovcoc alhta apquilyapascaseycaoc yingmin enlhit najan quilvanaa. 13Am alhta eyascacmoc amyaa Simón. Inyiplovcoc alhta najan macyapasquiscama yingmin. Yejemoc alhta apyipitcaclho Felipe. Pilapcasquic alhta Simón apvita asoc monquinatquiscama alyiviy najan asoc sinpilapquiscama.

14Apquillingangvocmec alhta amyaa apóstoles apquilapajasomap apnaycam tingma Jerusalén. “Dios appayvam inquilmac apquilvalhoc co Samaria” —alhta intomjac amyaa apquilanyacpo. Yejemoc alhta apquilapajasa Pedro najan Juan. 15Lhama alhta apquilvocmo maa. Yejemoc alhta apquilmalhnesquisa, yoyam ellhovac Espíritu Santo. 16Am alhta eyca evayventac mocjam Espíritu Santo tacjaplhit. Acvamlha macyapascaseycaoc yingmin ayinyema apvisay Visqui ingac Jesús. 17Apninquinquic alhta apmeoc apyitsicsaoc Pedro najan Juan as enlhitaoc. Apquillhocac alhta Espíritu Santo.

18Apvitamcoc alhta Simón aptomjaclha apóstoles apquilapajasomap. Lhama alhta apninquina apmeoc apyitsicsaoc, apquillhoca eyca Espíritu Santo. Yejemoc alhta apsantamo solyayem Simón. 19Aptomjac alhta apquilanya Simón:

—Ingyane sat coo lha colhic sicmovan. Acninquinquic sat ancoc emeoc apyitsicsaoc enlhitaoc, yejemoc sat elmoc Espíritu Santo —alhta aptomjac.

20Apcatingmavoc alhta Pedro:

—Ingyitsapojo sat lhama solyayem pac. Apcanayquic lhip emoc Dios apcaycaoc acyanmongam solyayem. 21Copvanquejec lhip jinpasmoc nincoo as asoc. Am copeyvoc aclhanma apvalhoc napato Dios Ingyapam. 22Iyanmonquis apvalhoc lhip. Ilvates aptamjaycam acmasom. Ilmalhna sat Dios Ingyapam, yoyam emascocsic actemaclha alquitamsama apvalhoc. 23Acvitac coo lhip aptomja apmapsom. Appilhquetacpec lhip aptamjaycam acmasom. Lanoc lhip apvalhoc asoc acmasom —alhta aptomjac.

24Apcatingmavoc alhta apyojolhma Simón:

—Jelmalhnesquis sat quellhip Visqui ingac. Nolane nasa jetnejic asoc apquillhena lhac —alhta aptomjac.

25Lhama alhta appenesa apquillingascama Dios appayvam Pedro najan Juan. Apquiltajavoc alhta mocjam tingma Jerusalén. Apquililtimnasquic alhta mataa tasic amyaa aplhamoclhojo tingma nalhit amay yoclhilhma Samaria.

Felipe najan co Etiopía

26Yejemoc alhta apvitacpo lhama ángel apquinyema Visqui ingac. Aptomjac alhta apcanya Felipe:

—Ingva, iyas sat nipiyam. Eyipjongvomoc sat lhip moc amay ayinyema tingma Jerusalén acyascama tingma Gaza.

Amay acyeycajangvoyacmo nac yoclhilhma actamopeycaoc. 27Yejemoc alhta aplhinga Felipe. Aptajanyavoc alhta nalhit amay enlhit co Etiopía. Enlhit apyimtalhnamo alhta. Quilvana avisqui yoclhilhma Etiopía alhta ayasinancama as enlhit najan aptamilquiscama alnatam. Quilvana avisqui alhta acvisay Candace. Lhama alhta apvocmo tingma Jerusalén. Apquilmalhnescasquic alhta Dios Ingyapam. 28Aptajavoc alhta mocjam apcaoclha. Apnec alhta netin calo (talelhcapoc) apquilyipsata vaycajac Isaías profeta Dios aplingascama apnatalhescama. 29Yejemoc alhta aptomjac Espíritu apcanya Felipe:

—Iyipitcangvomjo, iyiplaclha sat as talelhcapoc (calo) —alhta aptomjac.

30Lhama alhta apyipitcangvocmo Felipe. Aplingac alhta apquilyipsatem vaycajac Isaías apnatalhescama. Aptomjac alhta apcanya Felipe:

—¿Apyasamco ya lhquip actomjaclha apquilyipsatem? —alhta aptomjac.

31Apcatingmavoc alhta enlhit:

—¿Jalhco sat otnejic oyasamcojo? Paj selhicmoscama coo —alhta aptomjac.

Yejemoc alhta apcanyacpo Felipe, yoyam elhojoc lhama netin talelhcapoc (calo).

32Eycaso actomja alhta alyipsatomalhca vaycajac:

Innec alhta acyantama malha nipquesic yoyam ematong.

Apvanmaquic alhta malha nipquesic apquitcoc copayjeycam apatong naysicsa macyesescama.

33Apvinacpec alhta. Am alhta etac nintemaclha acpeyvomo.

Melvitacpejec sat aptovana niptamin. Mellhenacpejec sat nipyesicsa enlhit. Ayinyemaclha inmasquec alhta aptiyascam as nalhpop#Is 53.7-8.

—alhta intomjac vaycajac.

34Aptomjac alhta as enlhit apcanya Felipe:

—Jeltimnas siclho. ¿Soc enlhit aplhena nac profeta Dios aplingascama? ¿Aplhenacpe ya apanco, inlhoyqui laa poc? —alhta aptomjac.

35Yejemoc alhta apquiltimnasamcaa Felipe actemaclha appeyvasquiclha vaycajac actalhesomalhco. Apquiltimnasamcaa tasic amyaa actemaclha aplhenamap Jesús. 36Lhama alhta apquilyeycajangvocmo acyitnamaclha yingmin. Yejemoc alhta aptomja apcanya as enlhit:

—Quip ilanojo, yingmin nac jay. ¿Movanqueje ya otingya yapasquiscama yingmin? —alhta aptomjac.

37Apcatingmavoc alhta Felipe:

—Apvanqui inyicje. ¿Am ya eyascacmoc lhip? —alhta aptomjac. Yejemoc alhta apcatingmavo:

—Moyascacmoc coo Jesucristo Dios Apquitca —alhta aptomjac.

38Yejemoc alhta apcanya coytic talelhcapoc (calo). Apquilantalhningvocmec alhta yingmin Felipe najan aplhalhma. Apyapascasquic alhta yingmin Felipe as enlhit. 39Lhama alhta apquilantepa nayingmin. Pilapcasquic alhta apvonquepa Felipe. Espíritu Santo Visqui ingac alhta apyantamac. Am alhta etamcoc apvonquepa. Yejemoc alhta apquimpaclho as enlhit. Payjeclhec alhta apvalhoc. 40Apvitacpec alhta Felipe tingma Azoto. Apquiltimnasam alhta mataa tasic amyaa moclhama tingma apyeycajangvomlha acvocmo apmiyaclhilha tingma Cesarea.

Sélection en cours:

LOS HECHOS 8: ENHL

Surbrillance

Copier