လု 13

လွင်ႈဢၼ်ပိၼ်ႇၸႂ်ၸူးၽြႃးပဵၼ်ၸဝ်ႈ

1ၼႂ်းၶိင်ႇမိူဝ်ႈၼၼ်ႉ၊ၵူၼ်းၵမ်ႈၽွင်ႈဢၼ်မီးယူႇတီႈၼၼ်ႈမွၵ်ႇလၢတ်ႈတီႈၸဝ်ႈယေႇသု၊လွင်ႈဢၼ်ၶုၼ်ပိလတ်ႉ၊ဢဝ်လိူတ်ႈၵူၼ်းၵႃႇလိလႄး၊ၵမ်ႈၽွင်ႈလေႃးၵၼ်တင်းတူဝ်ယဵၸ်ႈပရေႃးႁဵၵ်ႈဢၼ်ၶဝ်သၢၵ်ႈလူႇၼၼ်ႉဢေႃႈ။- 2ၸဝ်ႈယေႇသု၊ၶိုၼ်းလၢတ်ႈတီႈၶဝ်လႄႈဝႃႈ၊ “ၵွပ်ႈပိူဝ်ႈၵူၼ်းမဵဝ်းၵႃႇလိလႄး၊ၸိူဝ်းၼၼ်ႉလႆႈၶၢမ်ႇတၢႆၸိူဝ်ႉၼင်ႇၼၼ်လႄႈသူထၢင်ႇၶဝ်ယဵင်ႈၶႅၼ်းမီးဝူတ်ႈဢပျတ်ႈယႂ်ႇၼႃႇသေၵူၼ်းမဵဝ်းၵႃႇလိလႄး၊တၢင်ႇၵေႃႉၸိူဝ်းၼၼ်ႉ၊ဝႃႈၼႆႁိုဝ်း။- 3ၵဝ်ဝႃႈတီႈသူၸမ်ႉ၊ဢမ်ႇၸႂ်ႈၸိူဝ်ႉၼင်ႇၼၼ်ၵူၺ်း။ ပေႃးသူယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူၸိုင်၊သူတၵ်းလႆႈလုသုမ်းမိူၼ်မိူၼ်ၵၼ်ဢေႃႈ။- 4လိူဝ်သေၼၼ်ႉ ၵူၼ်းသိပ်းပႅတ်ႇၵေႃႉဢၼ်သဝ်လၢင်းသီးလွမ်ႇ၊လူမ်ႉတဵင်တၢႆၸိူဝ်းၼၼ်ႉ၊သူထၢင်ႇၶဝ်ယဵင်ႈၶႅၼ်းမီးဝူတ်ႈဢပျတ်ႈယႂ်ႇၼႃႇသေၵူၼ်းဢၼ်ယူႇၼႂ်းဝဵင်းယေႇရုသလႅမ်ႇ၊ၵႃႈမီးတင်းလၢႆဝႃႈၼႆႁိုဝ်း။- 5ၵဝ်ဝႃႈတီႈသူၸမ်ႉ၊ဢမ်ႇၸႂ်ႈၸိူဝ်ႉၼင်ႇၼၼ်ၵူၺ်း။ ပေႃးသူယင်းဢမ်ႇၶုၵ်းၸႂ်လႆႈမႆႈၸႂ်ဢပျတ်ႈလႄႈပိၼ်ႇၸႂ်သူၸိုင်၊သူတၵ်းလုသုမ်းမိူၼ်မိူၼ်ၵၼ်ဢေႃႈ၊” ဝႃႈၼင်ႇၼႆဢေႃႈ။

တူၼ်ႈမၢၵ်ႇလိူဝ်ႇဢၼ်ဢမ်ႇၸၢင်ႈမၢၵ်ႇ

6လိုၼ်းၼၼ်ႉ၊ၸဝ်ႈယေႇသု၊ဢဝ်တင်းၵႂၢမ်းဢုပမႃႇလႄႈလၢတ်ႈဝႃႈ၊ “မီးၵူၼ်းၵေႃႉၼိုင်ႈမၼ်းၽုၵ်ႇဝႆႉတူၼ်ႈမၢၵ်ႇလိူဝ်ႇၵႃႈၼႂ်းသူၼ်မၼ်းဢေႃႈ။ မၼ်းၵႂႃႇၸူးတီႈတူၼ်ႈမၢၵ်ႇလိူဝ်ႇၼၼ်ႉလႄႈ ႁႃတူၺ်းမၢၵ်ႇမၼ်းသေၵေႃႈဢမ်ႇႁၼ်သေႁူၺ်ႇ။- 7မၼ်းၸင်ႇၵႂႃႇလၢတ်ႈတီႈၵူၼ်းႁဵတ်းသူၼ်ၼၼ်ႉလႄႈဝႃႈ၊ ‘တူၺ်းလူး။ ၵဝ်မႃးႁႃတူၺ်းမၢၵ်ႇမၼ်းၵႃႈတီႈတူၼ်ႈမၢၵ်ႇလိူဝ်ႇၼႆႉထူၼ်ႈထိုင်သၢမ်ပီယဝ်ႉ။ ၵူၺ်းၵႃႈ၊ဢမ်ႇႁၼ်သေႁူၺ်ႇ။ ပွမ်ႈပႅတ်ႈတႃႉ။ ႁဵတ်းသင်လႄႈ ႁႂ်ႈမၼ်းႁူၵ်ႉလိၼ်ၼႆႉယူႇၸိူဝ်ႉၼင်ႇၼႆၼင်ႇႁိုဝ်၊’ ဝႃႈၼႆ၊မိူဝ်ႈဢၼ်လၢတ်ႈၸိူဝ်ႉၼင်ႇၼႆၸိုင်၊- 8ၵူၼ်းႁဵတ်းသူၼ်ၵေႃႈလၢတ်ႈလႄႈဝႃႈ၊ ‘ယိူၼ်ႉထႅင်ႈပီၼိုင်ႈသေၵမ်းၶႃႈၸဝ်ႈ။ ၵဝ်ၶႃႈတေၶုတ်းယူင်းငဝ်ႈမၼ်းလႄႈသႂ်ႇၽုၼ်ႇလူးၵွၼ်ႇၶႃႈဢေႃႈ။- 9သင်ဝႃႈပီၼႃႈမၼ်းဢွၵ်ႇမၢၵ်ႇမႃးၸိုင်၊လီယဝ်ႉၶႃႈဢေႃႈ။ ပေႃးမၼ်းယင်းဢမ်ႇဢွၵ်ႇမႃးၸိုင်၊ၸင်ႇၵွႆႈပွမ်ႈပႅတ်ႈသေၵမ်းၶႃႈ၊’ ဝႃႈၼႆမၼ်းၶိုၼ်းလၢတ်ႈဢေႃႈ၊” ဝႃႈၼင်ႇၼႆဢေႃႈ။

မႄႈယိင်းလင်ၵွင်ႇယဵတ်ႇတူဝ်လႆႈမႃး

10ၵမ်းၼၼ်ႉ၊ၸဝ်ႈယေႇသု၊သင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးလင်ၼိုင်ႈၼႂ်းဝၼ်းၵမ်သိၼ်ယူႇဢေႃႈ။- 11တီႈၼၼ်ႈမီးမႄႈယိင်းၵေႃႉၼိုင်ႈၽီၶဝ်ႈမၼ်းသိပ်းပႅတ်ႇပီလႄႈၸပ်းတၢင်းပဵၼ်ဢၼ်လင်ၵွင်ႇယူႇ၊ဢမ်ႇယဵတ်ႇတူဝ်မၼ်းလႆႈသေဢိတ်းၼၼ်ႉဢေႃႈ။- 12မိူဝ်ႈဢၼ်ၸဝ်ႈယေႇသု၊ႁၼ်မႄႈယိင်းၼၼ်ႉၸိုင်၊မၼ်းၸဝ်ႈႁွင်ႉမၼ်းမႃးလႄႈ လၢတ်ႈတီႈမၼ်းၼၼ်ႉလႄႈဝႃႈ၊ “မႄႈယိင်း႟။ မႂ်းၵၢင်းလွတ်ႈသေတၢင်းၶႆႈတၢင်းပဵၼ်ယဝ်ႉ၊” ဝႃႈၼႆသေယဝ်ႉ၊- 13ယိုၼ်းမိုဝ်းမၼ်းၸဝ်ႈတၢင်ႇၼိူဝ်မႄႈယိင်းၼၼ်ႉလႄႈ ၼႂ်းၶိင်ႇၼၼ်ႉၵမ်းလဵဝ်မႄႈယိင်းၼၼ်ႉယဵတ်ႇတူဝ်မၼ်းလႆႈသေလႄႈယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။

14မိူဝ်ႈဢၼ်ၸဝ်ႈယေႇသု၊ႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆၼႂ်းဝၼ်းၵမ်သိၼ်လႄႈၵူၼ်းဢွၼ်ႁူဝ်ၸရွပ်ႈႁေႃးတြႃးၶႂ်ႈၸႃႉၼႃႇသေယဝ်ႉ၊လၢတ်ႈတီႈမူႇၵူၼ်းၸိူဝ်းၼၼ်ႉလႄႈဝႃႈ၊ “ပုၼ်ႈတႃႇၵူၼ်းတေႁဵတ်းၵၢၼ်ၸိုင်၊မီးႁူၵ်းဝၼ်းဢေႃႈ။ မႃးၶၢမ်ႇဢဝ်တၢင်းဢၼ်ႁႂ်ႈတၢင်းၶႆႈတၢင်းပဵၼ်ၸိုၼ်ႈႁၢႆၼႂ်းဝၼ်းၸိူဝ်းၼၼ်ႉတႃႉ။ ၼႂ်းဝၼ်းၵမ်သိၼ်ၼႆႉယႃႇပေမႃးၶၢမ်ႇဢဝ်လႃးလႃး၊” ဝႃႈၼင်ႇၼႆဢေႃႈ။

15ၸဝ်ႈၽြႃးၶိုၼ်းလၢတ်ႈတီႈၵႄႇၸရွပ်ႈႁေႃးတြႃးၼၼ်ႉလႄႈဝႃႈ၊ “ၵူၼ်းၼႃႈသိုဝ်ႈၸႂ်ၵူတ်ႉၼႆႉ႟။ ၼႂ်းဝၼ်းၵမ်သိၼ်သူၸၢင်ႈပွႆႇဝူဝ်းပွႆႇမႃႉလီႈလႂ်ဢွၵ်ႇၶွၵ်ႈလႄႈဢွႆႇၼမ်ႉပၼ်ယူႇဢမ်ႇၸႂ်ႈႁိုဝ်း။- 16မိူဝ်ႈလဵဝ်ၵေႃႉဢၼ်ပဵၼ်လုၵ်ႈယိင်းဢႃႇပြႃႇႁၢမ်ႇ၊လႆႈၶၢမ်ႇတၢင်းဢၼ်မႃႇၼၢတ်ႈ၊မတ်ႉဝႆႉသိပ်းပႅတ်ႇပီၼႆႉ၊ၸွင်ႇမၼ်းဢမ်ႇထိူၵ်ႈၶၢမ်ႇဢၼ်ပွႆႇလွတ်ႈပၼ်ၼႂ်းဝၼ်းၵမ်သိၼ်ၼႆႉႁိုဝ်း၊” ဝႃႈၼင်ႇၼႆဢေႃႈ။- 17ၶေႃႈၵႂၢမ်းဢၼ်မၼ်းၸဝ်ႈၶိုၼ်းတွပ်ႇၼၼ်ႉႁဵတ်းႁႂ်ႈၵူၼ်းဢၼ်ၶတ်းၵၼ်တင်းမၼ်းၸဝ်ႈတင်းလၢႆ လႆႈဢူၵ်းလႆႈဢၢႆဢေႃႈ။ ၵူၼ်းတင်းသဵင်ႈတင်းလူင်ၸမ်ႉ၊လႆႈသိူဝ်းၸူမ်းမူၼ်ႈပျေႃႇၼႂ်းလွင်ႈတၢင်းဢၼ်လီဢၢမ်း ဢၼ်မၼ်းၸဝ်ႈႁဵတ်းၼမ်ၼႃႇၼၼ်ႉဢေႃႈ။

ၵႂၢမ်းဢုပမႃႇလွင်ႈၽၼ်းၽၵ်းၵၢတ်ႇ

(တူၺ်း၊ မတ်ႈ 13:31-32။ မႃႇ 4:30-32)

18ပိူဝ်ႈၼႆလႄႈၸဝ်ႈယေႇသု၊သမ်ႉလၢတ်ႈထႅင်ႈၸမ်ႉ၊ “မိူင်းၽြႃးပဵၼ်ၸဝ်ႈမိူၼ်ၵႃႈသင်။ ၵဝ်တၵ်းလႆႈဢဝ်ၵႃႈသင်လႄႈတႅၵ်ႈတိူင်းမိူင်းၸဝ်ႈၼၼ်ႉ။- 19မိူင်းၸဝ်ႈၼၼ်ႉ၊မိူၼ်ၸိူဝ်ႉၼင်ႇၽၼ်းၽၵ်းၵၢတ်ႇမဵတ်ႉၼိုင်ႈဢၼ်ၵူၼ်းၵေႃႉၼိုင်ႈဝၢၼ်ႇၼႂ်းသူၼ်မၼ်းၼၼ်ႉဢေႃႈ။ တူၼ်ႈၼုမ်ႇမၼ်းယႂ်ႇမႃးလႄႈပဵၼ်တူၼ်ႈပဵၼ်လမ်းမႃးသေယဝ်ႉ၊ၼူၵ်ႉတင်းလၢႆမႃးလိုဝ်ႈမႃးသဝ်းယူႇၼိူဝ်ၵိင်ႇမၼ်းၶႃႈမၼ်းဢေႃႈ၊” ဝႃႈၼင်ႇၼႆဢေႃႈ။

ၵႂၢမ်းဢုပမႃႇလွင်ႈၸိူဝ်ႉပႅင်ႈ

(တူၺ်း၊ မတ်ႈ 13:33)

20 ၸဝ်ႈယေႇသု၊သမ်ႉၶိုၼ်းလၢတ်ႈထႅင်ႈၸမ်ႉ၊ “ၵဝ်တၵ်းလႆႈဢဝ်ၵႃႈသင်လႄႈတႅၵ်ႈၼိူင်းလူၺ်ႈၵၼ်တင်းမိူင်းၽြႃးပဵၼ်ၸဝ်ႈ။- 21မိူင်းၸဝ်ႈၼၼ်ႉ မိူၼ်ၸိူဝ်ႉၼင်ႇၸိူဝ်ႉပႅင်ႈဢၼ်မႄႈယိင်းၵေႃႉၼိုင်ႈဢဝ်သႂ်ႇလႄႈၼူတ်ႈၵႃႈၼႂ်းၽွင်ၶဝ်ႈမုၼ်းသၢမ်ၵွၵ်းပေႇတေႃႇထိုင်ႁွတ်ႈႁႂ်ႈၸိူဝ်ႉပႅင်ႈတင်းသဵင်ႈတင်းလူင်ၼၼ်ႉပွင်းၶိုၼ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။

တၢင်းဢၼ်သွၼ်ပၼ်လွင်ႈၽၵ်းတူၵႅပ်ႈ

(တူၺ်း၊ မတ်ႈ 7:13-14၊21-23)

22 ၸဝ်ႈယေႇသု၊ၵႂႃႇလႄႈသင်ႇသွၼ်ပၼ်ဝဵင်းၼိုင်ႈယဝ်ႉဝဵင်းၼိုင်ႈ၊ဝၢၼ်ႈၼိုင်ႈယဝ်ႉဝၢၼ်ႈၼိုင်ႈ၊ၸွမ်းတၢင်းၵႂႃႇၸူးဝဵင်းယေႇရုသလႅမ်ႇ၊ယူႇဢေႃႈ။- 23ၵူၼ်းၵေႃႉၼိုင်ႈလဝ်ႈထၢမ်တီႈမၼ်းၸဝ်ႈလႄႈဝႃႈ၊ “ၸဝ်ႈႁဝ်း။ ၶဝ်ၸိူဝ်းဢၼ်လႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉတေမီးၵေႇၼႃႇၶႃႈယူဝ်း၊” ဝႃႈၼင်ႇၼႆဢေႃႈ။

24မၼ်းၸဝ်ႈၶိုၼ်းလၢတ်ႈလႄႈဝႃႈ၊ “ၶတ်းၸႂ်ၵျူဝ်းၸႃးၶဝ်ႈၵႃႈတီႈၽၵ်းတူၵႅပ်ႈတႃႉ။ ၵဝ်ဝႃႈတီႈသူၸမ်ႉ၊ၵူၼ်းၼမ်ၼႃႇၶတ်းၸႂ်ၵျူဝ်းၸႃးႁႂ်ႈလႆႈၶဝ်ႈသေၵေႃႈၶဝ်ဢမ်ႇၸၢင်ႈၶဝ်ႈလႆႈ။- 25မိူဝ်ႈဢၼ်ၸဝ်ႈႁိူၼ်းလုၵ်ႉလႄႈဢိုတ်းၽၵ်းတူယဝ်ႉၼၼ်ႉ၊သူသမ်ႉလႆႈၸုၵ်းယူႇၵႃႈၼွၵ်ႈႁိူၼ်းသေယဝ်ႉ၊တွႆႇၽၵ်းတူလႄႈလၢတ်ႈဝႃႈ၊ ‘ၸဝ်ႈႁဝ်းတီႈၶႃႈ။ ၽုၺ်ႇၽၵ်းတူပၼ်ႁဝ်းၶႃႈသေၵမ်းၶႃႈ၊’ ဝႃႈၼႆသေၵေႃႈမၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊ ‘သူလုၵ်ႉၵႃႈတီႈလႂ်မႃးၵဝ်ဢမ်ႇႁု၊’ ဝႃႈၼင်ႇၼႆဢေႃႈ။- 26သူတေၶိုၼ်းလၢတ်ႈလႄႈဝႃႈ၊ ‘ႁဝ်းၶႃႈလႆႈၵိၼ်လူၺ်ႈၵၼ်တင်းၸဝ်ႈႁဝ်းယဝ်ႉၶႃႈဢေႃႈ။ ၸဝ်ႈႁဝ်းယင်းသင်ႇသွၼ်ပၼ်ၵႃႈတီႈၼႂ်းဝဵင်းႁဝ်းၶႃႈယဝ်ႉဢေႃႈ၊’ ဝႃႈၼႆသေၵေႃႈ၊- 27မၼ်းၼၼ်ႉသမ်ႉတေၶိုၼ်းလၢတ်ႈလႄႈဝႃႈ၊ ‘သူလုၵ်ႉၵႃႈတီႈလႂ်မႃးၵဝ်ဢမ်ႇႁု။ သူၸိူဝ်းဢၼ်ႁဵတ်းဢၼ်ႁၢႆႉမိူၵ်ႈတင်းလၢႆၶဝ်႟။ ဝႄႈဢွၵ်ႇသေၵႃႈတီႈၵဝ်ၼႆႉၵႂႃႇတႃႉ၊’ ဝႃႈၼင်ႇၼႆဢေႃႈ။- 28ၼႂ်းမိူဝ်ႈဢၼ်သူလႆႈၶၢမ်ႇတၢင်းဢၼ်ႁေႃႈဢွၵ်ႇသေလႄႈ မီးယူႇၵႃႈၼွၵ်ႈမိူင်းၽြႃးပဵၼ်ၸဝ်ႈသေယဝ်ႉ၊မုင်ႈႁၼ်ဢႃႇပြႃႇႁၢမ်ႇ၊ဢိၸၢၵ်ႈ၊ယႃႇၵုပ်ႈ၊ဢိၵ်ႇတင်းပရေႃးၽႅတ်ႈ#13:28 “ပရေႃးၽႅတ်ႈ” - ၽူႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈလွင်ႈတၢင်းဢၼ်တၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈတင်းလၢႆၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉၸိုင်၊တၵ်းပဵၼ်တၢင်းဢၼ်လီၶေႃးၶူမ်လႄႈလႆႈႁွင်ႉႁႆႈၵတ်းၶဵဝ်ႈၵတ်းၽၼ်းၼၼ်ႉဢေႃႈ။- 29မိူဝ်ႈၼၼ်ႉ၊ၵူၼ်းတင်းလၢႆလုၵ်ႉသေၵႃႈတီႈတၢင်းဝၼ်းဢွၵ်ႇ၊တၢင်းဝၼ်းတူၵ်း၊တၢင်းႁွင်ႇ၊တၢင်းၸၢၼ်း၊တၵ်းမႃးလႄႈၼင်ႈၵိၼ်ၵႃႈတီႈၽိူၼ်ၶဝ်ႈ၊ၼႂ်းပွႆးမိူင်းၽြႃးပဵၼ်ၸဝ်ႈပုၼ်ႉဢေႃႈ။- 30တူၺ်းလူး၊ၵူၼ်းၸိူဝ်းဢၼ်မႃးတူၵ်းလိုၼ်းတေႃႈလဵဝ်ၼႆႉတၵ်းတူၵ်းဢွၼ်တၢင်းၵေႃႈမီးလႄႈၵူၼ်းၸိူဝ်းဢၼ်မႃးတူၵ်းဢွၼ်တၢင်းတေႃႈလဵဝ်ၼႆႉတၵ်းတူၵ်းလိုၼ်းၵေႃႈမီးဢေႃႈ၊” ဝႃႈၼင်ႇၼႆဢေႃႈ။

ၸဝ်ႈယေႇသုႁၵ်ႉဝဵင်းယေႇရုသလႅမ်ႇ

(တူၺ်း၊ မတ်ႈ 23:37-39)

31ၶိင်ႇလဵဝ်ၵၼ်ၼၼ်ႉ ၵူၼ်းၵိူင်းၽႃႇရိသႄး၊ၶဝ်ၵမ်ႈၽွင်ႈမႃးၸူးၸဝ်ႈယေႇသု၊သေယဝ်ႉ၊လဝ်ႈလၢတ်ႈလႄႈဝႃႈ၊ “ၸဝ်ႈႁဝ်းဝႄႈသေၵႃႈတီႈၼႆႈဢွၵ်ႇၵႂႃႇတၢင်ႇတီႈတႃႉ။ ၸဝ်ႈၽႃႉႁေႇရူတ်ႈ၊ၵျၢမ်ႇႁႃဢဝ်ၸဝ်ႈႁဝ်းတၢႆဢေႃႈ၊” ဝႃႈၼင်ႇၼႆဢေႃႈ။

32မၼ်းၸဝ်ႈၶိုၼ်းလၢတ်ႈတီႈၶဝ်လႄႈဝႃႈ၊ “သူၵႂႃႇလႄႈမွၵ်ႇလၢတ်ႈၵေႃႉဢၼ်ၸၢင်ႈယႃႉမိူၼ်မႃၼႆးၼၼ်ႉလူး။ ‘ၵဝ်ႁေႃႈၽီႁၢႆႉတင်းလၢႆဢွၵ်ႇပႅတ်ႈယူႇ၊ႁဵတ်းႁႂ်ႈယေႃးၵႃႇၸိုၼ်ႈႁၢႆယူႇၼႂ်းဝၼ်းမိူဝ်ႈၼႆႉတင်းဝၼ်းမိူဝ်ႈၽုၵ်ႈဢေႃႈ။ မိူဝ်ႈဢၼ်ထူၼ်ႈထိုင်သၢမ်ဝၼ်းၸိုင်၊ၵၢၼ်ငၢၼ်းၵဝ်တၵ်းယဝ်ႉတူဝ်ႈယဝ်ႉ။- 33ၼႂ်းဝႃႈၼၼ်သေၵေႃႈၵဝ်တၵ်းလႆႈသိုပ်ႇၵႂႃႇၶၢဝ်းတၢင်းၵဝ်ၼႂ်းဝၼ်းမိူဝ်ႈၼႆႉမိူဝ်ႈၽုၵ်ႈတင်းမိူဝ်ႈႁိုဝ်းလူးၵွၼ်ႇဢေႃႈ။ လွင်ႈမၼ်းၸမ်ႉ၊ၼွၵ်ႈသေၼႂ်းဝဵင်းယေႇရုသလႅမ်ႇ၊လႄႈပရေႃးၽႅတ်ႈတင်းလၢႆတၵ်းဢမ်ႇလႆႈသုမ်းဢသၢၵ်ႈတၢင်ႇတီႈတၢင်ႇလႅၼ်သေၵေႃႉသေၵူၼ်း၊’ ဝႃႈၼႆတႃႉ။

34“ဢူဝ်းဝဵင်းယေႇရုသလႅမ်ႇ၊ဝဵင်းယေႇရုသလႅမ်ႇ၊႟။ မႂ်းဢဝ်တၢႆပရေႃးၽႅတ်ႈတင်းလၢႆ၊ဢိၵ်ႇတင်းဢဝ်မၢၵ်ႇႁိၼ်ထိမ်ႈၶဝ်ၸိူဝ်းဢၼ်ပွႆႇၸႂ်ႉမႃးတီႈမႂ်းတင်းလၢႆၼၼ်ႉယဝ်ႉ။ မိူၼ်ၸိူဝ်ႉၼင်ႇဢၼ်ၵႆႇမႄႈဢဝ်လုၵ်ႈမႃးငွမ်းဝႆႉတႂ်ႈပိၵ်ႇမၼ်းၼၼ်ႉၵဝ်ၶႂ်ႈဢဝ်မိုဝ်းၵဝ်ၵွတ်ႇဢုမ်ႈဢဝ်မႂ်းဝႆႉလၢႆၽဝ်ႇလၢႆပွၵ်ႈယဝ်ႉသေၵေႃႈမႂ်းဢမ်ႇပၼ်ဢၶႂၢင်ႉတီႈၵဝ်။- 35တူၺ်းလူး။ ၽြႃးပဵၼ်ၸဝ်ႈႁဵတ်းႁႂ်ႈၵျွင်းပိၵ်ႈမၢၼ်ႇသူဝႆႉႁၢမ်းပႅတ်ႈယဝ်ႉ။ ၵဝ်ဝႃႈတီႈသူၸမ်ႉ၊သူတၵ်းဢမ်ႇလႆႈႁၼ်ၼႃႈၵဝ်ထႅင်ႈတေႃႇထိုင်ႁွတ်ႈဝၼ်းဢၼ်သူလၢတ်ႈလႄႈဝႃႈ၊ ‘ထႃႇဝရႃႉၽြႃးပဵၼ်ၸဝ်ႈပၼ်တၢင်းလီမၢင်ႇၵလႃႇၵႃႈတီႈၸဝ်ႈဢၼ်ၵျွမႃးၼႂ်းၸိုဝ်ႈသဵင်မၼ်းၸဝ်ႈၼၼ်ႉတီႈၶႃႈဢေႃႈ၊’ ဝႃႈၼင်ႇၼႆၼၼ်ႉႁွတ်ႈမႃးၼၼ်ႉဢေႃႈ၊” ဝႃႈၼင်ႇၼႆဢေႃႈ။

Sélection en cours:

လု 13: SHNCL

Surbrillance

Copier