Luk 14

Yesu akumposya mundu jwakulwala

1Lisiku line lyakupumula lya Ayuda, Yesu* ŵajile kukulya ku nyumba ja jumo jwa acakulungwa ŵa Afalisi* nipo Afalisi ni ŵandu ŵane ŵaliji kumlolecesya jwalakwejo. 2Papopo, pasogolo pa Yesu ŵapali mundu juŵalwalaga ndaka. 3Myoyo Yesu ŵawusisye aciŵalimu ŵa Malamusi* ni Afalisi kuti, “Ana Malamusi gakusakunda kumposya mundu pa lisiku lyakupumula,* kapena iyayi?”

4Nambo jemanjajo nganajanga kandu kalikose. Myoyo Yesu ŵamjigele mundu jwakulwalajo ni kumposya ni ŵamsalile kuti ajawuleje. 5Kaneko ŵawusisye soni kuti, “Ana nduni mwa jemanja jwakwete mwanace, kapena ng'ombe ni jikugwila mcisima pa lisiku lyakupumula, ana ngamyicuwula ligongo lyakuti lili lisiku lyakupumula?”#Mat 12:11

6Jemanjajo ŵalepele kwanga ciwusyoci.

Ya kulinondiya ni yakwapocela acalendo

7Yesu piŵaweni kuti ŵandu ŵiŵaŵilanjidwe kukulya nawo ŵala ŵalisagulilaga malo ga ucimbicimbi, jwalakwejo ŵasalile citagu* aci cakuti, 8“Mundu jwine naga akumŵilanga jemanja ku cindimba ca ulombela, mkaja kutama pa malo ga ucimbicimbi, ligongo lyakuti mwine mwakwe ŵamŵilasile soni mundu jwine jwakucimbicika kupunda m'mwejo.#Mis 25:6-7 9Kaneko mundu juŵamŵilasile jemanja ŵana ŵaŵili jula akusayika ni kumsalila m'mwejo kuti, ‘Maloga mwape aŵa.’ Pelepo m'mwejo timtende soni pa ndaŵi jitimtyoceje pelepo kuja kukutama pa malo gangali ucimbicimbi gala. 10Naga amŵilasile, mkatame pa malo gangali ucimbicimbi gala, mpaka mundu jwakuŵilasile jula atende kwika ni kukusalila kuti, ‘Mjangu, yikani mtame pa malo gakucimbicikwaga.’ Yeleyi tiyicimpa ucimbicimbi pameso pa ŵandu wosope, myoyo jemanjajo tacimwona m'mwejo kuti mli ŵakucimbicikwa. 11Jwalijose jwakulikwesya tacimtulusya, nipo jwakulitulusya tacimkwesya.”#Mat 23:12; Luk 18:14

12Kaneko Yesu ŵaŵecete ni Mfalisi* juŵamŵilasile jwalakwejo kuti, “Pandaŵi jimkukolosya cindimba ca yakulya ya ndaŵi ja musi kapena ca ndaŵi ja ligulo, mkasimwaŵilangaga acimjenupe, kapena acalongo acimjenupe, ŵa mwiŵasa mwenupe kapena acanasi ŵenu ŵakusicila. Naga mkutenda yeleyo, nombe nawo jemanjajo tacimŵilanga m'mwejo, kumwucisya yindu yimwatendele m'mwejo. 13Nambo m'mwejo pakukolosya cindimba, mwaŵilanjeje ŵandu ŵakulaga, ŵalemale ni ŵangalola. 14Pelepo nikuti timcikola upile, ligongo lyakuti jemanjajo ŵangali kandu kalikose kakuti amwucisye m'mwejo. Mlungu ni jutacimwucisya m'mwejo, pa ndaŵi jitacijimuka ŵandu ŵakulungama kutyocela ku malembe.”

Citagu ca cindimba cekulungwa

(Mat 22:1-10)

15Mundu jwine juŵalyaga nawo yakulya, piŵapikene yeleyi ŵamsalile Yesu kuti, “Akwete upile mundu jutacilya nawo mu Ucimwene wa Mlungu.”*

16Nambo Yesu ŵamsalile jwalakwejo kuti, “Mundu jwine ŵakolosisye cindimba ca yakulya nipo ŵaŵilasile ŵandu ŵajinji. 17Pijakwanile ndaŵi jakuti ŵandu alye yakulya, jwalakwejo ŵamtumile jwamasengo jwakwe kuti akasalile ŵandu ŵiŵaŵilanjidwe ku cindimba cila kuti, ‘Ayice pakuti yosope yaliji tayale!’ 18Mwa ŵandu wosope ŵiŵaŵilanjidwe ŵala, jumo jumo jwatandite kupeleka magongo gakuti ngayika ku cindimbako. Jwandanda jwatite, ‘Sumile mgunda ni ngwenela kuti njawule ngawulole, pepani ngayika.’ 19Jwine jwatite, ‘Une sumile ng'ombe syakulima likumi ni ngusosa kuti ngasilinje, pepani ngayika.’ 20Jwine jwatite, ‘Une lombele jwamkongwe sampano, myoyo nganipakombola kwika kweleko.’ 21Jwamasengo jula piŵawusile kweleko, ŵasalile ambujegwe ŵala yiyatendecekwe yila. Myoyo msyene nyumba jula ŵapile mtima ni ŵamsalile jwamasengo jula kuti, ‘Mjawule mwacitema m'matala ni m'misewu ja mu msinda ni mkaŵilanje ŵandu ŵakulaga, ŵalemale kapena ŵangalola ni myice nawo akuno.’ 22Jwamasengo jula piŵawusile, jwatite kuti, ‘Ambuje ŵangu, ndesile yimwandamwile yila, nambo malo gaciŵela.’ 23Kaneko mbujegwe jula ŵamsalile jwamasengo jula kuti, ‘Mjawule ku misewo ni m'matala gakusa kwa ndenje, ni mkaŵilanje ŵandu ayice akuno kuti nyumba jangu jigumbale. 24Ngumsalila yakuwona kuti, mwa ŵandu ŵiŵakanile pandanda ŵala pangali ni jumo jose jutapasye yakulya yangu.’ ”

Kuŵa jwakulijiganya jwa Yesu

(Mat 10:37-38)

25Likuga lyejinji lya ŵandu lyaliji mkwenda pamo ni Yesu, kaneko jwalakwejo jwagalawucile jemanjajo ni kwasalila kuti, 26“Naga jwalijose akusaka kuŵa jwakulijiganya jwangu, akwenela kunonyela une kwapunda babagwe ni mamagwe, ŵamkwakwe ni ŵanace ŵakwe, acakulugwe ni acalumbugwe, soni kuwupunda atamose umi wakwe.#Mat 10:37 27Jwalijose jwangakutwicila msalaba wakwe ni kunguya une, ngaŵa mkukomboleka kuŵa jwakulijiganya jwangu.”#Mat 10:38; 16:24; Mak 8:34; Luk 9:23

28“Naga jumo jwa jemanja akusaka kutaŵa sanja, ana ngatama kaje pasi ni kuŵalanjila mbiya sitisisosekwe kuti jwalakwejo apakombole kulola naga akwete mbiya syakwanila kumalicisya nyumbajo? 29Naga ngatenda myoyo, mwine tacitanda kutaŵa sanjajo ni kujilepela kumalisya. Myoyo ŵandu ŵakujiwona nyumbajo tacitanda kumseka mwa cipongwe. 30Jemanjajo tacitiji kuti, ‘Munduju jwatandite kutaŵa nyumba nambo ajilepele kumalisya.’ ”

31“Ana mwenye mpaka atende cici naga akwete asilikali 10,000 pa ndaŵi jakwawula kukumenyana ni mwenye jwine jwakwete asilikali 20,000? Mkanajawule kukuputa ngondo, ana ngatama kaje pasi ni kuganisya cenene naga tapakombole kumenyana ni mwenye jwinejo pakukamulisya masengo ciŵalanjilo ca asilikali cakweteco? 32Naga akuyiwona kuti ngaja kupakombola kumenyana nawo, jwalakwejo tagambe kutumisya ŵa mitenga kuja kumŵenda ya mtendele mwenye jwine jula ali ciŵela kwakutalicila. 33Myoyo soni jwalijose jwa jemanja jwangakuleka yosope yakwete ngakomboleka kuŵa jwakulijiganya jwangu.”

Njete jesuluce

(Mat 5:13; Mak 9:50)

34“Njete jili jambone, nambo naga jisulwice, ana mpaka jinonye soni uli? 35Ngajikola soni masengo atamose mu mgunda kapena pacitutu kuti jiŵe cakulya ca mbeju, m'malo mwakwe akusagamba kujijasa. Jwele jwakwete mapikanilo apikane gele maloŵega!”

Sélection en cours:

Luk 14: YAWO

Surbrillance

Copier